3
दक, बाबा हामे कसन मया करला आये की हामि महापरबुर बेटा बलाया होउ आव, आउर हामि आय बले। ये लागी सोंसार हामके ना जोन, कसन की हाय हाके बले ना जानला। 2 हे प्रिय, ऐबे हामे महापरबुर बेटा आव, आउर ऐबे ये प्रकट ना होयता की हामि काय कांई होयबु। अतक जानबु आयु की जड़दाय हाय प्रकट होयसी तेबे हामि हातार समान होयबु,कसन की हाके असनी ची दकबु जसन हाय आय। 3 आउर जोन कोनी हातार ऊपरे ये आशा सोंगाउ आत, हाय आपना निज के उसनी यी पवित्र करू आय, जसन हाय पवित्र आय। 4 जोन कोनी पा करू आय, हाय नियमर विरूद्ध करू आय; आउर पाप तो नियमर विरूद्ध आय। 5 तमी जानबास की हाय के काजे प्रकट होयला की पाप के धरी जाओं; आउर हातार स्वभाव ने पाप नियायः। 6 जोन कोनी हाय थाने बनी रउ आय, हाय पापना करे; जोन कोनी पाप करू आय हाय ना तो हाके दकला आचे आउर ना हाके जानसि आचे। 7 हे पिलामन, काहारि भरमायबा ने ना आसा। जोन धरमर काम करू आय, हाय हातार समान धर्मी आय। 8 जोन कोनी पान करू आय हाथ शैतान र बाट ले आय कसन की शैतान मरुलेची पाप करते आयला आचे। महापरबुर बेटा के काजे प्रगट होयला की शैतानर काम नाश करी। 9 जोन कोनी महापरबु ले जनम ला आचे हाथ पाप ना करे; कसन की हातार बेन हाय थाने बनी रउ आ, आउर हाय पाप करके, ची ना सके कसन की महापरबु ने जनम ला आचे। 10 ऐई थान ले महापरबुर बेटा आउर शैतान र बेटा जाना जाउ आत; जोन कोनी धरमर काम ना करेत हाय महापरबु ले नाई आउर ना हाय जोन आपना भाई ले मया ना सोंगाया। 11 कसन की जोन समाचार तमी मुर ले सुनला आस हाय ये आय की हामि गोटक दूसर ले गया सोंगाऊ; 12 आउर कैमर असन ना बना जोन हाय युस्त ले रये आउर जोन के आपना भाई घात करला। आउर हाके कसन लागी घात करला ? ये लागी की हातारकाम अडरा रये, आउर हातार भाी र काम धरमर रये। 13 ये भाई मन, अगर सोंसार तमके बैयार करू आय तो अक्चकाय ना जाहा। 14 हामि जानबु आचु की हामि मुरतु ले नकी करी जीवन में पहुचतु, आचु कसन की हामि भाईमन ले मया सेांगाउ आॅंव। जोन मया ना सोंगाये हाय मुरतुर दशा ने रउ आय। 15 जोन कोनी आपना भाई ले बैयार सोंगाउ आय हाय हत्यापरा आउर तमी जानबा आस की कोनी हत्यारार अनन्त जीवन ना रये। 16 हामि मया ई थान ले जानलु की हाय हामर काजे आपना परान देई देला, आउर हामके बले भाईमन काजे परान देनार चाहिए। 17 मातर जोन कोनी लगे सोंसार धन होओं आउर हाय आपना भाई के गरीब दकी करी हातार ऊपर जीव टूक बार ना चाहे, तो हाय थाने महापरबुर मया कसन बनी रये के सकुआय ? 18 हे पिलामन, हामि बचन आउर चीम ची ले नांई, मातर काम आउर सतर बाट ले बले मया करा। 19 ये थान ले हामि जानबु की हामि सत आव, आउरजोन गोट ने हामर मन हामके दोष देउ आय हातार विषय ने हामि हातार छोमे आपना -आपना मन के बरसक देयके सकबु; 20 .कसन की महापरबु हामर मन ले बड़े आय आउर सबु कांई जानुआय। 21 हे प्रिय, अगर हामर मन हामके दोष ना देये तेबे हामके महापरबुर असन दि होयता; 22 आउर जोन काई हामि मागु आय हाय हामके हातार ले भिरू आय, कसन की हामि हातार आज्ञा के मानु आव आउर जोन हाके भाइ आय हाई करू आव। 23 हातार आज्ञा ये आय की हामि हातार बेआ यीशु मसीह नावक उपरे विश्वास करू, आउर जसन हाय हामके आज्ञा हातार अनुसार एक दूसर ने मया सोंगाऊ। 24 जोन हातार आज्ञा के मानु आय, हाय हातार आउर यो तार थाने बनी रउ आय; आउर ये थान ले, अथा्रत हाय आत्मा ले जोन हाय हामके देला आचे, हामि हामि जानबु आचु की हाय हामर थाने बनी रउ हाय।