Yésùsì saka ma mwâ tiɗomɔ
14
Mà swéé ɔmi Zuifi, Yésùsì ɛ́làbàà nàà mà mɔ́kònjì Fàliziɛŋ à nyɔ́ ŋgá mɔ nàà à. Yeɓò ɓɛ̀ɛ̀ ì boa ki à boabàà à seɓá Yésùsì kpɛ̀ɛ̀. 2 Ma wì boabàà ki à sɔ̀ɔ̀tì wàà, mùù wàà yele dona wɛ nɛ̀ tíndòmɔ̀ mɔ lì. 3 Yésùsì kùù à Mgbààwɛ̀, áánàbàà nɛ̀ ɓò mbó mbwala mboŋa Njámbe yɔ́ɔ̀ Fàliziɛŋ nɛ̀náǎ: «Bò nɛ̀ jimi à mboŋa mɔ̀ɔ̀ nɛ̀náǎ ì kpasɛ́sɛ́ wì nɛ̀ tàà kpasisi ma wì à swéé ɔ̀mi mɔ̀ɔ̀?» 4 Ma wì à soko yóà gwéà ma bulò mà mɔ na. Yésùsì ɗɔ̀abàà mwâ tindò mɔ, kà kpàsìsì à, kà jisisi à ɛ́sɛ̀ nàà gàlà nɛ̀ à. 5 Kɔ́ɔ́ wɛ, kà ɓwɛ́ nɛ̀ yóà nɛ̀náǎ: «Pɛ́kà mà wì à ta ŋga mɔ̀nɛ̀ boa nɛ̀ bé wàà ŋgá tɔ́ è ndáì wàà, kà lúúndi ɓéà, bò má nɛ̀ ɔ̀ ɛ́lì à gbasà à wàwàà ná, ŋgà tɔ kà boa swéé ɔmi mɔ̀ɔ̀ nà?» 6 Ma wì sikinɔ́ boa mà nɛ̀ ɔ̀ búlì ɓɛ̀ nìo ŋgɔ̀ nà.Taɗɛ́ sɔ́ɔ́ɗi tísò
7 Yésùsì jɔ̀abàà mɛ́ɓɛ̀ɛ̀ kà ɓɛ̀ wì nɔ̀ɔ̀ í ɓééɗàbàà boabàà dáana dú ŋgonu à bati tíso à. Kɔɔ wɛ̀, kà pi síkà nɛ̀ yóà nɛ̀náǎ: 8 « À mɛ jɔ́à wì ɓééɗa mɛ à má yɔ̀à gà, ɓá sù à má dáána dú ŋgonu à bátì tísò nà, pɛ́kà bò nɛ̀ ɔ̀ dù nɛ̀ nɛ̀náǎ i ɓèèɗì mà wì kà bò Mgbààwɛ̀ pélè mɛ, 9 kà ɓɛ̀ wì kà ɓééɗà ɛ́nɛ̀ wɛ́ɛ́lì à, bò ɓwɛ́ nɛ̀ mɛ nɛ̀náǎ: “Ɗɛ́ ɓɛ̀ soko mɛ à.” Fòyò bò bá mɛ à kulo ŋgɔ̀ ɛ́lɛ̀ à kiyo sɔ̀ɔ̀ɗi tísò. 10 Bò dòlà wɛ́ náǎ, à ì ɓééɗa mɛ à yɔ́à ga, ɓa sùa du ŋgonu à ɓɛ̀ tìsó nàà ɗò à, kìmà ɓɛ̀ sìkí kà mwâ ɓèèɗì mɛ bò kpà mɛ ki du ŋgonu á, bò ɓwɛ́ nɛ̀ mɛ nɛ̀náǎ: “Mbàyì mù, pɛ̀ɛ̀ nɛ̀ kɛ̀ nàà bati, à dòlà tiso.” Mɔ̀ɔ̀wɛ̀, bò dú nɛ̀ mɛ nɛ̀ kumà à sɔ́ɔ́ti ɓɛ̀ wì nɔ́ɔ yele kà yóà bò dú ŋgonu à mbanji mesà ɛ́nɛ̀ yóà. 11 Tɛ́kìlìmɔ̀, ɓɛ̀ wì kà bò ɓoɗi mùù wàà, ì bò dɔ̀si à, ɓɛ̀ wì kà bò dɔ̀si mùù wàà, i bò ɓòɗì à.» 12 Kɔ́ɔ́ wɛ̀, kà Yésùsì ɓwɛ́ nɛ̀ mwâ ɓééɗi à nɛ̀náǎ: «À mɛ gwéà hà wì nyɔ́, ɓééɗè à má mbàyì mɛ nà, ɓééɗè à má ɓòjà mɛ nà, ɓééɗè à mà kàà ma ta ŋga yálì mɛ nà, ɓééɗè à má kàà nya mɛ kà yóà bò mwâ njá nà, pɛ́kà ɓò ɓɛ̀, yóà bò jìì kàà ɓééɗè mɛ à mɔ yóà. Kà yóà jìsìsì ɓɛ̀ mɔ kà mɛ hábàà yóà. 13 Ɓɛmɔ̀ŋgɔ̀, á mɛ hà wì nyɔ̂, à swéé yɔ́à, ɓééɗè ɓò sá, mɛ ɓééɗí ɓò kú, ɓò ɓɛ̀ɛ̀ nɛ̀ fɛ́à na ŋgà à, te kùù ɓò biyo lìì. 14 À mɛ dɛ́a mɔ mɛ́ɓɛ̀ɛ̀, mɛ bò du nɛ̀ mɛ̀ŋgala mɔ súlòwɛ̀, pɛ́kà ɓɛ̀ wì nɔ̀ɔ̀ ŋgɔ̀, bò má nɛ̀ ɔ̀ jisisi nɛ̀ hà mɛ nà, Njámbe à bò jisìsì dèmɔ̀ wɛ há mɛ, à ɓɛ̀ swéé kà ɓò ɓɛ̀ sìì à bò tuni à hándà.»
