20
गोटोक दिने, ईसु मंदिर ने सिकायते आवरी नंगत-गोट के सांगते रलादाय, महाप्रूर बड़े पूजारीमन आवरी सासतर-पंडीतमन, सियानमन संगे हांतार लगे आयलाय; 2 आवरी काय हक ने ए सबु के करबी आस? नोयले कोन तोके ए हक के देला ? हांमके तुय सांग बोली पोचारलाय। 3 तेबे हांय पोचारला, मुंय बले तोमके गोटोक गोट पोचारबी; मोके तोमी सांगा 4 एहुना देला बपतिस्मा, महाप्रू बाटले होयला नोयले लोकर बाटले होयला? 5 तेबे हांयमन एक दुसर ले गोटायलाय, महाप्रू, बाटले होयला बोलले, हांय बोलसी, तेबे तोमी काय काजे ताके बिसबास ना करलास ? 6 आवरी लोकर बाटले होयला बोलले, सबु लोक एहूना के अंतरजानी रला बोलते बिसबास करबा आत गुनुक हांमके सबु लोक पोकना संगे मारबाय बोलीकरी, 7 हांयटा काहार बाटले होयला बोलते हांमी ना जानू बोली बोललाय। 8 तेबे ईसु तीके बोलला, तेबे मंुय बले ए सबु के काहार हक ले करबी आची बोलते तोमके ना सांगी। 9 पाचे हांय, लोक के ए सिकानी कावनी के संागला; गोटोक माने गोटोक अंगुर बाड़ी लगायला; आवरी केतियारमन के तार गुता देयीकरी कुबे दिन काजे दुसर देस ने गला। 10 आवरी पाक टुटायबा बेरा अमरबाके, अंगुर बाड़ी तानले मोर बाटा क देबाय बोलीकरी, हांय मालिक आपना गोटोक कमेया के केतियारमन लगे पोटायला; मातर केतियारमन ताके मारपेटकरी चुचाय हाते पोटाय देलाय। 11 पाचे, हांय दुसर गोटोक कमेया के पोटायला; ताके बले हांयमन पेटीकरी इजीत दरी चुचाय हाते पोटाय देलाय। 12 आवरी पाचे, हांय गोटोक तीसर कमेया के पोटायला; तेबे हांयमन ताके बले लवुलुवानकरी केदी देलाय। 13 तेबे अंगुर बाड़ीर मालिक बोलला, एबर मुंय काय करबी? मंुय मोर लाडश्रा बेटा के पोटायबी होयके सके हांयमन तार इजीत करबाय। 14 मातर जड़कदाय केतियारमन हांके दकलाय, तेबे एक दुसरले सुतर होयलाय आवरी बोललाय, एई तो मालिकर बेटा आय; आसा हांके मोरते मारू, तेबे हांतार दनमाल हांके अंगुर बाड़ीर बाहरे जिकी नेयीकरी मोरते मारलाय। तेबे, अंगुर बाड़ीर मालिक तीके काय करसी? 15 हांय मन दाख र बाड़ी ले बाहरे निकराय करी मारलाय द्यई काचे दाख र बाड़ी र सोह्कार तिकर संगे कसन करसी 16 हांय आसीकरी हांय केतियारमन के मोरते मारीकरी अंगुर बाड़ी के दुसर लोक के सोपी देयसी। एटाके सुनीकरी लोकमन, असन केबे ना होयबार आय। बोलीकरी बोललाय। 17 मातर ईसु तीके दकीकरी पोचारला तेबे, जोन पोकना के मिसतीरीमन बाकनीकरी पोकाय रलाय; हांयची पोकना पाचे पाटीय ताने काम आयला। बोलीकरी दरम सासतर ने लिकला गोटर अरत काय आय ? 18 आवरी जोन हांय पोकना ऊपरे गसरसी, हांय चिरचपट होयी जायसी; आवरी जांहार ऊपरे हांय पोकना गसरसी हांय बिलबिला होयी जायसी। 19 अड़किदाय, महाप्रूर बड़े पूजारीमन आवरी सासतर-पंडीतमन हांमर इसाब ने ए सिकानी-कावनी के संागला बोलीकरी जानलाय; आवरी हांके दरबा काजे गतायते रलाय; मातर लोकमन के हांयमन डरलाय। 20 हांयमन ईसु के दरबा गत ने रलाय; आवरी हांके देवानर हंके सोपी देबा काजे तारा टांेडले गलती गोट दरबा काजे, आपना के अचा लोकमा दकायकरी गुपत कबर देबा लोक के ईसु लगे पोटायलाय। 21 हांयमन हांतार लगे आसीकरी पोचारलाय, ए गुरू, तुय बोलबाटा आवरी सिकायबाटा सत आय बोली हांमी जानु आवरी तुय सबु लोक के एक समान मानबी आस; आवरी महाप्रूर गोट के सते सिकायबी आस बोलीकरी हांमी जानु। 