Mɛ̀ŋgalà mɔ ɓɛ̀ wì kà kpà mboɗí wàà kà yɔ̀à à
(Mat 18.12-14)
15
Yeɓò kùù làpô nɛ̀ ma ɓò ɗàà kúmà yóà yele tikobàà pɛ̀ɛ̀ à ŋgólo Yésùsì, mɔ jé Mgbàà wè wàà. 2 Ye Fàliziɛŋ nɛ̀ ɓò mbò mbwala mboŋa Njámbe jéà pàà sɛ́à, kà yóà mimili mɔ nɛ̀náǎ: «Ɓɛ̀ wì boa ba gɛ́nɛ̀ ɓò dɛ́ ɗàà mɔ, kà nyɔ kàà mɔ yɔ̂ yóà!» 3 Kà Yésùsì pi sikà à yóà nɛ̀náǎ: 4 «Pɛ́kà mà wì à soko mɔ̀nɛ̀ boa nɛ̀ mboɗì sóósɛ̀kɔ, kà sìkìnɔ́ yɔ́ɔ̀ à taŋgá wɛ. Pisini ki mà nya wàà kà bò mákòwɛ̀ wɛ mɔ̀ɔ̀lɔ nɛ̀ màkó wɛ wánààlì nɛ̀ mɔ̀ɔlɔ dokɔ wánààlì à nyɔŋga mɔ, kà ɛli à kió wà ɓɛ̀ɛ̀ kà yɔ́à síkìnɔ́, hɔ̀ nɛ̀ à ɓɛ̀ siki kà bò kpà à ná? 5 À kpà wáɓɛ̀ɛ̀ sikinɔ́ kà yɔ̀ábàà, bò du nɛ̀ mɛ́ŋgalà mɔ súlòwɛ̀. Kà kùù à, ɓúú à ŋ ŋgɔ́ɔ́ ɓàà wàà, 6 bò jisi ɛ́lɛ̀ nàà gàlà nɛ̀ à, kà ɓééɗì mbayi wàà, nɛ̀ nyà wàà, kà ɓwɛ́ nɛ̀ yóà nɛ̀náǎ: “Ɛ́nɛ̀ mɛ́ŋgɛ̀lɛ̀lɛ̀ mɔɔɔ nɛ̀, pɛ́kà mi jió kpà mboɗi mù, wà ɓɛ̀ɛ̀ kà yɔ́àbàà.” 7 Ɓɛ́ kinɔ mɔ ŋgɔ̀, à kà mi ɓwɛ́ à ɛ́nɛ̀ nɛ̀náǎ, bò du nɛ̀ súlò mɛŋgalamɔ nàà li ŋgɔ̀ à mwâ njɛmbi sikinɔ lùfònò kpásì wàà, pélè màkò wì mɔ̀ɔ̀lɔ nɛ̀ màkó wɛ wánààli nɛ̀ mɔ̀ɔ̀lɔ dokɔ wànààlì sìì, kà yóà bò má nɛ̀ gwéà lùfonò kpási yóà nà.»Mɛ̀ŋgàlà mɔ ɓɛ̀ kó kà kpà gɓi ŋgili pátà wàà kà yɔ̀à à
8 «À boa è mà ko boabàà nɛ̀ gɓi ŋgilì pátà hɔsɛ ɓùùkɔ, kà mà sìkìnɔ̀ yɔ̂. Dù kima múndà nà, kà gbɛli gàlà, bò kii dòlàwɛ̀ hɔsɛ à ɓɛ̀ síkì kà bò kpà nà? 9 Mɛ́ɓɛ̀ kà kpàbâ, kà ɓééɗì mbáyi wàà nɛ̀ yè nyà wàà, kà ɓwɛ́ nɛ̀ yóà nɛ̀náǎ: “Ɛ́nɛ̀ mɛ́ŋgɛ́lɛ̀ mɔɔɔ nɛ̀, pɛ́kà mi jío kpà ɓɛ̀ pátà kà yɔ̀abàà nɛ̀ mì à!” 10 Ɓɛ̀ kinɔ́ mɔ ŋgɔ̀, ǎ kà mì ɓwɛ́ à ɛ́nɛ̀ nɛ̀náǎ: Bó nɛ̀ mɛ́ŋgalà mɔ à soko Iŋgèlesì Njámbe à mwâ njɛmbi sìkìnɔ̀ lùfono kpasì.»
