Ɛ́nɛ̀ lufini dɛ̀ɛ̀ mɔ
13
À ɓɛ̀ siki ŋgɔ̀, má wì pɛ́àbàà à nɛ̀ɗa mɔ à Yésùsì nɛ̀náǎ: «Pilati gbɛ́à ma ɓò Gàlilé, à ɓɛ̀ siki kà yóà boabàà hà ɓwuya à Njámbe à.» 2 Yésùsì búlòbàà nɛ̀ yóà nɛ̀náǎ: «Ɛ́nɛ̀ taŋgili bɔ̀ nɛ̀ è ɓɛ̀ ɓò Gàlilé nɔ̀ɔ̀ ŋgɔ̀ kà i giiɗóbàà bò nɛ̀ njɛmbi pélè ɓò Gàlilé yele? 3 Àà, mi ɓwɛ́ ɛ́nɛ̀ nɛ̀náǎ, á ɛ́nɛ̀ lúfini mà dɛ̀ɛ̀ mɔ mɔ̀nɛ̀ ná, ɛ́nɛ̀ yele bò fe mɛ yóà. 4 Ma kùsò gàlà boabàà nàà Silòwè. Ɓɛ̀ gàlá ŋgɔ̀ gbinobàà kà hɔniŋgi wì ɓúkɔ nɛ̀ mɔ̀ɔ̀lɔ dokɔ wâta, nàà ɛ́nɛ̀ géà kà ɛ́nɛ̀ taŋgili à? Yóà bàà bò nɛ̀ njɛmbi pélè ɓò Yélúzàlɛ̀mì yele? 5 Àà, mi sùù à ɓwɛ́ ɛ́nɛ̀ nɛ̀náǎ, ɛ́nɛ̀ lùfini dɛ̀ɛ̀ mɔ mɔ̀nɛ̀, à ɛ́nɛ̀ lùfini ma dɛ̀ɛ̀ mɔ mɔ̀nɛ̀ nà, kà ɛ́nɛ̀ yele fe mɛ yóà.»Siká ɓɛ̀ té kà wâ mà nà
6 Kɔ́ɔ́ wɛ, kà Yésùsì pi yóà sika nɛ̀náǎ: «Mà wì gúnobàà maŋgolo à pimba wàà. Kà ɛli à kió kii wɛ́ tàà kpà mà. 7 Ŋgɔ̀ɔ̀ wɛ, kà ɓwɛ́ nɛ̀ mwâ dɛ̀ tò wàà nɛ̀náǎ: “Ɓá jɔ̀ɔ̀! Bó hî pèmbè wâtá, mɛ́ɓɛ̀ɛ̀ mi pɛ̀ɛ̀ kió kii ɓɛ̀ maŋgolo mi kpà má nà. Ɗɛŋgɛ́ɗɛ̀ à! Bó ma ɗólà wɛ à nyɔ mbúnù gɔ́ na!” 8 Ɓɛmɔ̀ŋgɔ̀, mwâ dɛ̂ tò wàà búlòbàà nɛ̀ à nɛ̀náǎ: “Tɛtɛ wì, ɓá jii ɗe á à ɓɛ̀ pèmbè, mi bò ja mbúnù jitikini kùli wàà kimà mbó ɗe mbúnù jubû hɔ̀. 9 Kima bò nɛ̀ wàà nɛ̀ à ɓɛ̀ pèmbé nɔ̀ɔ̀ pɛ́nɛ̀ à, à wàà ma hi nà, kà mɛ ɓwɛ́ mi kɛ̀ ɗɛ́ ŋgiɗi à.”»
