Ɓwɛ̀ Njámbe Zaŋ mwâ ɗuɓi wì
(Mat 3.1-12; Mlk 1.1-8; Zaŋ 1.19-28)
3
Ɓɛ̀ siki, Tibeli boabàà nɛ̀ pembe ɓukɔ nɛ̀ mɔ̀ɔ̀lɔ kà bò Mgbàà mɔ́kònjì, Posi Pilati bóbàà ŋgɔmìnà nàà yudé, Elodi mɔ́kònjì nàà Galilé, ɓòjà wàà Filipi mɔ́kònjì nàà Itule Takoniti, Lisaniasi bóbàà kàà mɔ́kònjì nàà Abileni. 2 À ɓɛ̀ kinɔ siki ŋgɔ̀, Ana yɔ́ɔ̀ Kàífì bóbàà Mgbàà ɓò gbɛ ɓwúyà Njámbe, ɓɛ̀ siki ŋgɔ̀ bàà kà Njámbe wélabàà mɔ nɛ̀ Zaŋ bè Zàkàlì à jàà ɓɛ̀ soko kà nduɓè yɔ́ɔ̀ té bò ma hɔ̀ nàà. 3 Zaŋ ɛ́làbàà à ɓɛ̀ jàà nja ŋɛ̀ à ŋgolo ɓɛ̀ li è Zulidɛŋ nɛ̀ héà mbéyà nɛ̀náǎ: «Ɛ́nɛ̀ lufini ɗàà kpasi mɔ̀nɛ̀, kà nɛ̀ ɗuɓi, kima Njámbe bò jɔɔsì ɛ́nɛ̀ ŋgò à njɛmbi mɔ̀nɛ̀.» 4 Mɛ́ɓɛ̀ kà bò tóà wɛ à jàà mɔ̀kánɔ̀ gbààwè kúlàwè Njámbe é Ezaì nɛ̀náǎ: «Ma wì boa héà mbéyà à jàà ɓɛ̀ soko kà tè yɔ́ɔ̀ nduɓè bò ma hɔ̀ na nɛ̀náǎ: Ɛ́nɛ̀ ɓɔɔnyɛ gbò Mgbààmɔ́njà, ɛ́nɛ̀ yòòsɛ̀ gbò wàà sìì!5 Mɔ̀ɓéŋga yele bò du donɛ,
konoŋgo yele yɔ́ɔ̀ ŋgaɗi yele bò du mbɛ́ɓɛ̀kɛ̀, gbò nɔ̀ɔ̀ gilo wɛ̀ bò pɛ̀ɛ̀ sìì, ɓɛ̀ gbo nɔ̀ɔ̀ tùù ɗiɓoko à bò du ɓɔɔnya wɛ.
6 Yewì yele bò jɔ̀ɔ̀ mɛ́ɓɛ̀ɛ̀ kà Njámbe poki wì à.»
7 Bóàbàà ɓwɛ́ wɛ̀ à píò wì nɔ̀ɔ̀ bàà pɛ̀ɛ̀ wɛ̀ ɗuɓo wɛ nàà à nɛ̀náǎ: «kùlù kolo, ò à yàmisì ɛ́nɛ̀ yuo ɓɛ̀ pààsɛ́à Njámbe pɛ́nɛ̀ o? 8 À ŋgɔ̀ ɛ́nɛ̀ dɛ̀ ɓɛ̀ mɔ kà bò è ɛ́nɛ̀ lufono kpasi à. Ɛ́nɛ̀ dù à ma ɓwɛ́ wɛ nɛ̀ tùù nù nàà,ɔɔ bò nɛ̀ Abalahami mɔ ɗibafa na. Pɛ́kà mi ɓwɛ́ à ɛ́nɛ̀ tɛ̀kilì mɔ nàà, à soko ɓɛ̀ ɗìbokò nɔ̀ɔ̀, Njámbe bò nɛ̀ kiɓisi bé à Abalahami. 9 Ɓɛ̀ siki mɔ́kiwé bò i ɓɔ́ŋgà wɛ, mɔ ɗɛ ŋgiɗi kù tè. Tè yele kà wàà ma dòlà kìì à na, i bò ɗɛ̀ŋgiɗì à, i kùù á pi à wèè.»
