रोमी 16

हरेक नै धन्यवाद

1 हे मेरा भाईयो अर भेनों किखिया सैहर गी बिस्वासी मण्डली गी सेवा करण आळी आपणी भेन फेबे गै खातर ईं खत गै द्वारा बिनती करूं हूं, 2 थे बिनै प्रभु में एक बिस्वासी भेन तरियां आपगै सागै रळा ल्यो क्यूंकै बा परमेसर गै लोगा बिचाळै आदर गै योग्य है। जे बिनै कोई चीज गी जरूरत है तो बिनै थे मदद करो क्यूंकै बण पेला मेरी अर दूसरै लोगा गी मदद करी ही।

3 मेरी ओर भेन प्रिस्का अर भाई अक्किला नै निमस्कार केवो। ऐ दोनूं मेरै सागै यीसू मसी गी सेवा करण आळा है।

4 मेरो जीवन बचाण खातर आ दोना आपगो जीवन खतरे में रेड़ दियो। ईंखातर मैं ओर सारी गेर यहुदियां गी बिस्वासी मण्डली धन्यवाद करै है।

5 झिकी बिस्वासी मण्डली बिंगै घरै कठी होवै है बिनै बी मेरो ओर निमस्कार केवो।

मेरा प्यारा बेली इपनितुस झिको आसिया परदेस गो पेलो बिस्वासी है बिनै बी मेरी ओर निमस्कार केवो।

6 मरियम नै बी मेरी ओर ऊं निमस्कार केवो क्यूंकै बण थारै खातर भोत मेनत करी ही।

7 अन्दरनीकुस अर युनियास नै मेरी ओर ऊं निमस्कार केवो। ऐ दोनूं मेरा रिस्तेदार है अर मेरै सागै जेळ में बी रेया हा। खास चेला लोग बानै भोत आदर मान देवंता हा अर मेरै बिस्वास में आण ऊं पेला बे बिस्वास में आया हा।

8 मेरै भाई अम्पलियातुस नै बी मेरी ओर ऊं निमस्कार केवो। बण प्रभु में बिस्वास करयो। ईंखातर मैं बिनै भोत प्रेम करूं हूं।

9 भाई अरबानुस झिको म्हारै सामे यीसू मसी गी सेवा करी है। मेरै प्यारै बेली इस्तुखुस नै बी मेरी ओर ऊं निमस्कार केवो।

10 भाई अपिल्लेस नै बी मेरी ओर ऊं निमस्कार केवो। बो यीसू मसी गो इमानदार अर सच्चो आदमी हो।

अर अरिस्तुबुलुस गै घर में रेण आळा सारा बिस्वासी भेन भाईयां नै बी मेरो निमस्कार केवो।

11 मेरो भाई हिरोदियोन झिको मेरो रिस्तेदार है बिनै बी निमस्कार केवो।

नरकिस्सुस गै घर में रेण आळा सारा झिका प्रभु पर बिस्वास राखै है बानै बी निमस्कार केओ।

12 दोनों भेना तरुफेना अर तरुफोसा अर मेरो बेली परसिस सारा प्रभु गै काम में भोत मेनत करै है अर बानै बी मेरी ओर ऊं निमस्कार केओ।

13 भाई रुफस झिको प्रभु गी सेवा करण खातर चुणयो है

अर बिंगी मा मेरी मा बरगी है बा दोना नै मेरी ओर ऊं निमस्कार केओ।

14 असुंक्रितुस अर फिलगोन अर हिरमोस, पतरोबास अर हिरमास अर बांगै साथी भाईयां अर भेनों नै बी निमस्कार केवो।

15 भाई फिलुलुगुस अर भेन यूलिया नै मेरो निमस्कार केवो

अर भाई नेरेयुस अर बिंगी भेन अर भाई उलुम्पास

अर बिंगै सागै रेण आळा सारा बिस्वासियां नै मेरी ओर ऊं निमस्कार केवो।

16 सगळा नै पूरै मन ऊं निमस्कार केवो अठै गी मसी गो सारी बिस्वासी मण्डली गा भाई भेन लोग थानै निमस्कार केवै है।

आखरी बात

17 हे मेरा भाईयो अर भेनों, मैं थानै चेतो कराऊं। थानै मिलेड़ी सच्ची सिक्सा गै अलावा दूसरी सिक्सा देण आळ ऊं दूर रेवो क्यूंकै बे लोग थानै न्यारा न्यारा करसी अर बिस्वास में बी कमजोर करसी। 18 क्यूंकै हिस्या लोग प्रभु मसी गी सेवा कोनी करै है। बे आपगै पेट गै बारे में सोचेगा। बे मीठी मीठी बाता बोलगे भोळै भाळै लोगा नै फसा ल्य। 19 सारा भेन भाई जाणै है कै थे परमेसर गी इच्छा ऊं चालो हो। ई बात गी मनै भोत खुसी है। मेरी इच्छा आई है कै झिको काम आच्छो है बिनै आच्छी तरियां समझाओ अर झिको काम बुरो है बिऊं दूर रेवो।

20 सांती देण आळो परमेसर आपां नै सैतान पर बेगो ई पूरी तरियां जीत दिरासी अर मैं पराथना करूं कै आपणो प्रभु यीसू मसी थारै पर दया करै।

21 मेरै सागै सेवकाइ करण आळो तीमुथियुस थानै निमस्कार केवै है। मेरा रिस्तेदार बेली लुकियुस अर यासोन अर सोमिपतरुस बी थानै निमस्कार केवै है।

22 मैं, तिरतियुस झिको ओ खत लिखण लागरयो हूं थानै प्रभु गै नाम ऊं निमस्कार केऊं हूं।

23 भाई गायुस गै घर में मैं अजे तांई रुखेड़ो हूं झिकै गै घर में बिस्वासी लोग आराधना करण खातर कठा होवै है। बो थानै निमस्कार केवै है। ईरातुस झिको नगर गो भण्डारी है अर भाई क्वारतुस बी थानै निमस्कार केवै है।

24 मैं पराथना करूं हूं कै आपणो प्रभु यीसू मसी थानै सांती देवंतो रेवै। आमीन।

परमेसर गी मेमा

25-26 परमेसर गी स्तुति होवै। मैं यीसू मसी गै बारे में बोलेड़ै सुब समाचार गै द्वारा परमेसर थानै बिस्वास में पक्का करै। बि सुब समाचार नै परमेसर भोत साला तांई लुकोगे राख्यो हो। पण अब बो सारा पर परगट करयो है। ईं सुब समाचार गो मैं अब परचार करूं हूं। पेला परम परमेसर गी आग्या ऊं परमेसर गी बात बोलण आळा आपगी किताबा में इंगै बारे में बतायो हो। अब ओ सुब समाचार सारी दुनिया में लोगा नै सुणाणो चाइयै कै बे लोग बी बिस्वास ऊं परमेसर गी आग्या गो पालण करै। 27 परमेसर झिको हर तरियां गै ग्यान ऊं भरेड़ो है। बो ई सदा खातर आदर गै योग्य है क्यूंकै बण ई यीसू मसी नै संसार में भेज्यो है।