Yudasi boa tɔmasa gbɛsa Yésùsì
(Mat 26.1-5; Mlk 14.1-2; Zaŋ 11.45-53)
22
Ma swéé yɔ́à mapa tàà lévili, kà í ɓééɗì nɛ̀náǎ Pasika Zuifi à, boabàà à kumono wɛ̀. 2 Ye Mgbàà ɓò gbɛ ɓùyà Njámbe yɔ́ɔ̀ ɓò mbo mbwala mboŋa Njámbe boabàà kiyo jɛ gbɛ̂ Yésùsì, kpà hi nɛ̀náǎ yóà bóbàà à jéà kéé nɛ̀ wì. 3 À ɓɛ̀ sikí ŋgɔ̀, kà Sátànì bia sɛ́à Yúdasi kà ì ɓééɗì káà è Iskalioti à, mà ɓò ta ŋga yami wɛ Yésùsì ɓukɔ nɛ̀ wɛ́ɛ́lì. 4 Judasi ɛ̀làbàà kà wɛ̀li yɔ́ɔ̀ Mgbàà mɔ́kɔ̀njì ɓò gbɛ̀ ɓùyà à Njámbe, nɛ̀ mɔ́kònjì ɓò ɓanìnì Mgbàà gàlà Njámbe mɔ ì mɛ́ɓɛ̀ɛ̀ kà bò gbɛ́sì Yésùsì à yóà. 5 Yóà boabàà nɛ̀ mɛ̀ŋgàlà mɔ súlòwɛ̀, kà yóà ɗɛ́ pa ŋgá é ì bò hà á pátà. 6 Yudasi tɔmasabàà kà kunjìɗì kiyo dòlà siki mɔ gbɛ̀sì Yésùsì tàà píò à i ŋgo wɛ.Yésùsì boa ɛsa wì à ɓɔ̀ɔ̀nya nyɔ Pasika
(Mat 26.17-25; Mlk 14.12-21; Zaŋ 13.21-30)
7 À siki yɔ́à mapa taa levìlì à, ɓɛ̀ swéé ɛ́ ì gbɛ́ kàà nɛ̀ bé bata mɔ nyɔ́ à yɔ́a Pasika hɔ́àbàà. 8 Yésùsì tomabàà Piɛli yɔ́ɔ̀ Zaŋ nàà bati, kà ɓwɛ́ nɛ̀ yóà nɛ̀náǎ: «Ɛ́nɛ̀ ɛ́lɛ̀ à gio nyɔ̂ Pásika àɔɔ.» 9 Kà yóà áánì nɛ̀ à nɛ̀náǎ: «Mɛ gwéé ɔ̀ ɛ́lɛ̀ à gio nyɔ́ wɛ̀ ŋge?» 10 Kà búli nɛ̀ yóà nɛ̀náǎ: «Ɛ́nɛ̀ jée! À nɛ̀ hɔ́à nàà posi, ɛ́nɛ̀ bò kpatini nɛ̀ mà wéé à ɓuo njanjɔ̀ lì. Ɛ́nɛ̀ nɛ̀ná à, kà nɛ̀ bi à ɓɛ̀ gàlà kà bò bi hɔ̀. 11 Ɛ́nɛ̀ ɓwɛ́ à mwáà gàlà nɛ̀náǎ: “Mbò bwàlà boa áánà wɛ nɛ̀ mɛ nɛ̀náǎ: Ɓɛ̀ tumá kà bò nyɔ yɔ́a Pasika hɔ̀ yɔ́ɔ̀ ɓò yàmìwè wàà à ŋgè?” 12 Ɓɛ̀ wì ŋgɔ̀ bò mbo ɛ́nɛ̀ mà tuma náà ŋgɔ̀ gàlà jù té, Mgbààwɛ̀, nɛ̀ mɔ yele à jàà wɛ. Ɓɛ̀ sokó kà nɛ̀ bò gi nyɔ yɔ́a Pasika hɔ̀ à é.» 13 Yóà ɛ́làbàà, ì kpà mɔ yele mɛ́ɓɛ̀ɛ̀ kà Yésùsì ɓwɛ́àbàà, kà yóà gi nyɔ́ yɔ́à Pasika.