Mɛŋgàlà mɔ ɓɛ̀ wì kà kpà bé wàà kà yɔ̀à à
11 Yésùsì jiobàà ɓwɛ́ nɛ̀náǎ: «Mà wì boabàà nɛ̀ bé wɛ́ɛ́lì. 12 Ɗìɔ̀fì ɓwɛ́àbàà nɛ̀ bafa wàà nɛ̀náǎ: “Bafa mù, hà mi ɓàà ɓɛ̀ nɛ̀ ŋàà límɔ̀ kà boabàà mɛ bò hà mi à.” Mɔ̀ɔ̀wɛ̀, kà ɗibàfà kàpi límɔ̀ wàà à sokó bè wàà wɛ́ɛ́lì. 13 À ma bé jɛ kɔ́ɔ́wɛ̀, ɗíɔ̀fì lɛ̀sabàà ɓɛ̀ límɔ nɔ̀ɔ̀ kà boa nɛ̀ yele. Kà kùù pátà wɛ, ɛ́lɛ̀ nɛ̀ nyaŋaána wɛ à máɓá njá ɗúúsì. Nàà nɛ̀ ki, kpàsabàà njɛ̀mùnjɛ̀mù, kà ɗààsi pátà wàà yele. 14 Mɛ́ɓɛ̀ kà ɗààsabàà limɔ wàà yele à, kà Mgbàà fótò hɔ̀ à ɓɛ̀ nja ŋɛ̀ ŋgɔ̀, kà kunjìɗì kiyo mɔ yele. 15 Kà ɛli à dɛ̀ tô, nàà mà wì à ɓɛ̀ jàà nja ŋgɔ̀, kà ɛsi à nàà pimbà wàà à ɓánànà yé ŋgulu. 16 Bóàbàà nɛ̀ gɔ́là nyɔŋga ɓɛ̀ nyɔ nɔ̀ɔ̀ kà ŋgúlù boabàà à nyɔŋga wɛ; Ɓɛmɔ̀ŋgɔ̀ mà wì hà mà à na. 17 Kúnjoɗobàà tàŋgàlà kpásì wàà. Kà weli mɔ à jàà sɛ́à wàà nɛ̀náǎ: “Yeɓò dɛ̀ tó bafa mù bò nɛ̀ nyɔ̀ súlòwɛ̀, pélè yóà. Ɗɛ mi bò kɛ̀ à féà wɛ nɛ̀ fòtò! 18 Mi bò jisi ɛ́lɛ̀ nàà báfà mù. À mi hɔ́a nɛ̀ ki, mi bò ɓwɛ́ á nɛ̀náǎ: Bafa mù, mi dɛ́a njɛmbi nɛ̀ Njámbe, kɛ̀ dɛ kâ njɛmbi nɛ̀ mɛ. 19 Lɛɛsini má nɛ̀náǎ, mɛ ɓééɗè mí è, bè mɛ nà. Kúú mi mɛ má taŋga ɓò dɛ̀ tô mɛ.” 20 Kɔ́ɔ́ wɛ̀, kà gba jisi ɛ́lɛ̀ nàà bafa wàà. Mɛ́ɓɛ̀ kà báfà wàà jɔ̀a à pɛ́ nɛ̀ biɔ́ ɗúúsì à, kà ŋgo ba à súlòwɛ̀ nɛ̀ be wàà. Kà kùlì yù, ɛ́lɛ̀ à sekáɗà à, kà liɓikì à. 21 Bé wàà ɓwɛ́à nɛ̀ à enáǎ: “Báfà mù, mi dɛ́a njɛmbi nɛ̀ Njámbe, kɛ̀ jii dɛ njɛmbi nɛ̀ mɛ. Lɛɛsini má nɛ̀náǎ, mɛ kùù mi hi mɛ be mɛ nà.” 22 Ɓɛmɔ̀ŋgɔ̀, báfà wàà ɓwɛ́àbàà nɛ̀ ɓò dɛ tô wàà nɛ̀náǎ: “Wàwàà ɛ́nɛ̀ pɛ̀ɛ̀ nɛ̀ dòlàmɔ̀kanda ɛ́nɛ̀ yóósè à; Kà ɛ́nɛ̀ de námbini à dòkɔ̀ wàà, kà ɛ́nɛ̀ yóósì á sapato. 