Ɔɔ̀ Yésùsì toli nɛ̀ ŋgɛ?
(Mat 21.23-27; Mlk 11.27-33)
20
À ma swéé, Yésùsì boabàà mboa mɔ nɛ̀ ɓwɛ́ Dòlà Mɔtómò à jâ Mgbàà Mgbàà gàlà Njámbe à wì. Kà mɔ́kònjì gbɛ ɓwúyà Njámbe, nɛ̀ ɓò mbo mbwala mboŋa Njámbe, tɛ kù mgbáaŋgawi kà yóà hɔ̀. 2 Mɔ̀ɔ̀wɛ̀, kà yóà áánì nɛ̀ Yésùsì nɛ̀náǎ: «Ɓwɛ́ɔɔ ɓɛ̀ ɔ̀ ŋɛ̀ mɛ dɛ́ nɛ̀ ɓɛ̀ mɔnɔ? O à hà mɛ ɔ̀ mɔ dɛ́ nɛ̀ o?» 3 Yésùsì búlòbàà nɛ̀ yóà nɛ̀náǎ: «Mi boa pɛ̀ɛ wɛ à áánà ma nio nɛ̀ ɛ́nɛ̀, mi kàà. Ɛ́nɛ̀ ɓwé à mi: 4 Ó bàà ɛsi Zaŋ à ɗuɓo wì o? Njámbe ò wì ò?» 5 Kà yóà kunjìɗì dana nù à sókó yóà nɛ̀náǎ: «Àɔɔ bulo nɛ̀náǎ: “ Njámbe à pɛsi à,” bò ááni nɛ̀ ɔ̀ nɛ̀náǎ: “À ŋgɔ̀ ɛ́nɛ̀ dubàà tàà ɓukili ma Zaŋ na à wè gé?” 6 Á ɔ̀ ɓwɛ́ nɛ̀náǎ: “wì à pɛsi à,” wì yele bò duɗiɔɔ nɛ̀ ɗiɓòkò mɔ gbɛ̀ nɛ̀ɔɔ, pɛ́kà yóà ta ŋgili nɛ̀náǎ Zaŋ bóbàà kulawe Njámbe.» 7 Yóà búlòbàà nɛ̀ Yésùsì nɛ̀náǎ: «Ɔ̀ i má ɓɛ̀ wì kà pɛsabàà à nà.» 8 Kà Yésùsì ɓwɛ́ nɛ̀ yóà nɛ̀náǎ: «Nɛ̀ mi kàà, mi ɓwɛ́ kímà ɛ́nɛ̀ ɓé wì kà hà mi ɓɛ̀ ɔ́ɔ ŋɛ̀ kɛ̀ dɛ nɛ̀ ɓɛmɔ̀ŋgɔ̀ na.»Sika hanyia bò dɛ tò à pimba vinyi
(Mat 21.33-46; Mlk 12.1-12)
9 Kɔ́ɔ wɛ̀, kà Yésùsì pi síkà à sapido nɛ̀náǎ: «Ma wì kédabàà pimba be te vinyi,a kuubàà hà ma bò dɛ tô be té wɛ̀, kà yóà dɛ tô wɛ i kàpi à soko yɔ́ɔ̀ yóà à sɔɔ̀ɗi tò. Kà gba ɛ́lɛ̀ tɛ kàlɛ. 10 Siki gbása dò nɛ̀ hɔ̀ wè à, kà ɛ̀si ma ɓò dɛ tô wa sikinɔ nàà yɛ ɓɛ̀ wì nɔɔbàà dɛ to à piɓa wàà, kà yóà hà à ɓa ɓɛ̀ nɛ̀ à. À mɛ mɔ ŋgɔ̀, kà yóà ba à mɛlɛ à njisisia kɔ kɔtu. 11 Mwâ pimba jiobàà ɛ́sɛ̀ ma kwálà bò tô wàà, kà bò dɛ tò à pimba jii mɛ́lɛ̀ á, kà yóà yáá à, i jisisi à táá hà ma à ma mɔ. 12 Kà mwâ pimba jii ɛ́sɛ̀ à sa nɔ wààtà ma bò dɛ tô wàà, kà yóà yokéɗè à, i hé à ɗusi nɛ̀ pimba. 