Mùù yɔ́ɔ̀ ɓɛ̀ Yésùsì
(Mat 26.26-30; Mlk 14.22-26; 1Kl 11.23-25)
14 Mɛ́ɓɛ̀ kà siki hɔ́abàà, kà Yésùsì yɔ́ɔ̀ ɓò ɓwɛ́ mɔtómɔ̀ wàà gbesini à ŋ ŋgɔ́ɔ́ mésà. 15 Kà ɓwɛ́ nɛ̀ yóà nɛ̀náǎ: «Mi gwéabàà súlòwɛ̀ enáǎ ɔ́ɔ̀ nɛ̀ nyɔ́ nyɔ́ɔ̀ ɓɛ̀ Pasika à kinɔ sókò, kimà mi bò kɔli hi à jɔ̀ɔ̀ háɓáɗà! 16 Íí, mì ɓwɛ́ ɛ́nɛ̀ nɛ̀náǎ, mi nyɔ kìmà nyɔ pasika hi na hɔ̀ nɛ̀ ɓɛ̀ siki kà mɔ̀ɔ̀wɛ̀ bò dɛ nɛ̀ te à jàà Nja nɛ̀ Njámbe.» 17 Kɔ́ɔ́ wɛ̀, kuobàà kɔ́pɔ̀ kà hà Njámbe i ŋgɔ́ɔ́, kà ɓwɛ́ nɛ̀náǎ: «Ɛ́nɛ̀ kùù ɓɛ̀ kɔpɔ kà nɛ̀ nɔ̀nɔ̀ à sokó mɔ̀nɛ̀. 18 Ìì, mi ɓwɛ́ ɛ́nɛ̀ nɛ̀náǎ, kunjìɗì mwɛ̀ɛ̀ mi nɔ kima dɔ́ɔ̀ nà hɔ̀ nɛ̀ à ɓɛ̀ swéé kà Nja nɛ̀ Njámbe bò hɔ̀ nɛ̀ à.» 19 Kɔ́ɔ́wɛ̀, kà kù mapa, kà hà Njámbe i ŋgɔ́ɔ́, kà gbiiɗì mapa wè, kà kùù hà yóà kà ɓwɛ́ nɛ̀náǎ: «Ɓɛ̀ mɔ ɓɛ̀ɛ̀ bò mùù mù, kà i hábàà à wéè mɔ̀nɛ̀. Ɛ́nɛ̀ dɛ ɓɛ̀ mɔ ŋgo mɔ tá nɛ̀ mi.» 20 À kɔ́ɔ̀ ɗó nyɔ́ ŋga mɔ, kà Yésùsì kùù kɔpɔ dɔ́ɔ́, kà ɓwɛ́ nɛ̀náǎ: «Ɓɛ̀ kɔ́pɔ dɔ́ɔ́ ɓɛ̀ɛ̀ bò tɔ́ɔ́tɔ́ ŋgɔ̀mana mboni Njámbe, pɛ́kà mbè mù gwaa à wɛ mɔ̀nɛ̀. 21 Mɔ̀ɔ̀wɛ̀, ɛ́nɛ̀ jɔ̀ɔ̀ ɓɛ̀ wì kà bò à gbɛ́sì mì à, ɔ́ɔ̀ à bò kɛ́ mesa! 22 Ìì, Be wì bò fè mɛ́ɓɛ̀ɛ̀ kà Njámbe ɗɛ́ ŋgàɗabàà, ɓɛmɔ̀ŋgɔ̀, ŋgo nɛ̀ mwâ gbɛ́sì à!» 23 Kɔ́ɔ́ ɓɛ̀ wɛ̀lì mɔ ŋgɔ̀, kà yóà kujiɗi áánà wɛ à soko yóà nɛ̀náǎ: « Ŋge wì à sokó mɔ̀ɔ̀ bò dɛ̀ ɓɛmɔ̀ŋgɔ̀?»
