Yésùsì yɔ́ɔ̀ Zasé
19
À kɔ̀ɔ̀ɗòò wɛ Yésùsì biobàà à jàà posi Yéliko, mɛ́ɓɛ̀ɛ̀ kà boabàà lààɗa wɛ, 2 ma wì li wààbàà Zasé kà hɔ̀, bóbàà mɔ́kònjì ɓò kùù lápo bò à kàà nɛ̀ limɔ súlòwɛ̀. 3 Bóbàà kiyo jɛ̀ jɔ̀ɔ̀ ɓɛ̀ wì è Yésùsì à, ɓɛmɔ̀ŋgɔ̀, bò à ma nɛ̀ lɛ wè wɛ na, pɛ́kà boa ma kuso wɛ nà, wì boa kàà súlòwɛ̀. 4 Kúlòbàà yù ɛ́lɛ̀ nàà bátì kà da ɓɛ̀ tɛ́ ŋɛ̀ kà i ɓɛ̀ɗi nɛ̀náǎ, sikɔmɔli à, mɔ jɔ̀ɔ̀ Yesùsì kà áánìbàà à pélè ki. 5 Ɓɛ̀ siki kà Yésùsì hɔ́àbàà à ɓɛ̀ soko ŋgɔ̀ à, ɓò ɗa lii kà ɓwɛ́ nɛ̀ Zasè nɛ̀náǎ: «Jili wáwàà, Zasè, pɛ́kà lɛɛsi ni è mi bò lanù mwɛ̀ɛ̀ nàà gàlà nɛ̀ mɛ.» 6 Zasè jilobàà wàwàà kà ba gɛnɛ Yésùsì nɛ̀ mɛŋgalamɔ̀. 7 Mɛ́ɓɛ̀ɛ̀ kà wì jɔ́abàà mɔ̀ɔ̀wɛ̀ à, kà yóà yele kujiɗi ba li Yésùsì, kà yóà ɓwɛ́ nɛ̀náǎ: «Ɓɛ̀ wì ɓɛ̀ ɛ́la yálànù nàà mwâ njɛmbi!» 8 Zasé, yólì à sɔ̀ɔ̀tì Mgbáámɔnjà, kà ɓwɛ́ nɛ̀ à nɛ̀náǎ: «Ɓa jèè, Mgbáámɔ́njá, mi bò hà ndàbo limɔ mù à ɓò sa, à boa mi kúobàà súlò pátà nɛ̀ ma wì pélè ɓɛ̀ mɔ i áánà à, mi bò jisi à à sanɔ wánààli à ŋgɔ́ɔ́ ɓɛ̀.» 9 Kà Yésùsì ɓwɛ́ nɛ̀ à nɛ̀náǎ: «He ŋgɔ̀, mwâ poki wì hɔ̀ à à ɓɛ̀ jàà gála, pɛ́kà mɛ bò kàà à ɓɛ̀ya Abalahami. 10 Tɛ́kìlìmɔ̀ Bè wì pɛ́ɛ́bàà à kiyo wɛ nɛ̀ poka ɓò ɓɛ̀ɛ i yɔ́àbàà.»Yɛ́lɛ̀ ɓò dɛ tò nɔ̀ɔ̀ bàà wáátà
(Mat 25.14-30)
11 Yésùsì jiobàà pi ma sika mɔ ɓɛ̀ wì nɔ̀ɔ̀ kà yóà jèabàà Mgbàà wè wɛ. Mɛ́ɓɛ̀ɛ̀ kà bóbàà à ŋgòlò Yélúzàlɛ̀mì, ɓɛ̀ wì nɔ̀ɔ̀ ŋgɔ̀ ta ŋgilibàà nɛ̀náǎ Nja nɛ̀ Njámbe boa pɛ wɛ à dɛ tɛ à ma be siki. 12 Kà Yésùsì ɓwɛ́ nɛ̀náǎ: «Ma wì à jàà ɓɛ̀ gàlà dio wɛ ɛ́labàà à jàà ma nja ɗuusi mɔ dɛ́nɛ̀ wì ɗɛ à du Mgbàà mɔ́kònjì nja wàà, kɔ̀ɔ̀ɗoo wɛ kà jisi. 13 Nàà à su à ɛ́là wɛ, kà ɓééɗi ɓò dɛ tò