रोमी 15

बिस्वास में कमजोर लोगां गी उन्नती करणी

1 आपां झिका बिस्वास में पक्का लोग हा अर झिका लोग बिस्वास में कमजोर है बांगै सागै धीरज ऊं बांगी मदद करणी चईयै अर अपणै आपनै राजी करण खातर कीं ना करो। 2 आपणै में हर एक आदमी गो फरज बणै कै दूसरै हर एक भाई भेना गो बिस्वास नै पक्का करणा चाइयै अर बांगी भलाई कर'गे बानै राजी करणो बी चईयै। 3 क्यूंकै मसी अपणै आपनै राजी कोनी करयो। पवितर सासतर में इंया लिखेड़ो है कै, “हे परमेसर झिकी बुरी बात लोग थानै बोलता हा, बाई बात मेरै खातर बोलै है।” 4 पवितर सासतर में झिकी बात पेला लिखेड़ी है बे सारी बाता म्हानै सिखाण खातर है। ऐ बाता म्हारी धीरज अर होसलो भदाण खातर मदद करै है अर झिकी वायदो परमेसर पवितर सासतर में म्हानै दियो बि पर आस राखण में बी मदद करै है।

5 परमेसर थानै धीरज अर होसलो बढाण गी मदद करी है बो ई परमेसर थानै दूसरै गै सागै एक मन होगे रेण खातर मदद करै है जिंया यीसू मसी आपां नै कर'गे दिखायो। 6 कै अब थे सगळा एक सागै मिलगे एक ई मन ऊं आपणै प्रभु यीसू मसी गै पिता परमेसर नै आदर मान देणो चईयै।

यीसू मसी गो सुब समाचार सारा खातर

7 ईंखातर मेरा भाईयो अर भेनो, जिंया यीसू मसी परमेसर नै आदर मान देण खातर थानै अपनाया बिंया थे बी एक दुसर नै अपनाओ। 8 मैं थानै एक बात बताऊं हूं कै परमेसर यहुदी लोगा गै बडेरा सागै झिको वायदे करयो हो बिनै पक्को करण खातर यहुदी लोगा में मसी बांगो सेवक बणग्यो। 9 अर गेर यहुदी लोग बी दया गै कारण परमेसर गो आदर मान करै। पवितर सासतर में इंया लिखेड़ो है कै,

“मैं गेर यहुदी लोगा मैं तेरो धन्यवाद करूंगा

अर तेरै नाम गो भजन गाऊंगा।”

10 पवितर सासतर में इंया बी लिखेड़ो है, “थे गेर यहुदी लोगो परमेसर गा चुणेड़ै यहुदी लोगा सागै रळगे खुसी मनाओ।”

11 अर फेर बी परमेसर गा बचन में इंया लिखेड़ो है,

“हे गेर यहुदी लोगो प्रभु गी आराधना करो

अर धरती पर रेण आळी सारी जाती गा लोगो थानै बिंगी आराधना करणी चईयै।”

12 पवितर सासतर में परमेसर गी बात बोलण आळो यसयाह बी इंया केवै है,

“यिसै गी पीढी ऊं एक राजा पैदा होवैगो

अर बो संसार गै गेर यहुदी लोगां पर राज करसी अर बे सारा बि पर आस बी राखसी।”

13 मैं चाऊं हूं कै सारा नै आस देण आळो परमेसर थारै लोगां गै बिस्वास गै द्वारा थारै मन में सांती अर खुसी देवै, कै पवितर आत्मा गी ताकत ऊं झिकी आसा थानै है बा ओर बी बोळो होवंती जावै।

गेर यहुदियां खातर खास चेले पौलुस गी सेवकाइ

14 मेरै भाईयो अर भेनो, मैं जरूर जाणूं हूं कै, थे भोत भलाई ऊं भरेड़ा आच्छा लोग हो। परमेसर कनूं मिलेड़ी सिक्सा गै बारे में थानै भोत ग्यान है। ईं ग्यान गै द्वारा थे दूसरै लोगा नै सिखा सको हो कै, के गळत अर के सई है? 15-16 मैं थानै कीं ओर याद कराण खातर बडी हिम्मत गै सागै ओ खत लिखूं हूं। ओ बि किरपा गै कारण होयो झिकी परमेसर मनै दी है कै मैं गेर यहुदी लोगा गी बिचाळै मसी यीसू गो सेवक बणगे एक याजक गै रूप में परमेसर गी सुब समाचार गी सेवा करूं। ईंखातर मैं बा लोगा नै परमेसर गै सामे एक बलिदान गै रूप में ल्या सकूं झिकेऊं परमेसर खुस होवै क्यूंकै बे लोग पवितर आत्मा गै द्वारा सुद्ध हो'ज्य।

