Yésùsi ɛ̀sà yami wɛ ɓúkɔ nɛ̀ wɛ́ɛ́lì à tô
(Mat 10.5-15; Mlk 6.7-13)
9
Yésùsì gbèsanabàà ɓò yàmìwè wàà ɓúkɔ nɛ̀ wɛ́ɛ́lì kà hà yóà ɔ̀ yele, kima yóà bò he ɗàà lííndì nɛ̀ kpásàsà yekúlù bò tíndòmɔ̀ yele. 2 Kɔ́ɔ́ wɛ́, kà ɛsi yóà à ɓwɛ́ dòlà mɔtómɔ̀ nja nɛ̀ Njámbe, nɛ̀ kpasása ɓò tindò mɔ. 3 Kà ɓwɛ́ nɛ̀ yóà nɛ̀náǎ: «Ɛ́nɛ̀ kùù à má mà mɔ mɔ lɛ́ gbò nà: Tàà humbé, tàà ɓàkuté, tàà mapa táá pátà, ɛ́nɛ̀ du à má kàà nɛ̀ ma mɔkanda mɔ lufonɔ na. 4 Ɓɛ̀ gàlá i bò ba gɛ́nɛ̀ mɔ̀nɛ̀ hɔ̀ dòlà wɛ, ɛ́nɛ̀ dunu ki hɔ̀ nɛ̀ à ɓɛ̀ swéé kà ɛ́nɛ̀ ɓò jiisi nɛ̀. 5 À i binɔ ba gɛ́nɛ̀ mɔ̀nɛ̀ à ma soko ɛ́nɛ̀ gba à ɓɛ̀ posi ŋgɔ̀ kà ɛ́nɛ̀ togbisi mbúnù na ŋga: Mɔ̀ɔ̀wɛ̀ bò du nɛ̀ yóà mɛ ndemi jɔmasa yóà.» 6 Ye yami wɛ Yésùsì ɛ́làbàà, kà yóà peli à fii le yele, nɛ̀ ɓwɛ́ Dòlà Mɔtómò nɛ̀ kpàsàsà ɓò tindò mɔ.Sɛ̀a Hèlodi bò nɛ̀ ko à wê Yésùsi
(Mat 14.13-21; Mlk 6.30-44; Zaŋ 6.1-14)
7 Elódi Mgbàà mɔ́kònjì boabàà jéà ɓɛmɔ̀ à pɛla wɛ. Kà mɔ̀ɔ̀wɛ̀ njɛmi táŋgàlá mɔ̂ wàà. Pɛ́kà má wì ɓwɛ́àbàà nɛ̀náǎ: «Zaŋ mwâ ɗuɓi wì à tuni à hándà.» 8 Yemà wì ɓwɛ́àbàà kà nɛ̀náǎ: «Eli à tuɓi, kà ma wì ɓwɛ́ ma kúlàwɛ̀ Njámbe ɓò kà bò à bati à túɓi à hánda.» 9 Hèlódi ɓwɛ́ nɛ̀náǎ: «Zaŋ mi ɗɛŋgaɗabàà ju wàà, ŋgè wì hî á kɛ̀ boa jió wɛ jéé ɓɛ̀ yɛlɛ́ nɛ̀ lii wàà ɓɛ̀ɛ̀ è.» Mɔ̀ɔ̀wɛ̀ dɛ́abàà è à kii jɛ jɔ̂ Yésùsì.