wàà ɓùkɔ, kà hà wì nɛ̀ wì gbi ŋgili pátà sikinɔ à yoɗi súlò pátà, kà ɓwɛ́ nɛ̀ yóà nɛ̀náǎ: “Ɛ́nɛ̀ kɔlɛ à kiɓoso ɓɛ̀ pátà mɛ́ɛ́ hɔ̀ nɛ̀ à jiso mù.” 14 Ɓɛmɔ̀ŋgɔ̀, ɓò nja nɛ̀ à boabàà à kɛ à. Kà yóà ɛsi wì à ɗoo wàà mɔ ɓwɛ́ nɛ̀ nɛ̀náǎ: “Ɔ̀ gwéé ma à du Mgbàà mɔ́kònjì mɔ̀ɔ̀ na.” 15 Ɓɛmɔ̀ŋgɔ̀, kà i hà à tiso Mgbàà mɔ́kònjì kà gba jisi pɛ̀ɛ̀ nàà nja nɛ̀ à. Kà ɓééɗì ɓò dɛ tò wàà kà pisono à pátà nɛ̀ yóà, mɔ i nɛ̀ ɓɛ̀ mɔ kà yóà kpà kɔ ɗoo wàà. 16 Bati wì pɛ́àbàà kà ɓwɛ́ nɛ̀náǎ: “Mgbàà mɔ́kònjì mù, mi kpà gbi ŋgili pátà ɓukɔ nɛ̀ ɓɛ̀ mɛ pisonobàà n ɛ mi à.” 17 Kà Mgbàà mɔ́kònjì ɓwɛ́ nɛ̀ à nɛ̀náǎ: “Bó dòlàwɛ̀, dòlà mwâ dɛ tò, mɛ́ɓɛ̀ɛ̀ kà mɛ diiso mi à be tókiɗì mɔ, mi ɗɛ́à mɛ ŋgɔmina ju posi ɓukɔ.” 18 Kà wɛ́ɛ́lì mwâ dɛ to pɛ̀ɛ̀ kà ɓwɛ́ nɛ̀náǎ: “Mgbàà mɔ́kònjì, mi kpà gbi ŋgili pátà mɔ̀ɔlɔ̀ nɛ̀ ɓɛ̀ kà mɛ pisonobàà nɛ̀ mi à.” 19 Kà Mgbàà mɔ́kònjì ɓwɛ́ nɛ̀ wàà ɓɛ̀ nɛ̀náǎ: “Mɛ, mi boa dɛ́à mɛ ŋgɔmina à jàà posi mɔ̀ɔ̀lɔ.” 20 Kà ma mwâ dɛ tò ɓwɛ́ nɛ̀ à nɛ̀náǎ: “Mgbàà mɔ́kònjì mù gbi ŋgili pátà mɛ hɛ́à, mi ɓánanabàà à hɛla wɛ nɛ̀ mɔkanda. 21 Mi bóbàà à jéà kɛ́ɛ́ nɛ̀ mɛ, pɛ́kà mɛ kpɛ ŋgi súlò, mɛ kùù ɓɛ̀ mɔ kà mɛ ɗé ma nàà, mɛ gbásì ɓɛ̀ dò ŋɛ̀ kà mɛ ŋgúni à ma nà.” 22 Mgbàà mɔ́kònjì ɓwɛ́àbàà nɛ̀ à nɛ̀náǎ: “Ɗàà mwâ dɛ tò, mi bò páɓì mɛ à mɔsuma Mgbàà wè mɛ. Mɛ i ŋgobàà mi bò hanya wì, mi kùù ɓɛ̀ mɔ́nɔ̀ɔ̀ kà mi ma ɗé à nàà, kɛ gbàsi ɓɛ̀ dò ŋɛ̀ kà mi ma ŋguni à nàà. 23 À ŋgɔ̀, gébàà mɛ ɗɛ́à ma nɛ̀ pátà mù nàà ɓɛ̀ soko kà wì hɔsi pátà hɔ̀ nà è? Ki ma à jiso mù, mi bò kpà nɛ̀náǎ i ɗɛ́à ma be màà mi à ŋgɔ́ɔ́ wɛ na è.” 24 Kɔ́ɔ́wɛ̀, kà ɓwɛ́ à ɓò ɓɛ̀ɛ bàà ki à nɛ̀náǎ: “Ɛ́nɛ̀ kùù ɓɛ̀ pátà mɛɛ nɛ̀ à, kà ɛ́nɛ̀ hà wáɓɛ̀ɛ̀ kà bò nɛ̀ ɓukɔ à.” 25 Kà yóà ɓwɛ́ nɛ̀ à nɛ̀náǎ: “Mgbàà mɔ́kònjì, bò i nɛ̀ gbi ŋgili pátà ɓukɔ!” 26 Kà búli nɛ̀ yóà nɛ̀náǎ: “Ɓɛ̀ wì kà bò du nɛ̀ ma mɔ à, i bò jii hà à ma à ŋgɔ́ɔ́ wɛ. Ɗé wáɓɛ̀ɛ̀ kà bò ma nɛ̀ ma mɔ à nàà, i bò gbasi be ndambo ɓɛ̀ mɔ kà bò kɔli nɛ̀ à. 27 Nàà ɓò kɛ́ɛ́na mù kà yóà gwéà ma mi du Mgbàà mɔ́kònjì yóà nà, ɛ́nɛ̀ kùù yóà pɛɛnɛ nɛ̀ kɛ, kà ɛ́nɛ̀ ɗɛ ŋgiɗi ŋgɔli yóà à li mù.”»
Bio Yésùsì nàà Yélúzàlɛ̀mì
(Mat 21.1-11; Mlk 11.1-11; Zaŋ 12.12-19)
28 À kɔ̀ɔ̀ ɗo wéla ɓɛmɔ̀ŋgɔ̀, kà Yésùsì dàà bati tá ŋgà mɔ ɛli nàà Yélúzàlɛ̀mì. 29 À siki ɓɛ̀ kà kumonobàà nɛ̀ Betafage nɛ̀ Betani à, à ŋgólò ɓɛ̀ ŋgaɗi kà i ɓééɗi nɛ̀náǎ ŋgaɗi tè Olivi à, kà ɛsi nàà bati ma ɓò yàmìwè wàà wɛ́ɛ́lì. 30 Kà ɓwɛ́ nɛ̀ yóà nɛ̀náǎ: «Ɛ́nɛ̀ ɛ́lɛ̀ nàà ɓɛ̀ le kà bò nàà bati à, à ɓɛ̀ siki kà ɛ́nɛ̀ bò hɔ̀ à, ɛ́nɛ̀ bò kpà ma be ɓamìtólì kà ma wì ɓa bò tàà lɛ ma nù à ŋgɔɔ wɛ kuni. Ɛ́nɛ̀ buli à kà ɛ́nɛ̀ ku à pɛnɛ. 31 À ma wì áánà nɛ̀ ɛ́nɛ̀ nɛ̀náǎ: “Ɛ́nɛ̀ buli à à wè ge?” Ɛ́nɛ̀ ɓwɛ́ nɛ̀ à nɛ̀náǎ: “Mgbáámɔnjà boa gwéá à.”» 32 Yeɓò ɓɛ̀ɛ kà Yésùsì ɛsabàà, yóà kpà mɔ yele mɛ́ɓɛ̀ɛ̀ kà Yésùsì ɓwɛ́àbàà. 33 À siki ɓɛ̀ kà yóà boabàà búlò be ɓamìtólì à, kà mwâ mwɛ̀ ɓwɛ́ nɛ̀ yóà nɛ̀náǎ: «Géà kà ɛ́nɛ̀ buli nɛ̀ ɓɛ̀ bé ɓamìtólì è mɛ è?» 34 Kà yóà buli nɛ̀náǎ: «Mgbáámɔ́njá boa gwéà wɛ.» 35 Kɔ́ɔ́wɛ̀, kà yóà kùù be ɓamìtólì pɛnɛ nàà Yésùsì, kà yóà saɗi mɔkanda yóà à ŋgɔ́ɔ́ wɛ, kà yóà dasi Yésùsì. 