4
आवरी जड़ दाय माहा परभु जानला की फरिसी मन सुनलाय की यीशु यहुन्ना के खूबे चेला बनाऊ आय आवरी तिके बपतिस्मा देऊ आय 2 केबी यीशु आपन नाई मातर हातार चेला बपतिस्मा देयते रयेत – 3 जड़ दाय हांय यहुदीया के छाड़ी करी पाचे गलील ने गला, 4 आवरी हाके सामरेया ले होई करी जिबार जरूरी रये | 5 ई काचे हांय सुखार नावर सामरेया गोटक नगर ले आयला, जोन हांय भुई लगे आचे जाके याकूब आपना बेटा युसूफ के देई रये ; 6 आवरी याकूब र चुआ बले हांय थाने आचे मातर यीशु बाटे थाकी रये हांय चुआ ने तेयोही बसला |हांय गोट छय घंटा लागा लागी होई रये | 7 अटक ने गोटक सामरी बायले पानी भरके आयला |यीशु हाके बलला मोके पानी पिआव |” 8 कसन की हातार चेला तो नगर ने भोजन घेनके जाई रयेत | 9 हांय सामरी बायले हाके बलला, “ तूय यहूदी होई करी मुय सामरी बायले ले पानी कसन मांग्बी आस ?” ( कसन की यहूदी सामरी संगे कोनी परकार र बेबार ना सोंगायेत |) 10 यीशु जबाब देला, “ अगर तूय माहा परभुर र बरदान के जानीस, आवरी ये बले जानीस की हांय कोन आय जोन तोके बलसी आचे, ‘ मोके पानी पिआव तेबे तूय हाके मागबिस, आवरी हांय तोके जीवना र पानी देयता |” 11 बायले हाके बलला, “ हे परभू तोर लगे पानी भरबा काचे तो काई बले निआय, आवरी चुआ खोदरा आचे; एबे आवरी हांय जीवना र पानी कोन थानले आयला ? 12 काय तूय हामर बाबा याकूब ले बड़े आस, जोन थाने हामके ये चुआ देला; आवरी आपना ची आपना बेटा, आवरी आपना पशु मन संगे ई थानले पियला ?” 13 यीशु ताके जबाब देला,” जोन कोनी हांय पानी पियसी हांय पाचे पिआसा ना होये, 14 मातर जोन कोनी ये पानी पियसी जोन मुय हाके देऊ आय, हांय आवरी जूग जूग दायले पिआसा ना होये; मातर जोन पानी मुय हाके देबी, हांय थाने गोटक सोता बनी जायसी जोन जूग जूग र जीवना काचे उचरते रयसी |” 15 बायले हाके बलला, “ हे परभु हांय पानी मोके देस की मूय पिआसी ना होयली आवरी पानी भरके अतक दुर ना आई |” 16 यीशु ताके बलला “ जा, आपना मुनूस के ये थाने हाग देई आन |” 17 बायले जबाब देला, “ मुय बिना मुनूस र आची |” यीशु ताके बलला, “ तूय सते बलबी आस, ‘ मुय बिना मुनुकर आची |’ 18 कसन की तूय पाच मुनूक करली आस, जाहार लगे तूय एबे आचिस हांय बले तोर मुनूस नुआय | हांय तूय सते ची बलबी आस |” 19 बायले हाके बलला, “ हे परभू, मोके लागसी आचे की तूय आगम गिआनी आस | 20 हामर बाप दादी हांय डोंगरी उपरे आराधना करलाय, आवरी तोमि बलु आस की हांय जगा जोन थाने आराधना करबार रये यरुशेलम ने आचे |” 21 यीशु हाके बलला, “ हे नारी, मोर गोट के बिसबास कर की हांय समेया आयसी आचे की तोमि तोमि तो ये डोंगरी उपरे बाबा र अराधना करबास, ना येरुशेलम ने | 22 तोमि जोन के ना जानास, हातार आराधना करू आस; आवरी हामी जोनके जानू आव हातार आराधना करू आव; कसन की उधार यहूदी मनले आचे | 23 मातर हांय समेया आयसी आचे, मातर एबे बले आचे, जोन थाने सत भगत बाबा र आराधना आतमा आवरी सतले करबू, कसन की बाबा आपना काचें असनी ची आराधना करबा लोक के डगरायसी आचे | 24 माहा परभु आतमा आय, आवरी जरुर आय की हातार आराधना करबा बिता आतमा आवरी सत ले आराधना करा |” 25 बायले हाके बलला,” मुय जानबी आची की मसीह जोन क्रीस्ट बलाय होऊ आय, आयबा बिता आय; जड़ दाय हांय आयसी तो हामी सबू गोट सागी देबू |” 26 यीशु हांके बलला, “ मुय जोन तोके बलली आची हांय मुय आय |” 27 अतक ने हातार चेला आयलाय, आवरी टटका होयलाय की हांय बायले गोटायसी आचे; तेबे बले कोनी ना पचारलाय, “ तूय काय चाहयबी आस ?”