Kpà tɛ́ Yésùsì
(Mat 1.18-25)
2
À ɓɛ̀ siki ŋgɔ̀ Mgbàà mɔ́kònjì Loma è Ogusti hábàà mboŋa nɛ̀náǎ, i tɔlɛ wì yele à jù njà. 2 Bati ɓɛ̀ kulu tɔla wì ŋgɔ̀ à dɛ́ tɛ ɛ̀, à ɓɛ̀ siki ŋgɔ̀ Kiliniusi bàà bò ŋgɔ́ɔ́mina à ɓɛ̀ jàà kù njà è Sili à. 3 Yewì yele ɛ́labàà à tóà li yóà nàà ɓɛ̀ posi kà i kpábàà ndandò yóà. 4 Yosepi Mgbàà kàà nàà ɓɛ̀ posi è Nazàlɛ́tì à, nàà Galile, mɔ ɛ́lì nàà ɓɛ̀ posi è Betɛlɛhɛmi à, nàà Yudé, kà boabàà lè Mgbàà mɔ́kònjì è Daviti à, pɛ́kà bóbàà à jàà ndando Daviti. 5 Ɛ́labàà à tɔ́à li wa yɔ́ɔ̀ joŋga wàà Malia kà bóbàà nè twèè à. 6 À siki ɓɛ̀ kà yóà boabàà nàà Betelehemi à, kà siki njɔ̀ wa hɔ̀. 7 Kà ɗɛ́ wì à mbúnù bémbéwèè, bati bè wàà, kà liɓiki à nɛ̀ mɔ́kàndà, kà kùù à lase à jàà bɔka kà ɓwúyà nyɔmɔ hɔ́à, pɛ́kà yóà boa ma nɛ̀ soko nàà ɓɛ̀ gàlà kà gene là làà nù hɔ̀ nà.Iŋgèlesì hɔ́à nàà ɓò ɓanìnì ɓwúyà
8 À jàà ɓɛ̀ kinɔ kù nja ŋɛ̀ ŋgɔ̀ boabàà nɛ̀ ɓò ɓanìnì ɓwúyà, yóà la làà nù à jàà pímbà à ɓanànà dúú ɓwúyà yóà. 9 Kà ma Iŋgèlesì Mgbààmɔ́nja hɔ̀ nàà yóà, kà kùmà Mgbààmɔ́nja gùɓìɗì yóà nɛ̀ gɛ́lɛ̀lɛ̀ mɔ wàà yele, kà kéé ba yóà súlòwɛ̀. 10 Kà Iŋgèlesì ɓwɛ́ nɛ̀ yóà nɛ̀náǎ: «Ɛ́nɛ̀ jéà ma kéé nà, pɛ́kà mi pɛ̀ɛ̀ à ɓwɛ́ wɛ à ɛ́nè dòlà Mɔtómò, kà bò hà wì yele Mgbàà mɛŋgàlà mɔ à. 11 Dòlà Mɔtómò wɛ̀ héà: À ɓɛ̀ kììtu ŋɛ̀, na jàà posi nɛ̀ Daviti, nàà Kpásìsì kpà te, kpà tè à wè mɔ̀nɛ̀, bò Mgbààmɔ́nja, wáɓɛ̀ɛ̀ kà Njámbe taɗabàà. 12 Ɛ́nɛ̀ jɔ̀ɔ̀ ɓɛ̀ ɗémi kà ɛ́nɛ̀ bò yémbìyì nɛ̀ á héà. Ɛ́nɛ̀ bò kpà ma tɔ̀ɔ̀ mbɛ̀sɛ̀ bè, liɓiki nɛ̀ mɔ́kàndà, lasi à jàà ɓoka kà ɓwúyà nyɔmɔ hɔ́à.» 13 Tàà kàli màà, kà ma dùù iŋgèlesì nàà lìì ŋgo pɛ̀ɛ̀ gbésèné nɛ̀ á, yóà boa beya kuma Njámbe nɛ̀náǎ: 14 « Kuma à du nɛ̀ Njámbe nàà ŋgɔ̀, tènàtɛ́ nàà mbúnù à ɓóɓɛ̀ kà Njámbe gwéé à.»