Yésùsì dálà yewé mili mɔ̀ɔ̀lɔ̀
(Mat 14.13-21; Mlk 6.30-44; Zaŋ 6.1-14)
10 À jiso yóà, kà ɓò ɓwɛ́ Mɔtómò wàà ɓwɛ́ yɛlɛ ɓɛ̀ mɔ kà yóà dɛ́a yele à Yésùsì. Yésùsì kùobàà yóà gbà nɛ̀ à piò kà ɛli nɛ̀ yóà à ŋgólo má posi i ɓééɗì è Bɛ̀tesayidà. 11 Mɔ̀ɔ̀wɛ̀, wì jéàbàà, kà yóà nɛ̀ni à. Kà Yésùsi ba ŋgɛ́nɛ yóà dòlà wɛ. Kà ɓwɛ́ dòlà Mɔtómò Njà nɛ̀ Njámbe, nɛ̀ kpàsàsà ɓò ɓɛ̀ɛ̀ i boabàà nɛ̀ gwɛ́à wɛ̀. 12 Mɛ́ɓɛ̀ kà gɔnámbóó hɔ̀abàà ɓò ɓwɛ́ Mɔtómò ɓúkɔ nɛ̀ wɛ́ɛ́lì tikobàà ɛ́lɛ̀ à ŋgólo Yésùsì, i ɓwɛ́ nɛ̀ à nɛ̀náǎ: «Jisisi wì ɛ́sɛ̀, nàà mgbâ lè, nɛ̀ sɛká lè kimà yóà bò kpà soko lànu nɛ̀ mɔ nyɔ̀ŋgà. Pɛ́kà wì du má nù à ɓɛ̀ sokó nà.» 13 ̍Yésùsì búlòbàà nɛ̀ yóà nɛ̀náǎ: «Ɛ́nɛ̀ mwâ tɛ̀, ɛ́nɛ̀ hà yóà mɔ nyɔ̀ ŋga!» Kà yóà búlì nɛ̀náǎ: «Ɔɔ̀ bò kɛ nɛ̀ toka mápá mɔ̀ɔ̀lɔ, tɛkúú kɔ́yɔ̀ wɛ̂li. Mɛ bò nɛ̀ ɔ̀ gwè nɛ̀ nɛ̀náǎ, ɔ̀ ɛ́lɛ̀ à mbɔ́ɔ́ nyɔmɔ dáli ɓɛ̀ wì nɔ̀ɔ̀ yele?» 14 Kpà hi nɛ̀náǎ bóbàà ki mɛ mili wì mɔ̂lɔ. Yésùsì ɓwɛ́àbàà nɛ̀ ɓò yàmìwè wàà nɛ̀náǎ: «Ɛ́nɛ̀ dúúsi yóà nù, kinɔ́ sàpiɗò sikinɔ́ à dú nɛ̀ màkó wì mɔ̂lɔ.» 15 Yeɓò yàmìwè wàà diisobàà wè nù wàà, kà yóà dùùsi yè wì nù. 16 Yésùsì kùobàà ɓɛ̀ mápá mɔ̀ɔ̀lɔ nɛ̀ ɓɛ̀ kɔ́yɔ̀ nɔ̀ɔ̀ wɛ́ɛ́lì à. Ɓoɗabàà lii nâ ŋgɔ̀ kà hà Njámbe i ŋgɔ́ɔ́ à wê ɓɛ̀ nyɔ̀ ŋɛ̀ ŋgɔ̀. Kɔ́ɔ́ wɛ́, kà gbiiɗi kà kùù hà ɓò yàmìwè wàà, kà ɓwɛ́ nɛ̀ yóà è i kàpɛ́ hà yé wì. 17 Wì yele nyɔ́ŋgabàà mɔ kà jà doni. Kà yóà gbesini ŋgúndu wɛ dóósɛ̀ mbɛ́kà ɓùkɔ nɛ̀ wɛ́ɛ́lì.
Piɛli tɔ́ è Yésùsì bò ɓɛ̀ wì kà Njámbe pɛsa
(Mat 16.13-19; Mlk 8.27-29)
18 Mà swéé sikinɔ̀ Yésùsì bóbàà à sakwála mɔ à ma sókò, yɔ̂ ɓò yàmi wè wàà. Áánàbàà nɛ̀ yóà nɛ̀náǎ: «Yewì taŋgili è ò à mi ò?» 19 Yóà búlòbàà nɛ̀ à nɛ̀náǎ: «Yemà wì ɓwɛ́ nɛ̀náǎ, mɛ bò Zaŋ mwâ ɗuɓi wì, kà má wì taŋgili nɛ̀náǎ, Èli á mɛ, má wì jii kâ taŋɛ́lɛ̀ mɛ bò má mwâ toŋgiɗi Mgbàà wè Njámbe kà gbàbàà à hándà.» 20 Yésùsì áánàbàà nɛ̀ ɓò yàmi wè wàà nɛ̀náǎ: «Nàà ɛ́nɛ̀, ɛ́nɛ̀ taŋgili bɔ nɛ̀ è, ò à mi ò?» Piɛli, búlòbàà nɛ̀náǎ: «Mɛ bò ɓɛ̀ wì kà Njámbe taɗa.»
