Ɛ́nɛ̀ dɛ́ má mɔ̀wúò na
(Mat 10.26-27)
12
À ɓɛ̀ kinɔ́ siki ŋgɔ̀, súlò wì boabàà gbɛsana wɛ ma mɔ mɛ mili wì. À ɓɛ̀ yoli ŋɛ̀ kà ma ɓa píò boabàà à toka nya yóà à naŋga. Kà Yésùsì kunjìɗì wela mɔ nɛ̀ bò yàmìwè wàà nɛ̀náǎ: «Ɛ́nɛ̀ jɔmɛ nɛ̀ kpasi Fàliziɛŋ kà bò kpasi mɔ́wùò à. 2 Ɓɛ̀ mɔ nɔ yele à wúso à bò gbasiɗi tɛ̀ kà wì jɔ̀ɔ̀ gbeɗɛlɛ, kúlù mɔ yele à wúsò i bò i. 3 pɛ́kà mɔ yele kà ɛ́nɛ̀ welabàà à ɗindindi mɔ, i bò jèè à béà swéé, nɛ̀ ɓɛ̀ mɔ yele kà ɛ́nɛ̀ mimolo à kuli jala à jàà túma kpéà wɛ à i bò he nɛ̀ mbéyà à dɛ̀.»Ɓɛ̀ wì kà wì lɛɛsini nɛ̀ dììsò wɛ̀
(Mat 10.28-31)
4 «Mi ɓwɛ́ à ɛ́nɛ̀, mbayi mù nàà, Ɛ́nɛ̀ yúà ma ɓò ɓɛ̀ɛ̀ i gbɛ mùù, ɓɛmɔ̀ŋgɔ̀ i bò ma nɛ̀ ɔ̀ dɛ́ ma mɔ kɔ́ɔ́wɛ̀ nà. 5 Mi bò mbó ɛ́nɛ̀ ɓɛ̀ wì kà ɛ́nɛ̀ lɛɛsini nɛ̀ jéà nɛ̀ kee à. Ɛ́nɛ̀ yú Njámbe kà bò nɛ̀ɔɔ pi wì à ɓɛ̀ wéé ŋɛ̀ kà soni màà na à kɔ ɗò fio à. I, mi ɓwɛ́ ɛ́nɛ̀ nàà, à à kà ɛ́nɛ̀ lɛ́ɛ̀sìnì nɛ̀ jéà nɛ̀ kee!
6 I lèsi ma kpeka mɔ̀ɔ̀lɔ à falaga weli nàà? Ɗɛ Njámbe eli ma, ma wì à soko yóà na. 7 Njámbe tɔli kàà pɛ múuju mɔ̀nɛ̀ yele. Ɛ́nɛ̀ jéà ma kèè nà. Ɛ́nɛ̀ bò nɛ̀ ŋgó pélè kpéka yele!»
Tɔmàsà Yésùsì nɛ̀ bùùsò à, à lii wì
(Mat 10.32-33; 12.32; 10.19-20)
8
11 «À ɓɛ̀ siki kà i bò kùù ɛ́nɛ̀ ɛ́lɛ̀ nɛ̀ à paɓo à jàà gàlà sakwala mɔ, à lii bò paɓi wɛ nɛ̀ ŋgɔmina, ma wì à jéà ma kè à wéé ɓɛ̀ mɔnɔ kà ɛ́nɛ̀ bò weli mɔ gba wè à nâ, 12 pɛ́kà Gɛ́lɛ́lɛ́ Lííndì bò yamisi ɛ́nɛ̀ à ɓɛ̀ siki ŋgɔ̀ ɓɛ̀ mɔ kà áánì è ɛ́nɛ̀ wélè à.»
Sika mwâ limɔ nɛ̀ tɛ́kà
13 Ma wì à jàà píò ɓwɛ́àbàà nɛ̀ Yésùsì nɛ̀náǎ: «Mbó ɓwala ɓwé à ɓòjamu à kàpɛ à soko mɔ̀ɔ̀ ɓɛ̀ límɔ̀ nɔ̀ɔ̀ kà báfà mɔ̀ɔ̀ pisono à.» 14 Yésùsi búlòbàà nɛ̀ à nɛ̀náǎ: «Mbayi mù, o à ndéà mi mwâ paɓi wè mɔ̀nɛ̀ ò tɛ kùù kàpa limɔ mɔ̀nɛ̀ ò?» 15 Kɔ́ɔ́wɛ̀, kà ɓwɛ́ nɛ̀ yóà nɛ̀náǎ: «Ɛ́nɛ̀ jɔ́mɛ̀ kàà nɛ̀ ɗikayi limɔ, pɛ́kà limɔ wì màà dɛ kpasi wàà na, ŋga tɔ kà è à dù nɛ̀ limɔ súlòwɛ̀.»