Sìkà ɓɛ̀ wì nɔ̀ɔ̀ i ɓeeɗa à Mgàà nyɔ ŋgá mɔ
(Mat 22.1-10)
15 Kɔ́ɔ́ jéà ɓɛ̀ wélì mɔ ŋgɔ̀, kà ma wì bàà à ŋ ŋgɔ́ɔ́ mesa yɔ́ɔ̀ Yésùsì, ɓwɛ́ nɛ̀ à nɛ̀náǎ: «Mgbàà mɛ̀ŋgàlà mɔ súlòwɛ̀ nɛ̀ ɓɛ̀ wì kà bò nyɔmɔ nàà Njá nɛ̀ Njámbe à.» 16 Yésùsì piobàà sìkà nɛ̀ à, nɛ̀náǎ: «Mà wì télabàà yɔ̀à kà gi nyɔ́ súlòwɛ̀, kà ɓééɗì píò wì. 17 Mɛ́ɓɛ̀ɛ̀ kà sìki hɔ́abàà, kà ɛsi mwâ dɛ́ tô wàà à ɓwɛ́ wɛ à ɓɛ̀ wì nɔ̀ɔ̀ kà ɓééɗà nɛ̀náǎ: “Ɛ́nɛ̀ pɛ̀ɛ̀ siki nyɔ ŋgá mɔ hɔ̀ à lè.” 18 Ɓɛmɔ̀ŋgɔ̀, ɓò ɓɛ̀ ì ɓééɗabàà yóà yele kúnjoɗobàà áánà jɔɔsà wì ŋgo. Bati wì ɓwɛ́àbàà nɛ̀ mwâ dɛ̂ tò nɛ̀náǎ: “Mi mbɔà pimbà lɛɛsiní è, mi ɛ́lɛ̀ à jɔ̀ɔ̀ wɛ̀, mi yáya nɛ̀ mɛ jɔ̀ɔ̀ mi ŋgò.” 19 Wɛ̀ɛ̀lì wì ɓwɛ́àbàà nɛ̀náǎ: “Mi mbɔ́a dayi ɓukɔ, à yoli wɛ́ɛ́li wɛ́ɛ́li mi boa ɛ́sɛ̀ yóà à wéka wɛ tô nàà pimbà, mi boa ɛlá wɛ à seɓa yóà, mi yáyà nɛ̀ mɛ, jɔ̀ɔ̀ mi ŋgò.” 20 Kà mà wì jíí ɓwɛ́ nɛ̀náǎ: “Mi gba kúò ko wáàwàà, mɔ̀ɔ̀wɛ̀ bò dɛ nɛ̀náǎ, mi pɛ̀ɛ̀ ki ma nà.” 21 Mwâ dɛ̂ tó jisobàà, nɛ̀ yɛ́lɛ wɛ ɛ́lɛ̀ à nɛ́ɛ́ɗà wɛ à mɔ́kònjì wàà. Mwâ gàlà jéà paaséà, kà ɓwɛ́ nɛ̀ mwâ dɛ̂ tò wàà nɛ̀náǎ: “ Ɛ́lɛ̀ wáàwàà nàà ɓɛ̀ soko kà wì bò gbésana wɛ̀ hɔ́à, nɛ̀ gbo kà ɛli nàà pòsì à, mɛ kùù ɓò sa, yɔ́ɔ̀ ɓò kúmo, nɛ̀ ɓò biyo lìì tɛ kùù ɓò féà naŋga pɛ̀ɛ̀ nɛ̀.” 22 À jíso wàà, kà ɓwɛ́ nɛ̀ mɔ́kònjì wàà nɛ̀náǎ: “ Tɛ̀tɛ wì,ɔɔ dɛ́à ɓɛ̀ mɔ mɛ ɓwɛ́à àɔɔ dɛ̀ à. Ɓɛmɔ̀ŋgɔ̀, soko ɓàà bò.” 23 Mɔ́kònjì jíobàà ɓwɛ́ nɛ̀ mwâ dɛ̂ tò nɛ̀náǎ: “Ɛ́lɛ̀ hÌ à fii jelà kà peli à mbanda nɛ̀ à ŋgólo pimbà. Falɛ́ yóà kà yóà bi, kà gàlà mù à dònɛ̀. 24 Mi ɓwɛ́ ɛ́nɛ̀ nɛ̀náǎ, mà ta ŋga ɓɛ̀ wì nɔ̀ɔ̀ mi suo à ɓééɗà wɛ nɛ̀ bati à nyɔ̀ kìmà nyɔ̂ mù nà.”»
