रोमी 13

राज खातर जिमेदारी

1 सारा बिस्वासी भेन भाईया गो फरज बणै कै बे सारै छोटा अर मोटा सरकारी अफसरां गी बात जरूर मानणी चईयै क्यूंकै ओ सारो अधिकार परमेसर बानै दियो है। 2 झिका लोग बानै अफसरां गी बात कोनी मानै तो बे परमेसर गी बात कोनी मानै क्यूंकै बा सारो कीं परमेसर ई बणाया है झिका लोग इंया करसी बानै सजा जरूर मिलसी। 3 झिका लोग आच्छा काम करै है बानै अफसरां ऊं डरण गी कोई जरूरत कोनी पण झिका बुरा काम करसी बानै अफसरां ऊं डरणो पड़सी। ईंखातर जे थे अफसरां ऊं डरणो कोनी चावो हो तो आच्छा काम करो जद बे थानै आच्छा बतासी। 4 परमेसर सारै अफसरां नै ईंखातर बणाया कै सांसार में रेण आळै सारै लोगा गी भलाई करण खातर सेवा करै। जे तू गळत काम करसी तो तनै जरूर डरणो पड़सी क्यूंकै बांगै कनै थानै सजा देण गो अधिकार है अर ओ अधिकार बानै परमेसर दियो है। 5 ईंखातर थे अफसरां गी बात कोनी मानो तो थानै सजा मिलसी इंया सोचगे बा अफसरां गी बात माना पण थे जाणो हो कै इंया करणो सई बात है। 6 ईंखातर थे अफसरां नै सारै कामा गी चुंगी देणी चईयै क्यूंकै झिको काम परमेसर बानै दियो है बो एक सेवा गै रूप में पूरो हो'ज्य। 7 ईंखातर झिकै झिकै काम गी चुंगी देणी है बानै चुंगी देणी चईयै अर झिका नै मामलो देणो है बानै मामलो देओ अर जिऊं डरणो चईयै बाऊं डरो अर झिका गो आदर मान करणो है बांगो आदर मान करो।

एक दूसरै खातर जिमेदारी

8 थे आपसरी में प्रेम करण गै बिना कदी किंगा करजदार ना बणो क्यूंकै झिको कोई दूसरा ऊं प्रेम राखै है बो परमेसर गी आग्या नै पूरी तरियां पालण करै है। 9 क्यूंकै परमेसर गै नेम विधान में आ आग्या बतावै है, बेबीचार ना कर, किनैई ना मार, चोरी ना कर अर दूसरा गी चिजां देखगे लालच ना कर। परमेसर गी पूरी आग्या मिलगे एक ई आग्या गै बारे में बतावै है बा आई है कै जिंया तू अपणै आप सागै प्रेम करै है बिंया ई दूसरा सागै करो। 10 जे आपां दूसरा सागै प्रेम करेगा तो बा लोगा सागै बुरा काम कोनी कर सका। ईंखातर जे आपां दूसरा सागै प्रेम राखा हो तो परमेसर गी आग्या गो पूरी तरियां पालण करा हा।

11 अब आपां हिसे टेम में जीण लागरया हा इंगो थानै जरूर पतो है। ईंखातर झिको कीं मैं थानै बतायो है बिंया ई करता रेवो। क्यूंकै झिको टेम म्हे यीसू मसी पर बिस्वास करयो जद परमेसर म्हानै देण आळा अन्तिम उद्धार ऊं भोत दूर हा पण अब ओ भोत कनै आ गयो है। ईंखातर थे चेत गै रेओ। 12 पाप गै कारण संसार रात जिसो है पण अब रात बितगी अर चानणो होण आळो है। इंगो मतलब ओ है कै यीसू मसी जल्दी आण आळो है। ईंखातर म्हानै सारा बुरा काम छोड़णा चईयै अर जिंया एक सिपाई बन्दुक लेगे तैयार रेवै है बिंया ई म्हे बी दिन गै चानणै में आच्छा काम करगै रेणो चईयै। 13 जिंया लोग चानणै में रेवै है बिंया ई म्हानै बी चानणै में रेगे सीधी चाल चालणी चईयै। दूसरा गी पाल्टी में जा'गे बोळी दारू पीगे उल्लु नई बणणो चईयै, बेबीचार अर म्हानै देखगे लोगां नै सरम आण आळा काम ना करै अर बलण राखगे दूसरा गै सागै लडाई ना करो। 14 जिंया प्रभु यीसू मसी गो जीवन हो जिंया थे बी जीओ अर थारै मन गी बुरी इच्छा करण गी बात बी छोड़ देओ।