13 Mwâ pimba ɓwɛ́bàà nɛ̀náǎ: “Mi dɛ́ mɛŋgɛ̀ɛ̀ɛ̀? Mi bò i à ɛsa be mù kè gwéé súlòwɛ̀, nàà à yóà bò nɛ̀ diisi à.” 14 À ɓɛmɔ̀ŋgɔ̀, yóà nɛ̀ jɔ́ be wì wɛ pɛnɛ, kà yóà weli à sokó yóà nɛ̀náǎ: “Wáɓɛ̀ kà bò kɔli nɛ̀ mɔ̀gɔ̀là ɓɛ̀ pimba héà. Ɔ̀ gbɛ̀ à, kìmà ɔ̀ bò kɔli nɛ̀ mɔgɔla wè.” 15 Íkú à pi na kɔ́ɔ́ pimba, i gbɛ̀ à.» Kà Yésùsì áánì nɛ̀ yóà nɛ̀náǎ: «Ɛ́nɛ̀ ta ŋgili è mwâ pimba bò dɛ nɛ̀ yóà mɛ gè? 16 Bò pɛ à gbɛ̀ yóà yele kà ku pimba wàà hà ma kwàlà yé wì.» Mɛ́ɓɛ̀ɛ̀ kà yóà jéàbàà ɓɛ̀ gbâwɛ́ ŋgɔ̀, kà yóà bini nɛ̀náǎ: «Ɓɛmɔ̀ŋgɔ̀ dɛ kíma tɛ̀ nà!» 17 Ɓɛmɔ̀ŋgɔ̀, kà Yésùsì sɛɓi yóà kà ɓwɛ́ nɛ̀náǎ:
«Gɛ́lɛ́lɛ́ Mɔ́kànɔ̀ ɓwɛ́ enáǎ:
“Ɓɛ̀ ɗiɓoko kà bò bɛ́ɛ́ gàlà piobàà
bò i mɛ ɓi ŋgɔ̀ wɛ́ gàlà?”
Ɓɛ̀ Mgbàà wè ŋgɔ̀ ɗyakisi tɛ è kia? 18 Ɓɛ̀ wì nɔ yele kà i bò jiiɗi nù à ŋgɔ́ɔ́ ɗiɓoko wɛ bò gbìnì, ɓɛ̀ wì kà ɗiɓoko wɛ bò tɛ́ à ŋgɔ́ɔ́ wàà, bò hɔ́nìŋgì á.»
Bò dòlàwè wì kpɛ lapo?
19 Ye bò mbó mbwála mboŋa Njámbe yɔ̂ Mgbàà mɔ́kònjì ɓò gbɛ̀ ɓùya Njámbe, i gwéabàà sɛɛ kɔ à tɛ Yésùsì á siki ŋgɔ̀, pɛ́kà yóà i ŋgɔbàà dòlà wɛ nɛ̀náǎ, Yésùsì pia sìkà wɛ nɛ̀ yóà, ɓɛmɔ̀ŋgɔ̀, yóà boabàà à jɛ́à kɛ nɛ̀ wì. 20 Kà yóà kúnjiɗì ɗɛ́à lii à tɛ Yésùsì. À ɓɛ̀ siki ŋgɔ̀, yóà ɛsabàà ma wì kà yóà wéàbàà du ŋgo wɛ mɛ ɓɛ̀ wì nɔ̀ɔ̀ sìì à dio jàà Yésùsì. Ɓɛ̀ wì nɔ̀ɔ̀ ŋgɔ̀ bóbàà kiyo jɛ bása à sâ nɛ̀ nio. Kima yóà bò kùù à gbɛsɛ́ à ti kɔ ɔ̀ ŋgɔ́miná. 21 Kà yóà áánì nio nɛ̀ Yésùsi nɛ̀náǎ: «Mbo bwàlà, ɔ̀ i ɓɛ̀ mɔ mɛ ɓwɛ́, nɛ̀ ɓɛ̀ɛ̀ kà mɛ mboa bò sìì. Mɛ paɓi ma wì à dɛmɔ wàà na, ɓɛ̀ mɔ mɛ mbo à bò