Lúkàsì 17

Mbwàlà Yésùsì bɛ́ɛ̀sɛ̀ jɔ́ɔ̀sa wì ŋgò

(Mat 18.6-7, 21-22; Mlk 9.42)

Yésùsì ɓwɛ́àbàà nɛ̀ ɓò yàmìwè wàà, nɛ̀náǎ: «Bò du nɛ̀ ɓɛ̀ mɔ̀nɔ̀ɔ̀ kà bò bisi wì à njɛmbi kɛtɛ̀kɛtɛ̀. Ɓɛmɔ̀ŋgɔ̀, ŋgo súlo wɛ nɛ̀ ɓɛ̀ wì kà bò dàà nya wàà pi à njɛmbi à. 2 Ɔ̀ ɓa wékè nɛ̀náǎ, i bò hɛli Mgbàà ɗiɓòkò à té gɛ̀ wàà. I kùù á pi à jàà maŋ. Ìì, ɓɛ̀ mɔ bò dòlà wɛ nɛ̀ à, nàà i ili ma ta ŋga bè nɔ̀ɔ̀ sikinɔ à jàà njɛmbi. 3 Ɛ́nɛ̀ jɔmɛ!

À ɓójà mɛ dɛ́à ɗàà mɔ, hà à této. À tɔmasa mɛ jɔɔsi á ŋgò. 4 Á dɛ́à mɛ ɗàà wɛ sánɔ̀ mɔ̀ɔ̀lɔ dokɔ wɛ́ɛ́lì à kinɔ́ swéé, kɔ́ɔ́wɛ̀ kà pɛ̀ɛ̀ sanɔ mɔ̀ɔlɔ̀ dókɔ̀ wɛ́ɛ́lì à kinɔ swéé à áánà jɔɔsa wì ŋgo kà mɛ jɔ́ɔ́si kàà à ŋgo.»

Ɓùkòlò mɔ

5 Ye bò ɓwɛ́ Mɔtómò Yésùsì áánàbàà nɛ̀ à mà swéé nɛ̀náǎ: «Mgbáámɔ́njá, hàɔɔ Mgbàà ɓùkòlo mɔ.» 6 Kà Mgbààmɔ́njà buli nɛ̀náǎ: «Á ɓùkòlo mɔ mɔ̀nɛ̀ boa kàà tokiɗi pélè gbwà ɗogiliɓa, ɛ́nɛ̀ bò nɛ̀ ɔ̀ ɓwɛ́ nɛ̀ ɓɛ̀ ɗogiliɓa ŋgɔ́ɔ́ nɛ̀náǎ: “Júú kú mɛ kɛ̀ kà mɛ ɛli à guná tɛ̀ à jàà maŋ!” Bò diisí ɛ́nɛ̀.»

Tô mwâ dɛ̂ tò

7 « Ɔ̀ ɓà tɔ̀ nɛ̀náǎ, mà wì à taŋga mɔ̀nɛ̀ boa nɛ̀ mwâ ɗɛ̂ tò wàà, kà puɗiki pimbà, nɛ̀ nàà kà ɓanìnì dùù ɓwúyà. À ɓɛ̀ sikí kà mwâ dɛ tô wɛ jiisi nàà pimbà, ɛ́nɛ̀ bò ma nɛ̀ ɔ̀ ɓwɛ́ nɛ̀ à nɛ̀náǎ: “Ɛ́lɛ̀ wàwàà à nyɔŋga mɔ!” 8 Ɓɛmɔ̀ŋgɔ̀, ɛ́nɛ̀ ɓwɛ́ nɛ̀ à nɛ̀náǎ: “Gi gilo mù, Kɔɔ ɗo wɛ, lufínì mɔ̀kanda, mɔ dɛ tò à mi à ɓɛ̀ siki kà mi boa nyɔŋga mɔ nɛ̀ nɔ̀ɔ̀ mɔ. Kɔ́ɔ́wɛ̀, mɛ bò nyɔ kà mɔ, kà mɛ nɔ̀ɔ̀ mɔ à bò mɛ síkì.” 9 Ɛ́nɛ̀ hà ma mwâ dɛ̂ tò mɔ̀nɛ̀ i ŋgɔ́ɔ́ pɛ́kà dɛ̀a ɓɛ̀ mɔ kà ɛ́nɛ̀ áánà nɛ̀ à è à dɛ̀ nà. 10 Bó kàà kinɔ mɔ nɛ̀ ɛ́nɛ̀ mwɛ̀ɛ̀. À ɓɛ̀ siki kà ɛ́nɛ̀ dɛ́ ɓɛ̀ mɔ̀nɔ̀ɔ yele kà Njámbe ááni à ɛ́nɛ̀ ɓwɛ́ nɛ̀náǎ: “Ɔ̀ɔ̀ bò kɔ́tù yè ɓò dɛ̀ tò;ɔɔ lùfo dɛ́ ɓɛ̀ tô ŋɛ̀ kà lɛɛsini ɔ̀ dɛ.”»