16 Kà Yésùsì jìì pi ɓɛ̀ sika à yóà nɛ̀náǎ: «Ma mwâ limɔ boabàà nɛ̀ mbúnù wàà kà té téà pɔkɔ nɛ̀ à súlo wɛ̀. 17 Ɓɛ̀ wì ŋgɔ̀, pɛ́àbàà kà tagili à jàà sɛ́à wàà kà áánì nɛ̀náǎ: “Mi bò dɛ mɛ́gè è? Mi bò ma nɛ̀ soko kè bò ɓanìnì ɓɛ̀ nyɔ nɔ hɔ̀ na.” 18 Kà gba ɓwɛ́ nɛ̀náǎ: “Mi bò dɛ mɛ́ɓɛ̀ɛ̀, mi bò yakiɗi ŋgɔ́ɔ́ mù ke jìì bɛ̀ Mgbààwɛ̀, kɛ gbesini nyɔ mù nɛ̀ limɔ mù yele à jàà wɛ. 19 Kɔɔ wɛ, kà mi ɓwɛ́ à jàà sɛ́à mù nɛ̀náǎ: Mɛ héà ɓɛ̀ nɛ̀ limɔ súlòwɛ̀ mɔ súlò pémbe; Ɔɔmɛ, nyɔmɔ, nɔ̀ɔ̀ mɔ, kà mɛ mɛgili gbaasi mɛ.” 20 Ɓe mɔ ŋgɔ̀, kà Njámbe ɓwɛ́ nɛ̀ à ɛ̀náǎ: “Tɛka wì! Ɓɛ̀ kiitu ŋɛ̀ kpasi mɛ bò sɔni. Ɓɛmɔ̀ŋgɔ̀, ɓɛ̀ mɔ nɔ kà mɛ gbesana bò kɔli nɛ̀ o i o?”» 21 Kà Yésùsì jìì ɓwɛ́ à wì nɛ̀náǎ: «Mɛ́ɓɛ̀ kà hɔ̀ nàà ɓɛ̀ wì kà gbesini limɔ à túu vaa, ɓɛmɔ̀ŋgɔ̀, bò ma nɛ̀ ma limɔ à sɔ̀ɔ̀ti Njámbe na.»
Píò tɛ̀ nɛ̀ Njámbe
(Mat 6.25-34)
22 Ki, kà Yésùsì ɓwɛ́ nɛ̀ ɓò yàmìwè wàà nɛ̀náǎ: «Mɔ̀ɔ̀wɛ̀ kɛ ɓwɛ́ nɛ̀ ɛ́nɛ̀ nɛ̀náǎ: Ɛ́nɛ̀ dù à ma nɛ̀ sɛ́à nɛ̀ ko à wè nyɔ kà ɛ́nɛ̀ gwé mɔ kpasi nɛ̀ nà, ŋga tɔ̀ kà ɓɛ̀ mɔkanda kà ɛ́nɛ̀ bò nɛ̀ gweà wɛ mɔ mùù mɔ nɛ̀ na. 23 Pɛ́kà kpasi bò Mgbààwɛ̀ pélè nyɔ, kà mùù du Mgbààwɛ̀ pélè mɔkanda. 24 Ɛ́nɛ̀ ɓa jɔ̀ɔ̀ nùwɛ: Yóà gúni ma mɔ na, yóà gbasi ma kà dò nyɔ na, yóà bò ma nɛ̀ soko ɓanìnì nyɔ na, yóà bò ma kàa nɛ̀ góó na, ɓɛmɔ̀ŋgɔ̀, Njámbe boa dala yóà! Ɛ́nɛ̀ bò ma Mgbààwɛ̀ súlòwɛ̀ pélè núwɛ̀ na. 25 «Óà sókò mɔ̀nɛ̀ à wé féà kò mùù wàà bò nɛ̀ ɔ̀ jìì bɔ̀ɔ̀sɛ̀ ma bé jɛ à kpasi wàà òò? 26 À boa è ɛ́nɛ̀ bò ma nɛ̀ɔɔ dɛ ma mɔ à ɓɛ̀ mɔ kà bò ɗàà tokiɗi à na, géà kà sɛ́à mɔ̀nɛ̀ jùù nɛ̀ à kwele wɛ è? 27 Ɛ́nɛ̀ sebɛ̀ biyo mɛ́ɓɛ̀ kà ndandamboɗi fúnjì à: Yóà dɛ ma tó