SURA PAULUS
D̄I RU'U B̄A
FILEMON
Salam
1-3
1
Cinaku Filemon, soba ro lenga ma sama-sama karawi lab̄o nami! Nahu, la Paulus, dou ra bui b̄ara Isa Al Masih, nahu lab̄o la Timotius cina ndaita, matunti sura ake d̄i ru'u b̄a nggomi 2 ro d̄i ru'u b̄a ela Ruma ma kab̄oro weki d̄i uma nggomi; ro d̄i ru'u b̄a amancawa ndaita la Apfia ro lenga ma sama-sama karawi lab̄o ndaita la Arkhipus.3 D̄i pamao b̄a nami, raho-raho to'i mpa Allah Ta'ala, Ama ndaita ro Ruma Isa Al Masih mbeina bareka ro taho ro ntai d̄i ru'u b̄a nggomi.
Renta syuku
4-7
4 D̄i ade saniki do'aku, nahu peheku ngara nggomi ro rentaku syuku d̄i Allah Ta'ala. 5 B̄ara ringa b̄a nahu b̄a one nggomi poda-poda imbimu d̄i Ruma Isa ro meci ro ca'umu d̄i sara'a ela Allah Ta'ala. 6 Nahu do'aku raho-raho to'i mpa hubungan ndai kai sasama dou ma imbi ^dimakandad̄ina ndai loa ka'ao ma ncewi na'e mab̄oha bareka ma wara d̄i ndai b̄ara sa^buata lab̄o Al Masih. 7 Filemon, meci ro ca'umu d̄i sara'a ela Allah Ta'ala, makasana ro makatenggona ade nahu! Sara'a ela Allah Ta'ala wa'ura sana adena b̄ara nggomi.
Mab̄oha la Onesimus
8-22
8 B̄ara ndedena, kai sab̄ua dou ma sama-sama imbi, nahu kaloa mpa kau nggomi Filemon karawi au d̄i pab̄ua karawi b̄a nggomi. 9 Pala b̄ara nahu mameci ro ca'u nggomi, nahu karaho mpa. Nahu ake dou ma wa'ura tuaa ro ake wunga ade uma bui b̄ara Isa Al Masih. 10 Nahu, la Paulus, maraho sab̄ua mpa d̄i nggomi mab̄oha la Onesimus, ana nahu ade Al Masih. B̄a one d̄i ade uma bui ake nahu wa'ura ndad̄i ama rohanina. 11 Ntoina sia wati wara onena d̄i ru'u b̄a nggomi, pala ake sia wara onena, laina d̄i ru'u b̄a nggomi mpoa, pala d̄i ru'u b̄a nahu rau.
12 Sia ra meci b̄a nahu ede wa'ura kau b̄a nahu lao raka nggomi. 13 Sapodakaina nahu kane'e tapa sia loakud̄u sia sama-sama lab̄o nahu ta ake ^dimacepena nggomi, loakud̄u sia bantuna nahu, santoi nahu waraku d̄i ade uma bui ake b̄ara ngoa ro kahabaku Injil. 14 Pala nahu wati ne'eku karawi au-au nggara watipusi satuju b̄a nggomi. Nahu kancewi ca'u wali nggara nggomi karawimu kai nira ademu; nahu wati ne'eku kau pakasa nggomi.
15 Kombisi la Onesimus ngalakaina lab̄o nggomi d̄i ru'u samporo wakatu mpa loakud̄u nggomi maloaku raka mbali sia d̄i ru'u santoi-ntoina. 16 Ake sia laina ada d̄i ru'u b̄a nggomi mpoa, sia nawa'ura ncewi ntau co'i d̄i ru'u b̄a nggomi. Sia eded̄u sasama ela Al Masih ra meci b̄a nahu. Sia nawancuku wara onena d̄i ru'u b̄a nahu, au walipu d̄i ru'u b̄a nggomi! Tantu sia wara one podana nataho kai ada ro kai cina d̄i ade Ruma!
17 Nggara nggomi mawi'ikaisi nahu lengamu ma sama imbi d̄i Al Masih, weha ao katahopu la Onesimus sama b̄une tarimamu nahu. 18 Nggara sia nawarasi ncara atao nconggona d̄i nggomi, co'opu nahu d̄imacola sara'ana ede. 19 Taho, ndai nahu ^dimatuntina ta ake: Nahu, la Paulus, d̄imacola kanggori sara'ana. Tantu nahu wati paraluna ngoa ro kawaraku b̄a one ndai nggomi wara nconggomu d̄i nahu, eded̄u mori ro wokomu ma b̄ou kai ela Al Masih. 20 B̄ara ndedena, kai ngara Ruma bantu to'ipu nahu, kasanapu ade nahu mandad̄i cinamu ade Al Masih.
21 Nahu tuntiku sura ake b̄ara imbi podaku b̄a one nggomi ^dimakalampana au ra raho b̄a nahu. Nahu kab̄adenggomi ^dimakarawina ese mai b̄a ede. 22 Ari mai b̄a ede, sadia wea to'ipu ^bili d̄i ru'u b̄a nahu d̄i umamu, b̄ara pamao b̄a nahu Allah Ta'ala ringa ro kade'ena do'a nggomid̄oho sara'ana ro wa'a mbalina nahu d̄i nggomid̄oho.
Salam cumpukaina
23-25
23 La Epafras, ma wara sama-sama lab̄o nahu d̄i ade uma bui b̄ara Isa Al Masih, nggaduna salam d̄i ru'u b̄a nggomi. 24 La Markus, Aristarkhus, Demas ro la Lukas lenga ma sama-sama karawi lab̄o nahu nggadu rauna salam d̄i ru'u b̄a nggomi.
25 Raho-raho to'i mpa Ruma Isa Al Masih, barekana nggomid̄oho.
Salam do'a nami, Paulus