22
आमटी पाग ना बसायलार रोटी कायबा, पसह बोलबा तियार लगे अमरी रला। 2 आवरी महाप्रूर बड़े पूजारीमन आवरी सासतर-पंडीतमन ईसु के मोरायबा काजे उवाट डगरायते रलाय। मातर लोक के डरलाय। 3 अड़किदाय बारा चेलामन तानले, एहूदा इसकरियोतिर बितरे सयतान ओलला। 4 आवरी हांय, महाप्रूर बड़े पूजारीमन आवरी मंदिर राका-जागा करू मुकियामन लगे जायीकरी ईसु के तिकर हाते दराय देबार इसाव ने गोटायला। 5 तेबे हांयमन हरिक होयीकरी ताके पयसा देबा काजे राजी होयलाय। 6 ावरी एहूदा इसकरियोति बले राजी होयीकरी, ईसु के तिकर हाते दराय देबा काजे, लोकर रासी ना रबा गोटोक अचा समया के डगरायते रला। 7 पाचे, आमटी पाग ना बसायलार रोटी कायबा तियारर दिन अमरला; आवरी हांय दिने, सबु गरे पसहर मेंडा पिला के मारबार रला। 8 तेबे ईसु पतरस आवरी एहुना के पोटायकरी बोलला, तोमी जायीकरी हांमर कायबा काजे पसहर बोजी तियार करा। 9 तेबे हांयमन हांके पोचारलाय, तुय एटाके कोन तो तियार करबा काजे मन करबी आस ? 10 तेबे हांय तीके बोलला, तोमी सहरे जीबादाय, गोटोक माने पानी हांडी के उचायकरी आबाटाके बेट पायबास। तार संगे, हांय जीबा गरे जाहा; 11 आवरी हांय गरर सवकार के पोचारा, मंुय मोर चेलामन संगे पसहर तियारर बोजी कायबा बाकरा कोन लगे आचे? बोलीकरी गुरू तोके पोचारसी आचे। 12 तेबे हांय तोमके सबु तियार करला उपर पउचर गोटोक बडे बाकरा के दकायसी। हांयताने हांमार बोजी तियार करा। 13 हांयमन जायीकरी ईसु संागी रला असन सबु के पायलाय; आवरी हांयमन पसहर बोजी तियार करलाय। 14 बोजी कायबा बेरार अमरबाके, ईसु बारा अपासतलमन संगे बोजी कायके बसला। 15 आवरी हांय तीके बोलला, मुंय दुक पायीकरी मोरबार पइले, ए पसहर बोजी के तोमर संगे कायबा काजे कुबे मन-करली। 16 आवरी मंुय तोमके बोलबी आची, महाप्रू आपना लोक के बाचायकरी राजा असन राज करोतले मुंय, आवरी गोटोक पसहर बोजी के ना कायीं। 17 पाचे ईसु, दाकरसर बटका के दरीकरी महाप्रू के जुवार करला आवरी बोलला एके दरा आवरी तोमी सबु पिया। 18 कसनबलले, महाप्रूर राज आसोतले ए दाकरस के मुंय, आवरी ना पीयीं बोलते बोलबी आची। 19 पाचे हांय रोटी के दरीकरी महाप्रू के जुवार करला आवरी गोंदाकरी तीके देला आवरी बोलला एटा, मुंय तोमर काजे देबा मोर गागर आय। मोर मोरना के सुरता करबा काजे एक काहा। 20 बोजी कायलार पाचे, असनी हांय, दाकरसर बटका के बले दरीकरी बोलला, ए बटकार दाकरस, तोमर काजे बोहड़ी होयबा मोर लवु बाटले महाप्रू आपना लोकरी संगे बांदबा नुवा बायदा आय। 21 मातर दका ! मोके दरनाय देबा बिता मोर संगे कायसी आचे। 22 महाप्रू टेबायला असन मुनुसर-बेटा मोरसी; मातर हांके दराय देबा हांयमन, 23 हंामर बितरले असन काम करबा बिता कोन होयसी बोलते एक दुसर के पोचारके मुरायलाय। 24 आवरी तिकर मंजीगता ने, हांमर बितरे कोन सबले पड़े आय बोलीकरी जिकाटाना होयलाय। 25 ईसु तीके बोलला, एहूदी ना रबा लोकर राजामन आपना लोकर उपरे दाका देयीकरी राज करबा आता आवरी सनी दुसर लोकर उपरे हक करबा लोक, आपना के तिकर-संगवारीमन बोली बोलाय होयबा हाजे मन करबा आत। 