na, yóà tô ma kà mɔkanda na. Ɓɛmɔ̀ŋgɔ̀, mi ɓwɛ́ ɛ́nɛ̀ nɛ̀náǎ, ŋga tɔ kà è ɓɛ̀ mɔ́kònjì Salomɔ, nɛ̀ limɔ wàà yele, boa ma nɛ̀ dòlà mɔkanda pélè ma ta ŋga fúnjò ndandamboɗi ŋɛ̀ ŋgɔ̀ na. 28 Mɔ̀ɔ̀wɛ̀, Njámbe yoosi ndúbe kà bò à pimba mɔkanda mwɛ̀ɛ̀, mɔ dɛ nɛ̀ è nɛ̀tiɗi i ɗɛ̀ŋgɛ́ɗɛ̀ yóà pia wéé, mɛ géà kà dɛ kima nɛ̀ ɛ́nɛ̀ na è? Éé, ɛ́nɛ̀ kà bò nɛ̀ tokiɗi ɓukolo mɔ è! 29 Ɛ́nɛ̀ haɓɛɗɛ ma mùù mɔ̀nɛ̀ súlòwɛ̀ à kiyo mɔ nyɔŋga nɛ̀ mɔ nɔa na. 30 Yeɓɛ̀ wì nɔ i ima Njámbe à ɓɛ̀ ŋgɔ́ɔ́ mbúnù nà, yóà kii ɓɛ̀ mɔ̀nɔ ŋgɔ̀ yele taa giyó. Ɓɛ̀ mɛ ŋgɔ̀, ɛ́nɛ̀, ɛ́nɛ̀ bò nɛ̀ Ɗibafa kà i gwéà mɔ mɔ̀nɛ̀ à. 31 Ɛ́nɛ̀ ɓa súú à kiyo siki lé nɛ̀ Njámbe nɛ̀ bati, kɔɔ wè, Njámbe bò hà ɛ́nɛ̀ kwéle wɛ.»
Ye límɔ̀ nàà lìì ŋgɔ̀
(Mat 6.19-21)
32 «Ɛ́nɛ̀ dú ma nɛ̀ kee na, ɛ́nɛ̀ tokiɗi dùù ɓwuya. Pɛ́kà Bafa mɔ̀nɛ̀ jɔ́à nɛ̀náǎ bò dòlà wɛ à hà ɛ́nɛ̀ Nja wàà. 33 Ɛ́nɛ̀ lɛsɛ dɛmɔ mɔnɔ, kà ɛ́nɛ̀ kùù pátà wɛ hà bò sá. Ɛ́nɛ̀ du nɛ̀ ɓɛ̀ ŋguta kà ɗàà kima nàà, ɛ́nɛ̀ kpéséné limɔ mɔ̀nɛ̀ nàà li ŋgɔ̀, à ɓɛ̀ soko kà yɔ̂ kima na: Ye bò jù bò ma nɛ̀ ɔ̀ hɔ́ hɔ̀ nà, sɛ́ɗɛɗɛ ɗasi kima kàà na. 34 Pɛ́kà ɓɛ̀ soko kà limɔ mɔ mɛ bò hɔ̀ sɛ́à mɔ̀nɛ̀ bò nɛ̀ ki.»
Ye mwâ dɛ tó à nya njɛ
35 «Ɛ́nɛ̀ dunu nɛ̀ mɔkanda tô, nɛ̀ mùnda mɔ̀nɛ̀ dúo wɛ. 36 Ɛ́nɛ̀ dúú mɛ ɓe wì nɔ̀ɔ̀ à kɛ̀ɛ̀ mɔ́kònjì gàlà yóà mɔ mgbo nùù gàlà à à, à siki ɓɛ̀ kà bò kɔni à jiso wàà nàà yɔwa gáá. 37 Mɛŋgala mɔ súlòwɛ̀ nɛ̀ bò dè tô kà mɔ́kònjì yóà bò pɛ̀ɛ̀ kpà yóà tɔtɔ à! À tɛ̀kìlímɔ̀ mi ɓwɛ́ ɛ́nɛ̀ nɛ̀náǎ, bò yólì mɔkanda tô wàà, kà hà yóà soko à misa, kà kàpi nyɔ à yóà. 38 À jìso à wésɛ jɛ̀, ŋga tò kà à kɔɔ wesɛ jɛ̀, kà kpà yóà tɔtɔ, mɛŋgalamɔ súló wɛ nɛ̀ yóà.»
