Ɓɛ́ ko nɔ̀ɔ̀ à nɛ̀nà Yésùsì à
8
Kɔɔ wè, Yésùsì ɛ́làbàà ɓwe Dòlà Mɔtómò njaa nɛ̀ Njámbe à lé nɛ̀ posi, yɔ́ɔ̀ ɓò yàmìwè wàà ɓukɔ nɛ̀ wɛ́ɛ́lì, 2 nɛ̀ ɓɛ̀ ko nɔ̀ɔ̀ i boa poka wɛ à ɗàà lííndì, nɛ̀ tíndòmɔ̀ mɔ. Yeɓɛ̀ ko nɔ ŋgɔ̀ bàà: Malia beko ɓò Madala kà Yésùsì héabàà ɗàà lííndì mɔ̀ɔ̀lɔ dokɔ wɛ́ɛ́lì à tɛ wâ. 3 Zani ke Yuza ɓɛ̀ wì kà ɓánanabàà limɔ Elodi à, Zuzani nè súlò ko kà yóà gbàà gbaaɗa Yésùsi yɔ́ɔ̀ ɓò yàmìwè wàà nɛ̀ mɔsuma limɔ yóà.Sika mwâ pɛ̀ dò nyɔ̀ à pimba
(Mat 13.1-9; Mlk 4.1-9)
4 À fii posi yele wì gbaabàà pɛ̀ɛ̀ na Yésùsi. Mɛ́ɓɛ̀ kà sapiɗo wì sulobàà; Kà Yésùsì welimɔ nɛ̀ yóà nɛ̀ sika nɛ̀náǎ: 5 « Ma wì ɛ́làbàà à jáà pimba wàà à pɛ̀ɛ̀ dò nyɔ, mɛ́ɓɛ̀ɛ̀ kà boabàà à pɛ̀ɛ̀ wɛ à jàà pimba, ma dô nyɔ téàbàà à mbanji gbo kà wì toki, kà bénúɛ nyɔ̀ yóà. 6 Yemà gbàà wɛ téàbàà à soko ɗiɓɔko. À nɛ̀ hɔ̀ wɛ kà fé à saa télélé mɔ. 7 Yemà gbààwè téàbàà à soko nyaa dalɛ yóà nɛ̀ hɔ̀ wɛ, kà nya dalɛ hɔ̀ guɓiɗi yóà yele. 8 Yemà gbààwè téàbàà à tɛtɛ mbúmù, I hɔ̀ wàà ki, Mgbààwɛ̀ hɔ̀ sɔɔsɛkɔ.» Kà Yésùsì sɔ̀ɔ̀sì sika wàà nɛ̀náǎ: «Ɓɛ̀ wì kà bò nɛ̀ jálà mɔ jéé mɔ à jéà kà.»
Yésùsì pi sika à wéé ge?
(Mat 13.10-17; Mlk 4.10-12)
9 Ye bò yàmi wè Yésùsì áánà nɛ̀ à kùli ɓɛ̀ sika ŋgɔ̀. 10 Búlòbàà nɛ̀ yóà nɛ̀náǎ: «Ɛ́nɛ̀ ba, dombɔ mɔ i ɓɛmɔ̀nɔ̀ɔ̀ wuso à bɛ́ɛ̀sɛ̀ njá nɛ̀ Njámbe. Nàà máɓà píò, bò nɛ̀ yóà mɛ sika, mɔ dɛ́nɛ̀ è yóà sɛ́ɓɛmɔ̀ tàà jɔ̀ɔ̀ ma, wì jéé mɔ tàà i ma ɗìákàsà wè.»
