15
सतेर दाखलता मुय आय, आवरी मोर बुआ बेड़ा कमाऊ आय | 2 जोन खेंदा मोर ने आचे आवरी ना पाके, हाके हाय काटी देउआय ; आवरी जोन पाकुआय, हाके हाय बाचुआय की आवरी पाको | 3 तमि तो हाय बचन र लागी जोन मुय तमके बल्ली आची, सुध आचास | 4 तमि मोर ने बनी रहा, आवरी मुय तमर ने | जसन खेंदा अगर दाखलता ने बनी ना रए तेबे आपना ले ना पाक के सके, असनि ची तमि बले अगर मोर ने ना बनी राहास तेबे ना फलके सकास | 5 मुय दाखलता आय :तमि खेंदा मन आस | जोन मोर ने बनी रउआय आवरी मुय हातार ने,आवरी हाय खुबे पाकुआय, कसन बल्ले मोर ले अलगे होयिकरी तमि काई बले ना करके सकास | 6 अगर कोनी मोर ने ना बनी रयसी, तेबे हाय खेंदा मन र असन पोकाय दी जायता, आवरी सुकी जाऊआय ;आवरी लोक मन हाय के कूड़ा करी जोय ने पोडाय देऊआत,आवरी हाय पोड़ी जाऊआय | 7 अगर तमि मोर ने बनी रबास आवरी मोर बचन तमर ने बनी रयसी, तेबे जोन चायबास मांगा आवरी हाय तमर काजे होई जायसी | 8 मोर बुआ र महिमा इ थाने ची होऊआय की तमि खुबे असनपाक आना, तेबे ची तमि मोर चेला ठेबबास | 9 जसन बुआ मोर संगे मया सोंगायला, असनि ची मुय तमर संगे मया सोंगायली; मोर मया ने बनी रहा | 10 अगर तमि मोर आज्ञा मन के मानबास, तेबे मोर मया ने बनी रबास ; जसन की मुय आपना बुआ र आज्ञा के मानली आची, आवरी हातार मया ने बनी रबी आची | 11 मुय इ गोट मन तमके इ काजे बल्ली आची, की मोर हरिक तमरने बनी रओ, आवरी तमर हरिक पूरा होई जाओ | 12 मोर आज्ञा ये आय की जसन मुय तमर संगे मया सोंगाय्ली, असनि ची तमि बले एक दुसर संगे मया सोंगहा | 13 एतार ले बड़े मया कहारी नुआय की कोनी आपना संगवारी मन काजे आपना जीव देओ | 14 जोन आगया मुय तमके देऊआय अगर हाके मानबॉस तेबे तमि मोर संगवारी आस | 15 एबले मुय तमके दास ना बलबी कसन बल्ले दास ना जाने की हातर मालिक काय करूआय, मातर मुय तमके संगवारी बल्ली आची,कसन बल्ले मुय जोन गोट मन आपना बुआ ले सुनली, हाय सबु तमके सांगी देली | 16 तमि मोके ना चुन्लास मातर मुय तमके चुनली आची आवरी तमके अधिकार देली आची की तमि जाई करी पाक आना आवरी तमर पाक बनी रओ, की तमि मोर नाव ले जोन काई बुआ ले मांगबॉस, हाय तमके देओ | 17 इ गोट मन र आज्ञा मुय तमके इ काजे देबी आची की तमि एक दुसर ले मया सोंगाहा | 18 """अगर सोव्सार तमर ले बइर सोंगाउ आय, तेबे तमि जानास की हाय तमर ले पयले मोर संगे बइर सोंगायला |" 19 अगर तमि सोव्सार र होय्तास, तेबे सोव्सार आपना मन ले मया सोंगायता : मातर इ लागी की तमि सोव्सार र नुआस, मातर मुय तमके सोव्सार ले चुनली आची, इ काजे सोव्सार तमर बइर सोंगाऊआय | 20 जोन गोट मुय तमके बोली रई, 'दास आपना मालिक ले बड़े ना होए ,' हाके सुरता ने सोंगाहा | अगर हायमन मोके सतायलाय, तेबे तमके बले सतायबाय : अगर हाय्मन मोर गोट मानबाय,तेबे तमर बले मानबाय | 21 मातर इ सबु काई हायमन मोर नाव र लागी तमर संगे करबाय, कसन बल्ले हायमन मोर पटायला बिता के ना जानोत | 22 अगर मुय ना आयती आवरी तिक्र संगे ना गोठायती, तेबे हाय्मन पापी ना ठेबताय; मातर एबे तिके तिकर पाप काजे काई बहाना निआय | 23 जोन मोर ले बइर सोंगाऊआय, हाय मोर बुआ ले बले बइर सोंगाउआय | 24 अगर मुय तिकर ने हाय काम ना करती जोन आवरी कोनी ना करलाय,तेबे हाय मन पापी ना ठेबताय; मातर एबे तो हाय मन मोके आवरी मोर बुआ दुनो के द्कलाय आवरी दुनो ले बइर करलाय | 25 ए इ काजे होयला की हाय बचन पूरा हो, जोन तिकर नियम ने लिक्लार आचे,'हाय मन मोर ले फकाहा बइर करलात |' 26 मातर जड़ दाय हाय संगवारी आयसी, जाके मुय तमर लगे बुआ बाटले पटाय्बी, जसन की सत र आत्मा जोन बुआ र बाटले निकरुआय, तेबे हाय मोर गवाई देसी; 27 आवरी तमि बले मोर गवा आस कसन बल्ले तमि पईल ले मोर संगे रलास |