Lúkàsì 7

Bukolo mɔ ma Mgbàà mɔ́kònjì sɔɗya

(Mat 8.5-13)

Kɔ́ɔ́ ɗò sɔ̀ɔ̀sa wèli mɔ nɛ̀ sapiɗo bàà jéà à, kà Yésùsì bi nàà ɓɛ̀ posi è Kapɛlɛnaumi à. 2 Ma Mgbàà mɔ́kònjì sodya Loma boabàà nɛ̀ ma mwâ dɛ̀ tô wàà, kà gwɛ́abàà súlòwɛ̀ á tíndòmɔ̀ mɔ, à soko fio yɔ́ɔ̀ kpasi. 3 Mɛ́ɓɛ̀ kà mɔ́kònjì sɔ́ɗyà jéà wì à wela wè Yésùsì à, kà ɛ̀sì ma mgbààŋgà Zuifi mɔ áánì nɛ̀ à nɛ̀náǎ, à pɛ̀ɛ̀ à kpàsasa mwâ dɛ̀ tò wàà. 4 Mɛ́ɓɛ̀ kà mgbààŋgàà Zuifi hɔ́abàà à ŋgòlò Yésùsì à, yóà yaya nɛ̀ à súlòwɛ̀ nɛ̀náǎ: «Ɓɛ̀ wì ɓɛ̀ɛ́ bò du dòlàwɛ̀ mɛ tɔ̀mɛ̀sɛ̀ mɔ wɛ à à. 5 Pɛ́kà gwéé kulu mɔ̀ɔ̀, à kà bɛ̀ gàlà sakwala mɔ mɔ̀ɔ̀.» 6 Yésùsì ɛ́labàà yɔ́ɔ̀ yóà, boa ma hi ɗùùsì nɛ̀ gàlà nà, kà mɔ́kònjì sɔ̀dya ɛ́sì mbai wàà à ɓwɛ́ wɛ̀ à Yésùsì ènàǎ: «Mgbáámɔ́njá, haɓɛɗɛ ma mùù mɛ nà, pɛ́kà mi bò ma ɓɔɔnya wɛ kà mɛ bi à gàlà mù nà. 7 Mɔ̀ɔ̀wɛ̀ kà dɛ̀ è, mi mwâ tɛ̀ à wékɛ̀ ma pɛ́à nàà mɛ na. Tokà wɛ bò ènàǎ, lufi ɓwɛ́ gbàà wɛ mɛ sìkìnɔ̀, mɔ ɗɛ̀ mùù mwâ dɛ̀ tô mù à ba sa ŋgi tɛ. 8 Mi, mi diisi mɔ́kònjì mù, mi bò kà mɔ́kònjì ma yesɔnɗya, mi ɓwɛ́ nɛ̀ taŋga yóà nɛ̀náǎ: “Ɛ́lɛ̀!”, kà ɛ̀li, nɛ̀ ma wì: “Pɛ̀ɛ̀!”, kà pɛ̀ɛ̀, à mwâ dɛ̀ tô mù: “dɛ̀ ɓɛ̀ mɔ̀ɔ̀!”, kà dɛ̀.» 9 Ɓɛ̀ siki kà Yésùsì jéà gbààwè nɔ̀ɔ̀ ŋgɔ́ɔ́, kà mɛ ŋgili mɔ́kònjì sɔ̀dya wɛ, kibosoa mùù séɓɛ nàà ɗo, kà ɓwɛ́ wì ènàǎ: «À tèkili mɔ, mi ɓwɛ́ nɛ̀ ɛ́nɛ̀ è, mbo táá kpama ma wì nɛ̀ mgbàà ɓukolo mɔ nàà Izàɛ́lì mɛ́ɓɛ̀ɛ̀ wì.» 10 À gbiiɗi ɓò ɓwɛ́ Mɔtómò mɔ́kònjì sɔdya nàà gàlà, kà yóà kpà è mwâ dɛ̀ tô kpasa.

