यीसू मसी गै खास चेलै याकूब गो लिखेड़ो खत
स्वागत
1
1 मैं याकूब, परमेसर अर प्रभु यीसू मसी गै दास गी ओर ऊं संसार गै न्यारा न्यारा इलाका में फैलडी बारा जातियाa नै निमस्कार पुगाऊं।
बिस्वास अर बुद्धिमानी
2 हे भाईयो अर भेनों, जद थारै पर कीं तरियां गो दुख आवै तो बिनै पूरी खुसी गी बात समझो।
3 क्यूंकै थे जाणो हो कै परीक्सा गै टेम बिस्वास करां हा तो बिऊं धीरज पैदा होवै है।
4 धीरज नै थारै उपर पूरो काम करण देवो कै थे पूरा अर सिद्ध हो जावो अर झिकै में कोई कमी कोनी रेवैगी।
5 जे थारै में बुद्धी गी कमी है तो परमेसर कनूं मांगो बो थानै खुसी ऊं अर उदारता गै सागै दयगो।
6 पण बिस्वास ऊं मांगो अर मन में इंया ना सोचो कै थानै मिलसी या कोनी क्यूंकै आ सोचण आळो समुन्दर गी लेहरा गै समान होवै है झिकी पून ऊं उछळै है।
7-8 हिस्यो आदमी ओ ना समझै कै प्रभु कनूं मनै कीं मिलसी, अर हिस्यो आदमी दो घोड़ा पर सवार है अर आपगे कोई काम में मन कोनी लगावै है।
9 गरीब भेन भाई आपगै ऊंचै पद पर घमण्ड करै क्यूंकै बांगो नाम परमेसर ऊंचो करयो है।
10 अर धनी भेन भाईयां नै आपगै निची दसा पर घमण्ड करणो चईयै, क्यूंकै बे फूल गी तरियां जड जयगा।
11 सूरज निकलता ई बिंगो तावड़ो इतो तपै है कै बुटो सुक जावै है, बिंगो फूल जड़ जावै है अर बिंगी सुनदरता खराब हो जावै है। इंया ई धनवान आदमी आपगै रा पर चालतो एक दिन माटी में मिल जावै है।
परखणो अर लालच करणो
12 धन्य है बो आदमी झिको परीक्सा गी घड़ी में खडयो रेवै है क्यूंकै परीक्सा में खरो उतरण गै बाद बो जीवन गै बि जीतण गो मुकट नै पेरैगो झिको परमेसर आपगै प्रेम करण आळा नै देण गो वायदो करयो है।
13 जद कोई कोजो काम करण गै टेम परीक्सा आवै तो बो ओ ना केवै कै मेरी परीक्सा परमेसर भेजी है क्यूंकै बुरी बाता में परमेसर गो कीं लेणो देणो कोनी बो किंगी परीक्सा कोनी लेवै।
14 हर कोई आदमी आपगी बुरी बातां, बुरा बिचार अर बुरी इच्छा में फस गै ई परीक्सा में पडै़ है।
15 जद बिंगा बुरा बिचार ऊं पाप पैदा करै है जद पाप बोळो हो जावै तो मोत नै पैदा कर देवै है।
16 मेरा प्यारा भाईयो अर भेनों, धोखै में ना रेवो।
17 सारा आच्छा दान अर आच्छा उपहार उपर ऊं मिलै है अर बे बि परम पिता गै ओर ऊं झिकै आसमान गो चानणो पैदा करयो है ना बिनै अदळ बदळ करयो जा सकै है अर ना बि पर अदळ बदळ गी छिया पडै़ है।
18 परमेसर सच्चाई गै संदेस गै द्वारा आपगी उळाद बणाण गै खातर आपां नै चुणया है कै आपां सारा जीवां गै बिचाळै बिंगी फसल गा पेलां फळ होवां।
सुणनो अर करणो
19 हे मेरा प्यारा भाईयो अर भेनों याद राखो, हरेक नै सुणन में तैयार रेणो चईयै, बोलण में उंतावळ ना करो, रीस करण में बी उंतावळ ना करो
20 क्यूंकै आदमी गी रीस ऊं परमेसर गी धारमिकता कोनी पैदा होवै।
21 ईंखातर हर बुरो चाल चलण अर च्यारूंमेर फेलेडै़ बैर ऊं दूर रेवो अर दीनता गै सागै थारै मना में सोंपेडै परमेसर गै बचन नै ग्रहण करो झिको थारै प्राणा गी मुकती मिल सकै है।
22 परमेसर गी सिक्सा पर चालण आळा बणो ना कीं सुणण आळा जे थे सुणण आळा ई हो तो थे अपणै आपनै धोखो देण लागरयो हो।
23 जे कोई परमेसर गी सिक्सा नै सुणै है अर बि पर चालै कोनी तो बो बि आदमी बरगो है झिको आपगो मूं सिसै में देखे है।
24 बो अपणै आपनै आच्छी तरियां देखे है पण जद बठूं उड़ज्य है तो बेगो ई भूल जावै है कै बो किस्यो हो।
25 पण झिको परमेसर गी पूरै नेमा नै मनण खातर आच्छी तरियां सीख लिया है झिकी ऊं आजादी मिलै है अर आपणै काम पर आसिस मिलैगी कै सुण गै बिनै भूले बिना आपगै जीवन में लागू करै है अर बिंया आपणै आपगै कामा गै खातर परमेसर गै द्वारा धन्य होवैगो।