Bàti Yésùsì à ɓwɛ́ wɛ́ è bò fé kà tuni
(Mat 16.20-28; Mlk 8.30–9.1)
21 Yésùsì hàbàà yóà lembà mboŋa nɛ̀náǎ, i ɓwɛ́ má wè wɛ à má wì nà. 22 Kà Yésùsì jii ɓwɛ́ kɔ́ɔ́wɛ̀ nɛ̀náǎ: «Lɛɛsini nɛ̀náǎ, Be wì à jɔ̀ɔ̀ haɓaɗa súlòwɛ̀, mgbààŋga wì, mɔ́kònjì ɓò gbɛ ɓùyà Njámbe ɓò mbò mbwala mboŋa Njámbe yóà bò kiɓisi dɔ nɛ̀ à. I bò gbɛ̀ à, à jɛ́ wààtà kà tuni à hánda.» 23 Kɔ́ɔ́ wɛ́, kà ɓwɛ́ nɛ̀ wì yele nɛ̀náǎ: «Ɓɛ̀ wì kà gwee nɛ̀nà mi à. À fé à má ko múu wàà nà, à ɓúú pèlàŋgànà té wàà, swéé yele nɛ̀nɛ̀ nɛ̀ mi. 24 Tɛ́kìlìmɔ̀, ɓɛ̀ wì kà bò gwéé kpasasa mùù wàà, bò fè, ɓɛmɔ̀ŋgɔ̀, ɓɛ̀ wì kà bò gbɛ́si mùù wàà à wê mù á bò ba kpasi. 25 À wì há mɛ ɓɛ̀ limɔ́ nɔ mbúnù à yele, mɛ dù ta kpasisi ma mùù mɛ, mɛ ɗààsi kpasi mɛ, ɓɛmɔ̀ŋgɔ̀ bò gbaaɗi mɛ à ŋgé mɔ è? 26 Á wì jéà fóyò nɛ̀ mi, kà jéé kâ fòyò nɛ̀ gbààwe mùù, mi Bè wì, mi bò jéé kà fóyó nɛ̀ à, à ɓɛ̀ siki kà mi bò pɛ̀ɛ̀ nɛ̀ kumá mù à. Bò pɛ̀ɛ̀ kà nɛ̀ kumá Bafa mù gbesénè nɛ̀ mɔ gɛlɛ̀lɛ̀ Iŋgèlesì. 27 Mi ɓwɛ́ ɛ́nɛ̀, bò tɛ̀kili mɔ, má ɓɛ̀ wì nɔ̀ɔ̀ kɛ̀ fe ki mà tàà jɔ̀ɔ̀ ma Njámbe à soko mɔ́kònjì wâ nà.»