Ò à bò Mgàà wɛ, péle nya wa o?
24 Kɔɔ wɛ, kà ɓò yàmìwè Yésùsì kujiɗi mɔ́ɔ̀nà à sokó yóà lémbà wɛ mɔ i ɓɛ̀ wì à sokó yóà Mgbààwɛ̀. 25 Kà Yésùsì ɓwɛ́ nɛ̀ yóà nɛ̀náǎ: «Ye Mgbàà mɔ́kònjì njà à ŋgɔ́ɔ́ ɓɛ̀ mbúnù dùù nɛ̀ wì yóà mɛ mgbáàmɔ̀njà, kà ŋgɔmina gwee i ɓuɓi yóà è, ɓò dɛ̀ dèmɔ̀. 26 Ɓɛmɔ̀ŋgɔ̀, nàà ɛ́nɛ̀ à du à má mɛ́ɓɛ̀ nàà. Ɛ́nɛ̀ lɛ́ɛ́sìnì nɛ̀ dɛ wɛ́ nɛ̀náǎ, ɓɛ̀ wì kà bò mgbàà wɛ̀ à sokò mɔ̀nɛ̀ à, à dù mɛ tokiɗì yébè, kà ɓɛ̀ wì kà bò hà mboŋa à sokó mɔ̀nɛ̀ à, à dù mɛ mwâ dɛ̂ tò nya wàà. 27 À ŋgɔ̀ o à bò Mgbààwɛ̀ à sokó mɔ̀nɛ̀ o, wà ɓɛ̀ɛ̀ kà bò à kúò nyɔ́ɔ́ pɛ̀ɛ̀ dúúso wɛ à ŋ ŋgɔ́ɔ́ mesa ò? Wáɓɛ̀ kà bò à ŋ ŋgɔ́ɔ́ mesà o, wáɓɛ̀ɛ̀ kà bò à ŋ ŋgɔ́ɔ́ misa ma bò Mgbààwɛ̀ ná? Nàà mi, mi bò à sokó mɔ̀nɛ̀ mɛ ɓɛ̀ wì kà kùù nyɔ̀ pɛ̀ɛ̀ à dúúsò wɛ à ŋ ŋgɔ́ɔ́ mesà à! 28 Ɛ́nɛ̀, ɛ́nɛ̀ bò ɓɛ̀ wì nɔ̀ɔ̀ kà kɔ́labààɔɔ yóà à jàà yè hàɓàɗà mù. 29 Mɛ́ɓɛ̀ kà bafa mù kùobàà Njá kùù hà mi à, mi kùo kàà há ɛ́nɛ̀. 30 Ɛ́nɛ̀ bò nyɔmɔ, kà ɛ́nɛ̀ nɔ káá mɔ à ŋ ŋgɔ́ɔ́ mesa mù nàà Njá nɛ̀ mi, ɛ́nɛ̀ bò dù kàà nù à ŋ ŋgɔ́ɔ́ tiso mwâ njà, mɔ soi bánjà daɗo Ìslaɛ́li ɓúkɔ nɛ̀ wɛ́ɛ́li.»