Yésùsì boa ɗìákàsà sika mwâ pɛ̀ɛ̀ dò nyɔ̀
(Mat 13.18-23; Mlk 4.13-20)
11 Ɛ́nɛ̀ jéé kùli ɓɛ̀ sika ŋgɔ̀ héà: «dò nyɔ̀ à gbààwè Njámbe. 12 Yemà wì batini nɛ̀ mbanji gbo kà Mgbààwɛ̀ téà hɔ̀: I jéé gbààwè Njámbe kɔɔ wè kà Satani pɛ gbasɛ à jàà sɛ́à yóà mɔ dɛ nɛ̀ ìì ɓukili má nà, mɔ dɛ kà nɛ̀ nàà Njámbe à pokéà ma yóà nà. 13 Yemà wì batini nɛ̀ ɓɛ̀ mbúnù tùù ɗiɓoko à: À yóà jéà gbààwè Njámbe kà yóà ba nɛ̀ mɛŋgalamɔ; Ɓɛmɔ̀ŋgɔ̀, yóà bò ma nɛ̀ ku nàà, yóà ɓukili mɔ à ndambo siki, ma haɓaɗa nɛ̀ hɔ̀ wɛ, i mgbɔli ɓukolo mɔ. 14 Yeɓò ɓɛ̀ i téà à soko nyaa dàlɛ, bò ɓɛ̀ wì nɔ i jéà gbààwè Njámbe. Ɓɛmɔ̀ŋgɔ̀, tá ŋgala mɔ, nɛ̀ ɓoɗu limɔ, nè gbasi ɓɛ̀ mbúnù, i tufikiɗi gbààwè Njámbe, taa wàà ma kii. 15 Bò ɓɛ̀ i téàbàà tɛtɛ mbúnù, bò ɓò ɓɛ̀ i jéà gbààwè Njámbe, i ɓanìnì à jàà sɛ́à yóà kà bò ɓɔ́ɔ́nya wɛ dòlà wɛ. I wàà dòlà kii pɛ́kà yóà boabàà mgbi.»
Sika múnda
(Mlk 4.21-25)
16 «Ma wì du má múndà i guuɗi nɛ̀ kpanà nà, i du ma kàà múndà mɔ ɗè à ti yála nà, Ɓɛmɔ̀ŋgɔ̀, i du múndà mɔ gɛɛ nâ ŋgɔ̀ mɔ gɛlili ɓɛ̀ wì nɔ i bò bi à jàà gàlà. 17 Mɔ yele kà bò wúsòwɛ̀ bò gbásìɗì tɛ́ à Mgbàà swéé, nɛ̀ ɓò ɓɛ̀ kà bò à ɗindindi mɔ bò gbasiɗi tɛ̀ à gɛ́lɛ́lɛ̀ mɔ. 18 Ɛ́nɛ̀ jɔ̀ɔ̀ mɛ nɛ̀ kúlu jéà mɔ mɔ̀nɛ̀! Pɛ́kà ɓɛ̀ wì kà bò nɛ̀ mamɔ i bò jii hà à ma; Nàà ɓɛ̀ wì kà bò ma nɛ̀ ma mɔ nàà, i bò jii gbasɛ bè ɓɛ̀ɛ̀ kà i è bò nɛ̀.»
Tɛ́tɛ̀ yálì Yésùsì
(Mat 12.46-50; Mlk 3.31-35)
19 Nana Yésùsì yɔ́ɔ̀ ɓójà wàà, pɛ́à jɔ̀ɔ̀ à. Ɓɛmɔ̀ŋgɔ̀, ma soko peli nɛ̀ mɔ hɔ̂ à ŋgolo wàà, bò ma nà, à wee sapiɗo wì. 20 i ɓwɛ́ à Yésùsì nɛ̀náǎ: «Nana mɛ nɛ̀ ɓójà mɛ boa gwéà jɔ́à mɛ. Yóà bò yoli nàà dɛ̀.» 21 Yésùsì búlòbàà nɛ̀ yóà nɛ̀náǎ: «Nana mù nɛ̀ ɓójà mù bò ɓɔ jéé gbààwè Njámbe i lenɔ hɔ̂.»
