Yésùsì boa ɓééɗa báti ɓò yàmi wè wàà
(Mat 4.18-22; Mlk 1.16-20)
5
Mà swéé sikinɔ̀, Yésùsi bò yòli à ŋgólo ɓɛ̀ yèkù i ɓééɗì Gènèzàlɛ́tì à. Ye sápiɗo wì boa ɗéà á ɓii, nâ kà i jéé gbààwé Njámbe. 2 Yésùsì jɔ̀abàà ɓwató wɛ́ɛ́lì, kùni à ŋgólo ku. Yeɓò à yɔ́ɔ̀ gbà kù, kà yóà fali yɔ́ɔ̀ yóà. 3 Kà Yésùsi bi à jàà má tàŋgà ɓwàtò, ɓɛ̀ bò mɔ Simɔni. Kà ɓwɛ́ nɛ̀ à nɛ̀náǎ: «I li ɓwató ɛ́sɛ̀ biɔ̀ nàà li.» Kà Yésùsì kunjìɗì mboa sápiɗò wì mɔ.4 Mɛ́ɓɛ̀ kà mgbɔ̀la wèli mɔ à, kà ɓwɛ́ nɛ̀ Simoni nɛ̀náǎ: «I li ɓwàtó ɛ́sɛ̀ nàà wesɛ̀ li, ɛ́nɛ̀ à yɔ́ɔ̀ mɔ̀nɛ̀, kimà ɛ́nɛ̀ bò ba kɔ́yɔ̀.» 5 Kà Simoni buli nɛ̀ à nɛ̀náǎ: «Mbo mbwala, ɔ̀ haɓaɗa mû mwɛ̂ ɓɛ̀ kiitû tàà gbɛ̂ mà mɔ. Ɓɛmɔ̀ŋgɔ̀ á wɛlimɔ mɛ, mi bò dɛ.» 6 Kà yóà à yɔ̂, i ba kɔ́yɔ̀ súlo wɛ, kà yɔ́ɔ̀ kunjìɗì ɗyààɗa. 7 Kà yóà ɓééɗì nya yóà bàà à má kwalá ɓwató á nɛ̀náǎ, I pɛ̀ɛ̀ à gbááɗa yóà. Yóà hɔ̀obàà kà yɔ̂ yóà doosi ɓwató wɛ́ɛ́lì nɛ̀ súlò kɔ́yɔ̀, kà ɓwató tɔ́ è kà i nɔ̀ li. 8 Mɛ́ɓɛ̀ kà Simɔni Piɛli jɔ̀abàà ɓɛ̀ ɓulá ŋgɔ̀, kà gbini jigòlò à sɔ̀ɔ̀ti Yésùsi, Kà ɓwɛ́ nɛ̀náǎ: «Mgbáámɔ́njá ɛ́lɛ̀ ɗúúsi nɛ̀ mi, pɛ́kà mi bò mwâ njɛmbi.» 9 À ɓɛmɔ̀ŋgɔ̀, kà kéé ba á tɛ̀tɛ̀ wɛ nɛ̀ nya wàà i ɓòabàà à jàà ɓwató à. À wê ɓɛ̀ súlò kɔ́yɔ̀ kà yóà gbɛ̀abâ. 10 Ɓɛ̀ kinɔ́ kéé ŋgɔ̀ bábàà kàà Zaki yɔ́ɔ̀ Zaŋ, yè nyà Simoni, bè Zébèdé. Kà Yésùsì ɓwɛ́ nɛ̀ Simoni nɛ̀náǎ: «Jéà mà kéé na, kunjìɗì hèŋgɔ mi bò dɛ́ nɛ̀náǎ, me ɗɛ mɛ́ɓɛ̀ɛ̀ mɛ̀ɛ̀ nɛ̀ wì.» 11 Kà yóà jisi nɛ̀ ɓwató nàà mbànji li, yóà ɗeabàà mɔ yele i gba nɛ̀nɛ́ Yésùsì.