39 « Ɛ́nɛ̀ jéé dòlà wɛ nɛ̀náǎ: À mɔ́kònjì gàlà i ŋgó ɓɛ̀ siki kà mwâ jù bò pɛ̀ɛ̀ à, tɔmisi kima na à bi à jàà gàlà wàà na. 40 Ɛ́nɛ̀ kàà, ɛ́nɛ̀ bɔgnɛ̀ yoli mɔ̀nɛ̀, pɛ́kà ɓɛ̀ siki kà ɛ́nɛ̀ bò ma nɛ̀ tagala wɛ nàà, à kà Bé wì bò pɛ̀ɛ̀.»
Dòlà mwâ dɛ tò yɔ́ɔ̀ dàà mwâ dɛ tò
(Mat 24.45-51)
41 Piɛli áánàbàà nɛ̀ Yésùsì nɛ̀náǎ: «Mgbáámɔnjà, me ɓwɛ́ ɓɛ̀ sika ŋgɔ̀ nɛ̀ɔɔ nɛ̀ wì yele?» 42 Mgbáámɔ́njá buloa nɛ̀ à nɛ̀náǎ: «O à bò dòlà mwâ ɓanìnì limɔ sìì nɛ̀ jɔɔma? Bò wáɓɛ̀ɛ̀ kà mɔ́kònjì ɗɛ́à à galá mɔ sɛɓí nya wàà nɛ̀ kàpa nyɔ à tɛ́tɛ̀ siki. 43 Mɛŋgala mɔ súlòwɛ̀ nɛ̀ ɓɛ̀ mwâ dɛ tô ŋɛ̀ kà mɔ́kònjì wàà bò kpà à, à njiso wàà à dɛ tô mɛ ɓɛ̀à. 44 Tɛ́kìlìmɔ̀, mi ɓwɛ́ ɛ́nɛ̀ nɛ̀náǎ: Mɔ́kònjì wàà bò hà à limɔ gàlà wàà yele kà sɛ́ɓè. 45 Ɓe mɔ ŋgɔ̀, à ɓɛ̀ mwâ dɛ tô ŋgɔ̀ ɓwɛ́à à jàà sɛ́à nɛ̀náǎ: “Mɔ́kònjì gàlà mɔ̀ɔ̀ boa kàla wɛ tàà pɛ̀ɛ̀ ma!” Kà kpà kujiɗi mélè nya wàà ko nɛ̀ wɛ. Kà nyɔ̀ mɔ, kà nɔ dɔ̀ɔ̀, kà dɔ̀ɔ̀ ba à. 46 Ɓɛmɔ̀ŋgɔ̀, mɔ́kònjì ɓɛ̀ mwâ dɛ tô ŋɛ̀ ŋgɔ̀ bòɔɔ à ɓɛ̀ swéé kà mwâ dɛ tô tagili à ma bò pɛ̀ɛ̀ hɔ̀ nà, à ma siki kà i kima na. Bò he ɓɛ̀ mwâ dɛ tô ŋɛ̀ ŋgɔ̀ kà ɓa dɛ nɛ̀ à ɓɛ̀ mɔ kà wì dɛ nɛ̀ ɗàà wì à. 47 Ɓɛ̀ mwâ dɛ tô ŋɛ̀ ŋgɔ̀, kà i ɓɛ̀ mɔ kà mɔ́kònjì wàà gwéà. Ɓɛmɔ̀ŋgɔ̀, tàà ɓɔŋi ma ma mɔ, dɛ ma kà ɓɛ̀ mɔ kà mɔ́kònjì wàà gwéà na, i bò mɛ́lì à súlòwɛ̀. 48 Ɗɛ̀ à wáɓɛ̀ɛ̀ kà ima gwéà mɔ mɔ́kònjì wa na kà dɛmɔ ɗàà wɛ, i bò meli à tokiɗi. À wì hà wì mɔ súlòwɛ̀, i bò áánì kà nɛ̀ à súlòwɛ̀. À wì ɗéà mɔ súlòwɛ̀ nɛ̀ mɛ, i bò áánì kà nɛ̀ mɛ súlòwɛ̀.
