Sikà ɗàà mwâ ɗɛ́ ŋgiɗi wè
18
Yésùsì piobàà ɓɛ̀ sìká nɛ̀ yóà, mɔ ɗyaakisi nɛ̀ è, wì lɛɛsini nɛ̀ sakwàlà mɔ síkí yele tàà dɛ́ mà yɛ̀. 2 Kà ɓwɛ́ nɛ̀ yóà nɛ̀náǎ: «Ma mwâ ɗɛ̀ ŋgiɗì wè boabàà à má posi, jéà mà kéé nɛ̀ Njámbe nà, dììsì mà kàà mà wì nà. 3 À ɓɛ̀ kinɔ posi ŋɛ̀ ŋgɔ̀, mà ke gɔ̀là boabàà hɔ̀, kà pɛ̀ɛ̀ kɛtɛ́kɛtɛ nàà mwâ ɗɛ́ ŋgìɗì wè. Ɓɛ̀ kó ŋgɔ̀ ɓwɛ́àbàà nɛ̀náǎ: “Ɗɛ ŋgɛ́ɗɛ́ wè à sokó ɓɛ̀ wì kà ɔ́ɔ̀ à bò nɛ̀ wè à.” 4 Píò siki mwâ ɗɛ́ ŋgìɗì wè binobàà ɗɛ́ ŋgàɗà wè. Ta ŋgalabàà à jàà sɛ́à wàà, kà ɓwɛ́ nɛ̀náǎ: “Tɛ́kìlìmɔ̀, mi yu má Njámbe nà, mi dììsì má kàà wì nà, 5 ɓɛmɔ̀ŋgɔ̀, mɛ́ɓɛ̀ kà ɓɛ̀ ke gɔ́lá boa haɓáɗa mi à, mi bò ɗɛ ŋgiɗi wè wàà, wè bò káà pɛpɛ̂ kɛ̀tɛ́kɛtɛ̀ à haɓáɗá mi.”» 6 Kɔ́ɔ́wɛ̀, kà Mgbáámɔ́njá jii ɓwɛ́ nɛ̀náǎ: «Ɛ́nɛ̀ jéé dòlà ɓɛ̀ mɔ kà ɗàà mwâ ɗɛ́ ŋgiɗì wè ɓwɛ́! 7 Géà bò dɛ Njámbe à ɗɛ́ ŋgɛɗɛ mà wè wì wàà kà yóà boa mɛ́ɛ́ nù nɛ̀ à swéé nɛ̀ kíítu à ná? Kàli kima nɛ̀ gbààɗa yóà na. 8 Mi ɓwɛ́ ɛ́nɛ̀ nɛ̀náǎ: Bò ɗɛ ŋgiɗi wè yóà wááwáá. À ŋgɔ̀, à ɓɛ̀ sikí kà Bè wì kà bò pɛ̀ɛ̀ à ɓɛ̀ ŋ ŋgɔ́ɔ́ mbúnù à, bò kpà káà wì nɛ̀ ɓùkòlò mɔ?»Sika Fàliziɛŋ yɔ̀ɔ mwâ kùù lapò