Yésùsi kpàsasa mwâ ɓai
(Mat 8.1-4; Mlk 1.40-45)
12 Mɛ́ɓɛ̀ kà Yésùsi boabàà à má posi, à tàà káli mà, kà mà wì kà boabàà à tíndòmɔ̀ ɓàì à hɔ̀. Mɛ́ɓɛ̀ kà wì wɛ jɔ̀a Yésùsì à kà duundi mû à tì wàà, kà yayi nɛ̀ à nɛ̀náǎ: «Mgbáámɔ́njá à mɛ gwéà mɛ bò nɛ̀ ɔ̀ dɛ́ náǎ, ɓai mù à sonɛ.» 13 Kà Yésùsì nyafisi kɔ̀ wàà, kà bà nɛ̀ à, kà ɓwɛ́ nɛ̀náǎ: «Mi gwéà, ɓai mɛ à sɔnɛ.» Wàwàà ki kà ɓai sɔni. 14 Kà Yésùsì ɓwɛ́ à à nɛ̀náǎ: «Jii wɛ ɓwɛ́ mà á ma wì na, ɓɛmɔ̀ŋgɔ̀, lufí ɛ́lɛ̀ osasa mùù mɛ nàà mwâ gbɛ́ ɓùyà Njámbe. Kà mɛ hà ɓɛ̀ ɓùyà kà Mɔ̀ísì ɓwɛ́àbàà, mɔ osisinɛ à wì yele è nàà, mɛ ba saŋgitɛ.» 15 Kpà hî nɛ̀náǎ, kumá Yésùsi boabàà ɛla wa pélè sòkò, súlò wì boabàà gbesána wɛ à jéà à nɛ̀ sàkà tíndòmɔ̀ mɔ yóà. 16 Ɓɛmɔ̀ŋgɔ̀ Yésùsì pisònò yóà, kà ɛli à sakwála mɔ sisi wàà, à ɓɛ̀ sokó i bò má hò nà.
Yésùsi kpasasa mwâ kù
(Mat 9.1-8; Mlk 2.1-12)
17 Mà swéé, Yésùsì boabàà à mboa mbwala. Ye Fàliziɛŋ yɔ́ɔ̀ ɓò mbò wì mboŋa Njámbe boabàà du ŋgonù à ŋgolo wàà, yóà gbabàà à ɓɛ̀ le nɔ̀ɔ̀ à jàà Gálilê à yele. Nɛ̀ nàà Yudé tɛkúú ɓò ɓɛ̀ɛ̀ nàà Yélúzàlɛ̀mì à. Ɔ̀ Mgbáámɔ́njá Njámbe yɔ́ɔ̀ Yésùsi bâ bò, kà dɛ́ ɓò tíndòmɔ̀ mɔ à kpàsɛ̀. 18 Yewì kúobàà mà mwâ kú pɛ̀ɛ̀ nɛ̀. Ì ɓuubàà à ŋ ŋgɔ́ɔ́ kipói. Yóà bóbàà à kiyo jɛ biso á à jàà gàlà. Nɛ̀ làsà á à ti Yésùsi. 19 Ɓɛmɔ̀ŋgɔ̀ yóà jɔ̀ɔ mà ɓɛ̀ sokó i bò bisi á hɔ̀ á nà à wê súlò yé wì. Yóà dàŋgabàà jugua nɛ̀ à, kà yóà ɗɔ̀ɔ̀ jùgù, i bisi mwâ tíndòmɔ̀ mɔ, jiisi à wesɛ wì yele à ti Yésùsi. 