रोमी 10

1 हे मेरो भाईयो अर भेनो, मैं पूरै मन ऊं परमेसर ऊं पराथना करूं कै, बांगी मदद ऊं मेरा इसराएली लोग बेगी मुकती पाल्य। 2 बा लोगा नै परमेसर गी आग्या गो पालण करणो अर परमेसर गै पीछै चालण गो बी भोत होसलो दिखावै है। पण बो होसलो परमेसर गै सई ग्यान पर कोनी टिकेडो है। 3 परमेसर आपगी नजर में बा लोगां नै किंया निरदोस बणावै है बानै ठा कोनी। ईंखातर बे लोग अपणै आपनै निरदोस बणाण गी कोसिस करै इंया कर'गे बे परमेसर गी इच्छा नै कोनी मानै। 4 मसी आण ऊं पेला लोग परमेसर गी नजर में निरदोस बणन खातर नेम विधान गो पालण करता हा। पण मसी आण गै बाद इंया करण गी कोई जरूरत कोनी। क्यूंकै मसी गै उपर बिस्वास कर'गे सारा परमेसर गी नजर में निरदोस बण सकै।

मुकती सारा खातर

5 नेम विधान गै द्वारा परमेसर गी नजर में आच्छा बणाण आळै खातर मूसा इंया लिखयो है कै झिको कोई नेम विधान गो पालण आच्छी तरियां करै है बा लोगा नै सदा गो जीवन मिलैगो। 6-7 बिस्वास गै द्वारा परमेसर गी नजर में निरदोस बणण खातर पवितर सासतर में इंया लिख्यो है कै तू अपणै आपनै इंया ना पूछ, म्हारै खातर मसी नै धरती पर ल्याण खातर सुरग में कुण जावैगो अर अपणै आपनै इंया ना पूछै कै मरेड़ा मूं जींवतो कर'गे मसी नै उपर ल्याण खातर मरेड़ा गी रेण गी जिग्या में कुण जासी। 8 पवितर सासतर में इंया लिख्यो है कै परमेसर गो बचन थारै कनै है अर ओ ई बचन थारै मन में है अर ओ ई बचन थे बोलो हो। बिस्वास गै द्वारा झिका बचन गो परचार करा हा ओ ई बो बचन है। 9 कै जे थे आपगै मू ऊं केवो कै यीसू ई प्रभु है अर आपगै मन में हिसो बिस्वास राखै है कै परमेसर बिनै मरेड़ा मूं जींवतो करयो तो थानै जरूर मुकती मिल ज्यगी। 10 क्यूंकै थे आपगै मन में हिसो बिस्वास राखो हो ईंखातर परमेसर गी नजर में निरदोस बणो हो अर थे आपगै मू ऊं केवो कै यीसू ई प्रभु है ईंखातर परमेसर थानै मुकती देवै है। 11 यसयाह गी किताब में इंया लिखेड़ो है कै झिको कोई बि पर बिस्वास करै बो कदी सरमसार ना हो'सी। 12 यहुदी अर गेर यहुदी में कोई फरक कोनी है क्यूंकै सारा गो प्रभु एक ई है। झिका लोग बि पर बिस्वास करै है बानै बो भोत आसिस देवै है। 13 पवितर सासतर में इंया लिख्यो है कै, “जे कोई प्रभु गो नाम लेवेगो तो बो मुकती पावेगो।”

14 झिका लोग अजे तांई परमेसर पर बिस्वास कोनी करयो बे लोग परमेसर गो नाम किंया ले सकै है अर झिका लोग परमेसर गै बारे में सुणयो कोनी बे लोग परमेसर पर किंया बिस्वास करसी। जे बानै कोई परमेसर गै बारे में ना बतावै तो बे लोग किंया सुणेगा। 15 जे बा कनै कोई परचार करण आळा ना घाल्या तो बे किंया परचार सुणेगा। ईंखातर पवितर सासतर में इंया लिखेड़ो है झिका लोग सुब समाचार सुणाण खातर आवै है जरूर ई बांगो आणो लोगां खातर भोत खुसी गी बात है।

16 ईं सुब समाचार नै सारै लोगा कोनी मान्यो, यसयाह परमेसर गी बात बोलण आळो इंया केवै है, हे प्रभु थोड़ा ई लोग म्हारै बताएड़ै सुब समाचार पर बिस्वास करयो है। 17 ईंखातर बिस्वास सुब समाचार सुणाण ऊं आवै है अर सुब समाचार मसी गै बचन परचार करण ऊं आवै है। 18 पण मैं इंया पूछूं हूं कै इसराएली लोग सुब समाचार सुणै है के?

जरूर बा लोगा सुण्यो हो क्यूंकै पवितर सासतर में इंया बतावै है,

परमेसर गो बचन परचार करण आळा सारी धरती पर परचार करयो अर बा झिको कीं केयो बो सारी जिग्या पोंच ग्यो।

19 फेर बी मैं पूछूं हूं कै, इसराएली लोग सुब समाचार समझै है के?

जरूर बा लोगां समझयो क्यूंकै मूसा ऊं लिखेड़ी किताब में परमेसर इंया बतावै है कै थे यहुदी लोग,

मेरो गेर यहुदी लोगा सागै प्रेम देखगे थारै में बलण हो'सी अर झिका लोग मेरै बारे में कीं कोनी जाणो बा लोगा नै मैं किंया संभालूं ओ देखगे थानै रीस आवैगी।

20 यसयाह बिना डर गै फेर बी इंया केयो,

झिका लोग मनै कोनी ढूंढै हा बा मनै देख लियो

अर झिका लोग मेरै बारे में कोनी पूछयो बानै मैं अपणै आप दिखायो।

21 पण इसराएली लोगा गै बारे में परमेसर इंया केवै है

झिका लोग मेरो बिरोध करै है अर मेरी आग्या नै कोनी मानै बानै मैं आपगा बणाण खातर सदा ईं आपगो हात आ'गे कर'गे राख्यो।