Yésùsì ɓwɛ́ nàà, Piɛli bò bùùsì à
(Mat 26.31-35; Mlk 14.27-31; Zaŋ 13.36-38)
31 Yésùsì ɓwɛ́àbàà nɛ̀ Simɔni piɛli nɛ̀náǎ: «Simɔni, Simɔni, ɓá jèè, Sátàni áánà nɛ̀náǎ kà pɛ̀ɛ̀ yɛgalà ɛ́nɛ̀ mɛ́ɓɛ̀ɛ̀ kà i yɛgili ɓɛ̀ mɔ kà bò nɛ̀ Mgbàà, mɔ kɛ́tini sokó wɛ̀ yɔ́ɔ̀ pàlà wɛ̀. 32 Ɓɛmɔ̀ŋgɔ̀, mi sakwàlà mɔ à wéé mɛ, wɛ ɓukòlò mɛ kàà tɛ yɔ́ɔ̀. À ɓɛ̀ sikí kà mɛ bò jisi pɛ̀ɛ̀ nàà mi à, hà kà ɓòjà mɛ ɔ́.» 33 Piɛli búlòbàà nɛ̀ à enáǎ: «Mgbààmɔ́njà, mi bò wááwàà nɛ̀náǎ mi ɛ́lɛ̀ à mɔ́nyɔ́lɛ̀ɔɔ mɛ, mi fe kàà ɔ́ɔ̀ mɛ.» 34 Yésùsì jiobàà buli nɛ̀ à nɛ̀náǎ: «Piɛli, mi ɓwɛ́ mɛ nɛ̀náǎ nàà kwálà à dɔ́mɛ̀ mwɛ̀ɛ̀ mɛ bò bùùsì mi sanɔ waata.»
Ɛ́nɛ̀ dú ɓɔ́ɔ́nya wɛ mɔ bi bilò
35 Kɔ́ɔ wɛ̀, kà Yésùsì ɓwɛ́ nɛ̀ yóà nɛ̀náǎ: «À ɓɛ̀ siki kà mì ɛ́sàbàà ɛ́nɛ̀ tàà pátà, tàà ɓàkuté, tàà ma sápàtò à, ɛ́nɛ̀ boabàà à sá mà mɔ?» Kà yóà ɓwɛ́: «Á à, ó bò mà sáá má mɔ na.» 36 Kɔ́ɔ́wɛ̀, kà Yésùsì jii ɓwɛ́ nɛ̀ yóà ènáá: «Ɓɛmɔ̀ŋgɔ̀, mwɛ̀ɛ̀ ɓɛ̀ swéé ɛ́, ɓɛ̀ wì kà bò nɛ̀ pátà à kùù, kinɔɓɛkɛ mɔ̀ɔ̀ nɛ̀ ɓɛ̀ wì kà bò nɛ̀ ɓákuté à à kùù, wáɓɛ̀ɛ̀ kà bò tâ pɛli à, à lɛsɛ́ mɔ́kanda wàà, kimà bò mbɔɔ nɛ̀ pɛ́lì. 37 Bò tóà wɛ̀ à Gɛ́lɛ́lɛ́ Mɔ́kànɔ̀ Njámbe nɛ̀náǎ: “I yóosabàà à, à ta ŋga ɓò dɛ̀ ɗàà mɔ.” Mɔ̀ɔ̀wɛ̀, ɓɛ̀ mɔ ɓɛ̀ kà bò tóà wɛ à jàà Gɛ́lɛ́lɛ́ Mɔ́kànɔ̀ à wɛ mù à, bò dɛ tɛ.» 38 Yeɓò yàmìwè wàà búlòbàà nɛ̀náǎ: «Mgbààmɔ́nja, jɔ̀ɔ̀ pɛ̀lì héà wɛ́ɛ́lì à.» Kà buli nɛ̀ yóà nɛ̀náǎ: «lɛ́ɛ́sà na!»