20 Mɛ́ɓɛ̀ kà Yésùsì jɔ́àbàà ɓùkòlòmɔ̀ yóà, kà ɓwɛ́ nɛ̀ mwâ tíndòmɔ̀ nɛ̀náǎ: «Mbáì mù, mi jɔ́ɔsa mɛ ŋgò à njɛmbi mɛ.» 21 Yeɓò ɓò mbò mbwala mboŋa yɔ́ɔ̀ Fàliziɛŋ tàŋgalabàà nɛ̀náǎ: «Ŋge wì à Kà boa njàànjà Njámbe à è? Ma wì bò ma nɛ̀ ɔ̀ jɔɔsi wì ŋgò à njɛmbi nà, kinɔ Njámbe à bò nɛ̀ ɔ̀ wɛ!» 22 Mɔ̀ɔ wɛ, Yésùsì iŋgobàà tàŋgàlà mɔ yóà, kà ɓwɛ́ nɛ̀ yóà nɛ̀náǎ: «Gè mɔ dɛ́ è ɛ́nɛ̀ dú nɛ̀ ɓɛ̀ kulu tàŋgàlà mɔ nɔ̀ɔ̀ mɛ è? 23 Nɛ̀ ɓwɛ́ wɛ́ nɛ̀náǎ: “Yenjɛmbi mɛ bò jɔ̀ɔ̀sàwɛ̀ ŋgò”, nɛ̀ ɓwɛ́ nɛ̀náǎ: “Kuli ŋgɔ̀, mɛ lɛ̀nɔ̀ géà bò gwasi è?” 24 Ɓɛmɔ̀ŋgɔ̀, mi gwè ɓwɛ́ à ɛ́nɛ̀ nɛ̀náǎ, mi Bè wì, mi bò nɛ̀ ɔ̀ jɔ̂si wì ŋgɔ̀ à njɛmbi, à ŋ ŋgɔ́ɔ́ ɓɛ̀ mbúnù ɓɛ̀ɛ̀.» Kɔ́ɔ́ wɛ́, kà ɓwɛ́ nɛ̀ mwâ kú nɛ̀náǎ: «Mi ɓwɛ́ nɛ̀, mɛ kuli ŋgɔ̀ kùù kipói mɛ, jisi ɛ́lɛ̀ nàà gàlà nɛ̀ mɛ!» 25 Wàwàà, ɓɛ̀ wì ŋgɔ̀ kúlobàà ŋgɔ̀, á li wì yele. Kà kùù kipói wàà, kà boabàà yala nù hɔ̀ à, kà gba ɛ́lɛ̀ nàà gàlà nɛ̀ à, nɛ̀ ɓwɛ́ kuma Njámbe. 26 Mɔ̀ɔ̀wɛ̀ ɗéabàà yóà yele yòò. Yóà jeabàà kée súlòwɛ̀, kà yóà kunjìɗì ɓwɛ́ kuma Njámbe. I ɓwɛ́ nɛ̀náǎ: «Ɓɛ̀ɛ̀ kà dɛ̀a tɛ̀ mwɛ̂ ɔ̀ bò táá jɔ̂ mà nɛ̀ bati!»
Yésùsi boa ɓééɗa Lévî
(Mat 9.9-13; Mlk 2.14-17)
27 Yésùsi tùɓòbàà kà jɔ̀ɔ̀ má mwâ ku làpô, lii wàà Lévî, Dùŋgònù à soko tô wàà. Yésùsì ɓwɛ́àbàà nɛ̀ à nɛ̀náǎ: «Nɛ́nɛ́ mi!» 28 Levî kuliŋgɔ̀, pisini mɔ yele kà nɛ̀nɛ́ à. 29 Lévî kiobàà súlò nyɔ nâ gàlà nɛ̀ à, à wéé Yesùsì. Súlò má ɓò kùù làpô yɔ̂ má wì boabàà à ŋ ŋgɔ́ɔ́ mesa yɔ̂ yóà. 30 Ye Fàliziɛŋ yɔ́ɔ̀ ɓò mbò mbwala mboŋa kà yɔ́ɔ̀ yóà bóbàà, mimolo á mɔ. I ɓwɛ́ nɛ̀ bò yami wɛ Yésùsì nɛ̀náǎ: «Gè à kà nɛ̀ nyɔ nɛ̀ mɔ nɛ̀ nɔ̀ɔ̀ dɔ́ɔ́ ɛ́nɛ̀ ɓò kùù làpô, nɛ̀ ɓɛ̀ wì nɔ̀ɔ̀ à dɛ njɛmbi à è?» 31 Yésùsì bùlabàà nɛ̀náǎ: «Yeɓɛ̀ wì nɔ̀ɔ̀ nɛ̀ sagi tɛ̀ bò ma nɛ̀ gwéà mɔ́kònjì dɔkitɔlo na, ɓɛmɔ̀ŋgɔ̀ ɓò ɓɛ̀ à tido mɔ bò nɛ̀ gwéà à. 32 Mi pɛ̀ɛ̀ ma à ɓééɗà ɓò ɓɛ̀ kà yóà ɓwɛ́ yóà bò sìì à na, ɓɛmɔ̀ŋgɔ̀, ɓò ɓɛ̀ kà yóà i yóà bò ɓò dɛ̀ njɛmbi à. Kimà yóà bò lufini dɛ̀ɛ̀ mɔ yóà.»