Yésùsì pɛ̀ɛ̀ ma ɓósà wì tena tɛ na
(Mat 10.34-36)
49 Mi pɛ̀ɛ̀ à ɓósà wè à ŋgɔ́ɔ́ mbúnù, mɔ̀ɔ̀wɛ̀, mi bò à gwéà wɛ súlo wɛ è ɓɛ̀ wè ŋɛ̀ ŋgɔ̀ à du tɛ i! 50 Bò nɛ̀ ma kúlù ɗuɓo kà áánì è mi ɗuɓi, mi boa gwéà wɛ súlòwɛ̀ nɛ̀náǎ, ɓɛmɔ̀ŋgɔ̀ à dɛ́ tɛ̀. 51 Ɛ́nɛ̀ ta ŋgɛlɛ ma è mi pèè à ɗɛ́à téna tè à ŋgɔ̀ mbúnù na. Mi ɓwɛ́ à ɛ́nɛ̀ nɛ̀náǎ, mi pɛ́à nɛ̀ ketina. 52 Kunjìɗì mwɛ̂, à wì mɔ́ɔ́lɔ̀boa du ŋgɔnu à jàà kinɔ gàlà, yóà jéni kima na. Wɛ́ɛ́li bò sogini nɛ̀ waata kà waata sogini nɛ̀ wɛ́ɛ́li. 53 Ɗibafa jééni kima yɔ́ɔ̀ bè nà, bè jééni kima nɛ̀ ɗibafa nà, ɗinana jééni kima nɛ̀ bé wàà mɔ bembeko à na, bembeko jééni kima nɛ̀ nana wàà na. Ɗikoò jéénì kima nɛ̀ be ɗikoò na, bé ɗikoò jééni kima nɛ̀ ɗikoò na.»
Ɛ́nɛ̀ i diákàsà ɓɛ̀ mɔ à péla wɛ mwɛ̂ à
(Mat 16.2-3)
54 Yésùsì jiobàà ɓwɛ́ à sapiɗo wì nɛ̀náǎ: «À ɛ́nɛ̀ jɔ̀ɔ̀ tútúkà à kulo ŋgɔ̀ nàà ɛ́là swée, kà ɛ́nɛ̀ ɓwɛ́ wàwàà ki nɛ̀náǎ: “Kolo bò pɛnɛ à ɓwala wɛ.” Kà dɛ kà tɛ mɛ́ɓɛ̀ɛ̀. 55 À pɛ̀pɛ̀ hufo tɛ tólɛ́ nàà ɗɔ̀ɔ̀ li, kà ɛ́nɛ̀ ɓwɛ́ nɛ̀náǎ: “Gbegamɔ bò dɛ tɛ he gɔ”, kà dɛ tɛ mɛ́ɓɛ̀ɛ̀. 56 Ɓò mɔwuo! Ɛ́nɛ̀ i diákàsà yoli ɓɛ̀ mɔ nɔ̀ɔ̀ kà dɛ tɛ à ŋgɔ́ɔ́ mbúnù nɛ̀ na li ŋgɔ̀ à! À ŋgɔ̀ ɓɛ̀ mɔnɔ à dɛ tɛ mwɛ̂ à, ɛ́nɛ̀ i ma diákàsà wɛ na.»
Kíí jɛ ɓɔ́ɔ́nya soko ɛ́nɛ̀ mwâ kɛ́ɛ́ mɛ
(Mat 5.25-26)
57 «Gè à dɛ̀ɛ̀ kàà è ɛ́nɛ̀ ima kɛtana soko ɓɛ̀ mɔ̀ɔ̀ sìì ɛ́nɛ̀ mwâ tɛ̀ na è? 58 À ɛ́nɛ̀ boa ɛla wè à sɔya wɛ̀ ɛna mwâ kɛ́nà mɛ ɓa kii jɛ ɓɔɔnya wɛ ɛ́nɛ̀ à, à gbo. We kà kùù mɛ ɛ́lɛ̀ nɛ̀ à li mwâ paɓi wè. Kà mwâ paɓi wɛ kùù mɛ tɛ hà sɔɗya kà sɔɗya kùù mɛ ɗɛ à mɔnyɔlɛ. 59 Mi ɓwɛ́ mɛ sikinɔ nɛ̀náǎ, me bò mà nɛ̀ɔɔ túɓi nɛ̀ ki tâ dúma nàà mɛ kpéà dolosi pátà wàà yele na.»