Jude
यहूदा
1
यहूदा र बाटले जोन यीशु मसीह र दास आवरी याकूब र भाई आय, हांय हाग दिआय गलार नाव जोन माहा परभु बुआ ने पिरीय आवरी यीशु मसीह काचे अच्छा आचे | 2 दया आवरी शान्ति आवरी मया तमके खूबे मिरते रओ | 3 मयनत ले कोशिश करते रई जोन्ति हामी सबू सहभागी आवं, तो मयतमके ये समझाय बार जरुरी समझली की हांय विश्वास काचे पूरा कोशिश करा जोन पवित्र लोक मन के गोटकी ची हार सोपा जाई रये | 4 कसन की कतक असन मुनूक मन लुकी करी हामर लगे आई मिलला आत, जाहार ये दण्ड र वर्डनन जुना समेया ने आगले ची लिका गला आचे: ये मन भक्ति हीन आत, आवरी हामर माहा परभु र अनुगरह के लूच पन ने बदली देऊ आत, आवरी हामर गोटकी सामी आवरी परभु यीशु मसीह के इनकार करू आत 5 मातर अगर तमी सबू गोट के एक हार जानला आस, तेबे बले मय तमके ये गोट र सुधि देबार चाहयबी आची की परभु गोटक कूल के मिश्र देश ले छाड़ाय लार पाचे विश्वास ना आनबा लोक के नाश करी देला | 6 पाचे जोन सरग दूत मन आपना पद के स्थिर ना सोंगाय लाय मातर आपना निज निवास के छाड़ी देला, हांय तिके बले हांय भीषण दीनरनिआय काचे अंधार ने, जोन सदा काल काचे आय, बांदी सोंगायला आचे | 7 जोन निती ले सदोम आवरी अमोरा आवरी तिकर लगर - लगर, जोन ये मनर असन बेबिचारी होई रयेत आवरी दुसरा र गागर र पिटी होई रयेत, जोय र अनन्त दण्ड ने धरी करी कहनी होयला आत | 8 हाई निती ले ये सपना दकु मन बले आपना अपना गागर के अशुद करू आत, आवरी परभुता के नीच समझू आत, आवरी बड़े पद बिता मन के उलटा शिधा बलु आत | 9 "मातर बड़े सरग दूत मीकाईल , जेबे सयतान ले मुसा र गागर र बारे ने गोट बात करलाय, तो हांके उलटा शिधा बली करी दोष लगाय बार साहस ना करलाय मातर ये बल लाय,"" परभु तोके झगड़ा करो |""" 10 मातर ये लोक मन जोन गोट मन के ना जानेत तिके उलटा शिधा बलु आत, आवरी जोन गोट मन के चेत नोयला पशु मनर असन सवभाव ले ची जानेट, हांय मन खुद के नाश करू आत | 11 हांय मन उपरे हाय ! कसन की हांय मन केन र असन चाल चलोत, आवरी मजदूरी काचे बिलाम र असन भ्रष्ट होयला आत, आवरी कोरह मन र असन बिरोध करी नाश होयला आत | 12 ये तमर मया र सभा मन ने तमर संगे खायबा- पियबा, समुंद ने लुकला ढीपका असन आत, आवरी बेधड़क आपना ची पेट भरू राका करूं मन आत; हांय मन निर जल बादरी आत, जोनके लेहरा उड़ाय नेऊ आय; पतझड़ र फल ना आनबा गच आत, जोन दूय हार मरी गला आत, आवरी चेर ले उदकला आत; 13 ये समुंद र परचंड लेहरा आत, जोन आपना लाज र फेन उठाऊ आत; ये डामा डोल तारा आत, जाहार काचे सबू काल ले बड़े अंधार सोंगाय गला आचे | 14 "हनोक बले जोन आदम ले सात पीड़ी ने रये, ईकर बारे ने ये भविष बाड़ी करला, ""दका, परभु आपना लाखो पवित्र मन संगे आयला " 15 "की सबूर निआय करो, आवरी सबू भक्ति हीन मन के तिकर अभक्ति र सबू काम र बारे ने जोन हांय मन भक्ति हीन होई करला आत, आवरी हांय सबू कठोर गोट मनर बारे ने जोन हांय मन भक्ति हीन होई करला आत, आवरी हांय सबू कठोर गोट मनर बारे ने जोन भक्ति हीन पापि मन तार बिरुध ने बलला आत, दोषी होयबाय |""" 16 ये तो संतुस्ट ना होयबा, कूड़ कूड़ायबा लोक, आवरी आपना अभिलाषा र अनुसार चलबा लोक आत, आवरी आपना र मुह ले घमण्ड र गोट बलु आत, आवरी हांय मन लाभ काचे मुह दकी बड़ाई करू आत | 17 मातर हे पिरीय मन, तमी हांय गोट मन के सुरता करा जोन हामर परभु यीशु मसीह पेरित आगे ची बलला आचे | 18 "हांय मन तोमके बलबार आय, ""आगर दीन ने असन हासी उड़ाय बा लोक होयबाय जोन आपना अभक्ति र अभिलाषा र अनुसार चलबाय |""" 19 ये हांय आत जोन खुट सोंगाऊ आत; ये गागर र लोक आत, जाहार लगे आतमा निआय | 20 मातर हे पिरीय मन, तमी आपना खूबे पवितर विश्वास ने छमे बाड़ते आवरी पवितर आतमा ने पारतना करी करी, 21 खूद के माहा परभु र मया ने बनाई सोंगाहा; आवरी अनन्त जीवना काचे हामर परभु यीशु मसीह र दया बाट दकते राहा | 22 हांय मन जोन संका ने आचेत दया करा; 23 आवरी खूबे मन के जोय ले झटके निकराहा; आवरी खूबे मन ने भय संगे दया करा, मातर हांय फटई ले बले नफरत करा जोन गागर र लागी कलंकित होयला आचे | 24 अबर जोन तमके ठोकर खायबा ले बाचाय के सके, आवरी आपनार महिमा र भरपूरी र छमे मगन आवरी निर्दोष करी ठिया करके सके, 25 हांय गोटक माहा परभु हामर उधार करूं र महिमा आवरी गौरव आवरी पराक्रम आवरी अधिकार, हामर परभु यीशु मसीह र बाटले जसन सनातन काल ले आचे, ऐबे बले होओं आवरी जूग जूग रओ |आमेन |