Yésùsì kpasása ma kó à tiɗo mɔ à swee ɔmi Juwifi
10 Mà swéé ɔmi Zuifi Yésùsì boabàà à mboa wì mɔ à jàà gála sákwàlà mɔ. 11 À ɓɛ̀ jàà gála sákwàlà mɔ ŋgɔ̀, mà ko boabàà nɛ̀ pembè ɓùùkɔ nɛ̀ mɔ̀ɔ̀lɔ dokɔ wààta à tindò ɗàà lííndì. Bóà nɛ̀ tuo ɗò nàà bati, boa mà nɛ̀ ɔ̀ yosi mùù sìì dòlà wɛ na. 12 Mɛ́ɓɛ̀ kà Yésùsì jɔ̀abàà à, kà ɓèèɗi à kà ɓwɛ́ nɛ̀ à nɛ̀náǎ: «Yeko tindò mɔ mɛ sɔ́nà!» 13 Kà kùù kɔ̀ ɗɛ́ à tɛ wàà. Wàwàà ki, kà ɗô wàà yòli sìì, kà ɓwɛ́ kúmà Njámbe! 14 Ɓɛmɔ̀ŋgɔ̀, sɛ̀à mɔ́kònjì gála sákwàlà mɔ nyiŋgobàà, pɛ́kà Yésúsí kpàsasa wì à swéé ɔmi Zuifi. Mɔ wɛ kà mɔ́kònjì ɓwɛ́àbàà nɛ̀ wì nɛ̀náǎ: «Bò nɛ̀ jɛ mɔ̀ɔ̀lɔ dokɔ sikinɔ̀ kà wì lɛɛsini nɛ̀ dɛ tó à. Ɛ́nɛ̀ pɛ̀ɛ̀ à saká mùù à ta ŋga ɓɛ̀ swéé nɔ̀ɔ̀ ŋgɔ̀, tàà dû mà à swéé ɔmi mɔ̀ɔ̀!» 15 Ɓɛmɔ̀ŋgɔ̀, Mgbáámɔ́njá búlòbàà nɛ̀ à nɛ̀náǎ: «Ɛ́nɛ̀ ɓò mɔwuo! À swéé ɔmi mɔ̀ɔ̀, ma wì à ta ŋga mɔ̀nɛ̀ buli ma ndayi wàà ŋga tɔ̀ kà ɓamìtólì wàà kà ɛli à nɔ̀sà à li na, bò ma mɛ́ɓɛ̀ɛ̀ nà? 16 Ɓɛ̀ kó kà Sátàni hɛ̀la ɓɛ̀ à jàà pémbè ɓúkɔ nɛ̀ mɔ̀ɔ̀lɔ dokɔ wâta, bò ɓɛ̀à Abalahami, bò ma dòlà wɛ́ è i buli à à hɛ́là à swéé ɔmi mɔ̀ɔ̀ na?» 17 Bulo mɔ Yésùsì basa bò kɛ́ɛ́na wàà yele foyo. Ɓɛmɔ̀ŋgɔ̀, sàpiɗò wì yele mɛ́ŋgàlàbàà mɔ súlòwɛ̀ à wɛ dòlà mɔ nɔ̀ɔ̀ kà boabàà à dɛ wɛ à.
Ɔ̀ weké Nja nɛ̀ Njámbe nɛ̀ gè?
(Mat 13.31-32; Mlk 4.30-32)
18 Yésùsì ɓwɛ́àbàà nɛ̀náǎ: «Siki Nja nɛ̀ Njámbe batini nɛ̀ gè? Mi bò nɛ̀ ɔ̀ wéki à nɛ̀ gè mɔ è? 19 Ɓatini nɛ̀ ma dò tè kà mà wì kùù tokiɗi dò wɛ guni à pimbà wàà kà dò wɛ hɔ̀, kà dɛ mgbâ tè kà nuɛ bɛ́ɛ́ twá yóà à kɔ́ wɛ.»
Sika lévili
(Mat 13.33)
20 Yésùsì jíòbàà ɓwɛ́ nɛ̀náǎ: «Mi bò nɛ̀ ɔ̀ weki siki Nja nɛ̀ Njámbe nɛ̀ ŋgè? 21 Ɓatini nɛ̀ fùù lévìlì, mà ko kúùbàà gbésénè nɛ̀ súlò fùù falini, kà dɛ nɛ̀náǎ njaɓa wɛ yele à mɔɗɛ̀.»
Ô à bò bi nàà Nja nɛ̀ Njámbe ò?
(Mat 7.13-14, 21-23)