Ɓɛ̀ mɔ nɔ̀ɔ̀ kà wì lɛɛsini nɛ̀ dɛ̀ɛ̀ wɛ mɔ nɛ̀ni Yésùsì à
(Mat 10.37-38)
25 Súlò wì boabàà lɛ́ɛ́ wɛ à fíí gbo yɔ́ɔ̀ yóà, Yésùsì kiɓosobàà líí séɓè nɛ̀ yóà, kà ɓwɛ́ nɛ̀ yóà nɛ̀náǎ: 26 « Ɓɛ̀ wì kà gwéé é à pɛ̀ɛ̀ nàà mi á, à gwéé ma mi pélè báfà wàà na, nɛ̀ nànà wà na, nɛ̀ ke wàà na, yè be wàà na, ɓòjà wàà na, nɛ̀ bókònyà wàà na, tɛ kùù mɔ̀sùma mùù wàà na. À bò ma mɛ́ɓɛ̀ɛ̀ na, dù kima mwâ yami wɛ mùù na. 27 Ɓɛ̀ wì kà ɓùù mà pélà ŋgànà té wàà nɛ̀nɛ mí à nà, du kima mwâ yámì wɛ mù nà. 28 À ma wì à sokó mɔ̀nɛ̀ gwéà é à bɛ́ɛ́ gàlà jù tè, à ɓa sú à du ŋgo nù, kà ɗìtìlì ɓɛ̀ pátà kà bò nɛ̀ɔɔ dààsi nɛ̀, kà jɔ̀ɔ̀ à boa bò nɛ̀ pátà súlòwɛ̀ mɔ sɔ́si nɛ̀ tò wɛ. 29 Pɛ́kà, á kuŋjoɗo tô, nɛ̀ ja kɔ mbí ŋgò kà gàlà gba séésènè, wì yele kà bò jɔ̀ɔ̀ gàlà wɛ à, bò jàà à, 30 kà yóà ɓwɛ́ nɛ̀ à nɛ̀náǎ: “Ɓɛ́ wì ɓɛ̀ɛ̀ kúŋjoɗò bɛ́ gàlà, ɓɛmɔ̀ŋgɔ̀, kà gba mgbolɛ̀kɛ̀ɗɛ!” 31 Bò káà mɛ́ɓɛ̀ɛ̀ kà mà Mgbàà mɔ́kònjì bò ɛli wàà bilò nàà mà nya wàà Mgbàà mɔ́kònjì à. Bó ɓà súà dú ŋgo nù kà ɗitili, sɔ̀ɗyà wàà, mɔ í nɛ̀ kìmà bò nɛ̀ ɔ̀ lɛ̀ wè nya wàà nɛ̀ sɔɗya mili ɓukɔ bɛ́ɛ̀sɛ̀ wà ɓɛ̀ɛ kà bò pɛ̀ɛ̀ nɛ̀ màkó míli sɔ́ɗya wɛ́ɛ́lì à. 32 Á bò ma nɛ̀ ɔ̀ lɛ́ wè wàà nà, bò ɛsi ɓò bà kumu náà bati, nàà ɓɛ̀ Mgbàà mɔ́kònjì ŋgɔ̀ à áána ténàtɛ̀ à ɓɛ̀ siki kà ɓa bò ɗùùsì à.» 33 Yésùsì sɔ̀ɔ̀sabàà nɛ̀náǎ: «Ma wì à sokó mɔ̀nɛ̀, dùù kima mwâ yámì wɛ mù, à gbɔ̀lì ma ɓɛ̀ mɔ yele kà bò nɛ̀ nà.»
Tɔ́ɔ́ bò dòlà mɔ
(Mat 5.13; Mlk 9.50)