रोमी 11

इसराएल पर परमेसर गी दया

1 मैं केऊं हूं कै परमेसर आपगै इसराएली लोगा नै छोड़ दिया है के? आ बात जमाई कोनी क्यूंकै मैं बी एक इसराएली हूं, अबरहाम गै पीढी ऊं अर बिन्यामीन जात गो हूं। 2 परमेसर आपगै इसराएली लोगा नै भोत पेला ऊं चुण लिया हा। परमेसर बा लोगा नै बिलकुल छोड़यो कोनी। पवितर सासतर में एलियाह परमेसर गी बात बोलण आळा गै बारे में इंया लिखेड़ो है, एलियाह इसराएली लोगा गै बारे में परमेसर ऊं किंया पराथना करै है। इंगै बारे में थानै आच्छी तरियां पतो है। 3 एलियाह इंया बोल्यो हो, हे प्रभु बा लोग थारी बात बोलण आळा नै मार दिया अर बा लोग थारी मिन्दर गी बेदी नै बी हढा दी। बा सारा ऊं मैं एक ई परमेसर गी बात बोलण आळा बचयो हूं अर बे मनै बी मारणो चावै है। 4 परमेसर एलियाह नै के जबाब दियो थानै याद है। परमेसर एलियाह ऊं बोल्यो, “मैं आपगै खातर अजे तांई सात हजार लोग बचागे राखया है झिका अजे तांई बाल देवता गी पूजा कोनी करी।” 5 अजे तांई परमेसर इसराएली लोगा मूं केई लोगा पर किरपा कर'गे बचा राखै। 6 परमेसर आपगी किरपा ऊं बा लोगा नै चुणयो ना बांगै आच्छा कामा नै देखगे। जे परमेसर बा लोगा गा आच्छा काम देखगे चुणे है तो परमेसर गी किरपा बिलकुल बेकार है।

7 फेर के हो'ग्या? झिका इसराएली लोग परमेसर गी नजर में निरदोस बणाणा चावा हा पण इंया कोनी होयो। बामूं थोड़ा सा लोगा नै परमेसर चुण्या हा। बे लोगां परमेसर गी नजर में निरदोस बण गयो। बचेड़ा लोगा गा मन परमेसर पथर बरगा कर दिया। 8 पवितर सासतर में इंया लिखेड़ो है कै,

“परमेसर बानै गूंगा बणा दिया। आंख होवंता होया बी

बे देख कोनी सका है अर कान होवंता होया बी

बे लोग सुण कोनी सकै अर इंया अजे तांई बी इंया होवै है।”

9-10 दाऊद बी इंया केवै है,

“बांगो खाणो पीणो बांगी ठोकर सजा गो कारण

अर बे आच्छै दिना में बी जाल में फस जावै। बांगी आख्या धुधली होगी अर बांगै दुखा गै कारण कडतू बांकी होगी।”

गेर यहुदियां गो उद्धार

11 मैं इंया पूछूं हूं के बे लोग ठोकर खा'गे पडग्या अर कदी उठ कोनी पाया, इंया है के? कदी कोनी, बा लोग यीसू मसी पर बिस्वास कोनी करयो। ईंखातर परमेसर गेर यहुदी लोगा गै मुकती दी। अर यहुदी लोग गेर यहुदी लोगां पर बलण लागग्या। 12 जे आ लोगा परमेसर गी बात ना मानी ओ बात जगत गै लोगां खातर आसिस गो कारण हो'ग्यो अर बा लोगां गो घाटो गेर यहुदी लोगां गो फैयदा गो कारण हो'ग्यो। जे बे लोग बी परमेसर गी बात मानसी तो भोत लोगा नै बांगै द्वारा आसिस मिलसी।

13-14 हे गेर यहुदी लोगो, अब मैं थारै सागै बात करूं हूं, थानै सिखाण खातर मनै परमेसर एक खास चेलो बणा गै थारै कनै घाल्यो, मेरै खातर आ एक भोत खास बात है। मैं इयां आस राखूं हूं कै थानै देखगे मेरा आपगा इसराएली लोगा नै बलण होणी चईयै कै बे लोग बी यीसू मसी पर बिस्वास कर'गे मुकती पा ल्ये। 15 जद इसराएली लोग परमेसर ऊं दूर हो'ग्या हा जद गेर यहुदी लोग झिका परमेसर सागै कोई संबन्ध कोनी हा, परमेसर बांगै सागै संबन्ध राखयो। जद परमेसर इसराएली लोगां सागै संबन्ध राखयो तो बो इंया होयो जिंया एक मरेड़ो आदमी जींवतो हो'ग्यो। 16 जे परमेसर नै चढाऐडो पेलो पेडो आच्छो है तो बचेड़ो सारो गूंदेडो आटो बी आच्छो है अर जे एक दरखत गी जड़ आच्छी है तो दरखत गा सारा डाला अर डालिया बी आच्छी है।