Yésùsì tùùsò wɔ̀ bé ma kè gɔ́là

11 Yésùsì ɛ̀labàà nàà ma posi kà i ɓééɗì è Nayini, yɔ́ɔ̀ ɓò yàmìwè wàà, nɛ̀ píò wì boabàà lɛ̀ wɛ yɔ́ɔ̀ yóà. 12 Ɓɛ̀ siki kà Yésùsì boabàà kumini nɛ̀ biyo wɛ nàà posi à, i boabàà ɛ̀la wɛ nɛ̀ wɔ nàà handa: Bóbàà kinɔ kika bè ma kè gɔ́là. Píò ɓò ɓɛ̀ lè ŋɛ̀ ŋgɔ̀ boabàà yɔ́ɔ̀ à. 13 Ɓɛ̀ siki kà Mgbààmɔ́njà jɔ̀a kè gɔ́là, ŋgo bàà à súlòwɛ̀ nɛ̀ à, kà ɓwɛ́ nɛ̀ à è: «Héà ma kwa i nà!» 14 Yésùsì tikobàà ndɔ̀ sàndukù wɔ̀, kà bò ɓɛ̀ɛ̀ ɓùo wɛ yoli, kà Yésùsì ɓwɛ́ nɛ̀náǎ: «Mbwala wì, mi ɓwɛ́ nɛ̀ mɛ, kùli ŋgɔ̀!» 15 Wɔ̀ kulóa ŋgɔ̀ dùnù, kà kujindi wélimɔ̀. Yésùsì kua à jisisi hà nàna wàà. 16 Kée bábàà ɓɛ̀ wì nɔ̀ɔ̀ bàà ki à yele, kà yóà ɓwɛ́ nɛ̀náǎ: «kuma à du nɛ̀ Njámbe! Ma Mgbàà kulàwé Njámbe hɔ́à à soko mɔ̀ɔ̀, Njámbe pɛ́à gbààɗa kulu wàà!» 17 Ɓɛ̀ gbààwè ŋɛ̀ ŋgɔ̀ kúobàà jàà nja Yudé, nɛ̀ ɓɛ̀ lè nɔ̀ɔ̀ à ŋgolo wɛ yele. Yewì boabàà à nɛ̀ɛ̀ɗá ɓɛ̀ mɔ kà Yésùsì dɛ́àbàà.

Niyo Zaŋ nɛ̀ Yésùsì

(Mat 11.2-19)