9 Yésùsì piobàà ɓɛ̀ siká à wéè ɓò ɓɛ̀ɛ̀ kà yóà ta ŋgili è yóà bò sìì à lìì Njámbe à, kà yóà jàànjì nya yóà. 10 Ɓwɛ́àbàà nɛ̀ yóà ènáá: «Yewì wɛ́ɛ́lì dáŋgabàà mɔ à sakwála mɔ nàà Mgbàà gála Njámbe Yélúzàlɛ̀mì. Ma wì à ta ŋga yóà bóbàà Fàliziɛŋ, ma wì mwâ kùù làpò. 11 Fàliziɛŋ yòlabàà à sokò wàà, kà yayi à jáà sɛ́à wàà nɛ̀ Njámbe nɛ̀náǎ: “Oo Njámbe mù, mì há mɛ i ŋgɔ́ɔ́, pɛ́kà mi bò mà mɛ nya mù nà, kà yóà bò ɓò ju, ɗàà wì, ɓò kpà ɓòkàlé. Mi hà mɛ i ŋgɔ́ɔ́, pɛ́kà mi bò má mɛ ɓɛ̀ mwâ kùù làpó gɔɔ nà. 12 Mi sini nyɔ́ sánɔ̀ wɛ́ɛ́lì à jàà yé ŋgà à wɛ́ɛ̀ mɛ, kɛ̀ kpè káà ɗɔ́lɔ̀ ɓɛ̀ mɔnɔ yele kɛ bàà.” 13 Mwâ kùù làpô, yolabàà ɗùùsi, wè ki á mà ɓò ɗà lìì nàà ŋgɔ̀ nà. Kà màà kɔ̀ à jù, kà yayi nɛ̀náǎ: “Oo Njámbe mù, jɔ̀ɔ̀ ɓɛ̀ mwâ njɛmbi è mi à ŋgò.” 14 Mi ɓwɛ́ ɛ́nɛ̀ nɛ̀náǎ, ɓɛ̀ mwâ kùù làpó boabàà sìì à sɔɔti Njámbe à ɓɛ̀ siki kà jiso ɛ́lɛ̀ nàà à. À boa Fàliziɛŋ, Njámbe jéà mà à na, pɛ́kà, ɓɛ̀ wì yele kà bò ɓóɗi mùù à, ì dɔ̀sì à, wàà ɓɛ̀ɛ̀ kà dɔsi mùù wàà, i ɓòɗì à.»
Yeɓò ɓɛ̀ i bò mɛ bé à
(Mat 19.13-15; Mlk 10.13-16)
15 Yewì kúobàà mbɛ̀sɛ̀ bé pɛ̀ɛ̀ nɛ̀ náà Yésùsì nɛ̀náǎ kà ɗé kɔ à tɛ yóà. Mɛ́ɓɛ̀ kà ɓò yàmìwè wàà jɔ à mɔɔ̀ wɛ kà yóà kujiɗi kpɛ ŋga nɛ̀ yóà. 16 Ɓɛmɔ̀ŋgɔ̀, Yésùsì ɓèèɗabàà mbɛ̀sɛ̀ bé, kà ɓwɛ́àbàà nɛ̀náǎ: «Ɛ́nɛ̀ ɗɛ be i pɛ̀ɛ̀ nàà mi! Ma wì à kàmɛnɛ ma yóà na, pɛ́kà nja Njámbe bò mɔ ɓɛ̀ wì nɔ̀ɔ mɛ yóà. 17 Mi ɓwɛ́ ɛ́nɛ̀ bò tɛ̀kili mɔ, ɓɛ̀ wì kà tɔmisi mà Njà nɛ̀ Njámbe mɛ bé à nàà, bi kimà nà!»
