Satani boa wéa Yésùsì
(Mat 4.1-11; Mlk 1.12-13)
4
Yésùsì dóosa wè nɛ̀ Gɛ́lɛ́lɛ́ Lííndì gbàbàà nàà ɓɛ̀ li ŋɛ̀ julidɛ̀, kà Lííndì Njámbe dáà à, à ɛ̀lɛ̀ nɛ̀ ɗúùsì nɛ̀ wì. Yésùsì dóosa we nɛ̀ Gɛlɛlɛ Lííndì gbàbáá nàà ɓɛ̀ li ŋɛ̀ julidɛ̀, kà Lííndì Njámbe dáà à, à ɛ̀lɛ̀ nɛ̀ ɗúùsì nɛ̀ wì. 2 Satani wéàbàà à màko jɛ̀ wànààlì, á ɓɛ̀ njè nɔ ŋgo nyɔ nyɔ́ɔ́ mà mɔ na, mɛ́ɓɛ̀ɛ̀ kà ɓɛ̀ siki ŋgo péla. Kà fòtò bà à, 3 kà satani ɓwebàà nè à nɛ̀náǎ: «À boa è me bò bè Njámbe te Bè Njámbe ɓwe à ɓɛ̀ ɗiɓɔ̀ko à pɛ ɓɛ̀ mo i nyɔ.» 4 Kà Yésùsì bùli nè à nɛ̀náǎ: «Bò tóà wɛ̀ à jàà mɔkonɔ Njámbe nɛ̀náǎ: “Wì gbasi mà nɛ̀ tùù nyɔ nà.”»5 Kà Satani kùù Yésùsì ɛ́lɛ̀ nɛ̀ ɗùùsi nàà ŋgɔ́ɔ́, kà bò à jú njàà à ŋgɔ́ɔ́ mbúnù à kinɔ sikì. 6 Kà ɓwe nè à nɛ̀náǎ: «Mi bò hà me tiso Mɔ́konji, nɛ̀ ŋgoŋ. Pɛ́kà ɓɛ̀ mɔ nɔ̀ ŋgɔ̀ bò ɓɛ̀ nɛ̀ ŋàà, mi bò nɛ̀ hà wabɛ̀ gɛ gwéà. 7 À mɛ gbino jigɔ́lo à ti mù, kà mɛ ɓúɓì mi, ɓɛ̀ mɔ nɔ̀ mɛ yele bò dú bɔ̀ mɛ.» 8 Yésùsi búlòbàà nè à nɛ̀náǎ: «Bó tóàwɛ̀ à mɔ̀kànɔ̀ Njámbe nɛ̀náǎ: “Mɛ bò ɓuɓi Mgbáámɔ̀njà Njámbe, mɛ dɛ tùù tô wàà.”» 9 Kà Satani jíí kùù à ɛ́lɛ̀ nɛ̀ nâ Yélúzàlɛ̀mì kà kùù à yóósè à ŋgɔ́ɔ́ jugu Mgbàà gálà Njámbe, kà ɓwɛ́ nɛ̀ à nɛ̀náǎ: «À boa mɛ bò Bé Njámbe hɔ́ɔ́sɛ̀ mùù mɛ kɔ́ dùùɗì á mbúmù. 10 Pɛ́kà bò tóà wɛ à mɔ́kànɔ Njámbe nɛ̀náǎ: “Njámbe bò ɓwɛ́ nɛ̀ iŋgèlesì wàà nɛ̀náǎ, i ɓánɛ̀nɛ̀ mɛ.” 11 Bò kàà tóà wɛ nɛ̀náǎ: “Yóà bò ɓùù kàà mɛ à kɔ̀ yóà, mɔ dɛ nɛ̀ naŋga mɛ à ɗukiɗi ma ɗiɓokò na.”» 12 Kà Yésùsì ɓuli nɛ̀ à nɛ̀náǎ: «Mɔ́kànɔ̀ Njámbe ɓwɛ́ nɛ̀náǎ: “Mɛ wéà ma Mgbáámɔ́njá Njámbe mɛ na.”» 13 Kɔɔɗɔ̀ wéà Yésùsi à kùlù yòli yele, kà Satani gba ɛ́lɛ̀ ɗùùsi nɛ̀ à, hɔsɛ à ɓɛ̀ siki kà Njámbe gwɛyabàà.
