Yésùsì mókɔ̀njì swéé ɔmi yezuifi
(Mat 12.1-8; Mlk 2.23-28)
6
Ma swéé à siki ɔmi yezuifi. Yésùsì pelabàà à jàà pimba ma nyɔ̀ kà i ɓééndì è bèle. Ye bò yamiwe wàà ɓìlì kíì bèlè kà yóà nyɔ gbàà wɛ. 2 Yemà Fàliziɛŋ áánabàà nɛ̀ yóà nɛ̀náǎ: «Ge à kà nɛ̀ de nɛ̀ ɓɛ̀ mɔ kà mboŋa mɔ̀ɔ̀ tɔ̀misi mâ wì dɛ à swéé saba na?» 3 25 Kà Yésùsì buli nɛ̀ yóà nɛ̀náǎ: «Ɛ́nɛ̀ tɔ̀lì mà ɓɛmɔ̀ kà Daviti dɛ́abàà, mà swéé ɓɛmɔ̀ŋgɔ̀ pélabàà ɔ̀ wàà, pɛ́kà fòtò bábàà à, yɔ́ɔ̀ ɓɛ̀ wì nɔ̀ɔ̀ kà yóà boabàà lɛ̀ɛ̀ wè à nà? 4 Bíòbàà à jàà Mgbàà gàlà Njámbe, kùobàà ɓɛ̀ mápa nɔ̀ɔ̀ kà ì hàbàà mɔ gbɛ ɓùyà Njámbe à, nyɔ̀ ŋgàbàà, hà kàà ɓò ta ŋga wàà. Kpà hì nɛ̀náǎ, mboŋa mɔ̀ɔ̀ ɓwɛ́, kinɔ̀ ɓò gbɛ ɓwúyà Njámbe à nyɔ̀!» 5 Yésùsì jíòbàà ɓwɛ́ nɛ̀ Fàliziɛŋ nɛ̀náǎ: «Bè wì bò mɔ́kònjì swéé ɔmi yezuifi.»Yésùsì saka ma wì nɛ̀ kàtakala kɔ̀
(Mat 12.9-14; Mlk 3.1-6)
6 À ma kwala swéé saba, Yésùsì bíòbàà à jàà gàlà sakwálà mɔ. Ki, boabàà nɛ̀ ma wì kà boa nɛ̀ wéé kɔ wàà féà wɛ. 7 Yeɓò mbò wì mboŋa Njámbe, yɔ́ɔ̀ Fàliziɛŋ boabàà à séɓa kpɛ́ɛ́ mo jɔ̀ɔ̀ nɛ̀ kima Yésùsì bò nɛ̀ɔɔ kpásìsì wì à swéé saba, pɛ́kà yóà bóbàà à gwéà hɛla à nɛ̀ wè. 8 Ɓɛmɔ̀ŋgɔ̀, Yésùsì i ŋgobàà ta ŋgala mɔ̂ yóà yele. Ɓwɛ́àbàà nɛ̀ mwâ kùmɔ nɛ̀náǎ: «kulì ŋgɔ̀ pɛ̀ɛ̀ yoli nɛ̀ kè nàà bati à líí wì yele!» Kà ɓɛ̀ wì ŋgɔ̀ kùli ŋgɔ̀ yole nàà bati 9 Yésùsì áánàbàà nɛ̀ yóà nɛ̀náǎ: «Mi boa áánà mɔ nɛ̀ ɛ́nɛ̀ sikinɔ, à liswee ɔmi Zuifi, gè à bò dòlà wè wì dé é? Nɛ̀ dɛ̀ɛ̀ dáámɔ̀, nɛ̀ dɛ̀ɛ̀ demɔ̀, kpàsàsá wì, nɛ̀ gbé wì. Géà kà mboŋa mɔ ɓwɛ́ è ɔ̀ dɛ̀ à liswee ɔmi mɔ̀ɔ̀ è?» 10 Yésùsì boabàà à seɓa yóà yele siknɔ sikinɔ, kɔ́ɔ́wɛ̀ kà ɓwɛ́ nɛ̀ mwâ kàtakala kɔ́ nɛ̀náǎ: «Nyafɛ́sɛ̀ kɔ́ mɛ!» Kà nyafisi kɔ́ wàà, kɔ̀ wàà boi dòlà wɛ. 11 Ɓɛmɔ̀ŋgɔ̀ ŋgììso à sɛ́à ɓò mbò wì mboŋa Njámbe, yɔ́ɔ̀ Fàliziɛŋ súlòwɛ̀. Yóà áánabàà à sokó yóà nɛ̀náǎ: «Géà kɔ̀ bò nɛ̀ dɛ nɛ̀ bɛ́sɛ̀ Yésùsì à è?»