Wì lɛɛsini nɛ̀ pisono mɔ yele mɔ nɛ̀ni Yésùsì
(Mat 19.16-30; Mlk 10.17-31)
18 Mà mɔ́kònjì Zuifi áánàbàà nɛ̀ Yésùsì nɛ̀náǎ: «Dolà mbò mbwala, géà kɛ̀ lɛɛsini nɛ̀ dɛ́ɛ́ wɛ́ mɔ dû nɛ̀ ɓɛ̀ kpàsí nɛ̀ kinɔ nɛ̀ kinɔ à è?» 19 Kà Yésùsì ɓwɛ́ nɛ̀ à nɛ̀náǎ: «Gé à mɛ ɓɛ̀ɗi nɛ̀ mi dòlà wɛ é? Ma wì bò má dòlàwɛ̀ na, kinɔ Njámbe à bò dòlà wɛ. 20 Mɛ ì mbòŋà: “kpá má ɓòkàlé nà; Gbɛ́ má wì nà; Ju à ma mɔ na, hɛlɛ ma wì nɛ̀ wè na, kùù ma mɔ̀ɔ̀ wì nɛ̀ mɔwuo na, díísì bafa mɛ nɛ̀ nana mɛ.”» 21 Kà ɓɛ̀ wì ŋgɔ̀ buli nɛ̀ à nɛ̀náǎ: «Ɓɛ́ mboŋa nɔ̀ɔ̀ ŋgɔ̀ yele mi díísobàà kujiɗi à siki ɓwalá mù ɔ̀ nɛ̀ mwɛ̀ɛ̀.» 22 Mɛ́ɓɛ̀ kà Yésùsì jèabàà ɓɛ̀ bùlò mɔ ŋgɔ̀, kà ɓwɛ́ nɛ̀ à nɛ̀náǎ: «Kɔ̀la nɛ̀ mɛ mɔ sikìnɔ̀ kà mɛ lɛɛsini dɛ́ɛ́ wɛ̀: Ɛ́lɛ̀ à lɛsá ɓɛ̀ mɔ nɔ̀ɔ̀ yele mɛ bò nɛ̀, kùù pátà wɛ kà mɛ hà ɓò sà, mɛ bò du nɛ̀ má kwalá límɔ̀ nàà ŋgɔ̀; Kà mɛ pɛ̀ɛ̀, mɛ nɛ̀ni mi.» 23 Mɛ́ɓɛ̀ kà ɓɛ̀ wì ŋgɔ̀ jéàbàà ɓɛ̀ wɛ̀lì mɔ ŋgɔ̀, kà kuuɗi ŋginda wàà, pɛ́kà boabàà nɛ̀ límɔ súlòwɛ̀. 24 Yésùsì jɔ̀abàà mɛ́ɓɛ̀, kà ɓwɛ́ nɛ̀náǎ: «Bò sààka wɛ nɛ̀ ɓò limɔ i bi nàà Nja Njámbe! 25 Bò sààka wɛ nɛ̀ fɔlɔ à pɛlɛ à to du, ɓɛmɔ̀ŋgɔ̀, bò sààka wɛ pɛlɛ soko nɛ̀ mwâ limo à bi nàà Nja Njámbe.» 26 Ɓò ɓɛ̀ɛ i jéàbàà ɓɛ̀ wèlì mɔ ŋgɔ̀ ɓwɛ́àbàà nɛ̀náǎ: «À ŋgɔ̀ ò à bò dù poka wɛ ò?» 27 Yésùsì búlòbàà nɛ̀náǎ: «Ɓɛ̀ mɔ kà wì bò má nɛ̀ ò dɛ̂ nɛ̀ à nàà, Njámbe bò nɛ̀ ɔ̀ dɛ̂ nɛ̀.» 28 Piɛli ɓwɛ́àbàà nɛ̀ à ènáá: «Ɓá jɔ̀ɔ̀, ɔ̀ pisono mɔ yele kɔ pɛ̀ɛ̀ à nɛ̀ná mɛ.» 29 Yésùsì búlòbàà nɛ̀náǎ: «Mi ɓwɛ́ ɛ́nɛ̀ tɛ́kílí mɔ, à wì gbá gàlà wàà, ké wàà, ɓójà wàà, yáli wàà, bé wàà à wéé Nja nɛ̀ Njámbe na, 30 bò kpà má kwalá wɛ súlòwɛ̀ à ŋgɔ̀ mbúnù, kɔ́ɔ́wɛ̀, à ɓɛ̀ siki ŋɛ̀ pɛ́nɛ̂ bò ba kpasi nɛ̀ kinɔ nɛ̀ kinɔ.»