23 Ɛ́nɛ̀ kùù kwàlà bata kɔ dálà à dòlàwɛ̀ pɛ nɛ̀, kà ɛ́nɛ̀ gbɛ, kà ɛ́nɛ̀ gi, kɔ̀ dɛ yɔ̀à, 24 pɛ́kà bè mù ɓɛ̀ féabàà lé, jìo pɛ̀ɛ̀ à kpàsì, yɔ́àbàà mi jìo kpá à.” Ká yóà kúnjiɗì yɔ́à nɛ̀ mɛ́ŋgalà mɔ. 25 À ɓɛ̀ siki ŋgɔ̀, dɛbàà tɛ̀ à ɓɛ̀ siki kà ŋgàà wàà boabàà nàà pimbà. Mɛ́ɓɛ̀ kà jìsobàà nàà pìmbà á, kà hɔ̀ à ŋgólo gàlà, kà jéé gidi gémà nɛ̀ yɔ́à. 26 Kà ɓééɗì má taŋgà ɓò dɛ̀ tò báfà wàà, kà áánì ɓɛ̀ mɔ péla wɛ nɛ̀ ki à. 27 Mwâ dɛ́ tò búlòbàà nɛ̀ à nɛ̀náǎ: “Ɓójà mɛ pɛ́ya, àà kà bafa mɛ gbɛ́à bátà kɔ dálábàà dòlàwɛ̀ hɔma wɛ kó ɓànàbàà, pɛ́kà kpà bé wàà à sa ŋgite.” 28 Sɛ́à bati bé nyi ŋgobàà, kà bini biyo wɛ à jàà gàlà. Bafa wàà pɛ́àbàà à bɔ̀mbalà à mɔ dɛ nɛ̀ è à ɛ́lɛ̀ nàà gàlà. 29 Ɓɛmɔ̀ŋgɔ̀, bé wàà búlòbàà nɛ̀ à ènáá: “Ɓà jéé, bò nɛ̀ súlò pémbè kà mi boa dɛ tôɔɔ mɛ, mi bò kàà diso gbààwè mɛ yele. Ɗé, mɛ ɓàà bò tàà hà mi ma swéé ma bè mbɔ ŋgɔ̀ bátà sikinɔ kà mi ba nɛ̀ yɔ́àɔɔ mbayi mù. 30 Mɔ̀ɔ̀wɛ̀, à ɓɛ̀ siki kà bè mɛ ɓɛ̀ɛ̀ jiso à, à kà ɗasa limɔ mɛ yele yɔ́ɔ̀ ko à, nàà à mɛ gbɛya bè bata kàɔɔ dálabàà à dòlà wɛ à!” 31 Ɗibafa ɓwɛ́àbàà nɛ̀ à nɛ̀náǎ: “Bè mùù, mɛ bò swéé yeleɔɔ mɛ, ɓɛ̀ mɔ kà mi bò nɛ̀ yele bò kàà bɔ mɛ. 32 Áánìbàà nɛ̀náǎ ɔ̀ ba yɔ́à kà ɔ̀ mɛŋgili mɔ, pɛ́kà ɓójà mɛ ɓɛ̀ɛ̀ féàbàà lè jio pɛ̀ɛ̀ à kpasi, yɔabàà lè à kɔ jio kpà à!”»