Yésùsì boa taɗa ɓò ɓwɛ́ Mɔtómò ɓúkɔ̀ nɛ̀ wɛ́ɛ́lì
(Mat 4.23-25)
12 Ma swéé, Yésùsì dáŋgabàà ŋgaɗì ɛ́lɛ̀ nàà jù wɛ̀ à sákwàlà mɔ, kà pesi kíìtû yele à sakwálà Njámbe. 13 Mɛ́ɓɛ̀ kà mɔ̀sai sábàà á. Kà Yésùsì ɓɛ̀ɛɗì ɓò yàmìwè wàà yele. À soko yóà kà taɗi ɓukɔ nɛ̀ wɛ́ɛ́li, kà hà yóà ɓɛ̀ lìì è ɓò ɓwɛ́ Mɔtómò 14 Lìì yóà héà: Simɔni, kà Yésùsì gbálàbàà Piɛli, Andele, ɓójà Simɔni, Zaki, Zaŋ, Filipi, Batélémi. 15 Matiɔsi, Tomasi, Zaki, bè Alifè, Simɔni mwâ lɛ́sìnì ɗô bò lé, 16 Yúdi bè Zaki, tèkùù Yúdàsì Iskaliɔsi wà ɓɛ̀ɛ̀ kà bò gbɛ́si Yésùsì à.
Yésùsì boa mboa sápìɗò wì mɔ nɛ̀ kpàsàsà ɓò tìndɔ̀ mɔ
(Mat 4.23-25)
17 Yésùsì jìlobàà ŋgaɗì yɔ́ɔ̀ ɓò ɓwɛ́ Mɔtómò, kà yolí à ma soko kà bò mbɛ́ɓɛkɛ, à ɓɛ̀ soko kà ɓò yàmìwè wàà boabàà hɔ̀ súlòwɛ̀, boa kà nɛ̀ súlò wì kàà ki, ɓò tòlì à ɓɛ̀ lè nɔ̀ɔ̀ jàà Yudé yele, nàà Yélúzàlɛ̀mì, nàà ɓɛ̀ posi à ŋgolo Tili yɔ́ɔ̀ Sidónì, ɓɛ̀ posi nɔ̀ɔ̀ à ŋgɔ́lò li à. 18 Yewì pɛɛabàà à jéà mbwala Yésùsì, nɛ̀ sàkà tíndòmɔ̀ yóà. Sàkà à kà ɓò ɓɛ̀ kà yóà boa kà nɛ̀ dáá lííndì à. 19 Yewì yele kiobàà jɛ̀ ndɔ̀ à pɛ́kà ma Mgbàà ɔ̀ boabàà à gba wɛ̀ à tɛ wàà kà kpasisi yóà yele.
Ɓó ɓɛ̀ɛ̀ à jɔ́ɔ́ dé mɔ nɛ̀ ɓò bɛ́ɛ́ jɔ̀ɔ̀ ɗàà mɔ
(Mat 5.1-12)
20 Yésùsì sɛɓabàà ɓò yàmìwè wàà, kà ɓwɛ́ nɛ̀náǎ:
«Dòlàmɔ̀ nɛ̀ ɛ́nɛ̀ ɓò sà,
pɛ́kà njàà Njámbe bò dù bone!
21 Dòlàmɔ̀ nɛ̀ nɛ̀ ɛ́nɛ̀ ɓò ɓɛ̀ à jéà fòtò mwɛ́ɛ̀,
pɛ́kà jà mɔ̀nɛ̀ bò doni!