36 À ɓɛ̀ siki kà boabàà titiko wɛ wì sasaɗa mɔkanda fii gbo kà pélè à ŋgɔ̀ wɛ. 37 Mɛ́ɓɛ̀ kà boabàà à tiko wɛ nɛ̀ Yélúzàlɛ̀mì à, à ɓɛ̀ ŋgo ŋɛ̀ kà jili ŋgaɗi te Olivi à, sapiɗo ɓò yàmìwè yele done nɛ̀ mɛŋgalamɔ, kujoɗobàà hà Njámbe kuma nɛ̀ lemba gɛ, à wɛ ɓɛ̀ ɓúlà nɔ̀ɔ̀ kà yóà jɔ́àbàà. 38 Yóà boabàà à ɓwɛ́ wɛ nɛ̀náǎ: « Njámbe à ɗufi ɓɛ̀ mɔ́kònjì pɛnɛ à li Mgbáámɔ́njá! Tenatɛ nàà li ŋgɔ̀ nɛ̀ kuma nɛ̀ Njámbe nàà ŋgɔ̀ nàà ŋgɔ̀!» 39 Yemà Fàliziɛŋ, kà boa ki à jàà píò à, ɓwɛ́ à Yésùsì nɛ̀náǎ: «Mbo mbwala, ɓwɛ́ nɛ̀ ɓò yàmìwè mɛ yóà ga bɛ̀.» 40 Kà Yésùsì buli nɛ̀náǎ: «Mi ɓwɛ́ ɛ́nɛ̀, à yóà gabɛ̀, ɗiɓoko à bò mɛ́ɛ́ nù!»
Yayo Yésùsì à ŋgɔ̀ɔ̀ ju Yélúzàlɛ̀mì
41 À ɓɛ̀ siki kà Yésùsì boabàà à ŋgólò posi è Yélúzàlɛ̀mì à, kà jɔ̀ɔ̀ à, kà yayi à ŋgɔ̀ ju wàà, 42 kà ɓwɛ́ nɛ̀náǎ: «À jéé mɛ i kàà mwɛ̀ɛ̀ à ɓɛ̀ swéé, mɛ ɓɛ̀ i kpà ténate! Ɓɛmɔ̀ŋgɔ̀, mɔ wɛ bò wúsòwɛ̀ nɛ̀ mɛ, mɛ bò ma nɛ̀ ɔ̀ jɔ̀ɔ̀ nɛ̀ na! 43 Ma swéé bò pɛ̀ɛ̀ à wɛ mɛ, kà ɓò kɛɛ mɛ bò kɛli mɛ nɛ̀ lopa ŋgo kà yóà jitikini mɛ, mɔ kii jɛ bi bilo nɛ̀ mɛ soko yele. 44 Yóà bò hɔnigi mɛ, nɛ̀ wì mɛ yele. Yóà ɗɛ kima ma ɗiɓoko sikinɔ à mɛ ma à ŋgɔ́ɔ́ ma na. Pɛ́kà, mɛ i à ma ɓɛ̀ siki kà Njámbe pɛ́à à gbààɗa mɛ na!»
Yésùsì héà bò lɛɛsi mɔ à Mgàà Mgbàà gàlà Njámbe
(Mat 21.12-17; Mlk 11.15-19; Zaŋ 2.13-22)
45 Yésùsì biyobàà à jàà Mgbàà Mgbàà gàlà Njámbe kà he ɓò lɛɛsimɔ. 46 Kà ɓwɛ́ nɛ̀ yóà nɛ̀náǎ: «À jàà mɔ́kànɔ̀ Njámbe, Njámbe ɓwɛ́ nɛ̀náǎ: “Gálà mù bò du gàlà sakwala mɔ.” Ɗɛ nàà ɛ́nɛ̀, ɛ́nɛ̀ kiɓoso à pɛsɛ gàlà husi ɓò jù!» 47 Swéé yele Yésùsì bóbàà à mbo à wì mɔ à jàà Mgbàà Mgbàà gàlà Njámbe. Ye mɔ́kònjì ɓò gbɛ ɓwúyà Njámbe yɔ́ɔ̀ ɓò bò wì mɓoŋa Njámbe tɛ kùù mgbàà ŋgawi. Yóà boabàà à kiyo jɛ wɛ i gbe à. 48 Ɓɛmɔ̀ŋgɔ̀, yóà i à ma mɛ́ɓɛ̀ɛ̀ kà yóà bò dɛ nà, pɛ́kà píò boabàà jéà à nɛ̀ sɛ́à yóà yele.