याकूब 2

पक्सपात गै विरुद्ध चेतावनी

1 हे मेरा भाईयो अर भेनों, आपणो आदर मान प्रभु यीसू मसी में झिको थारो बिस्वास है, बो पक्सपातपूर्ण ना होवै। 2 जे थारी सतसंग घर में एक अमीर आदमी सोनै गी मुदडियां अर आच्छा गाबा पेरगे आवै है अर एक गरीब आदमी गंदा गाबा पेरगे आवै है, 3 अर थे झिको आच्छा गाबा पेरेड़ो है बिनै आदर देवंता होया केवो है, “तूं मेरै कनै बेठ जा” अर बि गरीब आदमी नै केवो है, “तूं बठै ई खडयो रे।” 4 इंया करता होया के थे आपसरी में भेदभाव कोनी करयो है अर बुरा विचारां गै सागै न्याय करण आळा कोनी ठेरया?

5 हे मेरा प्यारा भाईयो अर भेनों, सुणो के परमेसर ईं संसार गै गरीबा नै कोनी चुणया कै बिस्वास में धनी अर बि सुरग राज गा अधिकारी होवै झिकी वाचा बण आपगै प्रेम करण आळा ऊं बाधी है? 6 पण थे बि गरीब आदमी गी बेजती करी है कै धनी लोग थारै पर जुलम करै अर बे थानै कचेरी में घीस घीस गै कोनी लेजै के? 7 बे ई कोनी है के, झिका मसी गै बि उतम नाम गी निंदा करै है, झिको थानै दियो ग्यो है।

8 जे थे पवितर सासतर में मिलण आळै नेम गो सच्चै मन ऊं पालण करो हो तो थारै पडोसी ऊं बिंया ई प्रेम करो जिंया थे आपणै आप ऊं करो। 9 जे थे पकसपात करो तो थे पाप करो हो। थे नेम विधान नै तोड़ण आळा बणोगा। 10 क्यूंकै जे कोई सगळा नेमां गो पालण करो हो अर एक ई बात में चुक जावो तो बो सगळा नेमां गो दोसी मानयो जावै है। 11 क्यूंकै झिको सारा नेमां नै बणायो है, ओ ई परमेसर केयो है, “थे बेबीचार ना करियो,” बण ओ बी केयो, “थे हतया ना करियो,” जे थे बेबीचार कोनी करयो अर थे हतया करो हो तो थे नेम विधान नै तोडण आळा हो। 12 थे बा लोगा गी तरियां बोलो अर बा लोगा गै बरगो बरताव करो झिका गो बि नेम विधान गै अनुसार न्याय होणो चईयै झिकै ऊं छुटकारो मिलै है। 13 झिको दयालु कोनी, बिंगै खातर परमेसर गो नयाय बी बिना दया गो हो'सी। पण दया न्याय पर जीतै है।

बिस्वास अर करम

14 हे मेरा भाईयो अर भेनों, जे कोई आदमी केवै है कै मनै बिस्वास है पण तो बिगों के फयदो है? बिंगा काम बिस्वास गै सागै ना होवै हिस्यो बिस्वास बिंगो उद्धार कर सकै है के? 15 जे एक भाई अर भेन नै गाबा गी जरूरत होवै अर बांगै कनै खाण तांई कीं ना होवै, 16 अर थारै ऊं कोई बिनै केवै, “सांती ऊं जावो, परमेसर थारो कलयाण करै, थे अपणै आपनै गरम राखो अर आच्छी चिजां खावो।” पण जद थे बिंगै सरीर गी पेरनै गी जरूरी चिजां ना देवो तो इंगो के फायदो है? 17 ईंखातर जे बिस्वास गै सागै काम कोनी करो तो बो अपणै आप में मरेड़ो है।

18 पण कोई केवै, “थानै बिस्वास है अर मनै काम है।” थे बिना काम गै सागै आपगो बिस्वास मनै दिखाओ अर मैं थानै आपणो बिस्वास आपगै काम गै सागै दिखाऊंगा। 19 थानै बिस्वास है कै परमेसर एक ई है। अर ओपरी बी बिस्वास करै अर घबरावै है। 20 अरै मूरख। तनै के सबूत देऊं कै करम बिना बिस्वास कोई काम गो कोनी? 21 जद महारै बाप अबरहाम आपगै आपगै बेटै इसहाक नै बेदी पर चढायो तो बो करमा ऊं धारमिक कोनी ठेरैयो कै? 22 तूं देख कै बिगों ओ बिस्वास कामां ऊं दिख्यो अर बिगों कामा ऊं बिस्वास पूर्ण होयो हो। 23 ईं तरियां सासतर गो केईड़ो पूरो होयो, अबरहाम नै परमेसर पर बिस्वास करयो अर बिस्वास गै उपर ई बो धरमी ठेरयो। बो परमेसर गो बेली कुहायो। 24 ईंखातर थे देखो कै एकलो बिस्वास ऊं कोनी पण आपगै कामा ऊं आदमी धरमी ठेरायो जावै है।

25 ईं तरियां राहब वेसया बी बि टेम आपगै करमा ऊं धरमी ठेरी जद बण दूता नै आपगै घर में सरण दी अर फेर दूसरै रा ऊं कठैई घाल दिया।

26 जिंया बिना आत्मा ऊं सरीर मरेड़ो होवै है बिंया ईं बिस्वास बिना काम ऊं मरेड़ो है।