Kunjìɗì tó Yésùsi nàà Galilé
(Mat 4.12-17; Mlk 1.14-15)
14 À ɓɛ̀ siki kà Yésùsi jisobàà ɛ́lɛ̀ nàà Galilɛ à, boa dóne nɛ̀ ɔ̀ Gɛ́lɛ́lɛ́ Lííndì. Kà kumá li wa ku ɓɛ̀ kú nja gɔ yele. 15 Yàmasabàà wì mɔ à jàà gàlà sakwàlà mɔ, kà wì yele wéli dòlà mɔ ɓɛ̀se à.
I bino Yésùsì nàà Nazàlɛ́tì
(Mat 13.53-58; Mlk 6.1-6)
16 Kà Yésùsì ɛli nàà Nazàlɛ́tì à ɓɛ̀ le ŋɛ̀ kà mgbàà ŋgabàà hɔ̀. À lííswee ɔmi Yufi. Kà bí à gàlà sakwala mɔ mɛ́ɓɛ̀ kà dɛ dɛ à nɛ̀ bátì à, kà kulì ŋgɔ̀ mɔ tɔli mgbâwe Njámbe. 17 I kúobàà mɔ́kànɔ̀ kulawɛ̀ Njámbe è Ezaì à, kà buli à ɓɛ̀ sókó wì tóà nɛ̀náǎ:
18 «Lííndì Mgbáámɔ́njá bò à tɛ mù
pɛ́kà taɗabàà mi nɛ̀náǎ: Mi dú mwâ ɓwɛ́ dòlà Mɔtómò à à bò sà,
Pɛsi à mi mɔ ɓwe à mɔtamba nɛ̀náǎ, yóà bò poka wɛ,
Ne ɓwɛ́ wɛ̀ à ɓɔ bió líí nɛ̀náǎ: Yóà bò jɔ̀ɔ̀ mɔ gɛlɛ̀lɛ̀
Mɔ pɛ à póka wì nɔ̀ɔ̀ à jɔ̀ɔ̀ kotɔ,
19 nè ɓwe ɛ́nɛ̀ nɛ̀náǎ: Pémbé demɔ̀ Mgbààmɔ́njà hɔ̀ à.»
20 Kɔ́ɔ́wɛ̀, kà Yésùsi liɓiki Mɔ́kànɔ̀a, jisisi hà mwâ dɛ tó à gàlà sakwalamɔ, kà tiki dúnù. Yeɓɛ̀ wì nɔ̀ɔ̀ yele i boa ki à jàà gàlà sakwalamɔ, i seɓabàà á kpɛɛ. 21 Kà Yésùsì ɓwɛ́ nɛ̀ yóà nɛ̀náǎ: «Ɓɛ̀ tɔla mɔ́kànɔ kà ɛ́nɛ̀ jéà mi à tɔ́là wɛ mwɛ̀ɛ̀ à, dɛ́à tɛ̀ à ɛ́nɛ̀ ɓɛ̀ wì nɔ̀ɔ̀ kà ɛ́nɛ̀ boa jéà mi à tɔ́là wɛ à.» 22 Yeɓɛ̀ wì nɔ́ ŋgɔ̀ yele i boabàà séɓa à, jéà de wɛ súlòwɛ̀, nɛ̀ kàma dòlà mgbaawe nɔ̀ɔ̀ à gba wɛ à nua, kà yóà ɓwɛ́ nɛ̀náǎ: «Bè Yosèpì kà hè à?» 23 Kà Yésùsì buli nɛ̀ yóà nɛ̀náǎ: «Mi i, ɛ́nɛ̀ bò tasi mi ɓɛ̀ sika kà ɓwɛ́ nɛ̀náǎ: “Mɛ mwâ saki wì, sakɛ mùù mɛ nɛ̀ tɛ mɛ.” Ɔ̀ jéà ɓɛmɔ̀ nɔ yele mɛ dɛ́àbàà nàà Kapɛlɛnaumi, dɛ kà ɓɛ̀ kinɔ mɔ ŋgɔ̀ kɛ̀ à jàà le nɛ̀ mɛ.» 24 Kà jii ɓwɛ́ à yóà nɛ̀náǎ: «À tɛ̀kìlímɔ̀, i ba ma gɛnɛ kulawé Njámbe dòlà wè nàà mɔsùma lé wàà na. 25 À tɛ̀kìlímɔ̀, mi ɓwɛ́ à ɛ́nɛ̀ nɛ̀náǎ: À siki ɓɛ̀ kulawɛ Njámbe Eli à, pelabàà pembe wááta nɛ̀ ndambo táá ma kolo, kà Mgbàà foto bi à jàà nja yele. À ɓɛ̀ siki ŋgɔ̀ ké gɔla boabàà à já Izàɛ́lì súlòwɛ̀. 