यीसू मसी गै खास चेलै यूहना गो लिखेड़ो दूसरो खत
यूहना गी ओर ऊं निमस्कार
1
1 मैं यूहना, बिस्वासी मण्डली गो मुखिया ओ खत लिखण लागरया हूं, बि लुगाई ऊं झिकी परमेसर चुणी ही अर बिंगा टाबरा गै नाम झिका नै मैं साच्चो प्रेम राखूं हूं, अर मैं ईं कोनी पण बे सारा प्रेम करै है झिका परमेसर ऊं आएड़ा है अर बे सच्चाई नै जाणै है।
2 मैं थानै प्रेम राखूं क्यूंकै बा सच्चाई झिकी आपणै में रेवै है अर सदा ई आपणै सागै रेवैगी।
3 परम पिता परमेसर अर परमेसर गो बेटो यीसू मसी आपां नै किरपा, दया अर सांती देवै अर सच्चाई, प्रेम सदा आपणै सागै रेवैगी। आमीन।
प्रेम अर सच्चाई
4 थारी बिस्वासी मण्डली गै कीं टाबरां नै बि सच्चाई झिकी आपां नै परम पिता ऊं मिली है बि तरियां जीवन जींवता देखगे मैं भोत राजी हूं।
5 अर मैं थानै अब दुबारै याद कराऊं कै आपां नै आपसरी में प्रेम करणो चईयै। मैं थानै कोई नुई आग्या कोनी पण बि आग्या नै लिखण लागरयो हूं, झिकी आपां नै आदि काल ऊं मिली है।
6 प्रेम गो मतलब ओ ई है कै आपां बिंगी आग्या पर चालां। आ बाई आग्या है झिकी थे सरू में ई सुणी है कै थानै प्रेम गै सागै चालणो चईयै।
7 संसार में भोत ई भटकाण आळा है। झिका ओ कोनी मानै कै ईं धरती पर आदमी गै रूप में यीसू मसी आयो हो, बे भटकाण आळा है अर मसी गा दुसमण है।
8 आपगै बारै में सावधान रेवो। अर झिकी मेनत म्हे करी है बिनै थे गमा ना देईयो, पण थे बिंगो पूरो प्रतिफळ पावो।
9 झिको कोई भोत दूर उड़ग्यो है अर मसी गै बारै में बणयो कोनी रेवै, परमेसर बिंगै कनै कोनी है अर झिको बिंगी सिक्सा में बणयो रेवै है, पिता परमेसर अर बिंगो बेटो यीसू मसी दोनूं ईं बिंगै सागै है।
10 जे कोई थारै कनै आ'गे ओ संदेस कोनी देवै है तो आपगै घरै बिंगो आदर सत्कार ना करो अर बिंगै स्वागत में निमस्कार बी ना बोलो।
11 क्यूंकै झिको हिस्या आदमी गो निमस्कार करै है, बो बिंगै बुरे कामां में भागिदार बणै है।
आखरी निरदेस
12 थानै लिखण नै मेरै कनै भोत सारी बातां है पण बानै मैं कागज अर स्याई ऊं कोनी लिखणो चाऊं। पण मनै भरोसो है कै थारै कनै आ'गे आमै-सांमै बेठगे बातां करूंगा। झिकै ऊं आपणी खुसी पूरी होवैगी।
13 तेरी चुणेड़ी भेन गा टाबर थानै निमस्कार केवै है।