Hà mɔ kɔ́tú ké gɔ́là
(Mlk 12.41-44)
21
Yésùsì sèɓabàà à ŋgólò wàà, kà jɔ̀ɔ̀ mɛ́ɓɛ̀ɛ̀ kà mwâ njá boa píò pátà à ɓɛ̀ soko kà i pi pátà hɔ̀ à jàà Mgbàà Mgbàà gàlà Njámbe à. 2 Kà jɔ̀ɔ̀ kàà mɛ́ɓɛ̀ɛ̀ kà ma kɔ́tù ke gɔ́là píò tokiɗi gbi ŋgili pátà wɛ́ɛ́lì à ɓɛ̀ soko ŋgɔ̀. 3 Kà Yésùsì ɓwɛ́ nɛ̀náǎ: «Mi ɓwɛ́ ɛ́nɛ̀, bò tɛ̀kili mɔ, ɓɛ̀ kɔ́tú ke gɔ́là ɗɛ́à pátà à ɓɛ̀ soko pélè wì yele. 4 À tɛ́kìlì mɔ, bò ɓɛ̀ hɔ̀ yele hà ɓɛ̀ pátà kà yóà boa ma nè gwéà wɛ i na, ɓɛmɔ̀ŋgɔ̀, ɓɛ̀ kɔ́tu ke ŋgɔla à jàà sa wàà hà ɓɛ̀ mɔ kà boa nè yele mɔ kpasi nɛ̀ à.»Yésùsì boa ɓwɛ́ wɛ è Mgàà Mgbàà gàlà Njámbe bò yààkìɗì tɛ̀
(Mat 24.1-2; Mlk 13.1-2)
5 Yemà kinɔ́ wì boabàà à wéla wè Mgbàà Mgbàà gàlà Njámbe, kà yóà ɓwɛ́ è bò dòlà wɛ súlòwɛ̀, nɛ̀ dòlà ɗiɓoko, tɛ kùù ɓɛ̀ mɔnɔɔ kà wì hà Njámbe à. Ɓɛmɔ̀ŋgɔ̀, Yésùsì búlòbàà nɛ̀ yóà nɛ̀náǎ: 6 «Mà swéé bò dù, kà ma ɗìɓòkò sikinɔ kɔ́li kima nɛ̀ɛ̀ní à ŋgɔ́ɔ́ ma na, ɓɛ̀ mɔ̀ɔ kà ɛ́nɛ̀ boa jɔ̀ɔ̀ wɛ, yele bò yakiɗi tɛ.»
Yeɓɛ̀ mɔ nɔ̀ɔ̀ kà bò haɓiɗi wì à
(Mat 24.3-14; Mlk 13.3-13)
7 Yóà áánàbàà nɛ̀ à nɛ̀náǎ: «Mbo mbwala, ɓɛmɔ̀ŋgɔ̀ bò dɛ tɛ̀ à ŋgè siki è? Ŋgè ndemi mɔ bò osisiɔɔ ɓɛ̀ siki kà ɓɛ̀ mɔ nɔ̀ɔ̀ ŋgɔ̀ bò i à dɛ tɛ́ à è?» 8 Yésùsì búlòbàà nɛ̀ yóà ènaáǎ: «Ɛ́nɛ̀ dù nɛ̀ jɔma, ɛ́nɛ̀ dɛ̂ má è wì ɔtɛ́ɗɛ̀ ɛ́nɛ̀ nà. pɛ́kà súlò wì bò pɛ̀ɛ̀ à ɔtáɗà ɛ́nɛ̀, nɛ̀ lìì mù! Yóà bò ɓwɛ́ nɛ̀náǎ: “Mi bò wà ɓɛ̀ kà Njámbe taɗa kà boabàà bò pɛ̀ɛ̀ à! Siki hɔ́à!” Ɓɛmɔ̀ŋgɔ̀, ɛ́nɛ̀ nɛ̀nɛ ma yóà nà. 9 À ɓɛ̀ siki kà ɛ́nɛ̀ bò jéé wì à wela wɛ bílo, nɛ̀ dɛ njɛ́munjɛ́mu mɔ à jàà njà à, ɛ́nɛ̀ jéama kéé nà. Peka lɛɛsini ɓɛ̀ mɔnɔɔ ŋgɔ̀ à sua dɛ́ tɛ́ nɛ̀ bàtí. Ɓɛmɔ̀ŋgɔ̀, sɔ̀ɔ̀ɗì mbúnù hɔ̀ kima à ɓɛ̀ siki ŋgɔ̀ wááwáá nà.» 10 Kà Yésùsì tò ŋgiɗi wéli mɔ wàà nɛ̀náǎ: «Yemà kúlu bò ɛ́li à biyo bilo nɛ̀ má kulu, ma ju nja bò ɛli à biyo bílò nàà má ju nja. 11 Bò du nɛ̀ Mgbàà naŋgilili, kà nɛ̀ fótò, nɛ̀ pɔ́kɔ Mgbàà tíndòmɔ̀ mɔ, à ma píò ju nja, bò du kàà nɛ̀ kee ɓula, tɛ kùù ndemi à tola wɛ nàà li ŋgɔ̀. 