परमेसर अर बिंगा चुणेड़ा इसराएली लोग
9
1 मैं झिकी बात केऊं बा साची है बिमै कीं झूठ कोनी क्यूंकै मैं मसी गै सागै भागिदार हूं। पवितर आत्मा मेरै मन गै बिचार नै पक्को करै है। ईंखातर मेरै मन गै बिचार में कोई बी झूठ कोनी।
2 मेरै मन में बोळो दुख है अर सदा तकलीफ देवंतो रेवै क्यूंकै मेरा यहुदी भाई भेन मसी पर बिस्वास कोनी करै।
3 मेरा इसराएली भाई भेन मसी गै बिस्वास में आण खातर चावै परमेसर मनै सराप देगे मसी ऊं न्यारो कर दय तो बी मनै दिकत कोनी।
4 क्यूंकै बण इसराएली लोगा नै आपगी उळाद तरियां चुण लिया अर परमेसर कितो म्हान है बो बी बानै दिखायो। परमेसर बांगै सागै भोत इकरार कर'गे एक नेम विधान बी दियो। बानै परमेसर गी आराधना मिन्दर में जा'गे करणी बी सिखाई अर बांनै सारा नै वायदो बी दे दियो।
5 बे लोग आपगै बडेरा गी पीढी गा हा। अर मसी माणस बणगे ई पीढी में पैदा होयो। अर बो ई सारा गै उपर परम परमेसर है अर बिंगी स्तुति सदा ई होंती रेवै। आमीन।
6 परमेसर झिको वायदो करयो बिनै पूरो करै बिना छोड़यो कोनी। ईंखातर कै झिका इसराएली जात गा है, बे सारा इसराएली कोनी।
7 अर झिका अबरहाम गै जात ऊं पैदा होया बे सारा अबरहाम गी उळाद कोनी क्यूंकै पवितर सासतर में इंया लिखेड़ो है कै इसहाक ऊं पैदा होएड़ा ई तेरी उळाद कुहासी।
8 झिका लोग अबरहाम ऊं सारीरिक इच्छा ऊं पैदा होया बे लोग परमेसर गी उळाद कोनी। पण झिका परमेसर गै वायदे गै अनुसार पैदा होया बे ई अबरहाम गी पीढी गी उळाद है।
9 क्यूंकै परमेसर अबरहाम ऊं इंया वायदो करयो कै अगले साल ई टेम मैं जद अठै पाछो आऊंगा तो तेरी घराळी सारां एक बेटै नै जन्म देसी।
10 अर आ बात कोनी बो ई बेटो इसहाक आपणो बडेरो हो। इसहाक गो ब्या रिबेका गै सागै हो'ग्यो अर बांगै जोड़ला टाबर बी हो'ग्या।
11-12 परमेसर जद किनैई चुणे है तो बो बानै बांगै कामां गै द्वारा कोनी पण बो आपगी इच्छा गै द्वारा चुणे है। ईं बात गी जाणकारी देण खातर टाबरां गो जन्म ऊं पेला ई अर टाबरां नै भले बुरे करण ऊं पेला ई परमेसर रिबेका नै बता दियो कै तेरो छोटो बेटो मोटोडे बेटो पर हुकम चलावैगो।
13 पवितर सासतर में इंया लिखेड़ो है कै मैं याकूब नै एसाव ऊं बोळो प्रेम करयो।
14 इंगै बारै में आपां सोचा हा कै परमेसर पक्सपात करण आळो है। पण आ बात जमाई कोनी हो सकै।
15 क्यूंकै परमेसर मूसा नै केयो जे मैं कीं पर दया करणी चाऊं तो
बि पर दया करूंगा अर जे कीं पर मेहर करणो चाऊं तो बि पर मेहर करूंगा।
16 ईंखातर जे किन्ही चुणनो चावै है तो बा चुणिजण आळै आदमी गी इच्छा कोनी पण परमेसर आपगी दया गै अनुसार ई चुणे है।
17 पवितर सासतर में आपां इंया पढा हा कै परमेसर मिस्र देस गै राजा फिरोन ऊं केयो, मैं तनै ईंखातर राजा बणायो कै, मैं आपगी ताकत थारै पर दिखाऊंगा अर बिंगै द्वारा सारी दुनिया नै मेरै बारे में पतो चालेगो।