Mɛ́ ŋgalà mɔ súlòwɛ̀ nɛ̀ ɛ́nɛ̀ ɓò ɓɛ̀ à héà wàà kwàà,
pɛ́kà ɛ́nɛ̀ bò ma mami.
22 Dòlàmɔ̀ nɛ̀ ɛ́nɛ̀ ɓò ɓɛ̀ kà ì boa kɛ́ɛ̀ wɛ̀ à, à ì píò ɛ́nɛ̀, kà ì yàà káá ɛ́nɛ̀, kà ì ɓwɛ́ dáá mɔ bɛ̀sè ɛ́nɛ̀, pɛ́kà ɛ́nɛ̀ boa ɓúkòlò Bè wì.
23 À ɓɛmɔ̀ŋgɔ̀ hɔ́à, ɛ́nɛ̀ dù nɛ̀ mɛ́ ŋgàlà mɔ, á ɓɛ̀ liswee ŋgɔ̀, kà ɛ́nɛ̀ yɔ́ yɔ́à nɛ̀ mɛ̀ ŋgàlà mɔ, ìì Njámbe boa hɔ̀ɔ̀sa ɛ́nɛ̀ mgbàà dèmɔ̀! Tɛ́kìlìmɔ̀, ŋgàà báfa yóà dɛ́àbàà nɛ̀ kulawɛ Njámbe! 24 Ŋgo nɛ̀ ɛ́nɛ̀ súlòwɛ̀, ɓò limɔ, pɛ́kà ɛ́nɛ̀ bàà demɔ̀ mɔ̀nɛ̀ lé! 25 Ŋgo nɛ̀ ɛ́nɛ̀ súlòwɛ̀, kà bò nɛ̀ kulu mɔ yele mwɛ̀ɛ̀ à, pɛ́kà ɛ́nɛ̀ bò jèè fótò! Ŋgo nɛ̀ ɛ́nɛ̀ súlòwɛ̀, ɓò ɓɛ̀ɛ̀ à ma ŋgà mámì mwɛ́ɛ̀, pɛ́kà ɛ́nɛ̀ bò duu à gàlà fio, kà ɛ́nɛ̀ héé kua! 26 Ŋgo nɛ̀ ɛ́nɛ̀ súlòwɛ̀, à wì yele ɓwɛ́à dèmɔ̀ mɔ̀nɛ̀, pɛ́kà mɛ́ɓɛ̀ɛ̀ bàà kàà, kà ŋgáá baáfa yóà dɛ́abàà nɛ̀ dáá kulawɛ á.»
Ɗikai nɛ̀ ɓò kɛ́ɛ́nà
(Mat 5.38-48; 7.12a)
27 «Mi ɓwɛ́ nɛ̀ ɛ́nɛ̀ ɓò ɓɛ̀ à jéà mi è nɛ̀náǎ: Ɛ́nɛ̀ gwéé mwâ kɛ́ɛ́ná mɔ̀nɛ̀, ɛ́nɛ̀ dɛ dèmɔ̀ nɛ̀ bò ɓɛ̀ kàì boa ke ɛ́nɛ̀ à. 28 Ɛ́nɛ̀ ɗufi ɓò ɓɛ̀ɛ̀ ì kòòki ɛ́nɛ̀ à, ɛ́nɛ̀ sakwèlè mɔ à wéè bò ɓɛ̀ɛ̀ kà ì boa bà lì mɔ́ne à. 29 À wì dio mɛ à tánà, kiɓísì máɓà hà à kà dìì. À wì kúo mɔ̀kótó gamɔ mɛ, ɗɛ à kà kùù ɓɛ̀ mɔ̀kótó à ti wɛ. 30 Hà mɔ à wì yele ì bò áánì mɔ nɛ̀ mɛ. Á wì kúo mɔ nɛ̀ mɛ áánɛ̀ má nɛ̀ à nà. 31 Ɓɛ̀ mɔ kà mɛ gwéé ì dɛ̀ nɛ̀ mɛ à dɛ káà mɛ́ɓɛ̀ɛ̀ nɛ̀ nyá mɛ. 32 À ɛ́nɛ̀ gwéà tóka ɓò ɓɛ̀ i gwe ɛ́nɛ̀ à. Ma mɔ kà wì bò hà ɛ́nɛ̀ i ŋgɔ́ɔ́ à bò ma kina, pɛ́kà ɓò njɛmbi gwèè kàà ɓò ɓɛ̀ɛ̀ ì gwéé yóà, 33 á ɛ́nɛ̀ dɛ́à demɔ̀ nɛ̀ tòkà ɓò dɛ̀ɛ̀ demɔ̀ nɛ̀ ɛ́nɛ̀ à, ɔ̀ bò hà ɛ́nɛ̀ i ŋgɔ́ɔ́? Pɛ́kà mwâ njɛmbi dɛ̀ kàà mɛ́ɓɛ̀ɛ̀! 