8
हांय दिन मन ने जड़दाय आवरी बड़े भीड़ कूड़ा होयला, आवरी तीकर लगे कांई खयबा कजे ना रय, तेबे यीशु आंतार चेला मन के लगे आग देई तीके बल्ला, 2 “मोके ये भीड़ कजे तरस आयसी आचे, कसन बल्ले बरा बर तीन दिन तक मोर संगे आचेत, आवरी तीकर लगे कांई गोटा खयबा कजे नीआय | 3 अगर मोय तीके भूके घरे पटाय देबी, तो बाटे थाकी जीबाय; कसन बल्ले येमन कतक लोक दूर ले आय ला आत |” 4 आंतार चेला मन ताके जबाप देलाय, “ इति जारे अतक रोटी कोलग ले आन्बाय की ये मन तृप्त होअत?” 5 हांय तीके पचार ला, “ तमर लगे कटटा रोटी आचे?” हांय मन बललाय, “सात|” 6 तेबे हांय लोक मन के भुहिं ने बसबा कजे आदेस देला, आवरी हाँय सात गोटा रोटी धरला आवरी धन्यवाद देई करी टूटाय ला, आवरी अपनार चेला मन के देएते गला की तीकर चमें देवत आवरी हांय मन लोकर चमे देलाय| 7 तीकर लगे कीनिक मा सुरु मा माछ बल्ले रला; हांय धन्यवाद देई करी तीके बल्ले लोक मनर चमे देबा कजे बल्ला| 8 हांय मन खाई करी तृप्त होय लाय आवरी चेला मन बाच ला गोंदा के साथ टुकना बरी करी उठाय लाय| 9 आवरी लोक मन चार हजारर आस पास रलाय; तेबे यीशु तीके बिदा करला| 10 आवरी हांय तुरते अपनार चेला मन संगे डोंगा ने चेगी करी दलमनुता परदेस ने गला| 11 आवरी फरिसी मन आई करी यीशु संगे गोट गोटाय के मुराय लाय, आवरी ताके परक बा कजे ताके सरगगर चिना मांग लाय| 12 हांय अपनार मन ने हांह भरी बल्ला, “ये समयर लोक का्य कजे चिना डगरावात? मोय तमके सत्य सांग भी आचे की ये समयेर लोक मन कांई चिना ना मिर्सी|” 13 आवरी हांय तिके छाडी करी आवरी डोंगा ने चेग्ला आवरी हांय पाट गला| 14 चेला मन रोटी धरबार भुल्की रलाय, आवरी ना डोंगा ने तीकर लगे गोट्की रोटी रला| 15 हांय तीके सांगला, “ दका, फरीसी मनर खमीर आवरी एरोदेसर खमीर ले बाची करी राहा|” 16 हांय मन आपस ने गोट बात करी बल के मुराय लाय; हामर लगे रोटी निहाय|” 17 ये जानी करी यीशु तीके बल्ला, “तमी काय कजे आपस ने ये गोट बात कर बा आस की हामर लगे रोटी नाई? काय एबले ना जानला आस आवरी ना समझ ला आस? काय तमर मन कठोर होयला आचे? 18 काय आंकी रहु- रहू बल्ले ना दकास, आवरी कान रला ताने बल्ले ना सुनास? आवरी काय तमके सुरता निहाय 19 की जड़दाय मोय पांच हजार कजे पांच टा रोटी टूटाय रली तो तमी टुकड़ा मनर कतक भरी करी उठाय लास?” हांय मन ताके, “बारा टुकना|” 20 “आवरी जड़दाय चार हजार कजे सात गोटा रोटी रला तो तमी गोंदार कतक तुकना भरी करी उठाय रलास?” हांय मन ताके बल लाय, “सात टुकना|” 21 हांय तीके बलला, “काय तमी एबले ना जानला आस?”बैदसैदा ने गोटक अंधा के चंगा करबार 22 येमन बैदसैदा ने आय लाय; आवरी लोक गोटक आंधा के आंतार लगे आनलाय आवरी ताके बीनती करलाय की ताके छिव| 23 हांय कानार हाथ धरी करी गाँव ले बाहरे नेला, आवरी आंतार आंखी ने तुकी करी तार उपरे हाथ सोंगाय ला, आवरी ताके पचार ला, “काय कांई तोके दका देई सी आचे?” 24 हांय हाथ उटाय करी बल्ला, “मोय माने मन के दक बी आचे; हांय मोके इंड बा गच असन दका देहु आय|” 25 तेबे आय आवरी आंतार आंखी ने हाथ सोंगाय ला आवरी काना ने ध्यान ले दकला| हांय चंगा होयला, आवरी ठीक ठीक दकला| 26 हांय ताके ये बल्ली घरे पटाय ला, “ ये गाँव ने गोड बड़े ना आन|” 27 यीशु आवरी आंतार चेला केसिरिया फलिप्पीर गाँव ने गलाय| बाट ने हांय अपनार चेला मन के पचार ला, “लोक मोके काय बलु आत?” 28 हांय मन जबाप देलाय, “यहुन्ना बपतिस्मा देबा बीता;मतर कोनी कोनी एलिया आवरी कोनी कोनी बबिसबक्ता मन ले गोटक आय|” 29 हांय तीके पचार ला, “पर तमी मोके काय बलु आस?” पतरस ताके जवाब देला, “तू मसीह आस|” 30 तेबे हांय तीके जानी करी बल्ला की मोर बारे ने ये गोट कोनी के ना सांगा| 31 तेबे हायं तीके सिकाय के मुरायला कि मोनुसर बेटा काजे जरूर आय कि हायं खुबे दुक उठाओ, आउर सिआन मन आउर बड़े याजक, आउर सास्त्र पडू मन हांके तुच्छ समझीकरी मारोत, आउर हायं तिन दिनर पाचे जीव उठो | 32 हायं ऐ गोट तीके छुक छुका संगी देला | अतकी ने पतरस हांके अदरे नेई करी धमकायला | 33 मातर हायं उलटी करी आपनार चेला मन के दकला, आउर पतरस के धमकाय करी बल्ला, “हे शयतान, मोर छम ले गूच; कसनबल्ले तुय मापरूर गोट ने नाई मातर माने मनर गोट ने मन लगाऊ आस |” 34 हायं लोक रासी के आपनार चेला मन संगे लगे हाग देई करी तीके बल्ला, “जोन कोनी बले मोर पिटी-पिटी आयबा काजे मन करले, हायं आपना मन करबाटा के नाई, आउर आपनार कुरूस के उठाय करी मोर पिटी-पिटी आयबार आय | 35 कसनबल्ले जोन कोनी बले आपनार जीव के बाचायबा काजे होऊ आय हायं ताके भुलकू आय, मातर जोन कोनी बले मोर आउर सुसमाचार काजे आपनार जीव के देऊ आय हायं ताके बाचायसी | 36 आउरी मूनुक सबू सवसारर धन के पायले आउर आपनार जीव के ना बाचाय ले ताके काय लाभ मिरसी ? 37 मोनुस आपना जीवर पलटा ने काय देयके सक सी ? 38 जोन बले ऐ बेबीचारी आउर पापी जातीर मजीगता मोके आउर मोर गोट ले लाज होय सी, मुनुकर बेटा बले जड़ दाय हायं पवितर दूत मन संगे आपनार बुआर महिमा संगे आयसी, तेबे हायं मन के बले लाज होय सी |”