रोमी 8

पवितर आत्मा गै द्वारा जीवन

1 झिका लोग यीसू मसी पर बिस्वास करै है बानै परमेसर गी सजा कोनी मिलैगी। 2 क्यूंकै यीसू मसी गै सागै भागिदार होण गै कारण आपां नै पवितर आत्मा गै द्वारा एक नुओ जीवन मिल्यो। यीसू मसी आपां नै पाप गी गुलामी ऊं छुटकारो दिरवा दिओ अर आपां नै मोत अर परमेसर गी सजा ऊं बचा लिओ। 3 आपणै मन गै पाप गै कारण मूसा गै नेम विधान नै समझ कोनी सक्या अर ईं नेम विधान गै द्वारा छुटकारो कोनी मिल्यो। ओ काम करण खातर परमेसर आपगै बेटै यीसू मसी नै मिनख गै रूप में संसार में घाल्यो अर बिमै बिलकुल पाप कोनी हो। आपगै बेटै यीसू मसी गै बलिदान गै द्वारा परमेसर मिनख जाती गा मन ऊं पाप गी ताकत नै तोड़ दियो। 4 ईंखातर कै आपां नेम विधान गै अनुसार चाल सकां हा क्यूंकै अब आपां पाप गी बुरी इच्छा गै अनुसार कोनी पण पवितर आत्मा गै अनुसार ई जीवन बितावां हा।

5 झिका लोग पाप गी बुरी इच्छा गै अनुसार चालै है बांगो सोच बिचार पाप गै अनुसार ई होवै है पण झिका लोग पवितर आत्मा गै अनुसार चालै है बांगै सोच बिचार पवितर आत्मा गै अनुसार होवै है। 6 झिका लोग आपगै मन में बुरी इच्छा राखगे चालै है बे आखर में परमेसर गी सजा गै योग्य बण जावेगा। पण झिका लोग पवितर आत्मा गै अनुसार चालै है बानै परमेसर अनन्त जीवन अर सांती बी देवैगो। 7 अर कोई बी आदमी बुरी इच्छा ऊं सोचे है तो परमेसर गो बैरी बण जावै क्यूंकै ना तो परमेसर गै नेम विधान गै अधीन है, अर ना हो सकै है। 8 झिका लोग मन में बुरी इच्छा राखगे चालै है बे लोग परमेसर नै राजी कोनी कर सकै।

9 पवितर आत्मा अब थारै जीवन में काम करै है। ईंखातर अब पवितर आत्मा गी आग्या गै अनुसार थारो जीवन चालै है पण पाप गै अनुसार कोनी। जे किंगैई जीवन में मसी गी आत्मा कोनी तो बो मसी गै पक्स में कोनी। 10 जे थे यीसू मसी गी पक्स में है तो थारो सरीर पाप गै कारण मर ग्यो तो पतविर आत्मा थानै एक आच्छो जीवन देसी क्यूंकै थे परमेसर गी नजर में निरदोस बणग्यो है। 11 अर जे यीसू मसी नै मरण ऊं जींवतो करयो परमेसर गी आत्मा थारै में बसेड़ी है तो झिकै नै मसी नै मरेड़ा ऊं जींवतो करयो बो थारी नास होणाळो सरीर गो बी आपगै आत्मा गै द्वारा झिको थारै में बसेड़ो है बिंगै द्वारा जींवतो करेगो।

12 हे मेरो भाईयो अर भेनो, पेला आपां पाप गी गुलामी में हा। पण अब पाप गी बुरी इच्छा गै अनुसार बिलकुल कोनी रेणो चईयै। 13 क्यूंकै पाप गी इच्छा गै अनुसार जियोगा तो मोत गो कारण बण जाओगा। पण पवितर आत्मा गी मदद ऊं पाप कोनी करो तो थे जिओगा। 14 ईंखातर कोई बी आदमी जे परमेसर गी आत्मा गै द्वारा आपगो जीवन बितावै है तो बो परमेसर गो उळाद कुहासी। 15 क्यूंकै झिकी आत्मा थानै मिली है बा पाप गी गुलामी में रेगे डराण खातर कोनी मिली। पण परमेसर गी उळाद होण खातर मिली है। ईं आत्मा गै द्वारा परमेसर नै आपां के सका कै, हे पिता, मेरा पिता। 16 आपां परमेसर गी उळाद हा, ओ समझण गै खातर पवितर आत्मा ई आपणी मदद करै। 17 अर जे आपां परमेसर गी उळाद हा तो बिंगा वारिस बी हा, अर परमेसर गा वारिस अर मसी गा सागी वारिस हा। जे सच्च में आपां यीसू मसी गै दुख में सामिल हो जावा तो बिंगै सागै मान समान जरूर मिलैगो।

आण आळै टेम में मिलण आळी मेमा

18 क्यूंकै मैं समझूं हूं कै अब गी दुख परेसानी आपणै पर परगट होण आळी मेमा गै सामै कीं कोनी है। 19 परमेसर गी बणाएड़ी सारी चीज ईं बात गी बडी जोरदार ऊं उडीक करण लागरी है कै कद परमेसर आपगी उळाद नै मान समान देवैगा। 20 परमेसर आपगी बणाएड़ी सारी चिजां पर स्राप दियो। ओ बणाएड़ी चिजां गी इच्छा ऊं कोनी होयो पण ओ परमेसर आप ई करयो। 21 पण फेर बी एक पक्की आस है कै परमेसर आपगी योजना गै अनुसार बणाएड़ी सारी चिजां नै मोत गी गुलामी ऊं छुटकारो देगे आपगै बेटा नै मेमा गी आजादी देवैगो।