Sakwálà mɔ Yésùsì náá ŋgaɗi te olivi
(Mat 26.36-46; Mlk 14.32-42)
39 Yésùsì tùɓobàà kà ɛli à ɓá ɓɛ̀ tɛ́ kà ɛ́ɛ́labàà hɔ̀ nɛ̀ bàtì à, nàà ŋgàɗí ɓɛ̀ tè ŋɛ̀ olivi à, kà ɓò yàmìwè wàà nɛ̀nì à. 40 Mɛ́ɓɛ̀ɛ̀ kà yɔ́ɔ̀ hɔ́àbàà nàà ɓɛ̀ ŋgaɗi ŋgɔ̀ à, kà Yésùsì ɓwɛ́ nɛ̀ yóà nɛ̀náǎ: «Ɛ́nɛ̀ sákwɛ̀lɛ̀ mɔ, kima à ɓɛ̀ siki kà ɛ́nɛ̀ bò du weà wɛ, wɛ ɛ́nɛ̀ kàà tɛ té à njɛmbi.» 41 Kɔ́ɔ́ ɓɛ̀ wéli mɔ ŋgɔ̀, kà tiki nɛ̀ yóà ɛ́lɛ̀ biɔ́ ɗúúsì, à yóòɗì píò ɗíɓòkò nɛ̀ kɔ. Gbinobàà jigólò à mbúnù kà kúnjiɗì sákwàlà mɔ 42 nɛ̀ ɓɛ̀ gbààwé nɔ̀ɔ̀ nɛ̀náǎ: «Ɗibàfà, à mɛ gwéà, dɛ̂ ma mi jéà má ɓɛ̀ nyi ŋgo mɔ kà bò kpà mi á nà. Mɔ̀ɔ̀wɛ̀, à dɛ́ mà tɛ̀ à gwéà mɔ sɛ́à mù nà, ɓɛmɔ̀ŋgɔ̀, á dɛ tɛ à gwéà bɔ́ mɛ!» 43 Ma íŋgélési tòlabàà nàà lí ŋgɔ̀ pɛ̀ɛ̀ nàà Yésùsì à jió wɛ hà à ɔ̀. 44 Kéé bǎ à súlòwɛ̀, kà jìì kunjìɗì yayo nɛ̀ Njámbe péése soko. Ɓɛ̀ bɛ́abàà à gba wɛ à mùù wàà ju à mbúnù à, bóbàà batɛ́nɛ̀ mbɛ. 45 Kɔ́ɔ́ yáyò nɛ̀ Njámbe, kà kúlì ŋgɔ̀ jìsì pɛ̀ɛ̀ nàà ɓò yàmìwè wàà kà kpà yóà à téà lila, nɛ̀ mɔ̀ɔ̀ tɛ à wè ɓɛ̀ mɔnɔ à pela wɛ̀. 46 Tùùsòbàà yóà à lílà, kà ɓwɛ́ nɛ̀ yóà nɛ̀náǎ: «Gè á kà ɛ́nɛ̀ téé nɛ̀ lílà è? Ɛ́nɛ̀ kuli ŋgɔ̀ kà ɛ́nɛ̀ yayi nɛ̀ Njámbe, wɛ̀ ɛ́nɛ̀ kàà tɛ te à njɛmbi à siki ɓɛ̀ i bò wéà ɛ́nɛ̀.»
Ì ba Yésùsì
(Mat 26.47-56; Mlk 14.43-50; Zaŋ 18.3-11)
47 Mɛ́ɓɛ̀ kà boabàà à wela mɔ nɛ̀ ɓò yàmìwè wàà kà píò wì hɔ̀. Yudasi mà ta ŋga ɓò yàmìwè wàà ɓúkɔ nɛ̀ wɛ́ɛ́li, bóbàà à lɛ́ wɛ̀ nàà bati yɔ́ɔ̀ yóà. Tikobàà ɛ́lɛ̀ à ŋgólò Yesùsì, nɛ̀náǎ kà lìɓìkì à. 48 Yésùsì ɓwɛ́àbàà nɛ̀ à nɛ̀náǎ: «Yudasi, mɛ gbɛsi Be wì nɛ̀ liɓókò à?» 49 Mɛ́ɓɛ̀ ɓò kà ta ŋga Yésùsì jɔ̀abàà ɓɛ̀ mɔ kà bò hɔ̀, kà yóà áánì nɛ̀ à nɛ̀náǎ: «Mgbààmɔ́njà, mɛ gwéé nàà ɔ̀ dumiki ɓɛ̀ wì nɔ̀ɔ̀ nɛ̀ pɛ́li mɔ̀ɔ̀?» 