Sɛ'ɛ Zaakö 'nyɛɛ wʋlʋnɩwaa 'dɩ
5
Abhʋa wʋlʋnɩwaa,
a ‑pʋnɩ 'yukwli n 'kanyɩ 'dɩ 'nyɛ,
n nɛ naa:
A nɩ 'wi 'mɩɔ,
‑maa 'klɩyɩyɛ a 'kädɛ mɛɛ 'kanyɩɛ ghlɩ.
2 'A wʋlʋnɔɔ,
wʋ yi zɛ 'lɩlɩlɩ,
'a wʋlʋnɩbanɩɩ,
ngɔnʋ yi li.
3 'A ‑sikaa ‑nyɛ 'a monii 'sɔ,
gogolie 'kɩɛ köbhä.
Gogolie 'la,
mɩɩ 'kää 'nglɩ ‑kä Lagɔ 'kanyɩ gbʋ köbha.
Sɛ wa sia'ɛ ‑lu 'n wʋ bhɩɛ'ɛɛ,
‑sɩbhä gogoliea 'kanyɩɛ 'yli bhɩa 'lɩlɩlɩ.
'Pɩwʋ a 'ylibhɩɛzlɩɩ yɛ ghlɛ 'wë,
'n a 'yɩbhaa ‑bhlɛ wʋlʋnɔɔ 'wlu 'yize.
4 'A 'lagbïlea 'mö a libhonʋwaa,
a'a 'pɛnuë.
A ‑pʋnɩ 'yukwli,
'dɩ n nyanyɩɛ dɛ'ɛ nɩɩ,
wa ‑wʋa wanyɩ a ngäzɩ 'wi dɔ'wʋ.
‑Wa ‑wʋä sa'a ‑mä 'a gbɩɩ 'wʋ 'a glʋglʋlii 'wlu 'yɩbhanɩ dɔ'wʋ,
'n wa wiɛ,
‑Alowli Lagɔ ‑ɔ 'tɛɛ 'mö,
ɔ yɛa 'wa wiewɛlɩɩ 'nʋ.
5 Mä'ä 'pɩwʋ a dɔ'wʋ,
‑lii 'wuë,
yɩ kpälɛnanyɩ kɛ.
'Saa 'a dilaa 'yɩbhää,
'mö a nʋä.
A li 'kpölili 'n a 'ghlimanɩɛ,
'n a ‑bhɩɛa'aa 'bhila a ‑mi wa lɛ 'kä 'wlu ‑dɩ.
6 Nɩkpaa ‑waaa gbʋ ‑gömö ‑kää,
'mö a pɩɛnɩɛ gbʋ ‑gömö.
Wa'aa bhɛnɩ wa 'kanyɩ wanyɩ kä'mö ‑sɛ a za,
'n a lɩbhʋää 'n wa kuä.
A nɩ ‑kpaanɩ dlɩ 'mö ‑maa zezwii yia'a ‑pa yi
7 ‑Atʋayuënyɩ,
a nɩ ‑kpaanɩ dlɩ 'mö ‑këë ‑Alowli Zezwii 'a yiyitɛnyɩɩ 'kä ghlɛ.
A ‑yi sɛ nɩɩ,
glʋglʋnyɔ,
ɔ ‑kä 'ɔ glʋglʋlii glʋ 'wëë,
dlɩ 'mö ɔ ‑kpaanɩɛ,
tɛɛnɩ dɔdɔnyizakwëa a 'tɛnyɩ 'mö ‑këë,
'n gudea lɩbhää,
'n ɔ dɩa'aa.
8 Sɛɛ glʋglʋnyɔ ‑kpaanɩ'ɛ dlɩ 'möö,
a nɩ ‑kpaanɩ ‑sɩbhä dlɩ 'mö.
A 'tɛmanɩ 'yli yɔwʋ,
‑maa zlɩɩ ‑Alowli Zezwii 'kää 'mö yii,
ɛ yɛ 'dio 'wë.
9 ‑Atʋayuënyɩ,
a nɩ tɩ nuë 'wʋ kwäkwänɩ,
nzɩɩ Lagɔ tanyɩa gbʋ köbha.
A nɩ 'nɛmanɩa anyɩ 'wʋ,
‑maa ‑ɔ 'kää nɩkpaa 'wuë ‑zijli tuu,
ɔ'ɔa'a 'yuku ‑wʋ.
10 Lagɔ 'a 'möbhïlanɩwaa,
‑wa nyɛ a‑a nɩkpa ɔ 'nglɩ 'mö 'dɩɩ,
wa 'yɩ a 'klɩ a ‑bɛ.
‑Maa ‑mä 'wa 'klɩyɩyɛ 'wuë 'mö,
dlɩ 'mö wa ‑kpaanɩ a‑a.
'Wa gbäpöö 'mö a nɩ ‑gänɩ.
11 ‑Mä 'klɩyɩyɛ 'mö,
sɛ wa ‑glɛɛ Lagɔ 'wʋ 'yize a za,
'wa ‑jɔlʋ.
Nɩkpɛɛ wa laa Zɔɔbö,
sɛ ɔ 'yɩɛ 'klɩ a ‑bɛ,
a ‑yi ‑sɩbhä.
‑Maa ‑mä 'ɔ 'klɩyɩyɛ 'wuë 'mö,
Lagɔ 'mö ɔ ‑glɛɛ 'wʋ 'yize.