12 Ɓɛmɔ̀ŋgɔ̀, nàà mɔ̂ wɛ́ à sua dɛ tɛ́, í bò bá ɛ́nɛ̀, kà wì haɓiɗi ɛ́nɛ̀, i bò kùù ɛ́nɛ̀ gbɛsɛ kima i bò paɓi ɛ́nɛ̀ à gàlà sákwàlà mɔ, kà wì ɗe ɛ́nɛ̀ à mɔ́nyɔ́lɛ́, i bò fundi ɛ́nɛ̀ nàà Mgbàà mɔ́kònjì yɔ̂ ŋgɔmina njà à wè mù. 13 Bò du nɛ̀ ɛ́nɛ̀ ɓɛ̀ siki kà ɛ́nɛ̀ lɛɛsini nɛ̀ ɓwɛ́ ɓɛ̀ mɔ kà ɛ́nɛ̀ i ŋgɔ̀ bɛsɛ mi à. 14 Ɛ́nɛ̀ ɗɛ à jú mɔ̀nɛ̀ è, ɛ́nɛ̀ sua ma kiyo wè nɛ̀ bati ɓɛ̀ mɔ kà ɛ́nɛ̀ bò weli mɔ kàmini nɛ̀ mùù mɔ̀nɛ̀ nà. 15 Mi mwâ tɛ bò hà ɛ́nɛ̀ gbààwé jɔma, kà bò kɛɛ́na mɔ̀nɛ̀ ɓò ma nɛ̀ ɔ̀ sɔyi má mɔ nɛ̀ búlo wa na. 16 Ɛ́nɛ̀ bò du gbɛsa wɛ nɛ̀ mɔsuma bafa mɔ̀nɛ̀ yɔ́ɔ̀ náná mɔ̀nɛ̀, ɓójà mɔ̀nɛ̀, yali mɔ̀nɛ̀ nɛ̀ mbayì mɔ̀nɛ̀, i bò dé à mɔnyɔlɛ fio súlò ma bò ta ŋgà mɔ̀nɛ̀. 17 Yewì yele bò kee ɛ́nɛ̀ à wéé mù. 18 Ɓɛmɔ̀ŋgɔ̀, mà pɛ múúju mɔ̀nɛ̀ síkìnɔ́ yɔ́ɔ̀ kimà na. 19 Ɛ́nɛ̀ bá kâ sɛ̀à. À ɛ́nɛ̀ dɛ́a mɛ́ɓɛ̀ ɛ́nɛ̀ bò kpasisi mùù mɔ̀nɛ̀.»
Yésùsì boa ɓwɛ́ wɛ́ è Yélúzàlɛ̀mì bò yaakiɗi tɛ
(Mat 24.15-21; Mlk 13.14-19)
20 «Ɓɛ̀ siki kà ɛ́nɛ̀ bò jɔ̀ɔ̀ sɔɗya à ɓaŋgá Yélúzàlɛ̀mì à, ɛ́nɛ̀ bò ì à ɓɛ̀ siki ŋgɔ̀ nɛ̀náǎ, bò hî ki à pɛ̀ɛ̀ wɛ́ à yakada tɛ. 21 Ɓò ɓɛ̀ɛ̀ ì bò du nù nàà njá Yudé à, à yu mɔ ɛ́lɛ̀ nàà ŋ ŋgɔ́ɔ́ ŋgaɗi, ɓò ɓɛ̀ɛ̀ ì bò du nâ jàà Yélúzàlɛ̀mì à, áánì nè yuo mɔ ɛ́lɛ̀ ɗúúsi, ɓò ɓɛ̀ɛ̀ nàà pimbà jisi kimà pɛ̀ɛ̀ nàà posí nà. 22 Pɛ́kà bò du swéé paɓo, ɓɛ̀ mɔnɔ kà Gɛ́lɛ́lɛ́ Mɔ́kànɔ̀ ɓwɛ́àbàà bò dɛ̀ tɛ. 23 Ŋgo nɛ̀ ɓɛ̀ ko nɔ̀ɔ̀ kà bò nɛ̀ twúè à, nɛ̀ ɓò ɓɛ̀ɛ̀ à áásà bé bòlè à ɓɛ̀ siki ŋgɔ̀! Pɛ́kà Mgbàà haɓaɗa bò du à jàà nja ŋɛ̀ ŋgɔ̀, kà pasɛ́à Njámbe bò gbasidi tɛ bɛ́ɛ̀sè ɓɛ̀ kulu nɔ ŋgɔ̀. 24 I bò gbɛ́ yóà nɛ̀ pɛ́li, ì bò kùù yóà ɛ́lɛ̀ nɛ̀ hɛla wɛ à jàà njá yele, kà bò ɓɛ̀ɛ̀ kà yóà ɓukili ma mɔ ná tooki Yélúzàlɛ̀mì hɔ̀ nɛ̀ à ɓɛ̀ siki kà Njámbe hà yóà à pélè.