Kumá Yésùsì gbàsaɗa tɛ̀ nàà ŋgɔ́ɔ́ ŋgaɗi
(Mat 17.1-8; Mlk 9.2-8)
28 Bóbàà mɛ ŋga sikinɔ kɔ́ɔ́ ɓɛ̀ wèli mɔ ŋgɔ̀, kà Yésùsì kùù Piɛli nɛ̀ Zaŋ tɛkúú Zaki, kà yɔ̂ yóà da mɔ nàà ŋgɔ́ɔ́ ŋgàɗi à wàà sàkwàlà mɔ. 29 À ɓɛ̀ siki kà boabàà à sákwàla mɔ, kà sɔ̀ɔ̀ti wàà kiɓisi tɛ̀, kà mɔ́kanda wàà fɛ́ pùù kà du ŋgɛ ŋgɛ́ ŋgɛ̀. 30 Tàà kálì má, kà wì wɛ́ɛ́lì hɔ̀, Mɔ̀ísì yɔ́ɔ̀ ɓɛ̀ kulawe Njámbe Eli bàà è, kà yɔ̀ɔ Yésùsì ɓwɛ́ yɛ́lɛ̀. 31 Yóà gbasiɗibàà mùù à jàà kumá Njámbe. Yóà welibàà nɛ̀ Yésùsì wè fio wàà kà bò dɛ tɛ́ nàà Yélúzàlɛ̀mì à. 32 Piɛli yɔ̂ ɓójà ɓɛ̀ wɛ́ɛ́lì lila pélè sòkò. Kɔ́ɔ́ wɛ́, i tuni à lila. Kà i jɔ̀ɔ̀ gɛlɛ̀lɛ̀ mɔ kumá Yésùsì nɛ̀ wì wɛ́ɛ́lì yoli à ŋgólò wàà. 33 À ɓɛ̀ siki kà ɓɛ̀ wì nɔ̀ɔ̀ ŋgɔ̀ wɛ́ɛ́lì gbábàà à ŋgólo Yésùsi à, kà Piɛli ɓwɛ́ nɛ̀ à nɛ̀náǎ: «Mbò mbwala, bò dòlà wɛ́ è ɔ̀ dú kɛ̀, ɔ̀ bɛ́ɛ́ saɓa wâta: Sikinɔ́ bò bɔ́ mɛ, sikinɔ́ mɔ Mɔ̀ísì, mà sikinɔ́ hì mɔ ɓɛ̀ kulawe Njámbe è Elì à.» I à mà ɓɛ̀ mɔ kà boa welá wɛ́ nà. 34 Mɛ́ɓɛ̀ kà boabàà welá mɔ, kà tutuká hɔ̀, kà guɓiɗi yóà yele, mɛ tigiyo. Kéé bàbàà yami wɛ Yésùsì à ɓɛ̀ siki kà yóà jɔabàà tutuká à gùɓoɗo yóà. 35 Mà gɛ tólabàà à jàà tutuká nɛ̀náǎ: «Wáɓɛ̀ɛ̀ bò Bè mù, wà ɓɛ̀ɛ̀ mi táɗà à. Ɛ́nɛ̀ jéé à!» 36 Kɔ́ɔ́ ɓɛ̀ gɛbàà wela mɔ, i lufi jɔ̀ɔ̀ Yésùsì sisi wàà. Kà ɓò yàmìwè wàà ga bɛ, yóà nɛ̀ɛ̀ɗí á mà yɛ́lɛ ɓɛ̀ mɔ kà yóà jɔ̀a à wì à ɓɛ̀ siki ŋgɔ̀ nà.
Yésùsì boa kpasásà má bé nɛ̀ ɗàà lííndì
(Mat 17.14-18; Mlk 9.14-27)
37 À máɓá mɔ̀sayi, kà yóà jili ŋgáɗi. Súlò yè wì pɛ́àbàà à kpatána wɛ nɛ̀ Yésùsì. 38 À ɓɛ̀ píò ŋgɔ̀, mà wì mɛ́abàà nù nɛ̀náǎ: «Mbò mbwala mi mbɔ́mbala mɛ kiɓisi lii, seɓé bè mù, pɛ́kà kiká bè mù á ɛ̀ɛ̀! 39 Ma ɗàà lííndì boa tɛ́ wàà, kà ɓi à ɓi, táá kàli ma, kà dɛ́ è à mɛ́ɛ́ nù, Kà tomgbisi á lèmba wɛ, kà pusíɗi pɛ̀ɛ̀ gbà wɛ̀ à nù wàà. Kà dɛ á ɗàà wɛ̀, gba kâ à tɛ́ wàà nɛ̀ ɗitàti. 40 Mi mbɔ́mbala ɓò yami wɛ mɛ nɛ̀náǎ i hé ɓɛ̀ dàà lííndì ŋgɔ̀. Ɓɛmɔ̀ŋgɔ̀, yóà lɛ̀ mà wè wɛ̀ nà.» 41 Yésùsì mɛ̀abàà nù kà ɓwɛ́ nɛ̀náǎ: «Óó, ɛ́nɛ̀ ɗàà wì, tâ ɓùkòlò mɔ, siki wáge à kà ɔ̂ nɛ̀ lɛɛsini nɛ̀ dùŋgò nù è? Mi lɛɛsini nɛ̀ ìmòsò ɛ́nɛ̀ siki wágè? Kúú be mɛ, pɛ̀ɛ̀ nɛ̀!» 42 Mɛ́ɓɛ̀ kà bé boabàà à ti kó wè pɛ̀ɛ̀ à ŋgólo Yésùsì á, kà ɗàà lííndì duuɗi á, à mbúnù, kà tomgbisi á lèmbà wɛ. Ɓɛmɔ̀ŋgɔ̀ Yésùsì kpɛ̀ŋgabàà nɛ̀ ɗàà lííndì, kà gba à tɛ bé, kà kpasi. Yésùsì jisosobàà à hà báfà wàà. 43 Kà mɔ̀ɔ wɛ ɗe wì yele yòò, pɛ́kà yóà jɔ̀à Mgbàà ɔ̀ Njámbe.