Yeɓò ɓanìnì ɓwúyà ɛ́là nàà Bɛ́tɛ̀lɛ̀hɛ́mì
15 Kɔ́ɔ́wɛ̀, kà yeÍŋgèlesì ɛli nàà ŋgɔ̀ kà ɓò ɓanìnì ɓwúyà ɓwɛ́ à sokó yóà nɛ̀náǎ: «Ɔ̀ nɔ̀ɔ̀sè nàà Bɛ́tɛ̀lɛhɛ̀mì à jɔ̀ɔ̀ ɓɛ̀ mɔ kà hɔ́à nɛ̀ kia, ɓɛ̀ kà Mgbáámɔ́njá mbòàɔɔ à.» 16 Tàà kálì mà, kà yóà ɛ́li hɔ̀ nɛ̀ kì, ì jɔ̀ɔ̀ Málíà yɔ́ɔ̀ Yósɛ̀pí kà ì jí jɔ̀ɔ̀ tɔ́ɔ́ mbɛ̀sɛ̀ bè làsì à jàà ɓókà. 17 Mɛ́ɓɛ̀ kà yóà jɔ́abàà tɔ́ɔ́ mbɛ́sɛ̀ bè kà yóà kúnjìɗì nɛ̀ɛ̀ɗá ɓɛ̀ mɔ kà Iŋgèlesì ɓwɛ́àbàà à yóà bèèsɛ ɓɛ̀ mbɛ́sɛ̀ bè ŋɛ̀ ŋgɔ̀ à. 18 Yeɓɛ̀ wì nɔ̀ɔ̀ yele kà jéà ɓɛmɔ̀ kà ɓò ɓanìnì ɓwúyà ɓwéabàà, kàmabàà gbààwé yóà súlò wè. 19 Malia boabàà ɓanana ɓɛ̀ mɔ nɔ̀ɔ̀ ŋgɔ̀ yele, nɛ̀ tà ŋgàlàwè à jàà sɛ́à wàà mɔ i nɛ̀ dòlàwɛ̀. 20 Kɔ́ɔ́wɛ̀, kà ɓɔ́ ɓanìnì ɓwùyà jìsi, ɛ́lɛ̀ nɛ̀ ɓwé kuma Njámbe, yɔ́ɔ̀ béà géma Njámbe. À wè ɓɛ̀ mɔ yele kà yóà jɔ̀àbàà, nɛ̀ ɓɛ̀ mɔ kà yóà jéà, pɛ́kà mɔ yele déà té mɛ́ɓɛ̀ɛ̀ kà iŋgèlesì ɓwèàbáà à yóà. 21 Jé mɔlɔ doko wààtà kɔ̀ wɛ kà ɓɛ̀ siki kà wì + \fr 2.21 \ft gùàsi bè hɔ̀, kà i gbali á è Yésùsì, ɓɛ̀ lìì ŋe kà iŋgèlesì ɓwéabàà à Malia ɗɛ́ bò ta kùù ma twèè à.
Mbóa Yésùsì à Mgàà gála Njámbe Yélúzàlɛ̀mì
22 Ɓɛ̀ siki kà Malia yɔ́ɔ̀ Yosɛpi áánìbàà i ba yɔ́à gɛlili bè, mɛ ɓɛ̀ kà mboŋa Moisi ɓwéabàà hɔ́à, yóà kùobàà bè ɛ́lɛ̀ nɛ̀ nàà Yélúzàlɛ̀mì, mɔ kúù à mbo à Mgbáámɔ́njá. 23 Pɛ́kà bò tóà wɛ à mboŋa Mgbáámɔ́njá nɛ̀náǎ: «Bati bé yele kà bo bémbéwéé ǎ, ì kúú à ha Mgbáámɔ́njà» 24 Malia yɔ́ɔ̀ Yósɛ̀pì ɛlabáá kàà ha ɓɛ́ ɓwúyá kà mboŋa Mgbáámɔ́njá ɓwɛabáá è wì hà, a sokó wèwè wɛ́ɛ́lì yɔ́ɔ̀ be ndɛ́ndɛ̀kɛ̀ wɛ́ɛ́lì.