tɛ́kili mɔ lɛsɛnɛ ɓɛ̀ kpasi kà Njámbe gwɛ̀ à. 22 Ìì, ɓa ɓwɛ́ àɔɔ, mboŋa mɔ̀ɔ̀ tɔmisi nɛ̀ tàà tɔmisi i kpɛ lápo à Mgbàà mɔ́kònjì Loma?» 23 Ɓɛmɔ̀ŋgɔ̀, kà Yésùsì i nɛ̀náǎ, saá kà yóà boa nɛ̀ túo wɛ bɛ́sɛ́ á, búlo bàà nɛ̀ yóà nɛ̀náǎ: 24 «Ɛ́nɛ̀ osɛ́sɛ́ mi ma pátà sikinɔ. Pota o, nɛ̀ lii o à ɓɛ̀ pátà ɔ̀?» Kà yóà buli nɛ̀náǎ: «Bò mɔ Mgbàà mɔ́kònjì Loma» 25 Ki Yésùsì ɓweabàà nɛ̀ yóà nɛ̀náǎ: «Íí ɛ́nɛ̀ jisisi mɔ mgbàà mɔ́kònjì hà à, kà ɛ́nɛ̀ jisisi mɔ Njámbe hà à.» 26 Tâ yóà á kpá ma ɗàà ma mɔ à tɛ Yésùsi à ɓɛ̀ mɔnɔ kà boabàà ɓwɛ́ wɛ̀ à lii yóà. Yóà boabàà nɛ̀ kàma mɔ súló wɛ à búlo mɔ wàà kà nù yóà kpɛ́.
Niyo ɓɛ̀sɛ túno wɔɔ
(Mat 22.23-33; Mlk 12.18-27)
27 Yemà Saɗuseɛŋ pɛ̀ɛ̀ à ŋgolo Yésùsì. Yóàbàà ta ŋgili nɛ̀náǎ tuno wɔɔ bò ma na. Kà yóà áánì nɛ̀ Yésùsì, 28 nɛ̀náǎ: «Mbò mbwala, Mɔ̀ísì tòabàà mboŋa pisínì àɔɔ nɛ̀náǎ: “À ma wì boa nɛ̀ ma ɓójà wa nɛ̀ ko kà fee tâ bé lɛɛsini enáǎ ɓòjà wàà à kùù ké gɔ́la ŋgɔ̀ ɓójà wàà mo kpà dádo à ɓójà wàà.” 29 Ɗé, ma boa mɔ̀ɔ̀lɔ dɔkɔ wɛ́ɛ́lì boabàà, kà bati jà kùobàà ko. Kà fɛ́ tàà pisini ma bè. 30 Wɛli wɛ kà ku ké ŋgɔla fé taa bɔ. 31 Kà wààtà jii kùù ɓɛ̀ kinɔ ke ŋgɔla ŋgɔ̀. Mɔ̀ɔ̀wɛ̀ yóà mɔlɔ dokɔ wɛ́ɛ́lì yele kùù à ɓɛ̀ ko ŋgɔ̀ i fe taa pisínì ma bé. 32 À sɔɗi wè kà bɛ kó gɔ fé kâ. 33 À ɓɛmɔ̀ŋgɔ̀, mɛ́ɓɛ̀ɛ̀ kà boabàà ke yóà mɔ̀ɔ̀lɔ dokɔ wɛ́ɛ́lì à swée kúlogɔ wɔ bò du ke o?» 34 Yésùsì búlòbàà nɛ̀ yóà nɛ̀náǎ: «À ɓɛ̀ ŋgɔɔ mbúnù we nɛ̀ ko dúuni. 