18 Ye yàmìwè Zaŋ, ɛ́labàà à nɛ̀ɗa mɔ wɛ yele à bò mbwala yóà. 19 Mɔ̀ɔ̀wɛ̀, Zaŋ ɓéɗa bò yàmìwè wàà wɛ́ɛ́lì ɛ́sɛ̀ nàà Mgbáámɔ́njá à áánà wɛ nɛ̀ à nɛ̀náǎ: «Mɛ̀ bò wáɓɛ̀ɛ̀ kà Njámbe taɗa à, kà bò pɛ̀ɛ̀bàà? À boa mɛ màà ɛ́ɛ́ nà, ɔ̀ jii kɛ́ɛ́ màkwàlà wì?» 20 Yeɓò yami wɛ Zaŋ hɔ́àbàà à ŋgólo Yésùsì i ɓwɛ́ nɛ̀ à nɛ̀náǎ: «Zaŋ à pɛsiɔɔ nàà mɛ, à áánà wɛ nɛ̀ mɛ nɛ̀náǎ: Mɛ bò Wáɓɛ̀ɛ̀ kà bò pɛ̀ɛ̀, à boa mɛ màà ɛ́ɛ́ na, ɔ̀ jii kɛ́ɛ́ màkwàlà wì?» 21 À ɓɛ̀ siki ŋgɔ̀, Yésùsì boabàà kpasasa ɓò tíndòmɔ̀ mɔ, nɛ̀ ɓò kumo, yɔ́ɔ̀ ɓò ɗàà lííndì, kà dɛ̀ɛ̀ súlò ɓò biyo lii yóà jɔ̀ɔ̀mɔ. 22 Yésùsì búlòbàà nɛ̀ yóà nɛ̀náǎ: «Ɛ́nɛ̀ ɛ́lɛ̀ à nɛ̀ɛ̀ɗá wɛ à Zaŋ ɓɛ̀ mɔ kà ɛ́nɛ̀ jɔ̀a nɛ̀ ɓɛ̀ kà ɛ́nɛ̀ jɛ́à: Ye biyo lii boa jɔ̀ɔ̀ mɔ gɛ́lɛ́lɛ́, ɓò kumo boa lɛ̀a nɔ̀ dòlà wɛ, bò ɓai ba sagitɛ, ɓò mgbe à jéà mɔ dòlà wè, wɔ̀ boa tuno wɛ, ɓò sà boa ba Dòlà Mɔtómò Njámbe. 23 Mɛŋgala mɔ súlò nɛ̀ ɓɛ̀ wì kà gbasi kima sɛ́à wàà à tɛ mùù à nàà.» 24 Mɛ́ɓɛ̀ kà ɓò yàmìwè Zaŋ jisobàà, kà Yésùsì kunjìɗì ɓwɛ́ wɛ à píò bɛ́ɛ̀sɛ̀ Zaŋ nɛ̀náǎ: «Ɛ́nɛ̀ ɛ̀li ɔ̀ seba ge, nàà ɓɛ̀ soko kà wì bò ma hɔ̀ nàà è? Ye ndɛ̀ɛ tombasa wɛ nɛ̀ pɛ̀pɛ̀? Aa 25 mɔ̀ɔ̀ wè, ɛ́nɛ̀ ɛ̀libàà tɛ̀ɛ̀ à jɔ̀a gé? Wì à yòla mandi mɔkanda? Ɓò ɓɛ̀ɛ̀ i yoli mandi mɔ̀kanda, i kpasi dòlà wɛ i dù nù à jàà gàlà mɔ́kònjì. 