18 ईंखातर परमेसर झिकै पर दया चावै है बि पर दया करै है अर झिकै गो मन पथर बरगो करणो चावै है तो बो बिंया ई करै है।
परमेसर गी रीस अर बिंगी दया
19 थारै मूं मनै केई पूछ सकै है कै परमेसर म्हारै उपर फेर पापां गा दोस क्यूं लगावै है। परमेसर के चावै है बिंगै बिरोध में कोई बी कीं कोनी कर सकै।
20 हे मिनख, तू कुण है झिको परमेसर गै सामणै उल्टो जबाब देवै। कुम्हार आपगी मरजी ऊं घड़ो बणावै है। घड़ो बिनै कदी कोनी के सकै कै तू मनै इंया क्यूं बणायो।
21 कुम्हार माटी गै एक ई गोळे ऊं दो तरियां गा घड़ा बणावै है। एक खास काम खातर अर दूसरो आम काम खातर क्यूंकै घड़ो बणाण आळै कनै इंया करण गो पूरो अधिकार है।
22 परमेसर आपगो काम इंया ई करयो क्यूंकै परमेसर कनै रीस अर ताकत दिखाण गो अधिकार है। परमेसर झिका लोग बिनास गै लायक है बा पर आपगी सजा देण आळो हो फेर बी धीरज करै है।
23 झिका लोगा पर पेला ईं परमेसर मान समान में भागिदार करण खातर चुणया है बा लोगा नै दया करी अर बानै दिखायो कै बो कितो म्हान है।
24 बे चुणेड़ा लोग आपां हा। परमेसर यहुदी लोगा नै एकलो कोनी चुणयो पण गेर यहुदी लोगां नै बी चुण्या है।
25 परमेसर गेर यहुदियां गै बारे में होसया गी किताब में इंया केयो है,
“झिका लोग पेला मेरा कोनी हा बानै अब मैं आपगा लोग केऊंगा
अर झिकी लुगाई पेला लाड़ली कोनी अब मैं बानै लाड़ली केऊंगा।”a
26 अर होसया गी किताब में इंया बी लिखेड़ो है,
“परमेसर झिकी जिग्या पर केयो हो थे लोग मेरी उळाद कोनी, बी जिग्या पर ई केयो
थे लोग जींवते परमेसर गी उळाद कुहाओगा।”b
27 परमेसर गी बात बोलण आळै यसयाह बी इसराएली लोगा गै बारे में इंया केयो हो,
इसराएल लोग समुद्रगी बेकळू रेत गै कणा गै बराबर है तो बी बामू थोड़े ईं लोगा गो उद्धार हो'सी।
28 यसयाह गी किताब में इंया ईं लिखेड़ो है कै,
“प्रभु झिको न्याय करण गो बचन लोगा नै दियो बो बचन भोत बेगी अर पूरी तरियां ऊं करसी।”
29 यसयाह पेला ई बतायो
“जे सरवसकतिमान परमेसर आपणी उळाद नै ना छोड़तो तो
आपां सदोम अर ओमोरा गै लोगां गी तरियां होवंता।”c
इसराएली लोगा गो अबिस्वास
30 फेर के बताणो है, गेर यहुदी लोग परमेसर गी नजर में निरदोस बणाण खातर कीं कोनी करयो पण बां लोग यीसू मसी गै उपर बिस्वास करयो ईंखातर बे परमेसर गी नजर में निरदोस बणग्या।
31 इसराएली लोगा नेम विधान गो पालण कर'गे परमेसर गी नजर में निरदोस बणाण गी कोसिस करी। पण इंया कोनी होयो।
32 क्यूं इंया होयो? इसराएली लोगा इंया सोच्यो कै म्हे नेम विधान मानगे परमेसर गी नजर में निरदोस बण ज्यगा पण बा लोग यीसू मसी पर बिस्वास करण गी इच्छा कोनी करी। यीसू मसी एक पथर जिसो है। इसराएली लोगा बि पर बिस्वास करण गी इच्छा कोनी राखी, ईंखातर बि पथर ऊं ठोकर खा'गे पड़ जाण बरगा हो'ग्या।
33 पवितर सासतर में परमेसर इंया केवै,
“देखो मैं यरुसलेम में ठोकर खा'गे पड़ण आळो एक पथर रखूंगा।
झिका बि पथर पर बिस्वास करसी बे कदी सरमसार ना हो'सी।”d