Yésùsì gásà pɛ́fù
(Mat 8.23-27; Mlk 4.35-41)
22 Ma swéé Yésùsì daŋgabàà ɓwato yɔ́ɔ̀ bò yàmìwè wàà. Kà ɓwɛ́ nɛ̀ yóà nɛ̀náǎ: «Ɔ̀ ɛ́lɛ̀ na maɓa kú yékù.» Kà yóà gbàà ɛ́lɛ̀. 23 Mɛ́ɓɛ̀ kà yóà boabàà à téà li à, kà Yésùsi té lìlà. Tàà kàli máá, kà lemba pɛfu kunjìɗì ufo kú, kà li kunjìɗì ɗi biyo wɛ à jàà ɓwato, yóà boabàà i à haɓaɗa. 24 Yeɓò yámì wɛ yésùsì tikobàà pɛ̀ɛ̀ à ŋgolo Yésùsi kà yóà tuusi à, à lila i ɓwɛ́ nɛ̀náǎ: «Mbo mbwala, Mbo mbwala,ɔɔ bò féɔ̀ hɔ̀ ŋgɔ̀!» À nɛ̀ tú no wɛ kà kpeŋgi nɛ̀ pɛpɛ yɔ́ɔ̀ buŋge kà pɛpɛ nɛ̀ buŋgé sɔni, kà mɔ yele pɛ̀ɛ̀ bɛ̀. 25 Yésùsi ɓweabàà nɛ̀ bò yàmìwè wàà nɛ̀náǎ: «Bukolo mɔ nè à ge?» Be mɔ ŋgɔ̀, dɛ́à yóà kè nɛ̀ káma súlòwɛ̀. Kà yóà ɓwɛ́ à soko yóà nɛ̀náǎ: «Ge kùlù wì à è? Kà welimɔ nɛ̀ pɛpɛ yɔ́ɔ̀ li, kà yóà diisi à e?»
Yésùsì kpásàsà ɓɛ̀ wì nɛ̀ ɗàà lííndì
(Mat 8.28-34; Mlk 5.1-20)
26 Yésùsì yɔ́ɔ̀ yàmìwè wàà, hɔ́bàà nàà njà ɓò Gelaza seɓé nɛ̀ Galile. 27 À jilo Yésùsì à jàà ɓwato ma wì à jàà ɓɛ̀ posi ŋgɔ̀ pɛ́à à kpatana wɛ nɛ̀ à. Bɛ wì ŋgɔ̀ bò nɛ̀ ɗàà lííndì à tɛ wàà. Kàlabàà, yoli ma mɔkanda nà, duduama nù à jàà gàlà nà. Dúdua nù à soko handa. 28 À nɛ̀ jɔ̀ɔ̀ Yésùsì kà mɛ̀ɛ̀ nù, kà té à naŋga wàà, kà ɓwɛ́ nɛ̀ lemba gɛ nɛ̀náǎ: «Yésùsì, Be Njámbe nàà ŋgɔ̀ nàà ŋgɔ̀, géà mɛ gwe nɛ̀ mi à è? Mi yaya nɛ̀ mɛ, haɓeɗe má mi nà.» 29 Yésùsì ɓwɛ́àbàà nɛ̀ ɗàà lííndì wɛ à túmbi à tɛ ɓɛ̀ wì ŋgɔ̀. Ɓɛ̀ ɗàà lííndì ŋgɔ̀, bábàà à kɛ́tɛkɛtɛ à ma siki, I helabàà kɔ̀ wàà, nɛ̀ naŋga wàà nɛ̀ ŋgɔmbɔ, mɔ ɓanìnì à, pɔpɔa ɓɛ̀ ŋgɔmbɔ nɔ ŋgɔ̀ yele, ɗàà lííndì ilobàà à jàà ɓɛ̀ soko nɔ̀ɔ̀ táá wì à. 30 Yésùsì áánà nɛ̀ à nɛ̀náǎ: «Líí mɛ à o?» Kà buli nɛ̀náǎ: «Líí mù à Dùùsɔɗya.» Ɓwɛ̀ ɓɛmɔ̀ŋgɔ̀, Pɛ́kà píò ɗàà lííndì biabàà à tɛ wàà. 31 Kà ɗàà lííndì wɛ yayi nɛ̀ Yésùsì è à ɛ́sɛ̀ ma yóà à jàà kiɓɔbɔ ɓɛ̀à haɓaɗa nàà.