22 Yésùsì pela à posi nɛ̀ lé nɛ̀ mbo à wì mɔ gbo nɛ̀ gbo mɔ ɛli nàà Yélúzàlɛ̀mì. 23 Mà wì áánàbàà nɛ̀ à nɛ̀náǎ: «Mgbáámɔ́njá, bò nɛ̀náǎ súlò wì dù kimà pokà wɛ nà?» Yésùsì búlòbàà nɛ̀ yóà nɛ̀náǎ: 24 «Ɛ́nɛ̀ kii jɛ biyo wɛ à ɓɛ̀ nù gàlà kà bò biɔ ɓamakaka à. Pɛ̀kà, mi ɓwɛ́ à ɛ́nɛ̀ nɛ̀náǎ, súlòwɛ̀ bò kii jɛ biyo wɛ lɛɛsini kima na. 25 À ɓɛ̀ siki kà mwâ gàlà bò kuli ŋgɔ̀ mbanda nù gàlà wàà nɛ̀ fogɔla, ɛ́nɛ̀, ɛ́nɛ̀ bò dù nàà dɛ̀, ɛ́nɛ̀ bò kɔni nù gàlà, kà nɛ̀ ɓwɛ́ nɛ̀náǎ: “Mgbáámɔ́njá, gbo gàlà àɔɔ.” Bó bulì nɛ̀ ɛ́nɛ̀ nɛ̀náǎ: “ Ɛ́nɛ̀, mi i má tola mɔ̀nɛ̀ nà!” 26 Kɔ́ɔ́ wɛ, ɛ́nɛ̀ bò buli nɛ̀ à nɛ̀náǎ: “ɔɔ nyɔ́ŋgabàà mɔ, kɔ̀ nɔ kàà mɔɔɔ nɛ̀. Mɛ mboabàà mbwala nàà gbo le nɛ̀ɔɔ.” 27 Bò jii ɓwɛ́ nɛ̀ ɛ́nɛ̀ nɛ̀náǎ: “Mi i mà tola mɔ̀nɛ̀ nà. Ɛ́nɛ̀ gba à ŋgóló mù, ɛ́nɛ̀ yele kà dɛ̀ɛ̀ ɗàà mɔ à!” 28 Ki à kà ɛ́nɛ̀ bò hèè kwà nɛ̀ tààɗa nyii, à ɓɛ̀ siki kà ɛ́nɛ̀ bò jɔ̀ɔ̀ Abalahami, Ìzàkì, Yákɔ̀pi nɛ̀ kulawɛ Njámbe yele nàà Nja nɛ̀ Njámbe, i bò pi ɛ́nɛ̀ nàà dɛ! 29 Yewì bò pɛ̀ɛ̀ nàà tola swéé, nɛ̀ nàà ɛla swéé, nɛ̀ nàà jù li nɛ̀ ɗɔ̀ɔ̀ li kà yóà yele gbesini à mbanji mɛsa nàà siki Nja nɛ̀ Njámbe 30 Mɔ̀ɔ̀wɛ̀, má ɓɛ̀ wì nɔ̀ɔ̀ i bò nàà bàti à bò du ɓò na ɗó, kà súlò yeɓò ɓɛ̀ nà ɗó à ka du ɓò na bàti.»
Sɛ́à Yésùsì boa nyi ŋgo wɛ nɛ̀ Yélúzàlɛ̀mì
(Mat 23.37-39)
31 À ɓɛ̀ sikí ŋgɔ̀, má Fàliziɛŋ tikobàà pɛ̀ɛ̀ à ŋgólo Yésùsì i ɓwɛ́ nɛ̀ à nɛ̀náǎ: «Gba à ɓɛ̀ lé ɓɛ̀ɛ̀, ɛ́lɛ̀ à má kwalá lè, pɛ́kà Hèlódi boa tɔ wɛ è kà gbɛ̀ mɛ.» 32 Yésùsì búlòbàà nɛ̀ yóà nɛ̀náǎ: «Ɛ́nɛ̀ ɛ́lɛ̀ à ɓwɛ́ wɛ à ɓɛ̀ wì ŋgɔ̀ kà dɛ mɔ mɛ ndili á nɛ̀náǎ: Mi bò à héà ɗàà lííndì, nɛ̀ kpàsàsà yɛ ɓò tìndòmɔ̀ mɔ mwɛ̂ nɛ̀ nɛ̀ɛ̀tiɗi, à jàà jɛ́ wààtà mì sɔɔsi tô mù. 33 Ɓɛmɔ̀ŋgɔ̀, mi lɛɛsini nɛ̀ tò ŋgàɗà naŋga nɔ́ mù mwɛ̀ɛ̀, nɛ̀ nɛ̀ɛ̀tiɗi, nɛ̀ mɔkɔ́ɔ̀tiɗi, pɛ́kà lɛɛsini ma nɛ̀náǎ mà kúlàwe Njámbe à fè à má kwalá soko kɔ́ɔ́ ɗò Yélúzàlɛ̀mì na. 34 Ka Yésùsì ɓwɛ́ nɛ̀náǎ: «Yèlùzàlɛ́mì, Yèlùzàlɛ́mì, mɛ ɓɛ̀ posi kà mɛ gbɛ̀ yekulawe Njámbe à, kà ɛ́nɛ̀ dùùɗì kàà nɛ̀ ɗiɓoko gbɛ̀ ɓò ɓɛ̀ kà Njámbe pɛ́sàbàà à ɛ́nɛ̀! Sanɔ wa géà kà mi ɓwɛ́àbàà gbésànà ɛ́nɛ̀ à ŋgólò mù, mɛ́ɓɛ̀ kà nàànjò kwala gbésìnì yebè wàà à ti ɓàà wàà è, ɓɛmɔ̀ŋgɔ̀ ɛ́nɛ̀ gwéà ma nà! 35 Ìì dòlàwɛ̀, ɓɛmɔ̀ kà bò dɛ tɛ́ bò nàà, Njámbe bò pisini ɛ́nɛ̀ nɛ̀ gàlà mɔ̀nɛ̀. Áá mì ɓwɛ́ ɛ́nɛ̀ nɛ̀náǎ: Ɛ́nɛ̀ jɔ̀ɔ̀ kímà mi hi na, hɔ̀ nɛ̀ à ɓɛ̀ swéé ɛ́ kà ɛ́nɛ̀ bò ɓwɛ́ nɛ̀náǎ: “Njámbe à ɗúfi ɓɛ̀ wì pɛ̀ɛ̀nɛ̀ à li Mgbáámɔ́njá!”»