Sìmèɔ́nì boa ha Njámbe íŋgɔ́ɔ̀ a wéé Yésùsì
25 Nàà Yélúzàlɛ̀mì, mà wì boabàà nɛ̀ kì, líí wàà bàà à Simèɔni, wì wɛ bóbàà sìì nɛ̀ díísò Njámbe, boa kɛ̀ɛ̀ pɛ̀ɛ̀ɗì ɓɛ̀ wì kà bò mɔ̀ɔ̀sì sɛ́à Izàɛ́lì à, yɔ́ɔ̀ Gɛ́lɛ̀lɛ̀ lííndì bàà bò. 26 Ɓɛ̀ lííndì ŋgɔ̀ ɓwɛ́àbàà nɛ̀ à nɛ̀ bati nɛ̀náǎ, fe kima tàà jɔ̀ɔ̀ ma Wáɓɛ̀ɛ̀, kà Mgbààmɔ́nja Njámbe boabàà è bò pɛ́sìa na. 27 Kà Lííndì Njámbe ílì Simèɔni ɛ́sɛ̀ nàà Mgbàà Mgbàà gàlà Njámbe. À ɓɛ̀ sìkì kà yálí Yésùsì boabàà à pɛ̀ɛ̀ wɛ̀ nɛ̀ à mɔ dɛ̀ ɓɛ̀ mɔ kà mboŋa Mgbààmɔ́nj ɓwɛ́àbàà wì dɛ̀ à. 28 Siméɔni kúòbàà mbɛ́sɛ̀ bè à kɔ wàà, kà hà Njámbe i ŋgɔ́ɔ́, kà ɓwɛ́ nɛ̀náǎ:
29 «Hé ŋgɔ̀, Mgbààmɔ́nja mɛ bóì nɛ̀ ɗɛmi mwâ de tò me kɛ̀ fé á tenàtɛ̀,
mɛ ɓɛ̀ kà me ɓwɛ́àbàà.
30 pɛ́kà mi jɔ́à mwâ poki wì kà gbà nàà mɛ nɛ̀ mɔ́sumà líí mù.
31 Wáɓɛ̀ kà mɛ ɓɔ̀ɔ̀nya bàà à wè kúlù wì yele à.
32 Bó ɓɛ̀ gɛ́lɛ̀lɛ̀ mɔ̀ɔ̀ kà bò dɛ è jú njà yele à i mɛ,
kà dɛ kàà nɛ̀náǎ, kulu mɛ Izàɛ́lì à dú nɛ̀ kuma.»
Simèɔni boa wélà mɔ mɛ kúlàwe Njámbe
33 Bafa bè, yɔ́ɔ̀ nànà wàà, bóbàà ŋgekaɗa ɓɛ̀ mɔ kà Simèɔni boa ɓwɛ́ wɛ̀ mbɛ́sɛ̀ bè à. 34 Sìméɔ́ni dufobàà yóà, kɔ́ɔ́wɛ̀, kà ɓwɛ́ à Malia nàna Yésùsì nɛ̀náǎ: «À wè ɓɛ̀ bè ŋe súlò wì à jàà Izàɛ́lì bò jììɗìnù, súlò wì bò bà kpàsì. Bò du ndemi Njámbe, ɓɛmɔ̀ŋgɔ̀, sulo wì bò pi à. 35 Ɓɛmɔ̀nɔ̀ɔ̀ wúsòwɛ̀ à jàà sɛ́à wì à, bò gbàsiɗi tɛ. Nàà mɛ Malia nyi ŋgomɔ bò ndumi mɛ sale mɛ peli.»
Ánà boa hà Njámbe iŋgɔ̀ɔ̀ à wè Yésùsì
36 À ɓɛ̀ siki ŋgɔ̀, boabàà nè ma ko, bóbàà kàà kúlàwè Njámbe, lìì wa bàà Ana, bóbàà bè Fanuɛli, à ɓɛ̀à Aséli bóbàà kòkotó, du ŋgo à ga à siki joŋga, kà yɔ́ɔ̀ we wàà dɛ pembe mɔ́ɔ́lɔ̀dokɔ wɛ́ɛ́lì. 37 Kɔ́ɔ́wɛ̀, kà wé wàà fè, kà kɔ̀ɔ̀li kè ŋgɔ̀lá. Bóbàà hi nɛ̀ pembe makowɛ mɔ̀ɔ̀lɔ́ nɛ̀ makowɛ wààtà nɛ̀ pembe wànààlì. Ana gbà gbà à ma à Mgbàà Mgbàà gàlà Njámbe nà, bóbàà dɛ tô à wɛ́ Wàà swéé nɛ̀ kììtu, swéé nɛ̀ kììtu, nɛ̀ sino nyɔ à wé Njámbe, tɛ́kù sàkwàlà mɔ. 38 À kino ɓɛ̀ siki ŋgɔ̀, boabàà ki yɔ́ɔ̀ Siméɔni, kà kúnjìɗì hà Njámbe iŋgɔ́. Kà kúnjìɗì wela wè bè à bò ɓɛ̀ yele kà i boabàà à kɛ̀ɛ̀ mwâ poki posi Yélúzàlɛ̀mì à.