50 Mà wì à soko yóà yɔ́abàà pɛ̀lì, pɔ́ɔ́ nɛ̀ já là náà wéékɔ́ mwâ dɛ̀ tò Mgbàà mɔ́kònjì mwâ gbɛ̂ ɓùjà Njámbe. 51 Ɓɛmɔ̀ŋgɔ̀, Yésùsì ɓwɛ́àbàà nɛ̀náǎ: «Ɛ́nɛ̀ mgbɔ̀lɛ̀ ɓɛ̀ mɛ̀ɛ̀ lɛ́ɛ̀sà nà!» Ɗɔ̀ɔ̀ à jàla ɓɛ̀ wì ŋgɔ̀, kà saki à. 52 Kɔ́ɔ́ wɛ̀, kà Yésùsì jìì ɓwɛ́ nɛ̀ mɔ́kònjì ɓò gbɛ́ ɓùyà Njámbe nɛ̀ mɔ́kònjì ɓò ɓanìnì Mgbàà gála Njámbe nɛ̀ ɓɛ̀ mgbàà ŋgà wì nɔ̀ɔ̀ i pɛ́àbàà à ba à nɛ̀náǎ: «Mwâ ju à mi? Géà kà nɛ̀ pɛ̀ɛ̀ ba nɛ̀ mi nɛ̀ pɛ́lì tɛ kùù ŋgindo tè à è? 53 Swee yele, ɔ́ɔ̀ nɛ̀ boabàà à jàà mgbàà gála Njámbe, ɛ́nɛ̀ bǎ mà mi nà, ɓɛmɔ̀ŋgɔ̀ siki hɔ̀ à nàà ɛ́nɛ̀, sikiɔɔ ɗindindi mɔ!»
Piɛli boa búúso Yésùsì
(Mat 26.57-58, 69-75; Mlk 14.53-54, 66-72; Zaŋ 18.12-18, 25-27)
54 Yóà sɛ̀abàà kɔ à tɛ Yésùsì. I kùù à ɛ́lɛ̀ nɛ̀ náà gàlà nɛ̀ Mgbàà mɔ́kònjì mwâ gbɛ̂ ɓùyà Njámbe. Piɛli boabàà à nɛ̀ná yóà nàà ɗò ɗúúsi. 55 I básàɗàbàà wéè à wésɛ̀ɛ̀ dè, yóà bóbààɔɔ wéè wɛ̀. Kà Piɛli pɛ̀ɛ̀ dúnù à ŋgólo ɓɛ̀ wì nɔ̀ɔ̀ àɔɔ wéé à. 56 Mà mwâ dɛ̂ tò, yékò jɔ́abàà Piɛli du ŋgò nù à ŋgóló wéè, kà simbili á kpɛ̀ɛ̀, kà ɓwɛ́ nɛ̀náǎ: «Ma ɓò ta ŋga wàà héà!» 57 Ɓɛmɔ̀ŋgɔ̀, Piɛli bùùsobàà, kà ɓwɛ́ nɛ̀náǎ: «Yekó, mi ì ma à na.» 58 Be tokiɗi siki kɔ́ɔ́wɛ̀, kà kwalà wì jíí jɔ̀ɔ̀ Piɛli, kà ɓwɛ́ nɛ̀ à nɛ̀náǎ: «Mɛ kàà, mɛ bò ma ta ŋga yóà!» Ɓɛmɔ̀ŋgɔ̀, Piɛli jiobàà buli nɛ̀ ɓɛ̀ wì ŋgɔ̀ nɛ̀náǎ: «Àa ma ta ŋga yóà mà mi nà.» 59 Tàà bɔ́li ma súlòwɛ̀, biɔ mɛ lɛli sikinɔ, kà kwalá wì jíí ɓwɛ́ lémbà wɛ́ nɛ̀náǎ: «Tɛ́kìlìmɔ̀, ɓɛ̀ wì ɓɛ̀ɛ̀, yɔ́ɔ̀ Yésùsì à lɛlɛ, pɛ́kà bò ɓò Gálilê.» 