26 मातर तोमी असन ना रबार आय। तोमर बितरे सबु ले बड़े माने, सबु ले सुरू माने असन रबार आय; आवरी मुकिया, कमेयार असन रबार आय। 27 तेबे कोन माने बड़े आय ? बात कायके बसबा बिता आय नोयले सकल-ओंडा करबा बिता ? काय बात कायके बसला बिता बड़े नु आय ? मातर मुंय तोमर मंजीगता ने गोटोक कमेया असन आची। 28 मोर सबु दुक-तकलिस ने तोमी तो मोर संगे रलास; 29 आवरी जसन मोर बाबा मोके राज करबा काजे हक देला आचे, असनी मुंय पने तोमके गोटोक राज के देबी। 30 तेबे तोमी मोर राजे, मोर बोजी ने कायबास-पियबास; आवरी इसरायेलर बारा बंस के राज करबा काजे गादी ने बसबास। 31 तेबे हांय बोलला, सिमोन ए सिमोन दक! गंवु के कुलाप ताने पुनबा असन सयतान तोमके परिकिया करबा काजे महाप्रू लगे मांगला आचे। 32 मातर तुय तोर बिसबास के ना चाड़बार आय बोलते, मुंय तोर काजे पारतना करली आची; आवरी तुय मोर लगे बाहड़ी आयबादाय, तुय तोर भाईमन के बरसक करबार आय। 33 तेबे पतरस ईसु के बोलला, ए परबु मंुय तोर संगे जइल गरे जीबा काजे आवरी मोरबा काजे पने तियार आची। 34 ईसु ताके बोलला, ए पतरस आजी राती कुकड़ा बासबार चोमे, तुय मोके ना जानी बोलीकरी तीन हार निंदरबीस। 35 पाचे ईसु तीके पोचारला, मुंय तोमके पयसा तयली, जोरा आवरी पनई ना दरा बोलीकरी पोटायलादाय, काय तोमके कांईटा उना होयला? हांयमन नाई बोली बोललाय। 36 आवरी हांय तीके बोलला मातर एबे, तोमर लगे पयसा तयली आवरी जोरा रले, हांयटाके तोमर संगे दरा; आवरी तोमर लगे कंडा ना रले, आपना पटई के बिकीकरी गोटोक गेना। 37 चोर-कंगारमन असन हिंयाय जायसी बोलते दरम सासतर ने लिकला गोट मोर ताने होयबार आय बोलीकरी मुंय इसाब ने लिकला गोट होयबा बेरा अमरला आचे। 38 तेबे चेलामन बोललाय, ए परबु दक! एताने दुयटा कंडा आचे। तेबे हांय तीके, होयसी बोलला। 39 पाचे, हांय सहर ले बाहरे निकरीकरी सबुदाय जीबा असन जयतून बोलबा डोंगरी ताने गला। आवरी तार चेलामन तार संगे गलाय। 40 हांयताने अमरीकरी हांय तीके बोलला, सयतान तोमके परिकिया करबादाय, पाप ताने ना पड़बादाय बोलीकरी पारतना करा। 41 असनी बोलीकरी पाचे हांय, गोटोक पोकना के जतक लापी पोकाय होयसी अतकीह लापी हांयमन ले अलगे जायीकरी मांडीकुटा टेकीकरी पारतना करला; 42 आवरी बोलला, ए बाबा तुय मन-करले ए दुकर बटका के मोर लगले गुचाव। तेबले बले मोर मन असन नाई; मातर तोर मनर असन होवो। 43 तेबे सरग ले गोटोक दूत हांके दका देला आवरी हांके बरसायला। 44 हांय कुबे बाय-बिकाल होयीकरी आवरी अदिक पारतना करला; आवरी तार पसना लवुर तिपा असन बूंय ने गसरते रला। 45 हांय पारतना करी उटलादाय, चेलामन लगे जायीकरी हांयमन मुरमुरा होयीकरी असकट ने सोयलाटाके दकला। 46 आवरी हांय तीके बोलला, तोमी काय काजे सोयबा आस? उटा आवरी परिकिया ने ना पड़बाराय बोलीकरी पारतना करा। 