26 Kpà hî nɛ̀náǎ: Njámbe ɛsi ma Eli nàà ɓɛ̀ ke gɔla nɔ̀ɔ̀ bàà à njà Izàɛ́lì à na, ɓɛmɔ̀ŋgɔ̀ lufibàà ɛ́sɛ̀ nàà ma ke gɔla sikinɔ, bóbàà gɛnɛ, du á nù nàà ɓɛ̀ lè Salɛpta, à jàà Sìdónì. 27 À siki ɓɛ̀ kulawé Njámbe Elize à, bò ɓai boabàà kàà nàà Izàɛ́lì súlòwɛ̀. Kpà hî nàà ma taŋga yóà bà mà sáŋgitɛ̀ nà, kinɔ mɔ Náámànì ɓò Siliyɛ bàà sɔni.»
28 À siki ɓɛ̀ kà ɓɛ̀ wì nɔ̀ɔ̀ bàà jàà gàlà sakwalamɔ jeabàà ɓɛ̀ Mgbàà wè nɔ ŋgɔ̀ kà sɛ́à yóà nyi súlòwɛ̀. 29 Kà yóà kuliŋgɔ tuɓisi Yésùsi ɛ́lɛ̀ nɛ̀ nàà jɔ̀ɔ̀ lè à ŋgɔ̀ ŋgaaɗi kà le yóà bò bɛ̀ɛ̀wɛ hɔ̀, mɔ tosiki à ɛ́sɛ̀ nàà ti ŋgaaɗi 30 Ɓɛmɔ̀ŋgɔ̀ kà Yésùsi péli à soko yóà ɛ́lɛ̀.
Yésùsì saka ma wì nɛ̀ ɗàà lííndì
(Mlk 1.21-28)
31 Kɔ́ɔ́ wɛ, kà Yésùsì ɛli nàà ma posi Kapɛlɛnaumi, nàà Galile. À liiswee ɔmi zuifi, boabàà à yamasa gbààwè Njámbe à wì. 32 Yeɓɛ̀ wì nɔ̀ɔ̀ ŋgɔ̀ boabàà nɛ̀ kàmàmɔ̀ à wèè kùlú mboamɔ̀ wàà, pɛ́kà, Yésùsì wéwélì à mɔ nɛ̀ ŋgoŋ. 33 À jàà gàlà sakwala mɔ, ma wì boabàà nɛ̀ ɗàà lííndì à tɛ wàà. Kà mɛ̀ɛ̀ nù lemba wè nɛ̀náǎ: 34 «Ah! Géà mɛ gwéé nɛ̀ ɔ̀ é, Yésùsì Bé ɓò Nazàlɛ́tì. Mɛ pɛ̀ɛ̀ à bisò dɔ̀ mɔ̀ɔ̀? Mi i mɛ dòlà wɛ, mɛ bò ɓɛ̀ Gɛ́lɛ́lɛ́ wì kà Njámbe pɛ́sàà!» 35 Yésùsì kpɛ ŋgi nɛ̀ à, kà ɓwɛ́ nɛ̀ à nɛ̀náǎ: «kpe nù mɛ, kà mɛ gba à tɛ̀ ɓɛ̀ wì!» Kà ɗàà lííndì gbasi à dúuɗi à mbúmù, à lii wì yele, kà gba à tɛ wàà tàà dɛ ma ɗàà mɔ nɛ̀ à. 36 Kà yóà yele kàmi mɔ súlòwɛ̀, kà yóà áánì à soko yóà nɛ̀náǎ: «Gè kulu gbààwe à? Ɓɛ̀ wì hà ɗàà lííndì mboŋa, kà yóà tuɓi gba ɛ́lɛ̀ é.» 37 Lí Yésùsì nyaŋana tɛ̀ à ɓɛ̀ ku nja ŋɛ̀ ŋgɔ̀ yele.