17 परमेसर यहुदी लोग झिका एक जेतुन दरखत जिसा हा बिमुं फल लेण खातर लगायो अर बानै संभाळयो। पण गेर यहुदी लोग खाली जिग्या में उगेड़ा दरखत जिसा है। परमेसर आपगै लगाएड़ै दरखत गी डाली बाडगे खाली जिग्या में उगेडे़ दरखत गी डाली बाड़गे परमेसर लगाएड़ै दरखत गै मा पेंद कर दी। ईंखातर झिकी डाली पेंद कर दी बा डाली अब पेला आळै आच्छा दरखत गी जड सागै जुड गी अर बिनै बिऊं ताकत मिलै। 18 आच्छी दरखत गा डालिया बाड़गे तू झिको खाली जिग्या गै दरखत गी डालिया नै जोड़ दिआ। इंया सोचगे तू बिलकुल घमण्ड ना करी। तू इंया याद राखियै कै डाली कदी जड़ नै कोनी संभालै पण जड़ डाली नै संभालै है। 19 फेर तू केवेगो, आच्छी डालिया नै बाड़गे मनै पेंद कर दियो है। 20 आ बात सई है। बा लोग यीसू मसी पर बिस्वास कोनी राखयो ईंखातर परमेसर बानै बाड़ दिया अर थानै जोड़ दिया क्यूंकै थे यीसू मसी पर बिस्वास करयो। ईंखातर घमण्ड ना करियो अर डरगे रेईयो। 21 जे परमेसर पेला आळी डालिया पर दया कोनी करै तो थारै पर बी दया कोनी करसी।

22 ईं बात गो ध्यान राखो, परमेसर दया बी करै है अर सजा बी देवै है। झिका लोग बिंगी बात कोनी मानै बानै बो जरूर सजा देवै। थे बि पर बिस्वास करयो ईंखातर बण थारै पर दया करी। थे बि पर बिस्वास कोनी करै तो थानै बी बा डालिया तरियां बाड़ देसी। 23 जे यहुदी लोग फेर ऊं परमेसर पर बिस्वास करसी तो बानै बी परमेसर बि आच्छै दरखत सागै पेंद कर'गे जोड़ देसी क्यूंकै बिंगै कनै अधिकार है। 24 क्यूंकै थे झिका खाली जिग्या में उगेडा दरखता गी डाली नै बाडगे आच्छो फल देण आळै दरखत गै सागै जोड़ दिया। इंया है तो बि दरखत गी सागी डालिया जोडण में परमेसर नै कोई दिकत कोनी।

सारै इसराएल गो उद्धार

25 मेरा भाईयो अर भेनो, थे अपणै आपनै समझदार ना बणाओ। ईंखातर मैं इंया चाऊं कै परमेसर गी लुकागे राखेड़ी बाता नै जाणल्यो कै कीं इसराएली लोगां गा मन पथर बरगा हो'ग्या। सदा ई ऐ लोग गै मन इंया कोनी रेवैगा अर जिता गेर यहुदियां नै परमेसर चुण्यो है बे आच्छी तरियां जद परमेसर पर बिस्वास कर लेवेगा तो बा इसराएल लोगां गा मन नरम हो जावेगा। 26 इंया परमेसर इसराएली लोगा नै मुकती देसी। पवितर सासतर में इंया लिखेड़ै हो

“मुकती देण आळो सियोन ऊं आवैगो

अर याकूब गी पीढी गा लोगा गा बुरा काम पूरी तरियां दूर करसी।

27 पवितर सासतर में इंया बी लिखेड़ो है, मेरो एक इकरार जद बांगै सागै होवैगो जद

मैं बांगै पापा नै माफ कर देऊंगा।”

28 पण बे यहुदी लोग सुब समाचार पर बिस्वास कोनी करयो। ईंखातर परमेसर बांगै सागै बैर राखयो है, ईं बात ऊं थे गेर इसराएली लोगा थानै फायदो होण गो कारण हो'ग्यो। पण इसराएली लोग अजे तांई परमेसर गा चुणेड़ा लोग है क्यूंकै बांगै बाप दादा गै सागै करेडै़ वायदे गै अनुसार परमेसर अब बी बा लोगा सागै प्रेम करै है। 29 परमेसर आपगै चुणेड़ै लोगा नै कदी कोनी भूले अर कदी आपगो देयड़ो वरदान पूठो कोनी लेवै। 30 थे गेर यहुदी लोग, पेला परमेसर नै कोनी मानता हा पण अब परमेसर थारै पर दया करी क्यूंकै इसराएली लोग बिनै स्वीकार कोनी करयो। 31 इंया ईं इसराएली लोग अब परमेसर गी आग्या कोनी मानै। फेर बी परमेसर आण आळै दिन में बानै दया करसी जिंया पेला थारै पर करी ही। 32 परमेसर सारै लोगा पर दया करणी चावै है ईंखातर परमेसर सारै नै बांगी आग्या ना मानण गो मोको दियो।

परमेसर गी मेमा

33 सच्च में परमेसर आपगी बुद्धी अर ग्यान ऊं सारो कीं बणायो, ओ सारा गी समझ ऊं बारै है।

बिंगै काम करण गो तरिको किंगैई समझ कोनी सकै।

34 पवितर सासतर में इंया लिख्यो है कै,

“प्रभु गै सोच बिचार गै बारे में कुण जाणै है?

अर बिनै राए देण आळो कुण है?”

35 पवितर सासतर में इंया बी केवै है,

“परमेसर नै पेला कणई कीं दियो है के?

झिके गै बदल में परमेसर वापस कीं दे सकै?”

36 क्यूंकै सारो कीं परमेसर कनूं आवै अर सारों कीं परमेसर ई बणायो

अर सारो कीं बिंगो ई है। सदा ई बिनै आदर मान देवंता रेवा। आमीन।