17 क्यूंकै मनै आपणै पर धमण्ड करण में कीं बी सरम कोनी आवै क्यूंकै यीसू मसी गी मदद ऊं परमेसर गी सेवा करूं हूं। 18-19 मेरै द्वारा यीसू मसी गेर यहुदी लोगा में झिका बी काम करया बानै छोडगे ओर कोई बी बात बोलण गी हिम्मत मेरै कनै कोनी। गेर यहुदी लोगां बी यीसू मसी गी बातां मानण खातर मेरै द्वारा बोलेड़ा बचन सुणगे अर पवितर आत्मा गी ताकत ऊं मेरै द्वारा करेड़ा निसानी अर चमत्कार देखगे बा लोगा बिस्वास करयो। इंया कर'गे मैं यरुसलेम सैहर ऊं लेगे इल्लुरिकुम प्रेदेस तांई मसी गो सुब समाचार सारै लोगां नै पूरी तरियां सुणायो। 20 मैं हिसी जिग्या में जा'गे सुब समाचार गो परचार करणो चाऊं जठै अजे तांई मसी गो नाम कोनी लियो। इंया ना होवै कै जिंया केई दूसरा गी खोदेड़ी नीव पर घर बणाणो चावै है बिंया ईं दूसरा गै करेड़ै परचार पर चालगे परचार करण में मैं कोनी चाऊं। 21 पवितर सासतर में लिखेड़ी योजना गै अनुसार मैं चालूं, सासतर में इंया लिखेड़ो हो,

“झिका लोगा नै बांगै बारे में कोनी बतायो बे लोग बांगै बारे में दिखैगा,

अर झिकै लोगा कदी बी बांगै बारे में सुणयो कोनी बे लोग बानै समझेगा।”

रोम गी यातरा में पौलुस गी योजना

22 जठै अजे तांई सुब समाचार कोनी सुणायो गेयो मैं बठै जा'गे सुब समाचार भोत टेम तांई सुणायो। ईंखातर थारै कनै आण में देर लागगी।

23-24 अब मैं आ सारा प्रदेस में सुब समाचार सुणाण गो काम पूरा कर दियो। ईंखातर मैं जद स्पेन देस में जाण गै टेम थारै कनै रुकूंगा क्यूंकै थारै कनै आ'गे थारै मिलण गी मेरी इच्छा भोत साला ऊं ही। ईंखातर जद मैं थारै कनै कीं दिन खुसी गै सागै रेण गै बाद मनै आस है कै मेरी आ'गे गी यातरा में बी थे मनै मदद करोगा। 25-26 पण मैं अब यरुसलेम सैहर गै बिस्वासी लोगा गी सेवा करण खातर बांगै कनै जाण लागरयो हूं क्यूंकै मकदुनिया अर आखया गै बिस्वासी लोगा यरुसलेम सैहर गै परमेसर गै पवितर लोगा नै देण खातर मनै कीं दान बी दियो है। 27 बा लोगा झिको दान दियो बड़ी खुसी गै सागै दियो क्यूंकै ओ देण खातर बे यरुसलेम गै बिस्वासी लोगा गै करजदार हा। यहुदी बिस्वासी लोगा कनूं गेर यहुदी लोगा परमेसर गी बाता सुणी ही। ईंखातर बानै संसारिक बाता में बांगी मदद करणी चईयै ही। 28 ईंखातर मेरो बो काम पूरा कर'गे अर झिको दान कठो करयो है बो बानै देगे स्पेन जावंता टेम थारै माखर जाऊंगा। 29 मैं इंया जाणूं हूं, मैं जद बठै आऊंगा तो आपां सारा नै मसी गी पूरी आसिस मिलैगी।

30 मेरा भाईयो अर भेनो, आपां सारा प्रभु यीसू मसी पर बिस्वास करा हा। मैं थारूं पवितर आत्मा गै द्वारा मिलेड़ै प्रेम ऊं बिनती करूं हूं। मेरै सागै मिलगे परमेसर ऊं सच्चै मन ऊं पराथना करता रेवो। 31 थे लोग इंया करो कै यहुदी प्रदेस में झिका लोग बिस्वास कोनी करै। बा लोग ऊं बचगे रेऊं अर झिको दान में यरुसलेम गै लोगा खातर ले जाण लागरयो हूं बो बी खुसी गै सागै अर रा में कोई परेसानी ना आवै। 32 कै परमेसर गी इच्छा गै अनुसार मैं थारै कनै आऊंगा अर जिऊं आपां एक दूसरै नै हिम्मत दे सका। 33 मैं पराथना करूं हूं कै आपणो सांती देण आळो परमेसर थारै सागै रेवै। आमीन।