24
हपतार पइले दिन बड़े सकरिया, हांयमन तियार करी रला बासना जमकमन के दरीकरी मोट ताने गलाय। 2 आवरी हांयमन मोट के डापी रला पोकना के गुचाय होयलारटाके दकलाय। 3 मातर मोट बितरे गलादाय, परबु ईसुर मोड़ी के ना पायलाय। 4 एके दकीकरी हांयमन टटका होयलादाय, उदापड़े जलकी जीबा पटई पींदला दुय तन तिकर लगे टिंया होललाय। 5 तेबे बायलेमन कुबे डरीकरी तिकर मंूड के बूंय बाटे लंुवायलाय। तेबे हंाय दुय लोक तीके बोललाय, “जी रबा माने के, तोमी काय काजे मोरला ताने डगराबा आस ? 6 हांय एताने नी आय; हांय जीव उटला आचे? 7 मुनुसर-बेटा मुंय पापीमनर हाते सोपाय होयीकरी कुरूस ने चेगाय होयबी; आवरी तीसर दिने जीव उटबी’ बोलीकरी हांय गलील ताने रलादाय, तोमके सांगलाटाके सुरता करा।“ 8 तेबे हांयमन तार गोट के सुरता करलाय; 9 आवरी मोट तानले बाहड़ीकरी ए सबु के इगारा चेलामन आवरी तिकर संगे रला सबु लोक के सांगलाय। 10 ए गोटमन के मरियम मगदलनी, जोहना, एकूबर आया मरियम आवरी तिकर संगे रला बायलेमन, इगारा अपोसतलमन के सांगलाय। 11 मातर, एमनर गोट पोकाहा गोट असन लागला गुनुक, हांयमन बायलेमनर गोट के सत ना करलाय। 12 तेबे पतरस उटीकरी मोट बाटे पोरायला। आवरी हांय लोंयकरी ओबगो ईसु के गुड़ाय रला पटई के दकला; आवरी होयलार इसाब ने अचरित होयीकरी बाहड़ी आयला। 13 आवरी हांयची दिने, हांयमन तानले दुय जन, इमाऊस नांवर गोटोक गांव ताने जायते रलाय। हांय एरूसलेम ले कांई नोयले सात मील लापी ने रला। 14 हांयमन जायते रलादाय, होयलार ए सबु गोटर इसाब ने गोटायते गलाय। 15 असनी हांयमन गोटबात आवरी सांगा-सांगी होयते जीबादाय ईसु निजे, तिकर लगे आसीकरी तिकर संगे हींडला। 16 मातर, हांके चितायके ना सकबा असन तिकर आंकीमन डापी होयी रला। 17 अड़किदाय ईसु तीके पोचारला, “जायते जायते तोमी काय इसाबर गोट ने गोट-बात करबा आस? हांयमन कुबे चिंता ने टिंया होयलाय। 18 तेबे हांय दुनों तानले किलियुपास नांवर गोटोक माने बोलला, “एरूसलेम ने आजी-काली होयलाटाके ना जानला गोटकी परदेसी माने काय तुयची आस ?“ 19 तेबे हांय पोचारला, “काय गोट के सांगबा आस? तेबे हांयमन हांके बोललाय, नासरी गांवर, ईसुर इसाबर गोट तो आय। हांय महाप्रूर चोमे आवरी सबु लोकर चोमे, हांय करला काम ने आवरी सांगला गोट ने, सामरत बिता अंतरजानी रला। 20 हांमर महाप्रूर बड़े पूजारीमन आवरी मुकियामन, हांके मोरबा डंड देबा काजे रोमीमनर हाते सोपी देलाय; आवरी हांयमन हांके कुरूस ने चेगायलाय। 21 मातर एइची, बइरीमनर हातले इसरायेल देस के बाचायसी बोलीकरी हांमी आसा करी रलु। एबर हांयटा होयबार मसकुल असन दका देयसी आचे; कसनबलले, एटा सबु होयीकरी तीन दिन होयसी आचे। 22 आवरी हांमर बितरर कतक बायलेमन बले हांमके अचरित ने पड़ायलाय। हांमन आजी बड़े सकरिया मोट ताने जायी रलाय; 23 मांतर तार मोड़ी के ना पायलाय। आवरी हांयमन आसीकरी हांमके “हांय जीव आचे“ बोली सांगला सरगदूतमन के हांमी दकलु बोली बोललाय। 24 तेबे हांमर बितरले कतक लोक मोट ताने जायीकरी बायलेमन सांगी रला असन पायलाय; मातर ईसु के ना दकलाय। 25 तेबे हांय तीके बोलला; अंतरजानीमन लिकला सबु के, बिसबास करबा काजे बुदि ना रबा अलप बुदि बितामन ! 26 अंतरजानीमन लिकला असन किरिस्त दुक पायीकरी ताके मईमा मिरबा सरग ने जीबार काय जरूर नु आय ? 27 आवरी हांय, मोसा ले दरीकरी सबु अंतरजानीमन तार इसाब ने दरम सासतर ने लिकला सबु के तीके समजाय देला। 