60 Kà Piɛli buli nɛ̀ ɓɛ̀ wì ŋgɔ̀ nɛ̀náǎ: «Mi bò má à jéà ɓɛ̀ mɔ mɛ bò à wela wɛ na.» À ɓɛ̀ kinɔ́ siki kà boabàà à wela mɔ̀ɔ̀, kà kwàla dɔ́mi. 61 Kà Mgbààmɔ́nja kiɓosobàà mùù kà seɓe nɛ̀ Piɛli kpɛɛ, mɔ̀ɔ̀wɛ̀ kà Piɛli ta ŋgili ɓɛmɔ̀ kà Mgbáámɔ́njá ɓwɛ́àbàà nɛ̀ à nɛ̀náǎ: «Mwɛ̂ à ɓɛ̀ swéé ɛ̀, mɛ bò buusi mi sanɔ wààtà. Kɔ́ɔ́ buuso mi, kwàla bò dɔmi» 62 Piɛli tùɓobàà ɛ́lɛ̀ nàà dɛ̀ kà hee kwa súlòwɛ̀.
I boa yáá Yésùsì nɛ̀ mɛ́là à
(Mat 26.67-68; Mlk 14.65)
63 Yeɓɛ̀ wì nɔ̀ɔ̀ i boabàà à ɓanànà Yésùsì, jáábàà à nɛ̀ mɛ̀là à le. 64 Yóà kpeabàà lìì wàà nɛ̀ mɔ̀kanda i áánì nɛ̀ à ènáá: «Ò à dìì mɛ ò? Ɓwɛ̀ àɔɔ mɛ kulawɛ!» 65 Yóà wèlabàà káá má Mgbàà wè yáá jàlà nɛ̀ à.
Yesùsì náá Mgàà gàlà sɔyi wè Juwifi
(Mat 26.59-66; Mlk 14.55-64; Zaŋ 18.19-24)
66 Mɛ́ɓɛ̀ kà mɔ̀saì sábàà mgbáá ŋgà Zuifi nɛ̀ mɔ́kònjì ɓò gbɛ̀ ɓùyà Njámbe, tɛ kùù ɓò mbò mbwala mboŋa Njámbe gbésanabàà tɛ̀. Kà yóà áánì i kùù à pɛ̀ɛ̀ nɛ̀ nàà Mgbàà gàlà sɔyi wè yóà, 67 kà i áánì nɛ̀ à nɛ̀náǎ: «À boa mɛ ɓò ɓɛ̀ wì kà Njámbe taɗa ɓwɛ́ɔɔ.» Yésùsì búlòbàà nɛ̀ yóà nɛ̀náǎ: «À mi ɓwɛ́ à ɛ́nɛ̀, ɛ́nɛ̀ ɓukili kimà na. 68 À mi áánà káà nio nɛ̀ ɛ́nɛ̀, ɛ́nɛ̀ buli kima na. 69 Ɓɛmɔ̀ŋgɔ̀, kunjìɗì à ɓɛ̀ swéé ɛ́ mwɛ̂, Be wì bò dunu à tiso kuma nàà wè kɔ Njámbe mwâ ɔ̀ yele.» 70 Yóà yele áánabàà nɛ̀ à nɛ̀náǎ: «À ŋgɔ̀ Bè Njámbe à mɛ?» Kà buli nɛ̀ yóà nɛ̀náǎ: «Ɛ́nɛ̀ mwâ tɛ̀ ɓwɛ́, mi bò à.» 71 Mɔ̀ɔ̀wɛ̀, yóà ɓwɛ́àbàà nɛ̀náǎ: «Ɔ̀ɔ̀ bò má hi nɛ̀ posa gwéà ɓéèɗa ɓò ɗyaakisi wè na! Ɔɔ̀ mwâ tɛ́ jéà gbààwè nuu wàà!»