SURA PAULUS MA KA^DUAKAINA
D̄I RU'U B̄A
TIMOTIUS
Salam
1:1-2
1
Sura ake ratunti b̄a nahu, la Paulus, eded̄u rasul Isa Al Masih. Nahu nda^diku rasul eded̄u ra kane'ekai b̄a Allah Ta'ala, loakud̄u nahu loa ngoa ro kahaba mab̄oha mori ma sapodakaina ro ma ede ro hi^di. B̄a one Allah Ta'ala wa'ura sakena b̄a one Sia d̄imambei mori b̄une ede d̄i sanikina dou ma imbi ro ma rapu lab̄o Isa Al Masih. 2 Timotius, nggomi b̄une ana meci ndai nahu. Nahu mado'a, raho-raho to'i mpa Allah Ta'ala eded̄u Ama ndaita ma wara d̄i saroga lab̄o Isa Al Masih, Ruma ndaita katadana ncera ro mbura ro rahmat-Na d̄i nggomi. Raho-raho to'i mpa Allah Ta'ala barekana nggomi ndad̄ina nggomi mori taho-taho ro sana.Renta Syuku Ro Ngoa Ro Tei D̄i Ru'u B̄a La Timotius
1:3-18
3 Nahu marenta syuku d̄i Allah Ta'ala ra karawi wea b̄a nahu kai ade mpidaku ma raso. Nahu karawiku d̄i ru'u b̄a Sia sama b̄une ra karawi b̄a wa'i ro waroku ntoina. Sanikina nahu do'aku, nataho aimarai ro aimanga^di, nahu wati nefaku pehe ngara nggomi. 4 Nahu mbuipu kawaraku wakatu nggomi ncoki ademu. B̄ara ndedena nahu nawancuku ne'e poda eda angi lab̄o nggomi loakud̄u d̄i wakatu ede nahu sana poda adeku. 5 Nahu kawaraku nggomi ma poda-poda imbi d̄i Al Masih, sama b̄une ina wa'imu la Lois ro inamu la Eunike. Ro nahu ka'imbi poda b̄a one nggomi rau ma imbi b̄une ede. 6 B̄ara ndedena nahu ma ngoa ro kawara nggomi loakud̄u nggomi caha kalampa taki ma ncihi ncao lab̄o tenggo ro wa'umu ra mbei b̄a Allah Ta'ala wakatu nahu tohoku rima ese wawo nggomi. 7 B̄ara Roh ra mbei b̄a Allah Ta'ala d̄i ru'u b̄a ndaita, laina Roh makandad̄ina ndai dahu. Pala Roh Allah ede nakandad̄iku ndai tenggo, b̄ini b̄a meci ro ca'u ro loa pi'i ade.
8 B̄ara ndedena aina majamu ngoa ro kahaba d̄i dou makalai mab̄oha au ra iu b̄a nggomi mab̄oha Ruma ndaita; ro aina majamu b̄ara kasoba angimu lab̄o nahu, dou ra bui b̄ara nda^diku sakasi mab̄oha Isa Al Masih. Pala nggomi pab̄uapu kani tenggo ro wa'u ra mbei b̄a Allah Ta'ala d̄i nggomi ro ^batupu susa ro ncoki ade ngoa ro kahabakai Injil. 9 Allah Ta'ala kasalamana ndaita ro kad̄alena ndaita loakud̄u ndad̄i ela ndai-Na. Sia karawikaina ede laina kai dasa au ra wa'u karawi b̄a ndaita, malaisi kai dasa nia ndai-Na ro rahmat-Na. Sia mbeina ndaita rahmat-Na kai ncai Isa Al Masih. Sawatipu rakandad̄i dunia ake. 10 Ro ake, Allah Ta'ala tei katadana rahmat-Na ede d̄i ndaita kai maina Sangaji Makasalama ndaita eded̄u Isa Al Masih. Isa kakoana kuasa made ro wa'ana mori ma ede ro hid̄i kai ncai Injil.
11 D̄i ngoa ro kahabakai Injil edeku, Allah Ta'ala hantana nahu ndad̄i rasul ro guru. 12 B̄ara ndedena nahu iukaiku susa ro ncoki sara'ana ake, pala nahu ngge'e mpa imbi podaku, b̄ara nahu kab̄adepodaku cou d̄i'imbikai b̄a nahu. Nahu ka'imbi poda b̄a one au ra wa'u imbi podakai b̄a Sia d̄i nahu,a Sia rau ma jaga sampe d̄i Ainaina Kiama. 13 B̄atu kapodapu ngoa ro tei mancihi ra wa'u mbei b̄a nahu d̄i nggomi. Ro pab̄uapu nggomi ngge'e mpa nentimu d̄i imbi ro meci ro ca'u ma wa'ura ndad̄i ntau ndaita b̄ara sab̄ua lab̄o Isa Al Masih. 14 Kai bantu b̄a Roh Allah ma mori d̄ei ndaita, pab̄uapu nggomi jaga katahomu lampa rawi-lampa rawi mantau co'i ra wa'u imbikai d̄i nggomi.
15 Nggomi mab̄adeku b̄a one sara'a dou d̄i dana ro rasa Asia wa'ura tu'u wi'ina nahu, ndede rau la Figelus lab̄o la Hermogenes. 16 Pala iwa ro weki la Onesiforus wa'ura pila-pila kali kad̄ihina ade nahu. Raho-raho to'i mpa Ruma ngawana katada kasi adena d̄i siad̄oho.Konena nahu ade uma bui, la Onesiforus wati majana b̄ara ka'ada'an nahu ede. 17 Ndede ronggana d̄i Roma, sia usahana ngupa ncau nahu sampe sia eda angina lab̄o nahu. 18 Ro nggomi mab̄adeku b̄a one d̄i Efesus sia mboto poda bantuna nahu. Raho-raho to'i mpa Ruma katadana kasi adena d̄i sia wakatu ainaina Ruma paresana ncihi ro ncara samenana manusia.