28 पाचे हांयमन जायते रला इमाऊस गांव लगे अमरलाय; तेबे ईसु, आवरी चोमे जीबा असन दका देला। 29 मातर हांयमन हांके, राती हांमर संगे तेबा; कसनबलले, संज होयला आवरी बेर बससी आचे बोलीकरी गुवारलाय। तेबे हांय तिकर संगे तेबबा काजे गला। 30 आवरी हांय तिकर संगे बोजी कायके बसलादाय, रोटी के दरीकरी महाप्रू के जुवार करला आवरी गोंदाकरी तीके देला। 31 अड़किदाय, तिकर आकी उगाड़ी होयला आवरी हांयमन हांके चितायलाय; मातर हांय तिकर आकी ले दका ना देला। 32 तेबे हांयमन एक दुसर के बोललाय, हांय हांमर संबे बाटे गोटायते आवरी दरम सासतरर अरत के हांमके समजायते रलादाय, काय हांमर मन कुबे हरिक ने ना उचरला ? 33 आवरी हांयमन अड़किचीदाय उटीकरी एरूसलेम गलाय; आवरी इगारा चेलामन के आवरी तिकर संगे रूंडा होयी रला दुसर लोक के दकलाय; 34 अड़किदाय हांयमन ए दुनों के बोललाय, परबु सते मोरला तानले जीव उटीकरी सिमोन के दका देला आचे। 35 पाचे एमन दुनों, बाटे होयला गोट के आवरी हायं रोटी के गांेदा करबादाय, हांके चितायलाटाके सांगलाय। 36 हंायमन ए इसाब ने गोटायते रलादाय, ईसु निजे तिकर मंजिगता ने टिंया होयीकरी तीके बोलला, “तोमके असतिर होवो“। 37 मातर हांयमन डरलाय; आवरी काबा होयीकरी गोटोक डूमा के दकबामा तीके लागला। 38 मातर हांय तीके पोचारला, “तोमी काय काजे काबा होयबा आस आवरी काय काजे तोमर मने सक आयला? 39 मोर हात आवरी गोड़ के दका। तेबे मुयची आय बोली तोमी जानबास। मोके, चींयकरी दका; कसनबलले डूमा के, तोमी मोर ताने दकबा असन हाड़ा आवरी माऊस ना रये। 40 असन बोलीकरी हांय आपना हात गोड़ के तीके दकायला। 41 ४१हांयमन कुबे हरिक आवरी अचरित होयलाय गुनुक, बिसबास करके ना सकते रलादाय, हांय तीके पोचारला, “तोमर लगे एताने कांई बले कायबा काजे आचे कसन?“ 42 तेबे हांयमन हांक, गोटोक पोड़ायला माचर गोंदा के देलाय। 43 तेबे हांयटाके दरीकरी हांय तिकर चोमे कायला। 44 पाचे हांय तीके बोलला, मोसार बिदी ने, अंतरजानीमनर किताब ने आवरी दाऊदर बजन गीतर किताब ने, मोर इसाब ने लिकला सबु गोट पूरा होयबार आय बोलीकरी मुंय तोमर संगे रलादाय, तोमके संागला गोटमन एइची आय। 45 अड़किदाय, दरम सासतर के हांयमन समजबा काजे हांय तिकर मन के उगाड़ला; 46 आवरी हांय तीके बोलला, दरम सासतर ने, किरिस्त दुक पायीकरी तीसर दिने मोरला तानले जीव उटबार आय बोली लिकला आचे; 47 आवरी एरूसलेम ले दरीकरी सबु संवसारर लोक के, पाप करबाटाके चाड़ीकरी मन-बाहड़ायबार गोट के आवरी महाप्रू, लोकर पाप के मापी करसी बोलीकरी लोकमन किरिस्तर नांव ने तीके सांगबाय। 48 आवरी तोमी, मोर दुक पायलाटाके, मोरलाटाके आवरी मोरला तानले जीव उटलाटा सबु के दकलास; तेबे तोमी दकला ए सबु गोटमन के, जायीकरी लोक के सांगा। 49 आवरी मोर बाबा महाप्रू बायदा करला पवितर-आतमा के, मुंय तोमर काजे जपरे पोटायबी; मांतर महाप्रू बाटले तोमके सामरत मिरोतले, तोमी एरूसलेम ने तेबी राहा। 50 असन बोलीकरी पाचे, हांय तीके बेतनियाह गांव लगले नेयीकरी आपना हात के उचायकरी तीके बर देला। 51 आवरी हांय तीके बर देयते दलादाय, तीके चाड़ीकरी सरग ताने उचाय होयला, 52 आवरी तार जीबादाय, हांयमन हांके, पांय-पड़ीकरी जुवार करलाय; आवरी कुबे हरिक ने एरूसलेम बाहड़लाय, 53 आवरी रोजे दिने, मंदिर ने रयीकरी महाप्रू के जय-जय करते रलाय।