26 À ŋgɔ̀ ɛ́nɛ̀ ɛ̀libàà tɛ à jɔ̀a gé? Kulawɛ Njámbe? Ìì tɛ kili mɔ, mi ɓwɛ́ ɛ́nɛ̀, ɛ́nɛ̀ jɔ́à ɓɛ̀ wì kà bò pélè kulawɛ Njámbe à. 27 pɛ́kà Zaŋ bò ɓɛ̀ wì kà Toa mɔ ɓwɛ́à à nɛ̀náǎ: “Mi bò pɛsi mwâ hé mbɛ́à mù, ɛ́sɛ̀ nàà bati mɛ, kà ɛ́lɛ̀ à ɓɔ̀ɔ̀nya gbò à mɛ.”» 28 Yésùsì jiobàà ɓwɛ́ nɛ̀náǎ: « tɛ̀kìlímɔ̀, mi ɓwɛ́à ɛ́nɛ̀, à taŋga ɓò ɓɛ̀ɛ̀ kà ko kosa, ma wì sìkìnɔ̀ boma pélè Zaŋ nà. Kpà hi nɛ̀náǎ, be tokiɗi wáɓɛ̀ɛ̀ à siki le nɛ̀ Njámbe à bò Mgbààwɛ̀ pélè à. 29 Kulu wì yele i jèabàà Zaŋ mwâ ɗuɓi wì, nɛ̀ ɓò kùù làpo kà, i ŋgò è, Njámbe bò sìì. Mɔ̀ɔ̀wɛ̀ dɛ́ yóà tɔmɛsɛ ɗuɓo wì Zaŋ 30 Kpà hi nɛ̀náǎ Fàliziɛŋ yɔ́ɔ̀ bò mbo wì mboŋa Njámbe binobàà gwéà mɔ Njámbe bɛsɛ yóà, yóà gwee ma ɗuɓo wì Zaŋ mwâ ɗuɓi wì na.» 31 Yésùsì jiobàà ɓwɛ́ nɛ̀náǎ: «Mi bò nɛ̀ wɛki nɛ̀ ɓɛ̀ wì nɔ̀ɔ̀ mwɛ̂ nɛ̀ ò? Yóà batini nɛ̀ o? 32 Yóà batini nɛ̀ ɓɛ̀ be nɔ̀ɔ̀ dùŋgò nù à ɓɛ̀ soko à kpɛ̀mɔ à ɓèaɗana sala nɛ̀ ɓwɛ́à wɛ nɛ̀náǎ: “Ɔ̀ɔ̀ ba ŋgɔmbi, ɛ́nɛ̀ yɔ́à mà nà,ɔɔ kpɔ̀sa gèmà fio, ɛ́nɛ̀ hè ma kwà nà!” 33 Tɛ́kìlìmɔ̀, Zaŋ mwâ ɗuɓi wì pɛ́àbàà, nyɔ̀ ma mapa nà, nɔ̀a ma dɔ̀ɔ̀ nà, kà ɛ́nɛ̀ ɓwɛ́ nɛ̀náǎ, bò nɛ̀ ɗàà lííndì. 34 Bè wì pɛ́à kà nyɔ̀ mɔ, kà nɔ dɔ̀ɔ̀, kà ɛ́nɛ̀ ɓwɛ́ nɛ̀náǎ, ɛ́nɛ̀ jɔ̀ɔ̀ ɓɛ̀ wì kà ta ŋgili tùù nyɔ̀ nɛ̀ nɔ̀ɔ̀ dɔ̀ɔ̀, bò kà mbai ɓò gbesini làpo, yɔ́ɔ̀ ɓò ɗàà kuma. 35 Kpà hì nɛ̀náǎ, jɔma Njámbe bò i ŋgo wɛ sìì, nɛ̀ ɓɛ̀ wì nɔ̀ɔ i tɔmasa à yele.»

