Ɓɛ̀ mwâ dɛ tó ŋɛ̀ kà bò jɔma wɛ̀
16
Kà Yésùsì ɓwɛ́ nɛ̀ ɓɔ yàmìwè wàà nɛ̀náǎ: «Ma mwâ limɔ boabàà nɛ̀ mwâ dɛ̀ tò wàà kà ɓánànàbàà limɔ wàà, ma swéé, i pɛabàà ɓwɛ́ wɛ à à nɛ̀náǎ: “Mwâ dɛ̂ tò mɛ boa ɗáása limɔ́ mɛ.” 2 Mɔ́kònjì wàà ɓééɗabàà à, kà ɓwɛ́ nɛ̀ à nɛ̀náǎ: “ Géà kɛ̀ boa jéà wɛ nɛ̀ lii mɛ mɛ ɓɛ̀ è? Ɗyákɛsɛ̀ mi mɛ́ɓɛ̀ kà mɛ boabàà dɛ́ wɛ nɛ̀ limɔ mù à, pɛ́kà mɛ ma i à bò ɓánìnì mɔ̀ɔ̀ mù ná.” 3 Mwáà dɛ tô wɛ ɓwɛ́àbàà à jàà sɛ́à wàà nɛ̀náǎ: “Mɔ́kònjì mù boa kpasa mi à tô. Mi bò dɛ kia? Mi bò ma nɛ̀ɔɔ dɛ́ tô mbúnù na, mi bò du kàà nɛ̀ foyo mɔ ɛ́lì à gɛɗa nyɔ̀. 4 Ɛ́ɛ̀! Mi i ɓɛ̀ mɔ kè bò dɛ, kima à ɓɛ̀ siki kà mɔ́kònjì mù bò gbàsì mi à tô à, wì bò ba gɛ̀nɛ̀ mù!” 5 Kà gba ɓeeɗè bò tolosi mɔ́kònjì wàà sikimɔ sikimɔ, kà áánì nɛ̀ bati wɛ nɛ̀náǎ: “Mɛ bò nɛ̀ tolosi mɔ́kònjì mù wàgè?” 6 Wáɓɛ̀ búlòbàà nɛ̀ à nɛ̀náǎ: “Kuŋgu nɔ̀ɔ̀ sɔ́ɔ́sɛ̀kɔ̀”, mwâ dɛ tô ɓwɛ́àbàà nɛ̀ à nɛ̀náǎ: “Mɔ́kànɔ̀ tolosi mɛ he à, dunu kɛ̀ wàwàà, tô makowɛ mɔ̀ɔ̀lɔ.” 7 Kà jii áánɛ̀ nɛ̀ ma mwâ tolosi wɛ: “ Nàà mɛ, mɛ bò nɛ̀ tólòsi mɔ́kònjì mù wágè?” Wáɓɛ̀ búlòbàà nɛ̀ à nɛ̀náǎ: “Sako sa ŋgo sɔ́ɔ́sɛ̀kɔ.” Kà mwâ dɛ tô ɓwɛ́ nɛ̀ à nɛ̀náǎ: “ Mɔ́kànɔ̀ tolosi mɛ héà too. Mako wè mɔlɔ nɛ̀ makowe waata sako.” 8 Ki, kà mɔ́kònjì ɓwɛ́ dòlà yɛ́lɛ̀ bɛ́ɛ̀sɛ̀ ɗàà mwâ dɛ tô ŋgɔ̀, pɛ́kà dɛ́à mɔ nɛ̀ jɔ̀ɔ̀ ma. Tɛ́kìlìmɔ̀, à ɓɛ̀ siki kà ɓò ŋgɔ́ɔ́ mbúnù dɛ mɔ à soko yóà, yóà bò jɔɔma wè pélè ɓò ɓɛ̀ɛ à gɛ́lɛ́lɛ́ mɔ à.» 9 Kà Yésùsì jii ɓwɛ́ nɛ̀náǎ: «Mi ɓwɛ́ nɛ̀ ɛ́nɛ̀ nɛ̀náǎ, ɛ́nɛ̀ dɛ ɗibayi nɛ̀ limɔ mɔwuo. Mɔ̀ɔ̀wɛ̀, kima ɓɛ̀ siki kà du kima i na, nàà ɛ́nɛ̀ yóà bò bà gɛ̀nɛ̀ mɔ̀nɛ̀ nàà jàà gàlà yóà nɛ̀ kinɔ nɛ̀ kinɔ. 10 Ɓɛ̀ wì kà bò sìì à tokiɗi mɔ bò du kà sìì à Mgbààwɛ̀, ɓɛ̀ wì kà wùù wì à tokiɗi mɔ bò wuu kàà wì à mgbáà mɔ. 11 À boa ɛ́nɛ̀ bò ma sìì nɛ̀ limɔ mɔwuo ɓɛ̀ mbúnù nà ô à bò hà ɛ́nɛ̀ tɛ́tɛ̀ limɔ ô? 12 À ɛ́nɛ̀ dɛ ma mɔ sìì nɛ̀ dɛmɔ nya mɔ̀nɛ̀ nà, ô à bò hà ɛ́nɛ̀ mɔsuma bɔnɛ o? 13 «Ma wì bò ma nɛ̀ ɔ̀ dɛ tò mɔ̀kònjí wɛ́ɛ́lì nà. Kì bò bini ma wì kà gwéé ma wì. Ki bò hɛ́lìkìɗì mùù à tɛ̀ bàtì wáɓɛ̀ hɔ̀ kà jàànjì wéélì wɛ̀. Ɛ́nɛ̀ bò ma nɛ̀ ɔ̀ dɛ tò à Njámbe nɛ̀ tò à Pátà à kìnɔ̀ sàànɔ̀ nà!»Yemà gbààwè Yésùsì
(Mat 11.12-13; 5.31-32; Mlk 10.11-12)
14 Ye Fàliziɛŋ jeabàà Mgbàà wè ŋgɔ̀ yele kà yóà njáá Yésùsì, pɛ́kà yóà gwéabàà pátà súlòwɛ̀. 15 Kà Yésùsì ɓwɛ́ nɛ̀ yóà nɛ̀náǎ: «Ɛ́nɛ̀ bò ɓɛ̀ wì nɔ̀ɔ̀ kà yóà gwé ɓóa wɛ à lii wì è yóà bò sìì à, ɓɛmɔ̀ŋgɔ̀, Njámbe i sɛ́à mɔ̀nɛ̀. Ɓɛ̀ mɔ kà wì kùù è bò Mgbààwɛ̀ à, Njámbe bini mɔ̀ɔ̀wɛ̀. 16 Siki mboŋa Mɔ̀ísì nɛ̀ mɔ́kànɔ̀ Kulawè Njámbe sɔni à pɛɗi Zaŋ mwâ ɗuɓi wì. Kunjìɗì à ɓɛ̀ siki ŋgɔ̀, Dòlà Mɔtómò siki Nja nɛ̀ Njámbe bò ɓwɛ́ wɛ à wì. Wì yele à dɛ mɛɔɔ mɔ bi nɛ̀ ki. 17 Mbúnù yɔ́ɔ̀ liŋgɔ bò sapini wáwàà nàà ma bè tokiɗi ŋgudu mboŋa Njámbe à sapɛ̀nɛ̀.
18 Wì yele kà hɛ́à kè wàà kùù kwala wɛ, kpà ɓokalè nɛ̀ bati wà ɓɛ̀. À ma yé wèè hɛ́à kè wàà kùù ma kwala wɛ, kpà ɓokalè.»