Yésùsì kpàsasa ɓò ɓáyi ɓúkɔ̀

11 Yésùsì bóbàà à naŋganɔ̀ à gbò mɔ ɛli nàà Yélúzàlɛ̀mì, pelabàà à ɓɛ̀ jàà nja ŋɛ̀ kà kɛtini sokó Sàmàlì yɔ́ɔ̀ Gàlilé à. 12 Bioabàà à jàà má lè kà ɓò ɓayi ɓúkɔ pɛ̀ɛ̀ à kpatana wɛ nɛ̀ à. Kà yóà yoli ɗúúsi nɛ̀ à. 13 Kà yóà mɛɛ nù nɛ̀náǎ: «Yésùsì, Mbò mbwala, jɔ̀ɔ̀ ɔ́ɔ́ ŋgó!» 14 Yésùsì jɔ̀abàà yóà kà ɓwɛ́ nɛ̀ yóà nɛ̀náǎ: «Ɛ́nɛ̀ ɛ́lɛ̀ mboa mùù mɔ̀nɛ̀ nàà ɓò gbɛ̀ ɓùyà Njámbe.» Mɛ́ɓɛ̀ɛ̀ kà yóà boabàà ɛ́la wɛ à, kà yóà ba sa ŋgitɛ. 15 Mà wì sikinɔ́ à tàŋga yóà, mɛ́ɓɛ̀ɛ̀ kà jɔ̀abàà è, ba sa ŋgitɛ, kà jisi nɛ̀ ɓwɛ́ kumá Njámbe lémbà wɛ̀. 16 Kà pɛ̀ɛ̀ hɔ̀ à ti Yésùsì, kà guusi mùù sɔ̀ɔ̀ti wàà à mbúnù, kà hà á i ŋgɔ́ɔ́. Ɓɛ̀ wì ŋgɔ̀ bóbàà ɓò Sàmàlì. 17 Yésùsì ɓwɛ́àbàà nɛ̀náǎ: «Yóà ɓúkɔ yele bàà sá ŋgitɛ̀, bò ma mɛ́ɓɛ̀ na? Yeɓò ɓɛ̀ɛ̀ mɔ̀ɔ̀lɔ dokɔ wánààali à ŋgè? 18 Mà wì à sokó yóà tà ŋgili mà jisó wɛ̀ pɛ̀ɛ̀ à hà Njámbe i ŋgɔ̀ɔ̀ ná, kinɔ́ ɓɛ̀ gɛ̀nɛ̀ ɓɛ̀?» 19 Kà Yésùsì jii ɓwɛ́ nɛ̀ à nɛ̀náǎ: «Kulí ŋgɔ̀, kà mɛ ɛli; Ɓùkòlò mɔ mɛ kpásasá mɛ.»

Siki Njà nɛ̀ Njámbe boa sóko mɔ̀nɛ̀

(Mat 24.23-28, 37-41)

20 Ye Fàliziɛŋ áánàbàà nɛ̀ Yésùsì ɓɛ̀ siki kà Nja nɛ̀ Njámbe bò pɛ̀ɛ̀ nɛ̀ɛ. Yésùsì búlòbàà nɛ̀ yóà nɛ̀náǎ: «Nja nɛ̀ Njámbe pɛ̀ɛ̀ ma nɛ̀ ɗúkùlù na. 21 I bò má nɛ̀ ɔ̀ ɓwɛ́ nɛ̀ nɛ̀náǎ: “Ɛ́nɛ̀ jɔ̀ɔ̀ à héà bò kɛ̀!” I ɓwɛ́ kima kà nɛ̀náǎ: “Bó nɛ̀ kɛ nà!” Ɓɛmɔ̀ŋgɔ̀, ɛ́nɛ̀ i nɛ̀náǎ, siki Nja nɛ̀ Njámbe boa soko mɔ̀nɛ̀.»