‑Mä 'gbë 'wʋ,
sɛɛ Lagɔ ‑sɔɔɔ klɩ 'la 'wuë nglii,
a ‑yi ‑sɩbhä.
Nza n gbää nɩɩ,
Lagɔ dlɩ zɛmö ɔ nɛnɩɛ tenyii 'n ɔ kää nɩkpa a ngäzɩdlɩ.
A nɩ tɩ zligo 'lɩlɩlɩ
12 ‑Atʋayuënyɩ,
‑yɩ kää dɛsɛ tenyii,
miɛ nɩɩ,
a ‑kä bhïlaa,
a nɩ tɩ zligo.
Ɛ yi zlɩ mɛ oo,
ɛ yi dʋdʋ mu oo,
'saa a'bhë ɛ yi glɩnɩ ‑kë,
a nɩ tu 'mö zligonɩ.
‑Maa «nn» a ‑kä nʋä yi,
a lɛ:
«Nn,
miɛ.»
«N'nn» a ‑kä'ɛ nʋä yii,
a lɛ:
«N'nn,
ɛ'ɛ ‑bhö mi.»
A nʋ sa'a a 'kä ‑lɛ 'bhlenɩ,
nzɩɩ a tɩa anyɩ gbʋ köbha Lagɔ a 'yila 'klʋ a dɔ'wʋ.
A nɩ bhibhe ‑waaa ‑yɛ a 'wlumö
13 A gla'mö a nɩkpɛ ‑kä 'klɩ 'yɩ dɔ'wʋ ‑wʋʋ,
ɔ nɩ bhibhe Lagɔ.
‑Mɔɔ ‑kä 'mäna 'mö ‑wʋʋ,
ɔ nɩ bhlɩnɩ Lagɔ.
14 ‑Mɔmɔɔ gu ‑kɔɔ 'lɩbhää,
Zezwii a ‑nʋa a ‑zɩkpa a 'yukugänɩwaa,
ɔ nɩ wëzuë,
wa 'kɔ ‑Alowli a 'nglɩ 'mö 'kpö 'wlu zʋ,
wa 'kä ɔ 'wlumö bhibhe.
15 Wa ‑kä bhibhe,
wa ‑kä ‑Alowli dlɩ 'tɛɛnɩɩ,
ɔ yi guzunyɔ 'la puë,
ɔ yo 'wlu 'libhï.
'N 'nyinyloli ɔ ‑kä a nʋʋ,
Lagɔ yi yɩ gbʋ 'yi 'tatinɩ.
16 Zaa,
‑ɔ ‑kä 'nyinyloli 'mlɩ ‑kää,
ɔ nɩ ‑sɛnɩ ‑lɛ ɔ 'lilagɔgänɩnyɔ ‑mɔmɔɔ a 'yila 'klʋ yɩ 'bï.
Gu ‑kä ‑mɔmɔɔ 'lɩbhää,
a nɩ bhibhe ɔ 'wlumö Lagɔ,
ɔ 'kɔ yɛmanɩ.
‑Maa nɩkpɛ a ‑mɔɔ zlɔnɩɛ 'mö Lagɔ a 'yila 'klʋ a dɔ'wʋʋ,
ɔ ‑kä 'ɔ dlɩ 'wuë 'mö Lagɔ bhibhee,
'ɔ bhibhewɛlɩɩ,
‑li 'kädɩ yɩ 'wälanɩɛ 'yli.
17 Lagɔ a 'möbhïlanɩnyɔ Elii,
a nɩ 'pänɩɛ ‑ka 'ɔ wɛlɩɩ dlɩ kɛ.
Elii,
‑aa sɛ a nɩkpɛ ɔ glɩnɩ a‑a,
'n ɔ yiɛ 'ɔ dlɩ 'wuë 'mö Lagɔ bhibhe nɩɩ,
'nyizakwë nɩ tɩ lɩbhä.
Tɛɛnɩ ‑lɛ a 'tɛnyɩ 'la 'mö 'nyizakwë 'nɩɛ lɩbhä ‑këë 'n 'ylʋbö ta 'kïbhë yiɛ 'plɩ.
18 Yɩ 'plɩɛ 'wëë,
'n ɔ yi'ɛɛ Lagɔ bhibhe nɩɩ,
'nyizakwëa nɩ lɩbhäa'a.
'N Lagɔ yiɛ 'nyizakwëa lɩbha,
'n lile yiɛ 'wlʋ.
Sɛ'ɛ Zaakö gbää 'gbëbhlenɩ dɔ'wʋ
19 ‑Atʋayuënyɩ,
a gla'mö a ‑nɔ ‑bhlʋ ‑kä Lagɔ 'a 'yio 'wʋ 'bhöö,
'n ‑mɔmɔɔ ‑kɔɔ ligbaa 'n ɔ ‑kʋʋ 'wʋ nimï yii,
20 a nɩ yɩbhlɩnɩ sɛ nɩɩ,
nɩkpɛ a ‑mɔɔ ligbaa 'nyinylolinʋnyɔ 'n ɔ 'bhööä 'yiozokwëa 'wʋʋ,
mɔɔ 'kɔɔ 'kwie ngli ‑sɛ.
Mɔɔ 'kä'ɛɛ 'nglɩ ‑kä Lagɔ 'kä 'ɔ 'nyinyloli kɔkɔmlɛ a gbʋʋ 'yi 'tatinɩ.