35 Yeɓɛ̀ wé nɛ̀ ɓɛ̀ ko kà Njámbe jóabàà yóà bò tuni à wɔɔ k kpasi à ɓɛ̀ nja ŋɛ̀ pɛnɛ yóà, duni kima na. 36 Yóà fe ki ma kàà i na, pɛ́kà yóà bò mɛ iŋgèlesì. Yóà bò Bé Njámbe, pɛ́kà Njámbe túso yóà à fio. 37 Mɔ̀ísì ɗyákásàbàà nɛ̀náǎ, wɔ bò jiisi pɛ̀ɛ̀ à kpasi. À ɓɛ̀ soko kà Mɔ́kànɔ̀ wéla wè ma bé te maɗa wɛ à béà wè à, kà ɓééɗì Mgbáámɔ́njá Njámbe: “ Njámbe Abalahami, Njámbe Ìzàkì nɛ̀ Njámbe Yakɔpi.”» 38 Kà Yésùsì ɓwɛ́mɔ sɔɔsi nɛ̀ nɛ̀náǎ: « Njámbe bò Njámbe wì nɔ̀ɔ̀ tɔɔtɔ à, bò ma Njámbe wɔ na, pɛ́kà yóà yele bò tɔɔtɔ nàà à.» 39 Yemà bò mbo mbwala mboŋa Njámbe kuo gbààwè kà yóà ɓwɛ́ nɛ̀náǎ: «Mɛ wéla mɔ dòlà wɛ, mbo mbwala.» 40 Yóà wɛki à ma pi ma nio nɛ̀ à i na.
Wáɓɛ̀ kà taɗa yɔ́ɔ̀ Daviti
(Mat 22.41-46; Mlk 12.35-37)
41 Ká Yésùsì ɓwɛ́ nɛ̀ yóà nɛ̀náǎ: «Mɛge à i bò nɛ̀ hɔ̀ ɓwɛ́ nɛ̀ nɛ̀náǎ ɓɛ̀ wì kà Njámbe taɗa boa dado Daviti é? 42 Pɛ́kà Daviti mwâ tɛ ɓwɛ́ à jàà mɔ́kànɔ̀ gema nɛ̀náǎ:
Mgbáámɔ́njá ɓwɛ́à à Mgbáámɔ́njá mù nɛ̀náǎ:
Pɛɛ dú ŋgonu nàà weko mù à tiso kuma.
43 Hɔ̀ nɛ̀ ɓɛ̀ siki mi bò dɛ enáǎ ɓò kɛna mɛ à du bò ɓɛ̀ mɛ bò ɗɛ na ŋga mɛ à tɛ yóà.
44 Daviti ɓééɗì á nɛ̀náǎ: “Mgbààmɔ̀njì mù.” Mɛ ŋgéà kà ɓɛ̀ wì kà Njámbe taɗa bò dû à dado Daviti à è?»
Ɛ́nɛ̀ jɔmɛ nɛ̀ ɓò mbo mbwálà mboŋa Njámbe
(Mat 23.1-36; Mlk 12.38-40)
45 À siki ɓɛ̀ kà wì yele boabàà à jéà Yésùsì à, kà ɓwɛ́ nɛ̀ ɓò yàmìwè wàà nɛ̀náǎ: 46 «Ɛ́nɛ̀ jɔmɛ nɛ̀ bò mbò mbwala mbona Njámbe yóà gwéé lɛɛnɔ nɛ̀ ɓɔ̀là mɔ́kandà, kà yóà gwéé i tuusi yóà nɛ̀ diiso mɔ à ɓɛ̀ soko nɔ̀ɔ̀ à kpɛ mɔ à, yóà taɗi ɓɛ̀ soko nɔ̀ɔ̀ nàà bati à jàà gàlà sakwálà mɔ, tɛ kùù dòlà soko à sɔsɔ nyɔ. 47 Yóà kùù ɓɛ̀ mɔ yele kà ke gɔ́là bò nɛ̀ à, kà yóà dɛ bola sakwala mɔ à lii wì mɔ dɛ wì jɔ̀ɔ̀ yóà. Njámbe bò paɓi yóà lemba wɛ pélè ɓò ɓɛ̀ɛ hɔ̀.»