10 Mɛ́ɓɛ̀ kà píò wì jéàbàà ɓɛ̀ weli mɔ ŋgɔ̀ à, kà yóà áánì nɛ̀ Zaŋ nɛ̀náǎ: «À ŋgɔ̀ɔɔ bò dɛ̀ kíà?» 11 Zaŋ búlòbàà nɛ̀ yóà nɛ̀náǎ: «Wà ɓɛ̀ nɛ̀ mɔ́kàndà wɛ́ɛ́lì à, à kùù sikinɔ hà ɓɛ̀ wì tàà nɛ̀, wáɓɛ̀ɛ̀ nɛ̀ mɔ̀ɔ̀ nyɔŋga, à dɛ kinɔ mbɛ̀kɛ̀.»
12 Yeɓò kùù lápo pɛ́à kàà à kiyo jɛ̀ wɛ nɛ̀náǎ i ɗuɓi yóà, kà yóà áánì nɛ̀ Zaŋ nɛ̀náǎ: «Mbo bwala,ɔɔ bò dɛ́ kíà?» 13 Kà búli nɛ̀ yóà nɛ̀náǎ: «Ɛ́nɛ̀ áánè ma lápo pélè soko na.»
14 Ye sɔ̀dya kàà áánà nɛ̀ à nɛ̀náǎ: «Nààɔɔ, ɔ̀ lɛsini nɛ̀ dɛ̀ wɛ kíà?» Búlòbàà nɛ̀ yóà nɛ̀náǎ: «Ɛ́nɛ̀ kùù à mà mɔni nɛ̀ wì nɛ̀ ɔ̀ nà, ɛ́nɛ̀ hɛ́lɛ́ má wì nɛ̀ wè gɔ na, mɔ̀ɔ̀wɛ̀ ɛ́nɛ̀ lúfí mɛŋgɛlɛ kpéà wì mɔ̀nɛ̀.»
Dòlà Mɔtómò wàà ɓɛ̀ɛ̀ pɛ̀ɛ̀ nɛ̀
(Mat 3.11-12; Mlk 1.7-8)
15 Píò wì boabàà á kɛ́ɛ́ wɛ done nɛ̀ ɓúkolo mɔ, wì yele tá ŋgalabàà nɛ̀náǎ, Zaŋ bò wáɓɛ̀ɛ̀ kà Njámbe taɗabàà. 16 Zaŋ búlòbàà nɛ̀ yóà yele nɛ̀náǎ: «Mi, mi duɓi ɛ́nɛ̀ nɛ̀ lì, mɔ̀ɔ̀wɛ̀, ma wì bò pɛ́nɛ̀, à bò nɛ̀ ɔ̀ pélè mi, mi bò má nɛ̀ ɔ̀ buli pɛ́ kpákà wàà na. À, bò ɗuɓi ɛ́nɛ̀ nɛ̀ Gɛ́lɛ́lɛ́ Líínɗì, tɛ̀ kùù wéé. 17 Bò nɛ̀ njɛkɔ à kɔ mɔ kɛtini gbàà wɛ yɔ́ɔ̀ palawɛ. Bò gbɛsini gbàà á jàà gòò wàà, ɓɛmɔ̀ŋgɔ̀ kà dɔ palawɛ à jàà ɓɛ̀ wéé è kà bi mà nà.»
18 Zaŋ ɓwɛ́àbàà Dòlà Mɔtómò à píò nɛ̀ hà yóà súlò ma kwàla mbwala gbààwɛ̀ Njámbe.
Sɔ̀ɔ̀nɗi tô Zaŋ
19 Elodi mɔ mɔ́kònjì kúobàà Elodiadi kè ɓòjà wàà, tɛ kùù ɓɛ̀ dàà dɛ mɔ nɔ̀ɔ̀ yele kà boabàà à dɛ́ wɛ̀ à, mɔ wɛ kà Zaŋ há à tétò à. 20 Kà Elodi jii dɛ ma ɗàà mɔ. À ɗɛ́à Zaŋ á mɔ́nyɔ́lɛ̀.