34 Á ɛ́nɛ̀ gbààsa pátà à tóka ɓò ɓɛ̀ɛ̀ ì bò jisisi à ɛ́nɛ̀ à, ɔ̀ à bò hà ɛ́nɛ̀ i ŋgɔ́ɔ́? Pɛ́kà mwâ njɛmbi gbáásì kà mwâ njɛmbi pátà ki mà bò jisisi à yóà mɛ́ɓɛ̀ɛ̀. 35 Ɛ́nɛ̀ gwéé ɓò kɛ́ɛ́ ɛ́nɛ̀, ɛ́nɛ̀ dɛ̀ demɔ̀ nɛ̀ yóà. Ɛ́nɛ̀ gbààsɛ yóà mɔ, tàà ɓukili ma yóà bò jisi à ɛ́nɛ̀. À ɛ́nɛ̀ dɛ́a mɛ́ɓɛ̀ɛ̀, ɛ́nɛ̀ bò ba Mgbàà dèmɔ̀, ɛ́nɛ̀ bò du bè Njámbe náà Ŋgɔ̀ nàà Ŋgɔ̀ɔ̀, pɛ́kà bò dòlà wɛ, nɛ̀ ɓò ɓɛ̀ɛ̀ ì ì má dɛ̀ dèmɔ̀ na, yɔ́ɔ̀ ɓò hànyà. 36 Ɛ́nɛ̀ jɔ̀ɔ̀sɛ wì ŋgɔ̀, mɛ ɓɛ̀ kà Njámbe bafa mɔ nɛ̀ jɔ̀ɔ̀si wì yele ŋgɔ̀ à.»
Ɛ́nɛ̀ paɓɛ ma nya mɔ nɛ̀ wè na
(Mat 7.1-5)
37 Ɛ́nɛ̀ há má nya mɔ nɛ̀ wɛ́ na, kà Njámbe à dù tàà hà mà ɛ́nɛ̀ wɛ̂. Ɛ́nɛ̀ paɓɛ ma wì na kima Njámbe bò du tàà paɓi ma ɛ́nɛ̀. Ɛ́nɛ̀ jɔ́ɔ́sɛ̀ nya mɔ nɛ̀ ŋgò, kìmà Njámbe bò jɔɔsi káà ɛ́nɛ̀ ŋgò. 38 Ɛ́nɛ̀ hà wì mɔ, kà Njámbe à hà káà ɛ́nɛ̀, Njámbe bò nɛ̀ɛ̀ kàta mɔ̀nɛ̀ donɛ mɛ́ɓɛ̀ kà ɛ́nɛ̀ boa nɛ̀ɛ̀ mɔ nya mɔ̀nɛ̀, kàà pélè ɓɛ̀, pɛ́kà ɓɛ̀ kàtá kà nɛ̀ wɛ́kà nɛ̀ mɔ hà nya mɛ, Njámbe bò wɛki káà ɓɛ̀ɛ̀ nɛ̀ ɛ́nɛ̀ ɔ̀. Njámbe bò hà mɛ mɔ mɛ́ɓɛ̀ɛ̀ kà mɛ boa hà nya mɛ 39 Yésùsì piobàà mà sìkà yóà nɛ̀náǎ: «Mwâ biyo líì bò nɛ̀ɔɔ dàà mwâ biyo líì? À dɛ́à mɛ ɓɛ̀ yóà yele lúndi kímà ɓéà nàà? 40 Mà bè ɓò lèkɔ̀li bò má pélè mwâ mbô à mɔ nà, ɓɛmɔ̀ŋgɔ̀ ɓɛ̀ bè ɓò lèkɔli kà yama mɔ dòlà wè à, bò du mɛ mwâ mbô à mɔ. 41 Gè á mɛ jɔ̀ɔ̀ nɛ̀ tóka ɓɛ̀ bè tokiɗi ŋgúndu mɔ à gbáálìì nya mɛ é, tàà mɛ jɔ̀ɔ̀ Mgbàà ɓi ŋgɔ̀ à gbáalìì mɛ è? 42 Gèa mɛ ɓwɛ́ nya mɛ nɛ̀náǎ: “Ɗɛ́ mi kɛ̀ gbasɛ́ bè tokiɗì ŋgúndu mɔ à gbaɛlíì mɛ, ɗɛ́ nɛ̀náǎ mà Mgbàà ɓiŋgo boa gbáalíì mɛ”, nàà mɛ, mɛ jɔ̀ɔ̀ mà ɓɛ̀ Mgbàà ɓiŋgo ŋɛ̀ à bomɛ nà, mwâ mɔ̀wúò. Ɓá sú à gbasá ɓɛ̀ mgbàà mbiŋgo kà bò à gbalíì mɛ à kìmà mɛ bò jɔ̀ɔ̀ mɔ gɛlɛ̀lɛ̀ mɔ gbásì tokiɗí ɓɛ̀ɛ̀ à gbáalíì ɓójà mɛ à.»
I yémbiyi té à ki wàà
(Mat 7.16-20; 12.33-35)
43 «Dòlà tè wàà tùù dòlà kìì, kà dàà tè wàà tùù dàà kìì. 44 I yémbiyi tè à kíì wàà. I ɓílí má sàki à jàà ɓɛ̀ kòtó tùù nyáa dale nà. I ɓílí mà lòɗà à tèè kànyà na. 45 Ɓɛ̀ wì kà bò dòlàwè à, de kà dòlàmɔ̀. Pɛ́kà sɛ́à wàà bò dòlà wɛ. Kà ɗàà wì dɛ ɗààmɔ̀. Pɛ́kà sɛ́à wàà bò ɗààwɛ̀. Ìì ɓɛ̀ mɔ kà Mgbàà nù wì à, bò ɓɛ̀ mɔ kà done à sɛ̀à wàà à.»
Ɓɛ̀ wì kà dɛ ɓɛ̀ mɔ mi gwéé à, bò bàtɛ̀nɛ̀ nɛ̀ mi
(Mat 7.24-27)
46 «Gè á kà ɛ́nɛ̀ ɓééɗì nɛ̀ mi è Mgbáámɔ́njá, Mgbáámɔ́njá, tàà dɛ̀ ɓɛ̀ mɔ kɛ̀ ɓwɛ́ à ɛ́nɛ̀ è? 47 Ɓɛ̀ wì kà pɛ̀ nàà mi, kà jéé gbààwɛ̀ mù kà díísì mi, mi bò mbò ɛ́nɛ̀ ɓɛ̀ wì kà bò batɛ́nè nɛ̀ à. 48 Bó batɛ́nè nɛ̀ mà wì kà bɛ́ábàà gàlà. Kà jà kɔ mbi ŋgo wàà ɗuo wɛ̀. Mgbàà kòlò ɓwàla bàà kà lì kòlò dɛ̀ mbé, kà ɗyɛɛɗì gàlà tàà gbisi ma, pɛ́kà bò bɛ́ɛ́ wɛ̀ dòlàwɛ̀, 49 ɓɛ̀ wì kà jéé gbààwè mù tàà dɛ̀ mà mɛ́ɓɛ̀ɛ̀ kɛ̀ gwèè à, bò batɛnɛ̀ nɛ̀ mwâ bɛ́ɛ̀ gàlà ja má kɔ mbi ŋgo wàà ɗuo wɛ̀ na, Mgbàà kòlò ɓwáalabàà kà li dɛ mbɛ́, kà ɗyɛɛɗi ɓɛ̀ gàlà ŋgɔ̀ kà gbini yele.»