15
फिर मुंय सरग ने गोटक आउर बड़े आउर अदभुत चिना दकली, बलले सात सरग दूत जाहार लगे सातो अन्तिम बिपति रए, कसन कि तीकर समाप्त होयला पाचे मापरू र रीस र अन्त आप। 2 तेबे मुंय जोय मिलला कांच जसन गोटक समुन्द दकली, आउर जोन लो हांय पोशु ने आउर तार मूरति ने आउर हातार नाम र अंक ने जयवन्त होई रए त, तीके हांय कांच र समुन्द र लगे मापरू र बीणा के धरा करी ढिला दकला। 3 हांय मापरूर दास मूसा र गाना आउर मेमा र गाना गाई गाई बलते रएत ‘‘हे सर्बशक्तिमान परभु परमेश्र तोर बुता माहान आउर अदभुत आय हे युग-युग र राजा, तोर चाल अच्छा आउर सत्ये र आय‘‘। 4 ‘‘हे परभु, कोंन तोके ना डरे आउर तोर नाम र महिमा ना करे? कसन बलले के बल तूय ची पबितर आस। सबु जाति आई बुरी तोर छोमे घुटना टेकसी, कसन बलले तोर न्याय र बुता परगट होयला आचे। 5 एतार बाद मुय दकली कि संरग ने साक्षी र तम्बू र मंदिर खोल लाय, 6 आउर हंाय सात सरगदूत जाहार लगे सात बिपति रए। मलमल र शु़द्ध आउर चमकला कुरता फिन्दला आउर छाती ने सोना र पट्टी बांदलार मन्दिर ले निकरला। 7 तेबे हंाय चार प्राणी मन ले गोटक हंाय सात सरगदूत के मापरू जोन युग-युग जीबाबीत, र रीस ले भरला सोना र सात कटोरा दे लाय 8 आउर मापरूर महिमा आउर तार सामरथ र कारन मन्दिर धुमरा ले भरी गला, आउर जेबे तक हंाय सात सरगदूत र सात बिपति समाप्त ना होयला तेबे तक कोनी मन्दिर ने ना जायके सकला।