Ɗuɓo Yésùsì
(Mat 3.13-17; Mlk 1.9-11)
21 Mɛ́ɓɛ̀ kà Zaŋ ɗuɓo wì yele, kà Yésùsì ɗuɓi kàà tɛ̀. Ɓɛ̀ siki kà boabàà sakwala mɔ, kà líŋgɔ̀ gbo tɛ. 22 Kà Gɛ́lɛ́lɛ́ Lííndì jili à tɛ wàà bátɛ̀ nɛ̀ mùù ndɛ̀ndɛ̀kɛ̀. Kɔ́ɔ́wɛ̀, kà ma gɛ toli nàà liŋgɔ nɛ̀náǎ: «Mɛ bò bé mù, wáɓɛ̀ɛ̀ kà mi gwéà súlòwɛ̀, kà mi ɗéà mɛ̀ŋgàlàmɔ̀ mù yele à tɛ̀ wàà.»
Ndado ŋgàà bafa Yésùsì
(Mat 1.1-17)
23 À kúnjìɗì to Yésùsì, bò bàà nɛ̀ ɔ̀ du nɛ̀ pémbè makowɛ wààtà. Mɛ́ɓɛ̀ kà i boabàà à ta ŋgala wɛ̀, bò bè Yosepi, Yosepi bè Eli, 24 Eli bè Matati, Matati bè Lévi, Lévi bè Meliki, Meliki bè Yani, Yani bè Yosepi, 25 Yosepi bè Matatiyasi, Matatiyasi bè Amosi, Amosi bè Nahumi, Nahumi bé Ɛsili, Ɛsili bè Nagai, 26 Nagai bè Maati, Maati bè Matatiasi, Matatiasi bè Séméini, Séméini bè Yoseki, Yoseki bè Yoda, 27 Yoda bè Yòànáni, Yòànánì bè Lésa, Lésa bè Zolobabeli, Zolobabeli bè Sálàsíɛ̀lì, Sálàsíɛ̀li bè Néli, Néli 28 bè Meliki, Meliki bè Adi, Adi bè Kosami, Kosami bè Elimadami, Elimadami bè Éli, 29 Eli bè Yésùsì, Yésùsì bè Éliézeli, Eliézeli bè Jolimi, Jolimi bè Matati, Matati bè Lévi, 30 Lévi bè Siméɔni, Siméɔni bè Judasi, Judasi bè Yosepi, Yosepi bè Yonami, Yonami bè Éliyakimi, Eliakimi, Eliakimi 31 bè Méléya, Meléya bè Mena, Mena bè Matata, Matata bè Natâŋ, Nataŋ bè Daviti, Dviti 32 bè Jesé, Jesé bè Obɛ̀lidi, Obɛ̀lidi bè Bowazi, Bowazi bè Sala, Sala bè Nasɔni, Nasɔni 33 bè Àmìnàdábì, Àmìnàdábì bè Alini, Alini bè Hetilôni, Hetilôni bè Peletisi, pélètisi 34 bè Juda, Juda bè Isaaki, Isaaki bè Abalahami, Abalahami bè Téla, Téla bè Nawoli, Nawoli 35 bè Selugi, Selugi bè Léwu, Léwu bè Pelegi, Pelegi bè Ébeli, Ebeli bè Sela, Sela 36 bè Kàyina, Kàyina bè Alipasadi, Alipasadi bè Semi, Semi bè Nowé, Nowé bè Lameki, Lameki 37 bè Metusela, Metusela bè Hénoki, Hénoki bè Yaledi, Yaledi bè Maléli, Maleli bè Kàyina, Kàyina 38 bè Énosi, Enosi bè Seti, Seti bè Adami, Adami bè Njámbe.