32 À ɓɛ̀ soko ŋgɔ̀, ma dùù ŋgúlù boabàà à nyɔ ga mɔ à ma ŋgɔ̀ ŋgàɗi. Kà ɗàà lííndì yayi nɛ̀ Yésùsì nɛ̀náǎ, tɔmɛsɛ nàà, ɔ̀ bi à tɛ ŋgúlù. Kà tɔmisi. 33 Mɔ̀ wɛ, kà ɗàà lííndì gbâ à tɛ wì wɛ, i bi à tɛ ŋgúlù wɛ, kà ɓɛ̀ dúú ŋgúlù nɔ ŋgɔ̀, yele ŋgumbi nɛ̀ kuloyu, tɛ nɔ̀ɔ̀ tɛ̀ à yékù kà nɔ li i fè. 34 Mɛ́ɓɛ̀ɛ̀ kà ɓò ɓanìnì ŋgwéà jɔa ɓɛmɔ̀ŋgɔ̀ kà dɛ́à tɛ, kà yóà yúmɔ ɛ́lɛ̀ à ɓwɛ́ ɓɛ̀ mɔ kà dɛ́à tɛ na posi nɛ̀ lé bàà à ŋgolo wɛ à. 35 Yewì ɛ́làbàà à jɔ̀ɔ̀ ɓɛ̀ mɔ kà dɛ́à tɛ. Yóà nɛ̀ hɔ̀ wè à ŋgolo Yésùsi à, i kpà ɓɛ̀ wì kà ɗàà lííndì gbà à tɛ wa dúŋgo nù à ti Yésùsì, yola mɔkanda, jàà ju wàà bò i dòlà wɛ. Kà kéé ba yóà. 36 Ɓɛ̀ wì nɔ̀ɔ̀ i jɔa ɓɛ̀ mɔ kà dɛ́à tɛ, nɛ́ɛ́gàábàà à yóà, mɛ ɓɛ̀ kà mwâ ɗàà lííndì ba sa ŋgitɛ à. 37 Kà ɓò ɓɛ̀ njàà ŋɛ̀ ŋgɔ̀ yele ɓwɛ́ nɛ̀ Yesùsì à gba nja nɛ̀ yóà, pɛ́kà yóà boabàà jéà kèè tɛ̀tɛ̀ wɛ̀. Kà Yésùsì da ɓwato ɛ́lɛ̀. 38 Ɓɛ̀ wì kà ɗàà lííndì gbabàà à tɛ wàà áánàbàà nɛ̀ Yésùsì nɛ̀náǎ: «Mi bɔbala mɛ tɔmɛsɛ, nàà ɔ̀ mɛ ɛ́lɛ̀.» Ɓɛmɔ̀ŋgɔ̀, Yésùsì jisosobàà à, kà ɓwɛ́ nɛ̀ à nɛ̀náǎ: 39 «Jisi ɛ́lɛ̀ nàà gàlà nɛ̀ mɛ, nɛ́ɛ́gɛ̀ɗɛ́ ɓɛ̀ mɔ kà Njámbe déà nɛ̀ mɛ yele.» Wì wɛ ɛ́làbàà nɛ̀ nɛ́ɛ́ŋgàdà wɛ à fii posi yele ɓɛ̀ mɔ kà Yésùsì déà nɛ̀ à.
Bé mbékò Zàlusì yɔ́ɔ̀ ɓɛ̀ko kà ndɔa mɔkanda Yésùsì à
(Mat 9.18-26; Mlk 5.21-43)
40 À siki ɓɛ̀ kà Yésùsì jiso nàà ma ɓàà kùù yékù à, píò wì pɛabàà à kpatana wɛ nɛ̀ à, pɛ́kà yóà yele boabàà à kɛ à. 41 Ma wì lii wàà à Zàlusì kà hɔ̀. Wì wɛ wɛ́ɛ́lì mɔ́kònjì gàlà sakwala mɔ. Gúúsobàà mùù à ti Yésùsi kà yáyì nɛ̀ à, á ɛ́lɛ̀ na gàlà nɛ̀ à, 42 pɛ́kà ma kika bembeko wàà bóbàà du nɛ̀ pémbé ɓukɔ nɛ̀ wɛ́ɛ́lì bóbàà à soko fio yɔ́ɔ̀ kpasi.