Sika mwâ limɔ̀ yɔ́ɔ̀ Lazali
19 « Bóàbàà nɛ̀ ma mwâ limɔ yoli tû dòlà mɔkanda nɛ̀ Mgbàà gwéle, swéé yele kpà kpasibàà dòlà wɛ, nyɔ kàà mɔ dòlà wɛ. 20 À nù lopa ŋgo wàà ma mwâ sa boabàà yálà nù lii wàà à Lazali. Mùù wàà yele bóbàà tùù dálɛ̀. 21 Bó nɛ̀ gwéà dosa ja wàà nɛ̀ ɓɛ̀ ŋgundu nyɔ nɔ à téà wɛ à ŋgɔ́ɔ́ mésà mwâ limɔ. Ɓɛmɔ̀ŋgɔ̀, tóó ba i à pɛ̀ɛ̀ à yala dalɛ wàà. 22 Mwâ sa nɛ̀ féà wɛ à kà iŋgèlesì ɓùù à ɛ́lɛ̀ nɛ̀ à, à ŋgolo Abalahami. Kà mwâ limɔ fé kàà, kà i guni à. 23 Bóàbàà à jɔ̀ɔ̀ haɓaɗa à jàà njà nɛ̀ fio, ɓɔɗabàà lii kà jɔ̀ɔ̀ Abalahami yɔ̂ Lazali à kinɔ soko ɗúúsi. 24 Kà gbà mɛɛnu: “ Ŋgàà bafa mù Abalahami jɔɔsɛ mi ŋgo ɛ́sɛ̀ Lazali à ɗuɓo njɔ dokɔ wàà à jâ li mɔ pɛ à ŋgasa ɗabɛ́ mù, pɛ́kà mi boa jɔ̂ haɓaɗa à jàà kpɔ̀ɔ̀ ɓɛ̀ wè ɓɛ̀ɛ̀.” 25 Ɓɛmɔ̀ŋgɔ̀, Abalahami ɓwɛ́ nɛ̀ à nɛ̀náǎ: “Bè bè mù tagɛlɛ ɓɛ̀ dòlà gbaasi mɛ boabàà hɔ̀ à ŋgɔ́ɔ́ mbúnù à. Mɛ́ɓɛ̀ɛ̀ kà Lazali boabàà à jàà haɓaɗa, he ŋgɔ̀, i boa à mɔ̀ɔ̀sà sɛ́à wàà, ɗé nàà mɛ, mɛ bò i à jàà haɓaɗa. 26 Jɔ̀ɔ̀, à sokoɔɔ ɛ́nɛ̀ ma Mgbàà ɓɛ̀ya bò hɔ̀, mɔ̀ɔ̀wɛ̀, ɓò ɓɛ̀ i bò gwee gba wè nɛ̀ kɛ pɛ̀ɛ̀ nàà ɛ́nɛ̀ à, i bò ma nɛ̀ ɔ̀ péli nɛ̀ na, i bò ma nɛ̀ peli nɛ̀ kàà nà ɛ́nɛ̀ mɔ pɛ̀ɛ̀ nàà ɓɛ̀ soko mɛ ko hɔ̀ na.” 27 Kà mwâ limɔ ɓwɛ́ nɛ̀ à nɛ̀náǎ: “ Ŋgàa bafa mù, mi mbɔmbala mɛ, ɛ́sɛ̀ Lazali à jàà gàlà bafa mù. 28 Tɛ́kìlìmɔ̀ mi bò nɛ̀ ɓójà mù mɔ̀ɔ̀lɔ̀, Lazali bò ɛ́lì kà ɛ́lɛ̀ à dàà jala yóà mɔ dɛ nɛ̀ nɛ̀náǎ, yóà pɛ̀ɛ̀ ma ɓɛ̀ soko haɓaɗa na.” 29 Abalahami búlòbàà nɛ̀ à nɛ̀náǎ: “Yeɓòjà mɛ bò nɛ̀ Mɔ̀ísì nɛ̀ kúlàwè Njámbe yóà lɛɛsini nɛ̀ jéà yóà!” 30 Mwáà limɔ ɓwɛ́ à nɛ̀ à nɛ̀náǎ: “Abalahami ŋgàà bafa mù, ɓɛmɔ̀ŋgɔ̀ lɛɛsini kima na. À ma wì nɛ̀ ke à soko wɔ̀ɔ̀ gbá ɛ́lɛ̀ nɛ̀ kì yóà bò lúfìnì kpásì yóà.” 31 Abalahami ɓwɛ́àbàà nɛ̀ à nɛ̀náǎ: “Yóà jée ma Mɔ̀ísì nɛ̀ kúlàwɛ̀ Njámbe nà. Ga tɔ́ kà ma wì à túni à sóko wɔɔ yóà tɔmisi kima nà.”»