बिस्वासी मण्डली गा अगुवा लोग अर जवान लोगां नै संदेस
5
1 हे बिस्वासी मण्डली गा अगुवा लोगों, मैं थानै ओ खत लिखगै होसलो देवूं कै मैं बी एक अगुवो हूं। यीसू मसी गै दुख गो गवाह बी हूं अर बिंगै दुसर आण गै टेम परगट होण आळी मेमा में बिंगै सागै सहभागी बी होऊंगा।
2 जिंया गुआळियो भेड़ां नै संभाळै इंया थे बी परमेसर गै लोगां गी रुखाळी करो। ओ काम परमेसर नै खुस करण खातर पूरै मन ऊं करो। किंगैई केण पर ना करो। अर ना ओ काम धन गै लालच में करो पण सेवा समझ गै करो।
3 झिका लोग परमेसर थानै दिया है बानै संभाळ अर बा पर कोई दबाब ना बणा। पण बा पर एक नमुनो बण।
4 यीसू मसी झिको सारा गो एक मोटो गुवाळियो है। बो आण गै टेम थानै मेमा गो एक मुकुट देवैगो झिकै गी सोभ्या कदी खत्म कोनी होवैगी।
5 ईंतरिया जवानों, थे बी बिस्वासी मण्डली गै अगुवै लोगां गै अधीन में रेओ। एक दूसरै गी अधीनता में रेगे सेवा करो। क्यूंकै
“परमेसर घमण्डी लोगों गो बिरोध करै
पण नम्र लोगां नै आसिस देवै।”a
6 ईंखातर परमेसर गी ताकत आळै हात गै नीचे रेओ। बो सई टेम आण पर थानै ऊंचा करसी।
7 थे आपगी सारी चिंता बि पर छोड़दयो क्यूंकै बो थानै संभाळण आळो है।
8 चेते में रेओ अर ध्यान राखो कै थारो बिरोधी सैतान एक सैर गी तरियां इंया फिरतो रेवै कै किनैई मार खाऊं।
9 थे बिस्वास में मजबूत होगे सैतान गो सामणो करो। थानै ठा है कै दुनिया में दूसरा बिस्वासी बी इंया दुख झेले।
10 परमेसर आपगी दया सगळा पर करै। ईंखातर यीसू मसी गै द्वारा थानै अनन्त जीवन देण खातर मदद करी। थोड़ी देर खातर थे जे दुख झेलो तो परमेसर थानै पूरी तरियां मजबूत करेगो।
11 परमेसर गी सकती सदा इंया ई होवंती रेवै। आमीन।
आखरी संदेस
12 भाई सिलवानुसbc ओ खत लिखण में मेरी मदद करी। मैं बिनै प्रभु गो एक बिस्वास योग्य चेलो समझ्यो। मैं थानै होसलो देऊं कै परमेसर कितो दयालु है कै थे सारा बिंगै उपर बिस्वास राखो।
13 बेबिलोण सैहरd गी बिस्वासी मण्डली झिकी नै थारी तरियां परमेसर चुणी है, थानै निमस्कार केवै है। मसी में मेरो बेटो मरकुसe बी थानै निमस्कार केवै।
14 प्रेम ऊं लाड़ कोड़ कर'गे एक दूसरै नै निमस्कार केओ। थे सारा झिका यीसू मसी में हो, थानै सांती मिलती रेवै। आमीन।