À ɓɛ̀ siki kà Yésùsì boabàà à ɛla wɛ nɛ̀ ki à, wì boabàà màà à tɛ wàà done à ɗɛ́à à ɓii. 43 Ma ko boabàà ki, boa tíndòmɔ̀ mɔ, mbɛ́ à pɔ̀ɔ̀ à jà pembe buko nɛ̀ weeli, sɔ́ɔ́sàbàà limɔ wàà yele à dɔkitɔlɔ, taa ma wì à saka wɛ. 44 Tiɗoɗo bàà Yésùsì na ɗo kà ndɔ jɔ̀ɔ̀ mɔkanda wàà. Wàwàà ki kà mbɛ yoli. 45 Yésùsì áánàbàà nɛ̀náǎ: «O à ndɔ à mio?» Wì yele ɓwɛ́àbàà ma wì ndɔ ma mɛ na, kà Piɛli ɓwɛ́àbàà nɛ̀ Yésùsi nɛ̀náǎ: «Mbo mbwala wì bò totékéné mɛ à ɗɛ́à mɛ ɓii.» 46 À ɓɛmɔ̀ŋgɔ̀ kà Yésùsi ɓwɛ́ nɛ̀náǎ: «Ma wì ndɔ à mi, pɛ́kà mi jéà ma ɔ̀ à gba wɛ à tɛ mù.» 47 Ɓɛ̀ ko ŋgɔ̀ nɛ̀ jɔ̀ɔ̀ wɛ è i i ŋgo ɓɛ̀ mɔ kà dɛ́à, Kà pɛ̀ɛ̀ nɛ̀ yaa tɛ, té à naŋga Yésùsì. Kà ɓwɛ́ à lii wì yele kuli ɓɛ̀ mɔ kà ndɔ nɛ̀ Yésùsì nɛ̀ mɛ́ɓɛ̀ɛ̀ kà kpà saŋgitɛ wàwàà ki à. 48 Kà Yésùsì ɓwɛ́ nɛ̀ à nɛ̀náǎ: «Yekò ɓukolomɔ mɛ kpasasa mɛ. Ɛ́lɛ̀ à tɛ́ na tɛ̀.» 49 Mɛ́ɓɛ̀ kà Yésùsì boa ɓwɛ́ bɛ mɔ ŋgɔ́ɔ́ kà mwâ lɛ tomi Zàlusì mɔnkoji gàlà sakwala mɔ pɛ̀ɛ̀ ɓwɛ́ wɛ è nɛ̀náǎ: «Zàlusì, bembeko mɛ féà, haɓɛɗɛ ma mbo mbwala i nàà.» 50 Yésùsì nɛ̀ jéà ɓɛmɔ̀ŋgɔ̀, kà ɓwɛ́ nɛ̀ Zàlusì nɛ̀náǎ: «Jéà ma kéé nà lufi ɓúkili Njámbe bembeko mɛ bò kpasi.» 51 À hɔɗiɗi wàà na gàlà Zàlusì, tomisi ma na ma wì à bia jàà gàlà yɔ́ɔ̀ à na kɔ ndɔ Piɛ́li, Zaŋ, Zaki, tɛ ku bafa bé nɛ̀ nana bé. 52 Yewì yele boabàà à héà kwá nɛ̀ titoɓónò mû, à wéé bè. Kà Yésùsì ɓwɛ́ yóà nɛ̀náǎ: «Ɛ́nɛ̀ he ma kwaa na, fé ma na, boa lila.» 53 À ɓɛ̀ wɛli mɔ ŋgɔ̀, kà yóà kujindi jâ Yésùsi, pɛ́kà yóà igobàà à tɛ̀kìlímɔ̀ bé féà. 54 À ɓɛmɔ̀ŋgɔ̀, kà Yésùsi bàà bè à kɔ. Kà ɓwɛ́ nɛ̀ à nɛ̀ lemba gɛ nɛ̀náǎ: «Be, kuli ŋgɔ̀.» 55 Kà gba túni, kuli kà ŋgɔ̀ wàwàà. Kà Yésùsì ɓwɛ́ yali wàà i hà à nyɔ. 56 Ye yali wàà boabàà à kàma mɔ súlòwɛ̀ ɓɛmɔ̀ŋgɔ̀, Yésùsì ɓwɛ́àbàà nɛ̀ yóà nɛ̀náǎ: «Ɛ́nɛ̀ ɓwɛ́ ma ma wì ɓɛ̀ mɔ kà dɛ́à tɛ na.»