इफिसुस 6

मा बाप अर टाबर

1 हे टाबरों, थे प्रभु गा हो, ईंखातर आपगै मां बाप गो आदर मान करो अर बांगी आग्या नै मानो। इंया करणो आच्छी बात है। 2-3 आपगै मां बाप गो आदर मान करो कै थारो भलो होवै, अर थे धरती पर भोत टेम जींवता रेवो। ओ परमेसर गो पेलो नेम है झिकै गै सागै एक वाय्दो बी मिलै है।

4 हे मां बाप, थे आपगै टाबरां नै रीस आण गो कोई बी काम ना करो। पण बानै प्रभु ऊं मिलेड़ी सिक्सा दयो अर चेता गै आच्छी तरियां पालण करो।

मालिक अर दासां खातर संदेस

5 गुलामी में रेण आळा लोगो, थे आपगै ईं दुनियां गा स्वामी लोगां गै डर गी सागै आदर मान करो जियां थे मसी गा आग्या नै मानै हो। 6 थे लोग खुद नै देखण आळा नै खुस करण खातर कीं ना करो, पण मसी गै दास गै रूप में पूरै मन ऊं परमेसर गी इच्छा पर चालो। 7 थे लोग प्रभु गै खातर काम करो हो पण माणस खातर कोनी, आ समझ गै खुसी गै सागै पूरी मन ऊं काम करो। 8 क्यूंकै थे जाणो हो कै झिको कोई आच्छो काम करणो चावै बो गुलामी या आजादी, प्रभु ऊं बिनै बिंया ई फळ मिलैगो।

9 हे मालिको, थे बी आपगै अधीन में रेण आळा गै सागै बियां ई करो, बानै डरा ना अर धमकावो ना। थे याद राखो, थारो अर बांगो मालिक सुरग में है अर बो किंगी ई पक्सपात कोनी करै।

आत्मिक लडाई गा हथियार

10 आखर में, मैं ओ केणो चावूं, थे लोग प्रभु गै सागै अर बांगी ताकत ऊं बलवन्त हो जाओ। 11 परमेसर गा सारा हथियार लेल्यो कै थे सैतान गी योजना ऊं सामणो कर सको। 12 क्यूंकै आ आपणी लडाई माणसा ऊं कोनी पण प्रधान, अधिकारिया अर ईं संसार गै अंधकार गै हाकिमा ऊं अर सैतान गी आत्मिक सेनावा ऊं हो झिकी आकास में है। 13 ईंखातर परमेसर गा सारा हथियार बांध ल्यो कै जिऊं बुरा दिना में सामणो कर सको अर सारो कीं कर'गे खड़या रे सको। 14-16 अर सच्च ऊं आपगी कमर कसगे अर धारमिकता गो कोट पेर गै अर पगा में मेळ गै सुब समाचार गी तैयारी गा जूता पेरगे अर सारा सागै बिस्वास गी ढाळ लेगे खड़या रेवो, जिऊं थे बी दुस्ट सैतान गा जगता तीरा नै बुझा सको। 17 अर मुकती गो टोप, अर आत्मा गी तलवार झिकी परमेसर गो बचन है बिनै सागै लेल्यो। 18 हरेक टेम अर हरेक तरियां ऊं आत्मा में पराथना करता रेवो अर ईंखातर ई जागता रेवो कै सारा पवितर लोगा खातर लगातर पराथना करता रेवो। 19 अर मेरै खातर बी, कै मनै बोलण गै टेम हिस्यो प्रबल बचन देईजै कै होसले गै सागै यीसू मसी गै सुब समाचार गी लुकेड़ी बात बता सकूं। 20 झिकेगे खातर मैं जेळ में सांकळा में बांदेड़ो यीसू मसी गी ओर ऊं बोलण आळो राजदूत हूं अर मनै झिको कीं बोलणो होवै बो होसले ऊं बोल सकूं।

आखरी निरदेस

21 ऐ सारी बात मेरो बेली अर प्रभु गै सागै मोटै बिस्वास गै सागै काम करण आळो तुखिकुस थानै सारो कीं बतासी कै थे बी मेरी हालत नै जाणो कै मैं किंया हूं अर के करण लागरयो हूं। 22 ईंखातर मैं बिनै थारै कनै घालूं क्यूंकै थे मेरी हालत जाण सको अर थारै मन नै सांती मिल सकै। 23 हे भाईयो अर भेनों, थानै पिता परमेसर अर प्रभु यीसू मसी गी ओर ऊं सांती अर बिस्वास गै सागै प्रेम बी मिलै। 24 झिको प्रभु यीसू मसी पर साच्चो प्रेम राखै, बा सारा नै परमेसर गी किरपा होवंती रेवै।