यीसू मसी गै खास चेलै पतरस गो लिखेड़ो दूसरो खत
पतरस गी ओर ऊं निमस्कार
1
1 मैं समौन पतरस यीसू मसी गो सेवक अर खास चेला गी ओर ऊं, म्हारै बरगा खास अर आच्छा बिस्वास करण आळै लोगां नै ओ खत लिखण लागरयो हूं। बो बिस्वास थानै ईंखातर दियो है कै आपणो परमेसर अर मुकतीदाता यीसू मसी गी भलाई अर धारमिकता पर थे बिस्वास करयो।
2 परमेसर गी ओर ऊं अर आपणै यीसू गै पेहचाण गै द्वारा थानै परमेसर गी किरपा अर सांती ओर बोळी मिलती रेवै।
प्रभु गो बुलाणो अर चुणयो जाणो
3 आपां आपणै जीवन खातर परमेसर नै किंया माना जिंया बो चावै ईंखातर परमेसर आपगी सामरथ गै द्वारा आपां नै सारो कीं दियो है। क्यूंकै आपां बिनै जाणा हा झिकै आपां नै आपगी मेमा अर धारमिकता गै अनुसार बुलाया है।
4 इंगै द्वारा परमेसर आपां नै बे म्हान अर आच्छा वरदान दिया है झिका बण आपां नै देण गो वाय्दो करयो है। बिंगै द्वारा थे आप परमेसर गै सभाव बरगा होज्यो अर मसी पर बिस्वास ना करण आळै लोगां जिसा बुरा काम ना करो।
5 अर ईंखातर थे सारी तरियां गी कोसिस कर'गे आपगै बिस्वास पर सदगुण अर सदगुण पर आच्छी समझ।
6 अर आच्छी समझ ऊं बुरे काम नै छोड़गे आच्छो काम करण गी सोच अर बिऊं धीरज अर धीरज ऊं भगती।
7 अर भगती ऊं भाईचारो अर बिऊं प्रेम बी बडतो जावै है।
8 अर आ गुणां गी बडोतरी थारै में होवै है तो थानै आच्छा कामयाब बणा देसी। बिऊं थानै आपणै प्रभु यीसू मसी गो सारो ग्यान मिलसी।
9 पण कोई बी आदमी ईं तरियां ना जीयै तो बो एक आंधो है अर बो भूलग्यो कै बिंगा पेली आळा करेड़ा पाप परमेसर माफ कर दिया।
10 ईंखातर हे भाईयो अर भेनों, ओ दिखाण खातर उणतावळ करो कै थानै परमेसर बुलाया अर चुणया है क्यूंकै ऐ बातां करता रेओगा तो कदी ठोकर कोनी खाओगा।
11 ईं रीति ऊं आपां आपणै प्रभु अर मुकती देण आळै यीसू मसी गै अनन्त राज में बडे आदर समान ऊं जा सकांगा।
पतरस गो आखरी टेम
12 ईंखातर जे थारै में ऐ बातां है अर झिको सच्चाई गो बचन थानै दूसरा ऊं मिल्यो है बिमै थे बणया रेवो। फेर बी ऐ बातां मैं थानै याद दिरावंतो रेस्यूं।
13 मैं चाऊं कै जद तांई मैं जींवतो रेऊं ऐ बातां लगातार बतावंतो रेऊं जिऊं थे ईं बात नै भूल ना जाओ।
14 अर मैं जाणूं हूं कै मैं जल्दी मरण आळो हूं। क्यूंकै आ बात मनै प्रभु यीसू मसी गी पेला ई बताएड़ी है।
15 ईंखातर मैं हर तरियां गी कोसिस करतो रेऊं कै मेरै मर जाणै गै बाद बी थे लोग ऐ बातां याद राख सको।
मसी गी मेमा
16 आपणै प्रभु यीसू मसी गै दुसर आण गै बारे में बताएड़ी बातां चापलूस अर मनगड़त कोनी क्यूंकै म्हे यीसू मसी गी सामरथ आपगी आंख्या ऊं देखी।
17 जद बिनै परमेसर पिता कनूं आदर मान मिल्यो अर परमेसर झिको सारा ऊं मोटो है, बिंगी एक आवाज आई कै ओ मेरो लाडलो बेटो है। मैं इऊं भोत खुस हूं।
18 जद म्हे प्रभु गै सागै परमेसर गै पवितर पहाड़ में हा जद सुरग ऊं परमेसर गी आवाज म्हे सुणी।
19 परमेसर गी बात बताण आळा गै द्वारा लिखेड़ी हर एक बात सच्च है। आ बात आपां सारा जाणां हा। ईं पर ध्यान देगे थे बी सारा आच्छा काम करण लागरया हा क्यूंकै ओ तो एक चानणो है झिको एक अंधेरे में चमकण लागरयो है। जद तांई सांझ होवै अर थारै मना में दिनगे गै तारा गो उगणो होवै।
20 थे ओ जाणल्यो कै पवितर सासतर गी कोई बी बात परमेसर गी बात बताण आळा गी मन घड़त क्हाणी कोनी।
21 परमेसर गी बात आदमी गी आपगी बात कोनी होवै पण पवितर आत्मा गी ओर ऊं आदमी परमेसर गी बात बोलै।