Yésùsì boa jió wɛ ɓwɛ́ è bò fè
(Mat 17.22-23; Mlk 9.30-32)
Mɛ́ɓɛ̀ kà wì yele boabàà à kàma ɓɛ̀ mɔ kà Yésùsì boabàà à dɛ́ wɛ yele à, ɓwɛ́àbàà nɛ̀ ɓò yàmìwè wàà nɛ̀náǎ: 44 «Ɛ́nɛ̀ jèè kà nɛ̀ ɓanìnì dòlà ɓemɔ̀ ke bò ɓwɛ́ à ɛ́nɛ̀. Bè wì bò du gbɛ́sà wɛ à ti kɔ̀ yé wì.» 45 Mɔ̀ɔ wɛ, ɓò yàmìwè wàà jéà mà ɗyààkàsa ɓɛ̀ gbààwé ŋɛ̀ ŋgɔ̀ na, ɗyààkàsà wɛ boa nɛ̀ yóà wúsòwɛ̀. Wè yóà bò kâ tɛ̀ i. Kéé bǎ yóà nɛ̀ áánì ɗyààkàsà ɓɛ̀ gbààwé ŋɛ̀ ŋgɔ̀ nɛ̀ Yésùsì.
Ò à bò mgbâ wɛ pɛlɛ́ nya wàà ò?
(Mat 18.1-5; Mlk 9.33-37)
46 Yeɓò yàmìwè Yésùsì boabàà à dáánà nù à sokó yóà, mɔ î ɓɛ̀ wì kà bò mgbâ wɛ̀ pélè nya wàà. 47 Yésùsì iŋgobàà tàŋgàlà mɔ̂ yóà. Kà kùù bé yóósè à ŋgólo wàà. 48 Kà ɓwɛ́ nɛ̀ yóà nɛ̀náǎ: «Ɓɛ̀ wì kà bò bà gɛ́nɛ̀ ɓɛ̀ bé nɛ̀ ɗikayi à wê lii mù á, mi mwâ tɛ à kà bà gɛ́nɛ̀ wɛ. Ɓɛ̀ wì kà bà gɛ́nɛ̀ mù á, ba gɛ́nɛ̀ wáɓɛ̀ɛ̀ kà pɛ̀sabàà mì à. Tɛ́kilì mɔ, wà ɓɛ̀ɛ̀ kà bò bé à taŋgà mɔ̀nɛ̀, wáɓɛ̀ á bò mgbâ wɛ.»