Yésùsì boa ɛ́la wɛ̀ nàà Mgbàà Mgbàà gàlà Njámbe à ɓɛ̀ siki kà hɔ̀a nɛ̀ pembe ɓukɔ nɛ̀ wɛ́ɛ́li à
39 Mɛ́ɓɛ̀ kà yali Yésùsì sɔ̀ɔ̀sabàà dɛ ɓɛ̀ mɔ nɔ̀ɔ̀ yele kà mboŋa Mgbáámɔ́njá ɓwɛ́àbàà, kà yóà jìsì pɛ̀ɛ̀ nàà lè nɛ̀ yóà Nazàlɛ́tì, nàà ku nja Galile. 40 Bè boabàà hama wɛ, nɛ̀ lembakana, donɛ nɛ̀ jɔma, Njámbe boabàà gwéà súlòwɛ̀.
41 À fíí pembe yele, yáli Yésùsì ɛ ɛlibàà nàà Yélúzàlɛ̀mì à yɔ́a Pasika, gbàà yɔ́à Zuifi. 42 À ɓɛ̀ sikí kà Yésùsì hɔ̀abàà nɛ̀ pembè ɓùkɔ nɛ̀ wɛ́ɛ́lì à, kà ɛlì yɔ́ɔ̀ yálì wàà nàà Yélúzàlɛ̀mì wàà yɔ́à, mɛ́ɓɛ̀ɛ̀ kà boabàà nɛ̀ Zuifi nàà tòlàà. 43 Mɛ́ɓɛ̀ kà yɔ́a sɔ́nabàà, kà yóà jísí ɛ́lɛ̀ nàà lè nɛ̀ yóà, dɛ̀ ɓɛ̀ bè ŋe Yésùsì, kɔ́la náà Yélúzàlɛ̀mì tàà yali wàà iŋgo wɛ̀. 44 Yóà bóbàà taŋgala wɛ̀ nɛ̀náǎ, Yésùsì yɔ́ɔ̀ ma ɓò ta ŋga yóà à bò, yóà lɛ́abàà nɔ̀ ŋgùma swéé sikinɔ, kɔ́ɔ́wɛ̀, kà yóà kúnjìɗì kiyo Yésùsì à sokó yali yóà, nɛ̀ báì yóà. 45 Tàà kpà mà à. I jìì jísì ɛ́lɛ̀ nɛ̀ kiyo à hɔ̀ nɛ̀ nàà Yélúzàlɛ̀mì. 46 Yóà kiò à hɔ̀ɔ̀se à jɛ́ wààtà, kà yóà tɛ̀ kpà á à jàà Mgbàà Mgbàà gàlà Njámbe, dù ŋgónù à sokó ɓò mbó wì mboŋa Njámbe, bóbàà à jéà weli mɔ yóà nɛ̀ áánà nio nɛ̀ yóà. 47 Yeɓɛ̀ wì nɔ̀ɔ̀ yele kà boabàà à jéà à, boa nɛ̀ kàma mɔ súlòwɛ̀, à wè jɔma wàà nɛ̀ bulo mɔ wàà. 48 Mɛ́ɓɛ̀ kà yálì wàà jɔ́abàà à, kà yóà kàmi mɔ súlòwɛ̀, kà nana wàà ɓwɛ́ nɛ̀ à nɛ̀náǎ: «Bè mù, ŋgé mɔ kà mɛ dɛ nɛ̀ɔɔ mɛ́ɓɛ̀ɛ̀ è?ɔɔ bafa mɛ boa kiyo mɛ, sɛ́à mɔ̀ɔ̀ bóì nɛ̀ kò.» 49 Kà Yésùsì buli nɛ̀ yóà nɛ̀náǎ: «Ɛ́nɛ̀ kìì mi nɛ̀ ge? Ɛ́nɛ̀ ì má nɛ̀náǎ, mi lɛ̀ɛ̀sínì nè dù ŋgò nù à jàà gàlà Bafa mù nà?» 50 Nàà yàli wàà, yóà ì à mà dìákàsa ɓɛ̀ wélì mɔ ŋgɔ̀ nà. 51 Kà Yésùsì jìsì yɔ́ɔ̀ yálì wàà ɛ́lɛ̀ nàà Nazàlɛ́tì. Bóàbàà dììso yali wàà, nana wàà boabàà à ɓanana ɓɛ̀ mɔ nɔ̀ɔ̀ ŋgɔ̀ yele à jàà sɛ́à wàà. 52 Yésùsì boabàà hama wɛ nɛ̀ jɔma wàà yele, boabàà gwéà wɛ nɛ̀ Njámbe nɛ̀ wì yele.