Swee Be wì bò pɛ̀ɛ̀

22 Kɔ́ɔ́ wɛ́ kà ɓwɛ́ nɛ̀ ɓò yàmìwè wàà nɛ̀náǎ: «Mà siki bò hɔ̀ kà ɛ́nɛ̀ bò gɔli jɔ́a Be wì biɔ swéé síkìnɔ̀, ɓɛmɔ̀ŋgɔ̀ ɛ́nɛ̀ jɔ̀ɔ̀ ki mà à na. 23 I bò ɓwɛ́ nɛ̀ ɛ́nɛ̀ nɛ̀náǎ: “Ɛ́nɛ̀ sɛɓɛ kì!” Nàà: “Ɛ́nɛ̀ sɛɓɛ kɛ̀!” Ɓɛmɔ̀ŋgɔ̀, ɛ́nɛ̀ ɛ́lɛ̀ má nɛ̀ ki ná, ɛ́nɛ̀ kulí à má yù ɛ́lɛ̀ nɛ̀ ki na. 24 Mɛ́ɓɛ̀ kà nyɛkamakaló gɛlili li ŋgɔ kunjìɗì à ma ɓà gíò hɔ̀ à ma ɓà, pɛɛɗi Bè wì bò du káà mɛ́ɓɛ̀ɛ̀ à swéé wàà. 25 Ɓɛmɔ̀ŋgɔ̀, lɛɛsiní è à jɔ̀ɔ̀ haɓaɗa súlòwɛ̀, ɓò ɓɛ̀ jɛ́ bò pì à. 26 Ɓɛmɔ̀ kà ɗɛ́àtɛ̀ à siki Nóè à, ɓɛ̀ kìnɔ̀mɔ̀ ŋgɔ̀ bò dɛ̀ kàà tɛ̀ à líswèè pɛ́ɛ̀ɗi Bé wì. 27 Yewì nyɔ́ŋgààmɔ̀, ì nɔ̀mɔ̀, yewì ɛ́làbàà ga i ɛ́sì yebè yóà gà, hɔ̀ nɛ̀ à ɓɛ̀ swéé kà Nóè bíòbàà nɛ̀ à jàà kúkà. Kà mgbàà mbé pɛ̀ɛ̀ tɛ̀ gbɛ yóà yele. 28 Bò du káà mɛ siki Lòtì, wì nyɔ́ŋgabàà mɔ i nɔ̀ɔ̀ mɔ, ì mbɔ̀ɔ̀ mɔ i lɛɛsi mɔ, ì gùnì mɔ ì bɛ́ɛ́ gàlà. 29 Ɓɛ̀ mɔ̀ɔ̀ ŋgɔ̀, ɓɛ̀ swéé ɛ́ kà Lotì gbàbàà ɓɛ̀ posi è Sɔ̀dɔ́mì á, kà téé nàà li ŋgɔ̀ ma fùù kpɔɔwéè mɛ kòlò kà gbɛ yóà yele. 30 Ɓɛ̀ kinɔ́ mɔ ŋgɔ̀ bò dɛ tɛ́ à ɓɛ̀ swéé ɛ́ kà Be wì bò gbasiɗi nɛ̀ mù wàà. 31 Bɛ̀ swéé ɛ́ ŋgɔ̀, ɓɛ̀ wì kà bò dúŋgo nù à jàà tòɗi kà mɔ̀ɔ̀ wàà bò nàà nuu à jisi à ma pɛ̀ɛ̀ à kúò mɔ wɛ nà. Wà ɓɛ̀ɛ̀ kà bò náà pimbà à jisi à mà kàà pɛ̀ɛ̀ nàà gàlà na. 32 Ɛ́nɛ̀ ta ɓɛ̀ mɔ kà dɛ́à ke ɓɛ̀ wì è Lotì à. 33 Ɓɛ̀ wì kà bò gwe ɓanana kpási wàà, bò gbɛ̀sì tɛ̀. Ɓɛ̀ wì kà bò gwee gbɛ́sà kpàsi wàà bò ba kpasi. 34 Mi ɓwɛ́ ɛ́nɛ̀ nɛ̀náǎ: À ɓɛ̀ kiitú ŋɛ̀ ŋgɔ̀, wì wɛ́ɛ́lì bò du à kinɔ̀ yàlà, i bò kùù má wì ì pisini má wì. 35 Ye ko wɛ́ɛ́lì bò du à hɔna mɔ à kinɔ soko; I bò kùù má wì i pisini má wì. [ 36 Ye wéé wɛ́ɛ́lì bò du káà à jàà pìmbà, i bò kùù má wì i pisini má wì.]» 37 Yeɓò yàmi wè wàà áánàbàà nɛ̀ à nɛ̀náǎ: «Ɓɛmɔ̀ŋgɔ̀ bò dɛ tɛ̀ nɛ̀ ŋgè, Mgbáámɔ̀njà?» Kà búli enáǎ: «Ɓɛ̀ sokò kà wɔ̀ bò du hɔ̀, ki kàà waŋgò bò gbesini hɔ̀.»