Wáɓɛ̀ɛ̀ kà bò má mwâ kɛ́ɛ́nà mɔ̀nɛ̀ à nà bò bɔ́nɛ̀
(Mlk 9.38-40)
49 Kɔ́ɔ́ ɓɛ̀ wèli mɔ ŋgɔ̀, Zaŋ ɓwɛ́àbàà nɛ̀ Yésùsì nɛ̀náǎ: «Mbó mbwala,ɔɔ jɔ̀ɔ̀ má wì à héà ɗàà lííndì nɛ̀ ɔ̀ lii mɛ nɛ̀ kɛ̀. Ɓɛmɔ̀ŋgɔ̀,ɔɔ gwéà hɔ̀ kpéɗàɗà à, pɛ́kà bò má à ta ŋga mɔ̀ɔ̀ nà.» 50 Yésùsì bùloá nɛ̀ à nɛ̀náǎ: «Ɛ́nɛ̀ kpɛɗéɗè mà à na, tɛ̀kìlímɔ̀, ɓɛ̀ wì kà bò mà mwâ kɛ́ɛ́nà mɔ̀nɛ̀ à nà, bò bɔ̀nɛ̀.»
Yeɓò Sàmàlî bino ba gɛ́nɛ Yésùsì
51 Mɛ́ɓɛ̀ kà ɓɛ̀ siki kà Njámbe boabàà gwéà gbasa à à ŋgɔ́ɔ́ mbúnù à boabàà i à kumono wɛ, Yésùsì, ɓwɛ́àbàà à jàà sɛ́à wàà è ŋga tɔ kàà ŋgé mɔ è áánì à ɛ́lɛ̀ nâ Yélúzàlɛ̀mì. 52 Ɛsabàà ɓò hè mbéyà nâ bàti. Kà yóà bi à gbò, i ɛli hɔ̀ nâ mà lè à njá Sàmàlî mɔ ɓɔ̂nyi pɛ̀ɛɗi wàà. 53 Ɓɛmɔ̀ŋgɔ̀, ɓò ɓɛ̀ lé ŋɛ̀ ŋgɔ̀ binobàà ba gɛ́nɛ Yésùsì yɔ̂ ɓò yàmìwè wàà, pɛ́kà yóà ɛlibàà nàà Yélúzàlɛ̀mì. 54 Mɛ́ɓɛ̀ kà ɓò yàmìwè wàà, Zaki yɔ̂ Zaŋ jèabàà è ɓò lè, bino yóà kà yóà ɓwɛ́ nɛ̀náǎ: «Mgbáámɔ́njá, mɛ gwéà nɛ̀náǎ ɔ̀ áánɛ̀ nɛ̀ Njámbe kà pɛ̀ɛ̀ dɔɔ ɓɛ̀ lé nɛ̀ wèè na liŋgɔ̀?» 55 Yésùsì kiɓosobáá mùù ká sèɓi yóà kà kpɛŋgi. 56 Yésùsì kiɓosobàà mùù kà sèɓi yóà kà kpɛŋgi. Kà yóà gba hî ki ɛ́lɛ̀ nàà mà kwalá lè.
Mi bò nɛ̀ni mɛ à soko yele kà mɛ bò ɛ̀li hɔ̀!
(Mat 8.19-22)
57 À fiigbó, mà wì ɓwɛ́àbàà nɛ̀ Yésùsì nɛ̀náǎ: «Mi bò nɛ̀ni mɛ̀ à soko yele kà mɛ̀ bò ɛ́lì hɔ̀.» 58 Kà Yésùsì ɓwɛ́ nɛ̀ à nɛ̀náǎ: «Yendìlì bò nɛ̀ lû, yebé nùɛ́ bò nɛ̀ yetwà, ɓɛmɔ̀ŋgɔ̀, mi Bé wì, mi bò ma nɛ̀ ɓɛ̀ sòkò kà mi bò lànù mɔ ɔmi hɔ̀ nà.»
59 Kà Yésùsì jii ɓwɛ́ nɛ̀ mà wì nɛ̀náǎ: «Nɛnɛ́ mi.» Ɓɛmɔ̀ŋgɔ̀, ɓɛ̀ wì ŋgɔ̀ búlòbàà nɛ̀náǎ: «Mbò mbwala, ɓa ɗe mi hɔ̀ kɛ̀ ɛ́lɛ̀ à guno bafa mù.» 60 Yésùsì búlòbàà nɛ̀ à nɛ̀náǎ: «Ɗe wɔ̂ kà yóà guní wɔ̀ yóà, nàà mɛ, ɛ́lɛ̀ ɓwɛ́ ɓɛ̀ kuma Njà nɛ̀ Njámbe.»