47 हांय गोटायतेच रलादाय, गोटोक रासक-लोक अमरलाय; आवरी बारा चेलामन बितर ले, यहूदा बोलबा गोटोक चेला, तिकर चोमे-चोमे आयला। हांय ईसु के चुमबा काजे हांतार लगे आयला। 48 मातर ईसु ताके बोलला, ए एहूदा काय तुय चुमीकरी मुनुसर -बेटा के दराय देबीयास? 49 तेबे हांतार संगे रला चेलामन होयबाटाके दकीकरी पोचारलाय, ए परबु काय हांमी कंडा ले मारबु ? 50 आवरी हांयमन तानले गोटोक महाप्रूर बड़े पूजारीर कमेयार बुजनी कान के कंडा ले काटी देला। 51 मातर ईसु टेबा, असन करबाटाके चाड़ी दियास ! बोली बोलला; आवरी हांय मानेर कान के चींयकरी ताके अचा करला। 52 पाचे ईसु, ताके दरबा काजे आसी रला महाप्रूर बड़े पूजारी मंदिरर राकाजागा करूमनर मुकियामन आवरी सियानमन के बोलला, काय काजे तोमी मोके गोटोक चोर-कंगार के दरबा असन कंडा आवरी टेंगा - बोड़गा के दरीकरी निकरलास ? 53 मुंय रोजे तोमर संगे मंदिर ने रली, अड़किदाय तोमी मोके ना दरलास! मातर एबर तोमर बेरा आवरी अंदारर हक आय। 54 हांयमन हांके दरीकरी, महाप्रूर बड़े पूजारीर गरे नेलाय। पतरस लापी दूरीया ले तिकर पीटी-पीटी गला। 55 हांयमन दुवारर मंजीगता जोय दरायकरी रूंडा होयी बसलादाय, पतरस बले तिकर संगे बसला। 56 तेबे गोटोक बूतीयारीन ताके जोय लगे बसलाटाके दकला आवरी ताके नियारीकरी बोलला, ए बले तो तार संगे रला। 57 मातर हांय, ए बाई मुंय हांके ना जानी बोलीकरी निंदरला। 58 डंडकर पाचे, गोटोक माने ताके दकीकरी बोलला, तुय बले तो हांतार संगर आस। मातर पतरस बोलला ए माने मंुय नु आंय। 59 आवरी कांई नोयले गोटोक गड़ीर पाचे, दुसर गोटोक माने सिरजीकरी बोलला, सते ए माने हांतरीची संगे रला कसनबलले ए बले गलीलर माने आय। 60 मातर पतरस बोलला, ए माने तुय काय बोलबी आस बोलते मुंय ना जानी ! हांय असन बोलतेची दलादाय, तुरते कुकड़ा बासला। 61 अड़किदाय परबु उलटीकरी पतरस के दकला। तेबे आजी कुकड़ा बासबार चोमें तुय मोके ना जानी बोलीकरी तीन हार निंदरबीस बोलते बोली रला परबुर गोट के पतरस सुरता करला; 62 पाचे हांय बाहरिया जायीकरी उमारी-उमारी कांदला। 63 आवरी ईसु के राका करते रला लोक, हांके हांसी पोकायकरी पेटलाय। 64 हांयमन हांतार आंकी के बांदीकरी तुय तो अंतरजानी आस; एबे हांमके सांग कोन तोके मारला? बोली हांके गोटमन के बोलीकरी तार इजित दरलाय। 65 आउर हाय मन खुबे आउर बले निदार गोट हान्तार बिरोध ने बलाय द्य 66 बेर उदलार पाचे, सियानमन, महाप्रूर बड़े पूजारीमन आवरी सासतर-पंडीतमन रूंडा होयीकरी तिकर पंच ने ईसु ने नेलाय; 67 आवरी पोचारलाय, तुय किरिस्त आस आले, हांमके सांग। तेबे हांय तीके बोलला, मुंय सांगले पने तोमी बिसबास ना करास; 68 आवरी मंुय तोमके कांई बले पोचारले, तोमी जुबान ना दियास। 69 मातर एब ले मुनुसर-बेटा, सबु ले सामरत बिता महाप्रूर बुजनी बाटे बसी रयसी। 70 तेबे हायमन सबु पोचारलाय, तेबे काय तुम महाप्रूर बेटा आस? तेबे हांय तीके बोलला, तोमी बोलबा असन मुयची आंय। 71 तेबे हांयमन, एबर हांमके साकीमनर जरूरत नी आय। हांमी निजे एतार टोंडले सुनलु आचु, बोली बोललाय।