Yésùsì yɔ́ɔ̀ ma mwâ njɛmbi ko

(Mat 26.1-13; Zaŋ 12.1-8)

36 Ma Fàliziɛŋ ɓééɗa Yésùsì à nyɔ́ŋga mɔ yɔ̂ à nàà gàlà nɛ̀ à. Yésùsì bíobàà à jàà gàlà nɛ̀ Fàliziɛŋ, dù nù mɔ nyɔmɔ. 37 Bóàbàà kàà ɓɛ̀ jàà posi ŋgɔ̀, ma yɛko kà boa nɛ̀ ɗàà kuma, mɛ́ɓɛ̀ɛ̀ kà jéàbàà è Yésùsì boa nyɔŋga mɔ nàà jàà gàlà nɛ̀ Fàliziɛŋ, pɛ́àbàà nɛ̀ dàà dònè nɛ̀ loɓinda. 38 Yólè nàà ɗò naŋga Yésùsì. Kà hè kwa sé nɛ̀ naŋga Yésùsì nɛ̀ mùùlíí wàà, kɔ̀ɔ̀ɗò wɛ kà ŋgùùsi mùù tùli naŋga Yésùsì nɛ̀ mùù jù wàà, liɓiki naŋga Yésùsì sɛ̀ loɓinda à ŋgɔ́ɔ́ wɛ. 39 À jɔ̀a mɔ wɛ, ɓɛ̀ Fàliziɛŋ kà ɓɛ̀ɛ̀ɗa Yésùsì à nyɔ̀ŋga mɔ, ɓwɛ́à mwâ tɛ̀ à jàà sɛ̀a wàà nɛ̀náǎ: «À du è ɓɛ̀ wì à dù tɛ dòlà kulawɛ Njámbe, à i ŋgo tɛ́ ɓɛ̀ ko à ndɔ̀ à, à i ŋgo ɓɛ̀ ɗàà kuma nɛ̀ à.» 40 Yésùsì kua gbààwè kà ɓwɛ́ nɛ̀ Fàliziɛŋ nɛ̀náǎ: «Simoni, mi bò nɛ̀ kinɔkinɔ mɔ ɓwɛ́à mɛ.» Simoni buloa nɛ̀ à nɛ̀náǎ: «Mbo mbwala wèlèmɔ̀.» 41 Yésùsì ɓwɛ́à nɛ̀ Simoni nɛ̀náǎ: «Yewì wɛ́ɛ́lì boa nɛ̀ tòlosi nɛ̀ ma mwâ limɔ, ma wì bò nɛ̀ sɛkɛ sɛkɛ pátà mili sɔ̀ɔ̀sɛ̀kɔ, sanɔ mɔ̀ɔ̀lɔ ma wì nɛ̀ sɛkɛ sɛkɛ pátà mako mili mɔ̀ɔ̀lɔ̀. 42 Mɛ́ɓɛ̀ kà mwâ limɔ jɔ̀abàà ɓɛ̀ wì nɔ̀ɔ̀ wɛ́ɛ́lì nɛ̀ tolosi wàà, boa ma nɛ̀ soko kpè tolosi wàà nà, jɔsa yóà wɛ́ɛ́lì yele ŋgo. Yésùsì áánà nɛ̀ Simoni nɛ̀náǎ: À taŋga ɓɛ̀ wì nɔ̀ɔ̀ wɛ́ɛ́lì à, oa bò gwéé mwâ limɔ súlòwɛ̀ o?» 43 Simoni buloa nɛ̀ Yésùsì nɛ̀náǎ: «Mi ta ŋgili è wáɓɛ̀ɛ̀ kà kua tolosi súlòwɛ̀ à.» Kà Yésùsì ɓwɛ́ nɛ̀ à nɛ̀náǎ: «Mɛ bò nɛ̀ gbàwé.» 44 Kɔ́ɔ́wɛ̀, Yésùsì kibosoa mùù nàà yékò kà ɓwɛ́ nɛ̀ Simoni nɛ̀náǎ: «Mɛ̀ jɔ̀a ɓɛ̀ ko ŋɛ̀? Mi biyo à jàà gàlà mɛ, mɛ hà ma mi li taa naŋga nà, kpà hi nɛ̀náǎ à, tàà naŋga mùù nɛ̀ mùùli wàà. Kà tuli yóà nɛ̀ mùù ju wàà. 45 Mɛ liɓiki ma mi à gàlà nɛ̀ mɛ nà, nàà à mgbɔlikiɗi ma liɓoko na ŋga mù na gàlà nɛ̀ mɛ na. 46 Mɛ̀ sɛ ma nɔ à jù mù nà, nàà à sɛ́à loɓinda à naŋga mù. 47 Mɔ̀ɔ wɛ kà mi ɓwɛ́ nɛ̀ mɛ nàà, ɓɛ̀ Mgbàà ɗikayi kà mboa mi à dɛ́à na súlò njɛmbi wàà jɔ̀sa tɛ ŋgo. Ɓɛ̀ wì kà i jɔ̀ɔ̀si à ŋgo tokiɗi à, osisi kâ tokiɗi ɗikayi.» 48 Yésùsì ɓwɛ́àbàà nɛ̀ yékò nɛ̀náǎ: «Mi jɔ̀sa njɛmbi mɛ ŋgo.» 49 Yeɓò ɓɛ̀ɛ̀ bàà à nyɔŋga mɔ yɔ́ɔ̀ à ɓwɛ́àbàà à jàà sɛ́à yóà nɛ̀náǎ: «Ge kulu wì à è, kà ɛli hɔ̀ nɛ̀ à jɔ̀ɔ̀sa wì ŋgò à njɛmbi e?» 50 Yésùsì ɓwɛ́à nɛ̀ ɓɛ̀ ko ŋɛ̀ ŋgɔ̀ nɛ̀náǎ: «Ɓukolo mɔ mɛ, kpasasa mɛ, ɛ̀lɛ̀ à tènatè.»