Sanɔ wààtà Yésùsì à ɓwɛ́ wɛ bò fé kà túnì
(Mat 20.17-19; Mlk 10.32-34)
31 Yésùsì kuobàà ɓò ɓwɛ́ Mɔtómò wàà ɓukɔ nɛ̀ wɛ́ɛ́lì, kà ɓwɛ́ nɛ̀ yóà nɛ̀náǎ: «Ɛ́nɛ̀ jèè, ɔ̀ boa ɛlá wɛ̀ náà Yélúzàlɛ̀mì, nɛ̀ ki ɓɛmɔ̀ nɔ̀ɔ̀ kà kulawe Njámbe tóabàà à wéè Bè wì à bò dɛ̂ tɛ̀. 32 I bò kùù á gbɛsɛ́ à ti kɔ ɓò ɓɛ̀ɛ̀ í ì má Njámbe à nà, yóà bò jàà à, ì bò yáá à, ì dufi káà sapu à tɛ́ wàà, 33 i bò mɛli à nɛ̀ fàsà i gbɛ̀ à. À jɛ́ wààtà kà tuni.» 34 Mɔ̀ɔ̀wɛ̀, à jàà ɓɛ̀ mɔnɔ ŋgɔ̀ yele ɓò ɓwɛ́ Mɔtómò jéà mà mɔ nà. Pɛ́kà ɓɛ̀ Mgbàà wè ŋɛ̀ ŋgɔ̀ boa wúsòwɛ̀ nɛ̀ yóà, yóà ì mà ɓɛ̀ mɔ kà Yésùsì boa gwéà welá wɛ à nà.
Yésùsì kpasasa mwâ bio lii
(Mat 20.29-34; Mlk 10.46-52)
35 Mɛ́ɓɛ̀ kà Yésùsì kumonobàà nɛ̀ ɓɛ̀ posi è Yèlìkò à, mà mwâ biyo líí bò à dú ŋgonù à ŋgolo gbó à dɛ́ kɛ̀ɛ̀ɗì. 36 Jèabàà gidi wì à pélá wɛ kà áánì nɛ̀náǎ: «Géà dɛ tɛ́ è?» 37 Kà i ɓwɛ́ á nɛ̀náǎ: «Yésùsì bé ɓò Nazàlɛ́tì à boa pelá wɛ̀ kɛ.» 38 Kà mɛɛ nù nɛ̀náǎ: «Yésùsì, bé Daviti, jɔ̀ɔ̀ mi ŋgó!» 39 Ɓó ɓɛ̀ɛ̀ ì boa nàà bàti à, kpɛ́ŋga nɛ̀ à mɔ dɛ nɛ̀ nà à gabɛ, ɓɛmɔ̀ŋgɔ̀, kà jìì mɛ́ɛ́ nù lémbà wɛ́ nɛ̀náǎ: «Bé Daviti, jɔ̀ɔ̀ mi ŋgò!» 40 Yésùsì yólàbàà kà ɓwɛ́ è ì kùù à pɛ́ nɛ̀. Mɛ́ɓɛ̀ kà kùmonobàà à ŋgólò Yésùsì à, kà áánì nɛ̀ à nɛ̀náǎ: 41 «Géà mɛ gwéé è mi dɛ̀ mɛ è?» Mwâ biyo lìì búlòbàà nɛ̀ à nɛ̀náǎ: «Mgbáámɔ́njá mbwala, dɛ nɛ̀náǎ mi jíí jɔ̀ɔ̀ mɔ.» 42 Kà Yésùsì ɓwɛ́ nɛ̀ à nɛ̀náǎ: «Jíí jɔ̀ɔ̀ mɔ, ɓùkòlò mɔ mɛ kpásasá mɛ.» 43 À ɓɛ̀ kinɔ́ siki ŋgɔ̀, kà jíí jɔ̀ɔ̀ mɔ, kà nɛ̀ni Yésùsì nɛ̀ ɓwɛ́ kumá Njámbe. Mɛ́ɓɛ̀ kà wì jɔ́abàà ɓɛmɔ̀ŋgɔ̀, kà sàpiɗó yele kunjìɗì bɛ́à kuma Njámbe.