नोयले “ काय काचे हाके गोटायबीआस ?” 28 तेबे बायले आपना घागरी के छाड़ी करी नगर ने गला, आवरी लोक के बलके धरला, 29 “ आसा, गोटक मुनूक के दका, जोन थाने सबू पाई जोन मुय करी रई मोके सांगी देलाय |काय तूय मसीह नुआस ?” 30 मातर : हांय नगर ले निकरी करी तिकर कटा आयलाय | 31 हांय मजी तार चेला मन यीशु के जुहार करलाय, “ हे रबी, काई गोटा खा |” 32 मातर हांय तिके बलला, “ मोर कटा खायबा काचे असन भोजन आचे जोन की तोमि जानास |” 33 तेबे चेला मन मिसी करी गोट बात करलाय, “ काय कोनी हातार काचे काई खायबा काचे आनला आस ?” 34 यीशु तिके बलला, “ मोर भोजन ये आय की आपना पटायबा बिता मनर असन चलबी आवरी हातार काम पूरा करबी | 35 काय तोमि ना बलु आस, ‘ काटबार एबे बले चार मास पड़ला आचे ?’ दका, मुय तोमके बलबी आची, आपना आकी उटाय करी बेड़ा उपरे धिआन दीआस की हांय काटबा काचे टाकला आचे | 36 काटबा बिता भुतीआर भूती पाऊ आय आवरी जूग जूग र जीवना र काचे फल ओंडाऊ आय, की बुनबा बिता आवरी काटबा बिता दुनो मिसी करी हरिक बनाऊ आत | 37 कसन की हांय उपरे ये कहनी अच्छा बसू आय: ‘बुनबा बिता आवरी आय आवरी काटबा बिता आवरी |’ 38 मूय तोमके ये बेड़ा ने काटबा काचे पटायली जोन थाने बुता ना करलास: दुसरा लोक बुता करलाय आवरी तोमि तिकर बुता र फलर भागी होयलास |” 39 हांय नगर र खूबे सामरी र हांय बायले बलला यीशु उपरे बिसबास करा; कसन की हांय ये गवाई देई रये: ‘ हांय सबू काई जोन मुय करली आची, मोके सांगला |’ 40 ई काचे जड़ दाय ये सामरी हातार लगे आयलाय, तेबे हाके बिनती करके धरलाय की हामर थाने रा | मातर हांय हांय थाने दूय ची दीन रये | 41 हातार बचन र लागी आवरी बले खूबे लोक बिसबास करलाय 42 आवरी हांय बायले बलला, “ एबे हामी तोर बलबा ची के बिसबास ना करेत; कसन की हामी आपना ची सुनलू आचू आवरी जानबु आचू की ये सते सोसार र उधार करता आय |” 43 फेर हांय दूय दीन पाचे हांय हांय थानले निकरी करी गलील ने गला, 44 कसन बलले यीशु आपना ची गवाई देला की अगम गियानी आपना देस ने आदर ना पाये | 45 जड़ दाय हांय गलील ने आयला, तेबे गलीली मन हरिक संगे तार संगे मिसलाय; कसान बलले जतक काम हांय यरुशेलम र परबर समेया ने करी रये, हांय मन हांय सबू के दकी रयेत, कसन बलले हांय मन बले परब ने जाई रयेत | 46 तेबे हांय फेर गलील र काना नगर ने आयला, जोन थाने हांय पानी के दाखरस बनाय रये |जोन थाने राजा र गोटक नवकर रये जाहार बेटा कफर नहुम बेमार पड़ी रये | 47 हांय ये सूनी करी की यीशु येहुदीया ले गलील ने आयला आचे,हातार लगे गला आवरी हांके बिनती करके मुरायला की जाई करी मोर बेटा के अच्छा करी देस: कसन बलले हांय मोरबा उपरे रये | 48 यीशु ताके बलला “जड़ दाय ले तूय चीन चमत्कार र काम के ना दकिस तेबले तूय बिलकुल बिसबास ना करबिस |” 49 राजा र नवकर ताके बलला, “ हे परभू, मोर बेटार मोरबार आगे जो |” 50 यीशु ताके बलला, “ जा, तोर बेटा जीव आचे |” हांय मुनूक यीशु र बलला गोट र बिसबास करला आवरी गला | 51 हांय बाटे ची रये की हातार दास हाके आई करी भेटला आवरी बलला, “ तोर बेटा जीव आचे |” 52 हांय तिके पचारला, कड़क दाय अच्छा होयला ?” हांय मन ताके बललाय, “ काली र सात घंटा ने हातार जर उतरी गला |” 53 तेबे बुआ जानला की हांय हाई समेया ने होयला जोन समेया यीशु ताके बली रये, “ तोर बेटा जीव आचे,” आवरी हांय आवरी हातार तार घराना बिसबास करलाय | 54 ये दुसर अचरनज र काम रये जोन यीशु येहुदीया ले गलील ने आई करी दकायला |