आपगै भाई पर दोस ना लगा
14
1 हे भाईयो अर भेनो जे थारै सागै आळा में किंगोई बिस्वास कम है तो बानै आपगै सागै मिला ल्यो। बांगै भेदभाव गै बारे में कोई बी बात ना करो।
2 केई इंया मानै है कै बे सारी तरियां गी खाण आळी चिजां खावंता हा। पण बिस्वास में कमजोर लोग एकली सब्जी ई खावै है।
3 सारी चीज खाण आळा लोग दूसरा नै झिका एकली सब्जी खावै बाऊं आपनै मोटो ना समझो। झिका एकली सब्जी खावै है बे दूसरा नै बुरा ना केवै। क्यूंकै आ दोना लोगा नै परमेसर ई ग्रहण करयो है।
4 आपणा हरेक बेली परमेसर गा सेवक लोग है। ईंखातर दूसरा गै सेवकां पर दोस लगाण म्हारै अधिकार कोनी है। बे झिको गलत या सई करै है बांगो फैसलो करण आळो परमेसर है झिको बांगो मालिक है। सई काम करण खातर प्रभु बा लोगा नै खडया कर सकै।
5 केई लोग कीं दिना नै दूसरा दिना ऊं खास मानै है। पण केई लोग हरेक दिना नै खास मानै है। ईंखातर हरेक आदमी नै आपगै सोच बिचार में पक्को रेणो चईयै।
6 झिका लोग कीं दिना नै दूसरै दिना ऊं खास मानै है बे लोग प्रभु गो आदर मान करै है। बिंया ई झिका लोग सारी तरियां गी चीज खावै है बे लोग बी प्रभु नै आदर मान देण खातर खावै है। इंगै द्वारा बे लोग परमेसर गो धन्यवाद बी करै। झिका लोग एकली सब्जी खावै बे लोग ईंखातर खावै है कै प्रभु नै आदर मिलै अर परमेसर गो धन्यवाद बी होवै।
7-8 आपां झिका प्रभु में हा, आपां लोग आपणै खातर कोनी जीआ पण प्रभु खातर जीया हा अर आपणै खातर कोनी मरा पण प्रभु खातर मरा हा। ईंखातर आपां जीया या मरा आपां प्रभु गा ई हा।
9 ईं कारण मसी मर गेयो अर जी उठयो हो झिका लोग अब जीयै है अर पेला मरग्या हा, बा सारा गो प्रभु बो ई है।
10 ईंखातर दूसरा झिका बिस्वास में है बा पर दोस ना लगावो अर बानै आप ऊं छोटा ना समझो क्यूंकै आपां सारा नै एक दिन परमेसर गै सामे न्याय खातर खड़यो होणो ई पड़सी।
11 पवितर सासतर में इंया लिखेड़ो है,
“प्रभु केवै है, मैं जींवतो परमेसर हूं। ईंखातर सारा नै मेरै सामे झुकणो ईं पडे़गो
अर सारी मिनख जाती परमेसर नै मान ल्यगी।”
12 ईंखातर आपां सारा नै आपगै कामा गो लेखो परमेसर नै देणो ई पड़सी।
आपगै भाई खातर ठोकर गो कारण ना बण
13 ईंखातर आपां कदी बी किंगैई उपर दोस ना लगावा अर आपणै बिस्वासी भाई भेना गो बिस्वास कम होण आळा अर पाप करण आळा कोई बी काम आपां ना करा।
14 प्रभु यीसू मसी मनै साफ रीति ऊं समझायो कै हर खाण आळी चीज, खाण खातर आच्छी है पण जे कोई मिनख कीं खाण गी चीज नै आच्छी ना समझै तो बिंगै खातर बा आच्छी कोनी।
15 जे थारै बिस्वासी भाई भेना नै थे आपगी खाण गी चिजां ऊं बिस्वास में कमजोर करो हो तो थे बानै सई रीति ऊं प्रेम कोनी करो। ईंखातर थारै खाण गी चीज गै द्वारा कोई भाई भेन नै बिस्वास में लारै ना हटण दयो क्यूंकै बांगै खातर बी मसी आपगी जान दी।
16 ईंखातर झिको काम तू करै है तनै आच्छो लागै है पण दूसरा नै कोजो लागै है तो तू बो काम ना कर।
17 परमेसर गै राज में खाणे पीणे गो कोई मतलब कोनी। बिंगो राज इंया होवै है कै झिका लोग परमेसर गी नजर में आच्छो जीवन जीवै है अर सांती ऊं अर झिकी खुसी पवितर आत्मा ऊं मिलै है।
18 जे कोई ईं रीति ऊं मसी गी सेवा करै है तो परमेसर बि पर खुस हो'सी अर लोग बिनै आदर मान बी देसी।
19 ईंखातर आपणो जीवन दूसरै गै जीवन में सांती देण गो कारण बणज्य अर जिऊं दूसरै लोगां गो बिस्वास पक्का होण में बी मदद मिलज्य।
20 थारै खाणे पीणे ऊं परमेसर गै काम नै ना बिगाड़ो। हर एक चीज खाण खातर सुद्ध है। पण जे थारै खाण गी चीज ऊं दूसरा लोग पाप में पड़ज्य तो हिसी चीज ना खाओ।
21 अर जे तेरै खाणे पीणे या कोई दूसरो काम करण ऊं तेरै बिस्वासी भाई भेन बिस्वास में हटै तो तूं इंया ना कर।
22 आ बाता गै बारे में तू किंया बिस्वास राखै आ बात किनैई बताण गी जरूरत कोनी। आ बात तेरै अर परमेसर गै बिचाळै रेण दे। झिका लोग आपगी नजर में झिको काम आच्छो समझै है अर बि काम नै बुरो कोनी मानै तो बा लोगा नै आसिस मिलैगी।
23 पण जे कोई आदमी आपगै मन में बेम राखगे खावै है तो बो पाप करै है। बे लोग बिना बिस्वास ऊं इंया करै है। ईंखातर बे परमेसर गी सजा गै लायक बण चुक्या है। झिको कीं बिस्वास ऊं कोनी, बो पाप है।