Yésùsì boa yamasa wì mɔ à wè sino nyɔ
(Mat 9.14-17; Mlk 2.18-22)
33 Ye Fàliziɛŋ ɓwɛ́àbàà nɛ̀ Yésùsì nɛ̀náǎ: «Yeɓò yami wɛ Zaŋ bò nɛ̀ fulu sini nyɔ́ kɛtɛ́kɛtɛ́, nɛ̀ sákwàlà mɔ, ɓò yami wɛ mɔ̀ɔ̀, yóà dɛ kâ mɛ́ɓɛ̀ɛ̀. Ɓɛmɔ̀ŋgɔ̀, bò mɛ nyɔmɔ kà yóà nɔ kâ dɔ̀ɔ̀.» 34 Yésùsì búlòbàà nɛ̀ yóà nɛ̀náǎ: «Ɛ́nɛ̀ taŋgili nɛ̀náǎ ɓɛ̀ wì nɔ̀ɔ̀ kà i ɓééɗa yóà à yóà ga, yóà à du táá nyɔ ma mɔ ɗɛ yɔ́ɔ̀ mwâ kùù ko à bò? Aa!» 35 Mɔ̀ wɛ, ma siki bò pɛ̀ɛ̀ kà mwâ kùù kɔ bò du gbasa wɛ. Yóà bò sini nyɔ̂. 36 Yésùsì piobàà ɓɛ̀ siká ŋɛ̀ nɛ̀náǎ: «Mà wì bò má nɛ̀ ɔ̀ ɗyaɗi mbɔ́mbi mɔ́kànda mɔ ɓɔ̂nyi sɛsɛ mɔ́kànda na, à wì dɛ́à mɛ́ɓɛ̀, mbɔ̀mbi mɔ́kandà bò ɗyààɗi tɛ̀, mbɔ̀mbi mɔ́kanda yɔ̂ ma ɓàà sɛsɛ wɛ lɛɛsini má nà. 37 Ma wì nɛ̀ɛ̀ ma tɔ̀ɔ̀ dɔ̀ɔ̀ à gwéé dàà ɗyo nà, à wì dɛ́à mɛ́ɓɛ̀ tɔ̀ɔ̀ ɗɔ̀ɔ̀ bò ò gwéé dáá ɗyo, Kà sɛ kà dáá ɗà. 38 Ɓɛmɔ̀ŋgɔ̀, lɛɛsini è, i ɗé tɔ̀ɔ̀ dɔ̀ɔ̀ à tɔ̀ɔ̀ dàà dyo. Mɛ́ɓɛ̀ ka dɔ̀ɔ̀ nɛ̀ dàà dyo bò dù ɓananawɛ̀ dòlàwɛ̀”» 39 Mà wì kà gwee tɔ́ɔ́ dɔ̀ɔ ɗé nɔá gwɛ́ɛ́ wɛ́ le à, bò má nà. Pɛ́kà i ɓwɛ́ nɛ̀náǎ: “Gwɛ́ɛ́ dɔɔ à bò dòlà wɛ.”»