Pɛɛɗì Bé wì
(Mat 24.29-31; Mlk 13.24-27)
25 Ye dɛ́mi bò dɛ tɛ́ á swéé, à wɛɗì, tɛ kùù à késà. À ŋ ŋgɔ́ɔ́ mbúnù kéé bò ba kúlù wì yele súlo wɛ, à wê lémba giɗi maŋ nɛ̀ Mgbàà mbù ŋgè. 26 Gòlòɓónjà bò gbɛ wì, à taŋgála ɓɛ̀ mɔ nɔ̀ɔ̀ kà bò pɛ́nɛ à dɛ tɛ́ à ŋ ŋgɔ́ɔ́ mbúnù yele à, pɛ́kà ɓɛ̀ ɔ́ɔ́ nɔ̀ɔ̀ kà bò nâ ŋ ŋgɔ́ɔ́ yele bò du à tomgba wɛ. 27 Kɔ́ɔ́ wɛ̀, ì bò jɔ̀ɔ̀ Bè wì pɛnɛ à jâ tùtùkà, bò du nɛ̀ ɔ̀ nɛ̀ kumà wàà súlòwɛ̀. 28 À ɓɛ̀ siki kà bɛ kúlù dɛ̀ɛ̀mɔ̀ nɔ̀ɔ̀ ŋgɔ̀ bò kujìdi hɔ̀ wɛ̀ à, ɛ́nɛ̀ yosé mùù, kà nɛ̀ ɓóɗì jù, pɛ́kà ɓɛ̀ siki i bò poki ɛ́nɛ̀ kumònò.»
Sika ɓóɗaɓóɗà
(Mat 24.32-35; Mlk 13.28-31)
29 Kɔ́ɔ́wɛ̀ kà Yésùsì jii ɓwɛ́ ɓɛ̀ sika nɛ̀náǎ: «Ɛ́nɛ̀ ɓa séɓi ɓɛ̀ te ŋɛ̀ ɓóɗaɓóɗa à. Ɛ́nɛ̀ jɔ̀ɔ̀ ɓóɗàɓóɗà nɛ̀ ɓɛ̀ tè yele nɔ̀ɔ̀ kà batini nɛ̀ à. 30 À saa yóà boa à sɛ́ɓá wɛ́ kà ɛ̀na i nɛ̀náǎ pémbè hɔ̀ à. 31 Ɓɛ́ siki kà ɛ́nɛ̀ bò jɔ̀ɔ̀ ɓɛ̀ kulu mɔ nɔ̀ɔ̀ ŋgɔ̀ à hɔ̀ɔ̀ wɛ̀, ɛ́nɛ̀ i à kâ nɛ̀náǎ, Nja nɛ̀ Njámbe bóì kumini. 32 Mi ɓwɛ́ ɛ́nɛ̀ tɛ̀kìlímɔ̀ nɛ̀náǎ, ɓò ɓɛ̀ɛ̀ yele mwɛ̂ tɔ́ɔ́tó, fe kima yele tàà mɔ̀ɔ̀wɛ̀ à dɛ̀ɛ̀ tɛ́ nà. 33 Li ŋgɔ̀ yɔ́ɔ̀ mbúnù bò sɔ̀nì, ɓɛmɔ̀ŋgɔ̀ gbààwé mù sɔni kima nà.
Ɛ́nɛ̀ téa má lilá nà
34 Ɛ́nɛ̀ jɔmɛ́ wè, ba wì dɔ́ɔ́, ɛsa à dɔɔ, ɛ́sà sɛ́à à ɓoɗu kpasi wì, bò kà tɛ njɛ́mɛ lííndì mɔ̀nɛ̀ à ŋ ŋgɔ́ɔ́ mbúnù à, wè pɛ́sì Be wì bò káá tɛ tuɓìɗì ɛ́nɛ̀ tuɓìɗì 35 mɛ saa. Pɛ́kà ɓɛ̀ swéé è ŋgɔ̀ bò guɓiɗi wì yele à ŋgɔ́ɔ́ mbúnù. 36 Ɛ́nɛ̀ téà má lila nà, ɛ́nɛ̀ nyánjɛ̀. Ɛ́nɛ̀ sakwɛ́lɛ̀ mɔ siki yele kimà ɛ́nɛ̀ bò du nɛ̀ ɔ̀, mɔ gbâ nɛ̀ à ɓɛ̀ mɔ yele kà bò hɔ̀, mɔyólì nɛ̀ à sɔɔti Bè wì.»