रोमी 12

परमेसर गी सेवा गो जीवन

1 ईंखातर हे भाईयो अर भेनो, परमेसर गी देएड़ी दया ऊं मैं थारूं बिनती करूं हूं कै थे पूरी तरियां ऊं आपगो जीवन परमेसर नै बलिदान गै रूप में चढाओ झिको परमेसर नै आच्छो लागै है। ओ ई है परमेसर गी सेवा करण गो सच्चो रा। 2 ईं संसार गै लोगा तरियां थे ना जीओ पण परमेसर नै थारो सोच बिचार बदलण दयो। इंया करोगा तो थानै पतो लागसी कै परमेसर गी इच्छा गै अनुसार किंया चालणो है, परमेसर नै किंया राजी करणो है अर परमेसर नै पूरी तरियां पक्की इच्छा गो पतो लगावंतो रेवो।

3 परमेसर मनै आपगी बात बताण खातर चुण लियो, ईं अधिकार ऊं मैं थानै बताऊं कै अपणै आपनै जिंया समझणो चईयै बिऊं बढगे कोई बी अपणै आपनै मोटो ना समझो पण परमेसर पर आपगै बिस्वास गै कारण झिका खास गुण आपां नै दिया है बानै आच्छी तरियां समझो। 4-5 आपणो हरेक गै सरीर में न्यारा न्यारा अंग है अर बे सारा अंग एक दूसरै ऊं जुडे़ड़ा है अर आ सारा अंगा गो न्यारो न्यारो काम है। इंया ई आपां मसी पर बिस्वास करण आळा बिंगै सरीर बरगा बणग्या अर आपां सारा न्यारा न्यारा अंग हा। अर हर एक अंग गो एक दूसरो गै सागै मेल मिलाप है। 6 परमेसर आपणै उपर दया कर'गे न्यारा न्यारा वरदान दिया है। जे परमेसर आपगी बात बताण गो वरदान थानै दियो है तो परमेसर थानै देऐडे़ बिस्वास गै अनुसार दूसरा नै बतावो। 7 जे किनैई दूसरा गी मदद करण गो वरदान मिल्यो है तो इंया ई करता रेवो अर जे किनैई दूसरा नै सिखाण गो वरदान मिल्यो तो इंया ई करता रेवो। 8 जे किनैई दूसरा नै दिलासो देण गो वरदान मिल्यो है तो बो आपगै पूरै मन ऊं दिलासो देवै। जे किनैई दूसरै नै कीं देण गो वरदान मिल्यो तो बो पूरै मन ऊं देवंतो रेवै। जे किनैई दूसरा गी अगवाई करण गो वरदान मिल्यो है तो बो बिनै पूरी हिम्मत गै सागै करै अर जे किनैई दूसरै पर दया करण गो वरदान मिल्यो है तो बो पूरी खुसी गै सागै करतो रेवै।

मसी लोगा गो चाल चलन

9 थे दूसरा गै सागै बिना कपट ऊं प्रेम करो, अर भलो काम पूरै मन ऊं कर पण बुरे काम ऊं दूर रेवो। 10 जियां एक घर गा लोग आपसरी में प्रेम करै है बियां ई थे दूसरा गै सागै प्रेम करो अर थे दूसरा नै आप ऊं मोटा समझो अर बांगो आदर मान करता रेवो। 11 थे बोळी मेनत करता रेवो अर आळसी ना बणो। पूरै मन ऊं प्रभु गी सेवा करता रेवो। 12 थे सदा खुसी गै सागै रेवो क्यूंकै परमेसर आण आळै दिना में थारै पर के करै है बा पर पक्की उडीक राखो। जद कोई दुख आवै बि टेम धीरज राखो अर सदा ई पराथना करता रेवो। 13 परमेसर गै पवितर लोगा नै कीं चीज गी जरूरत है तो बांगी जरूर मदद करो अर थारै घरै कोई आवै तो बिंगो आच्छी तरियां आदर मान करो।

14 झिका थानै तंग करै है बानै आसिस देओ अर सराप ना दयो। 15 झिका खुस है बांगै सागै खुस रेवो अर झिका दुख में है थे बांगै दुख में भागिदार हो जावो। 16 सारा गै सागै आच्छो मेल मिलाप अर सांती ऊं रेओ अर कदी धमण्ड ना करो पण दूसरा लोग झिका नै कीं कोनी समझै बांगै सागै उठ बैठ राखो अर अपणै आपनै ग्यानवान ना समझो।

17 झिका थारै पर बुरो करै है, थे बांगै सागै बुरो ना करो, दूसरा लोग झिकै काम नै आच्छो जाणै है बो ई करो। 18 थारूं जितो बी होवै, दूसरा गै सागै सांती ऊं रेवो। 19 हे भाईयो अर भेनो, जे कोई थारै सागै कीं करै है थे बिंगै बदले में कीं ना करो। पण परमेसर नै बिंगो न्याय करण दयो। क्यूंकै पवितर सासतर में इंया लिखयो है, “प्रभु केवै है, बदलो लेणो मेरो ई काम है, मैं बानै बदला देऊंगा।” 20 पवितर सासतर में इंया बी केवै है कै,

“जे तेरो दुसमण भूखो है तो बिनै रोटी खुवा दे,

जे तीसो है तो बिनै पाणी प्या दे क्यूंकै जे तू इंया करसी तो बिनै ई सरम मारसी।”

21 कोई बी थारै सागै बुरो काम करै तो थे बिंगै बदळै में कीं बुरो काम ना करो। भलाई कर'गे बुराई नै जीत ल्यो।