3
अतः जड़दाय तोमी मसीहर संगे जीलास जोन सरगर तिजर खोजने रहा, जोन थाने मसीह बक्ष्ज्ञमान आप आउर माहापरभुर बुजनी हाथ बाटे बोसला आचे। 2 धरतनी उपरे नाई मांतर सरगर तिज मन उपरे धिंयान लगाहा, 3 कसन की तोमी तो मोरलनास आउर तोमर जीवन मसीहर संगे माहापरभु ने लुकला आचे। 4 जड़दाय मसीह जोन हामर जीवन आय, परगट होयसी, तेबे तोमी बले हांतार संगे महिमा संगे परगट करा जीबास। 5 ए काजे आपना हांय अंग के भारी दयास जो धरतनी उपरे आचे, अर्थात् व्यभिचारी, अशुद्ध, दुकामना, अडरा लालच आउर लोबर जोन मुरती सेवार असन आय’ 6 इकरी लागी माहापरभुर रिस आज्ञा ना मानबार लोकर उपरे पडुआय 7 आउर तोमी बले जड़दाय ए अडरा जीवन कटाय ने रहास तो ये ताारी अनुसार चलते रहास 8 मांतर ऐबे तोमी बले ये सबु के अर्थात क्रोध, शेष, बैरभाव, निदा, आवरी मुं ले झगड़ा करबार ए सबु गोट केक छाड़ी दियास 9 काहारी संगे झूठ ना बोला, कसन बोलले तोमी जुना मनुष्यत्व के हांतार काम संगे उतराय देला आस ’ 10 आवरी नुआ मनुष्यत्व के पिन्दला आहास, जोन आपना बनायबार असनीची रूपर अनुसार गियान पायबा काजे नुआ बनते जाहा। ’ 11 हांयथाने ना तो युनानी रये ना यहूदी, ना खतना ना खतना रहित, ना झारर, ना स्कुली, ना दास आवरी ना स्वतंत्र केवल मसीह सबु कांई आउर सबु ने आचे। 12 ए काजे माहापरभ्राुर बाचला असन जोन पवित्र आय प्रिय आय, बड़े करूणा, आउर भलाई, आउर दिनता, आउर नम्रता, आउर सहनशीलता धरा, 13 आउर अगर कोनी के कोनी उपरे दोष देबाकाजे कांई कारण होओ, तो गोटक दुसर संगे आउर गोटक दुसरर अपराध क्षमा कराः 14 जसन परभु तोमर अपराध क्षमा करला, असनी ची तोमी बले करा। ’ए सबुर उपरे मयार सिद्धतार कटिबंद आय बांदा। 15 मसीहर शांति जाहार काजे तोमी गोटक देह होईकरी हांगदीया बले गला आहास तोमर मन ने राज करोः आउर तोमी धन्यवादी बनी रहा। 16 मसीहरन बचन के आपनार मन ने अधिक ले बसके दियास, आउर सिद्ध गियान संगे गोटक दुसर के सिखाहा आउर चित लगाहा, आउर आपना आपना मन ने अनुग्रह संगे माहापरभु काजे भजन आउर स्तुतिगान आउर आत्मिक गीत गाहा। 17 बचन ने नोयले काम ने जोन काई बले करा सबु परभु ईशुर नाम ने करा, आवरी तार बाटले महापरभू बाबार धन्यबाद करा | 18 ए बायले मन, जसन परभु ने उच आय, असनी ची आपना आपना मनुक संगे मिसी राहा। 19 ए मनुक मन आपना-आपना बायले के मया करा आउर हांयके ठोकरना ना करा। 20 ऐ पीलामन, सबु गोट ने आपना - आपना आया - बाबार गोट के मानी कर सबु काम करा, कसन की परभु ए थाने हरिक होउआय। 21 ऐ पीलाबीता, आपना पीलामन के तंग बाकरा ना होओ की तिकर साहस टूटी जायसी। 22 ऐ सेवक मन, जोन शरीर अनुसार तमर खामी आय, सबु गोट ने तिकर आज्ञार पालन करा, मनुक के हरिक करबा मनर असन दकायबा काजे नाई, मातर मनर सिदाई आउर माहापरभुर भय ले। 23 जोन कांई तोमी करना करू आहास, तनम न ले करा, ए समझी करी की मनुक काजे नाई मांतर परकु काजे करू आहासः 24 कसन की तमी जानबा आहास की तोमके एतार पलटा परभु ले मिरास मिरसीः तोमी परभु मसीहर सेवा करूं आहास। 25 कसन की जोन अडरा करू आय हांय अपना अडरार फल पायसी,’ हांय काहरी पक्षपात ना करें।