22 तुय एबर हांमके सांग, काय हांमके कयसर राजा के पटी देबार नियाव आय की नाई ? 23 तेबे हांय, तिकर चंद के जानीकरी तीके बोलला, 24 मोके गोटोक चांदीर पयसा के दकाहा। एताने काहार चापा आवरी काहार नांव आचे? तेबे हांयमन कयसर राजार चापा आय, बोललाय। 25 तेबे हांय तीके बोलला, जोनटाके कयसर राजा के देबार आय, हांयटाके कयसर राजा के आवरी जोनटाके महाप्रू के देबार आय, हांयटाके महाप्रू के दियास। 26 तेबे हांयमन लोकोर चोमें तार गोट ले गलती दरके ना सकलाय; मातर तार बोललाटाके सुनीकरी अचरित होयीकरी ओगाय होयलाय। 27 पाचे, मोरला तानले लोक आवरी जीवन ा उटेत बोली बोलते रला सदूकीमन बितरले कतक लोक हांतार लगे आसीकरी पोचारलाय, 28 ए गुरू, कोनी मानेर भाई बिया होयीकरी पिला टोकी ना पायीकरी मोरी गले, हांतार भाई तार बायले के बियाकरी तार भाई काजे पीला-टोकी पायबार आय बोलीकरील मोसा हंामर काजे लिकला आचे। 29 दका, सात भाई रलाय। हांयमन तानले पइल भाई बिया होयी, पिला-टोकी ना पायीकरी मोरी गला; 30 तेबे दुसर भाई आपना भाईर बायले के बिया करला; आवरी हांय पने पिला-टोकी ना पायीकरी मोरी गला 31 आवरी तीसर बले आपना भाईर बायले के बिया करला। असनी सात भाई ताके बिया करलाय आवरी पिला-टोकी ना पायीकरी मोरी गलाय। 32 सरासरी ने, हांय बायले बले मोरी गला। 33 तेबे असनी सात भाई ताके बियाकरी रबाके, लोक मोरला तानले जीव उटबादाय, हांय काहार बायले होयसी ? 34 तेबे ईसु तीके बोलला, ए जुगर लोक बिया करूवात आवरी बिया काजे देउवात; मातर जोन लोक हांय जुगर जीव के पायबा काजे आवरी मोरला तानले जीव उटबा काजे लइकर आचेत; हांयमन हांय जुग ने बिया ना करेत नोयले बिया काजे ना देयेत। 35 हांय जुगर जीवना के हांयमन सरगदूत असन रबाय; आवरी मोरके बले ना सकेत। हांयमन महाप्रूर पिला-टोकीमन आत। कसनबलले, हांयमन मोरला तानले जीवन उटलाय; 36 हांय जुगर जीवना के हांयमन सरगदूत असन रबाय; आवरी मोरके बले ना सकेत। हांयमन महाप्रूर पिला-टोकीमन आत। कसनबलले, हांयमन मोरला तानले जीवन उटलाय; 37 मोरला लोक जीव उटबा आत बोली मोसा बले दरम सासतर ने लिकला आचे। हांय, जोय दरते रला बूटार इसाब ने लिकलादाय, परबु के इबराहीमर महाप्रू, इसहाकर महाप्रू आवरी एकूबर महाप्रू बोली बोलसी आचे। 38 हांयमन सबुदाय काजे ना करलाय गुनुक, महाप्रू मोरला लोकर महाप्रू नु आय; मातर जीयबा लोकर महाप्रू आय; कसनबलले, सबु लोक तार काजे जीयबा आत। 39 अड़किदाय, एके सुनला सासतर पंडीतमन बितरले कतक लोक, ए गुरू तुय अचा सांगलीस। बोली बोललाय। 40 तार पाचे, हांयमन हांके आवरी कांई पोचारबा काजे दम ना करलाय। 41 मातर हांय तीके पोचारला, काय काजे लोक, किरिस्त के दाऊदर बेटा आय बोली बोलबा आत? 42 दाऊद आपनार गीतर किताब ने सांगसी आचे, परबु मोर परबु के बोलला, 43 तुय मोर बुजनी बाटे राज करबा काजे बस; आवरी मुंय तोर सतरूमन के हारायकरी तोर गोड़ तले आनबी। 44 दाऊद किरिस्त के, मोर परबु बोलसी आचे; तेबे किरिस्त कसन तार बेटा होयसी? 45 सबु लोक तार सुनते बोलला, 46 सासतर पंडीतमन ले चेता राहा हांयमन लोम चोगा पिंदीकरी बुलबा काजे हाटे जुवार के पायबा काजे, पारतना-गुड़ी तोने आवरी बोजी गरे बड़े ताने बसबा काजे मन करबा आत। 47 मातर हांयमन रांडी बायलेमन के टगीकरी तिकर गरर दन-माल के दरबा आत आवरी दुसर लोक दकबा काजे लोम लोम पारतना करबा आत; एमन कुबे डंड पायबाय।