Yésùsi kpasasa sulo bò tidomɔ
(Mat 8.14-17; Mlk 1.29-34)
38 Kɔ́ɔ́wɛ̀, Yésùsì gbabàà gàlà sàkwàà mɔ, ɛ́lɛ̀ nàà gàlà nɛ̀ Simɔni, kpà nana kè Simɔni nɛ̀ ɓɛ́ŋgàmùù. Yeɓɛ̀ wì nɔ̀ɔ̀ bàà ki à ɓwɛ́ya nɛ̀ à nɛ̀náǎ: «Dɛ ma mɔ á à.» 39 Kɔ̂ ɗɔ ɓɛ̀ weli mɔ ŋgɔ̀, kà Yésùsì guusi mû à ŋgolo fɔ̂ Simɔni, kpɛŋgè nɛ̀ mɔ́kòsà. Kà mɔ́kòsà gba à tɛ wàà. Waa wàà fɔɔ Simɔni kulo à ŋgɔ̀ dɛ tô yóà.
40 À nyii kitû, ɓɛ̀ wì nɔ bàà nɛ̀ ɓò tíndòmɔ̀ mɔ, kulu wè yele à, i péà nɛ̀ yóà nàà Yésùsi. Kà ɗe kɔ à ju yóà, kà wì nɛ̀ wì kpà sagitɛ. 41 Súlo ɗàà lííndì gbabàà à tɛ ɓɔ tíndòmɔ̀ mɔ, nɛ̀ mɛ̀ɛ̀ nù nɛ̀náǎ: «Mɛ bò Bé Njámbe!» À ɓɛmɔ̀ŋgɔ̀, kà Yésùsi kpeŋgi nɛ̀ yóà, mɔ dɛ nàà i wele à ma mɔ nà, pɛ́kà yóà iŋgobàà è bò mwâ poki wì.
Yésùsi à bwee dòlà motom ɔ na Yudé
(Mlk 1.35-39)
42 Mɛ́ɓɛ̀ɛ̀ kà mɔsayi sábàà, kà Yésùsì túɓi à ɓɛ̀ jàà posi ŋgo ɛ́lɛ̀ ɗúúsì à mà soko sisi wàà kà ma wì bò ma hɔ̀ na. Súlò yewì kunjiɗobàà kiyo à, mɛ́ɓɛ̀ɛ̀ kà yóà kpà à, i ɓwɛ́ nɛ̀ à nɛ̀náǎ: «Kpà ma kè i na, dunu ɔ̂ nɛ̀.» 43 Yésùsi ɓwɛ́à nɛ̀ yóà nɛ̀náǎ: «Lɛ́ɛ́sìnì kà nà mi ɓwe Dòlà Mɔtómɔ̀ nja nɛ̀ Njámbe, pɛ́kà pɛsi à mi à wéwɛ̀ɛ̀.» 44 Kɔ́ɔ́wɛ̀, kà ɛli à nja Galilé yele, nɛ̀ ɓwɛ́ dòlà Mɔtómò à jàà gàlà sakwàlà mɔ à jàà nja.