22 क्यूंकै आपां जाणा हा कै परमेसर गी बणाएड़ी सारी चिजां सरू ऊं लेगे अब तांई परेसानी अर दुख भोग्यो है जियां एक लुगाई जापै गै टेम भागे है। 23 सारी बणाएड़ी चिजां एकली कोनी पण आपां बी बांगै सागै मन में भोत दुखी होवां हा। म्हानै पवितर आत्मा मिलगी, आ परमेसर गै एक वायदे गै निसानी है। ईंखातर म्हे उडीक करण लागरया कै परमेसर कद पाप गी बुरी इच्छा ऊं पूरी तरियां छुड़ागे आपगी उळाद बणासी। 24 परमेसर आपां नै छुटकारो दियो बाई आपणी पक्की आस है। जे आपां नै कोई चीज मिलज्यै तो बि पर ध्यान लगागे आस राखा तो बा आपणी आसा कोनी। 25 झिकी चिजां आपां नै अजे तांई मिली कोनी अर बा चीज मिलण तांई बि पर धीरज ऊं पक्की आस राखणी चईयै।

26 ईं तरियां आपणी कमजोरी में पवितर आत्मा आपणी मदद करै है। कदी कदी जद आपां नै पराथना करणी कोनी आवै है जद बी पवितर आत्मा आपणी मदद करै अर आपणी परेसानी में पवितर आत्मा परमेसर गै सागै बिनती करै है। बा बिनती मिनख बोल कोनी सकै 27 परमेसर आपणी मन गी बात नै जाणै है अर पवितर आत्मा के बोलै है बिनै बी जाणै है क्यूंकै पवितर आत्मा पवितर लोगां खातर परमेसर गी इच्छा गै अनुसार बिनती करै है। 28 आपां जाणा हा कै परमेसर झिकै लोगा ऊं प्रेम राखै है परमेसर बा खातर हरेक बात भलाई खातर करै है। बा लोगां खातर झिका बिंगी इच्छा गै अनुसार बुलाएड़ा है। 29 क्यूंकै झिका नै बण पेला जाण लिया अर बानै पेला ई ठेराया बी है कै बिंगै बेटै गी स्वरूप में होवै कै बो सारै भेन भाईयो ऊं पेलो होवै। 30 फेर झिका नै बण पेला ऊं ठेराया अर बानै बुलाया बी अर झिका नै बुलाया बानै परमेसर गै नजर में निरदोस बी ठेराया अर बानै मेमा बी दी।

परमेसर गो प्रेम

31 आ बाता ऊं आपां नै पतो लागै है कै जे परमेसर आपणै सागै है तो आपणो बिरोध करण आळो कोई कोनी हो सकै। 32 परमेसर आपगै बेटै यीसू मसी नै आपगै खातर कोनी राखयो पण आपणै सारा खातर मरण नै सूंप दियो। बो बिंगै सागै आपां नै ओर सारो कीं मुफ्त में क्यूं ना देवैगो? 33 परमेसर गै चुणेड़ा नै कोई बी दोसी बणा कोनी सकै क्यूंकै परमेसर आपगी नजर में बानै निरदोस बणाया है। 34 परमेसर गै चुणेड़ा गो कोई बी न्याय कोनी कर सकै क्यूंकै मसी आपणै खातर मर गेयो अर सारा ऊं मोटी बात आ है कै परमेसर मसी नै मरेड़ा ऊं जींवतो करयो अर मसी परमेसर गी दाई ओर बेठगे आपणै खातर बिनती करै है। 35 आपां नै कोई बी मसी गै प्रेम ऊं न्यारो कोनी कर सकै। चायै आपणै जीवन में कोई बी परेसानी दुख आवै, चावै दूसरा लोग आपां नै तंग करै, चावै खाण खातर अर पेरण खातर कीं ना होवै, चावै आपां नै कोई मारण गी कोसिस करै अर चावै आपां मर जावा ऐ सारी बातां आपां नै मसी गै प्यार ऊं न्यारा कोनी कर सकै। 36 पवितर सासतर में इंया लिखेड़ो है।

“तेरै खातर म्हे हर रोज मारण आळा गै हात में दिया जावै हा

अर मारण आळी भेड़ जिसा समझया जावा हा।”

37 मैं झिको कीं बोल्यो है बा सारी बाता में यीसू मसी झिको आपणै प्रेम करै है बिंगै द्वारा आ सारी बाता पर पूरी तरियां ऊं जीत मिलै है। 38-39 आ बात मैं जरूर जाणूं ऊं कै मैं प्रभु यीसू मसी गै प्रेम ऊं कोई बी चीज न्यारी कोनी कर सकै। चावै आपां जीआ चायै मरां, चायै सुरगदूत या बुरी आत्मावा, आज गी डर गी बाता अर आण आळी दुख गी बात अर झिकी सकती आसमान में अर धरती पर है आ सारी बाता ऊं प्रभु यीसू मसी गै द्वारा आपां नै परमेसर झिको प्रेम दिखायो है बिऊं कोई बी न्यारो कोनी कर सकै।