Zaakö 4

A nɩ tɩ mä'ä 'pɩwʋ a ‑lii ‑wa

‑Atʋayuënyɩ,

a gla'mö a 'lʋlwɛɛ ‑nyɛ gwɩgwɛɛ 'sɔ dɛ yɩ 'bhöönɩ bhä?

N nɛ naa,

‑li a 'tʋzokwëa ‑nyɛ nyɔgba 'sɔ ‑yɩ pää 'a dilaa ghäyɩɩ,

mɩɩ kää 'nglɩ 'n a lʋä,

'n a gwɩɛ.

2 Mɩɩ 'pänanyɩɛ ‑li a kii 'wuë 'wʋ,

a yɩbhä ‑lu ‑mu nɩ,

a yɩbhä ‑lu ‑mu'la,

‑maa a'a ghli ‑sɩbhä.

‑Gblɩgblɩnɩ a ‑gblɩgblɩnɩɛ,

anyɩ a tɛlɩnɩɛ 'wʋ sɛ,

‑maa a'a ghlɩ ‑lu.

A gla'mö a 'lʋlwɛɛ ‑nyɛ gwɩgwɛɛ 'sɔ,

da'a yɩ 'bhöönɩɛ.

A'a zɛla Lagɔ,

nza a'a ghlɩɛ ‑lu.

3 ‑Maa a ‑kɔɔ'ɛ zɛla a'bhëë,

'a dlɩpäsaa 'nɩɛ nɛnɩ,

anyɩgäsɛ,

'saa 'a dilaa 'pänanyɩɛ 'wʋʋ,

'mö a zɛlɔɔ zaa,

ɔ'ɔ 'nyanyi.

4 Sɛɛ 'winglɔ panɩ'ɛ ɔ 'luwli ‑gömö 'n ɔ mö'ɛ käbönʋä a 'bɛyɩɩ,

‑sɩbhä a panɩɛ 'kwädlɩ Lagɔ ‑gömö mä'ä 'pɩwʋ a ‑lii a za.

A'a bhä sɛ ‑yi nɩɩ ‑ɔ ‑waa mä'ä 'pɩwʋ a ‑lii,

Lagɔ a ‑gblɩnyɔɔ ɔ zʋä,

a 'ni bhä ‑yi ‑a?

Sɛ'ɛ n gbää nɩɩ,

nɩkpɛ a ‑mɔɔ nyɛɛ 'ɔ dlɩɩ mä'ä 'pɩwʋ a ‑lii yowʋʋ,

Lagɔ a ‑gblɩnyɔɔ ɔ zʋä.

5 'Fʋ yɩ'ɩɛ ‑mä Lagɔbɔgʋʋ 'mö cɛlɩ nɩɩ,

Lagɔ,

nglʋnyinyesɛ ɔ ‑waa 'Wugɔmʋʋ ɔ zʋʋnyɩɛ ‑gömöö.

6 Miɛ abhlɩ,

‑maa sɛɛ Lagɔ pää nɩkpɛ a ngäzɩdlɩ,

‑sɩbhä 'nɩɛ ‑sɩbhä a sɛ ‑wʋ.

Sɛ'ɛ yɩ cɛlɩɛ ‑mä 'ɔ 'bɔgʋʋ 'mö nɩɩ:

Lagɔ ‑nyɛ bhabhawaa 'nɩɛ ‑wanɩ,

‑maa ‑wa lɛmöö wanyɩ dʋdʋ 'wʋʋ,

wa ngäzɩdlɩ ɔ pää.^a

7 ‑Sɩbhä a za n gbää nɩɩ,

a nɩ nglu 'wʋ,

Lagɔ 'kanyɩ ‑gömö 'kämanɩ.

Sataa ‑kaanyɩ ‑mä 'pää,

a nɩ ‑sɛ 'kwädlɩ nimï,

‑lɛ a dɔ'wʋ ɔ yeanyɩ gwë 'dionɩ.

8 A nɩ 'dio Lagɔ yɔwʋ,

‑lɛ a dɔ'wʋ ɔ yeanyɩ'ɛ ɔbhlɩ yɔwʋ 'diomö.

'Nyinylolinʋwanyɩ,

a nɩ ‑sɛ 'a 'nyinylolii kɛ'mö.

'A dilaa ‑yɩ ‑dlinɩɛ 'möö,

a nɩ 'nyɩ Lagɔ a 'yize yowʋ.

9 A nɩ yɩbhlɩnɩ 'a ngäzɩɩ a 'kä 'wi,

'mɩɔ 'kanyɩ kwlinɩ.

'Wi a kä a‑a a 'kä 'wi,

'n a nyɩɛ.

A kä a a 'kä ‑kɔnɩ 'n a nʋä 'mäna.

10 ‑Alowli Lagɔ a 'yila 'klʋ,

a nɩ ‑lɛmö anyɩ dʋdʋ 'wʋ,

‑lɛ a dɔ'wʋ,

ɔ yeanyɩ 'nglɩ 'nyɛ.

A nɩ tɩ zɛmö ‑dɩdɩnɩ

11 ‑Atʋayuënyɩ a nɩ tɩ zɛmö ‑dɩdɩnɩ,

‑maa nɩkpɛ a ‑mɔɔ ‑dɩnɩɛ ɔ 'lilɛ zɛmö,

‑ɔ kwɔɔ gbʋsɛ nuë 'wʋʋ,

Lagɔ 'a Gböö ‑yɩ nʋä nɩɩ,

nɩkpɛ nɩ tɩ ‑sɩbhä 'zʋʋ,

'mö ɔ yɛɛ da'a nuë 'wʋ kwämö nɩɩ,

yɩ'ɩɛ nɛnɩ.

‑N ‑kä ‑sɩbhä 'zʋʋ,

Lagɔ 'a Gböö,

'klʋkpamö ‑n 'niɛ da'a zʋ,

‑maa sɛ'ɛ ‑n nʋä nɩɩ,

‑nmöö 'nɛɛ ‑naa zaa,

‑n 'kɩ 'mö 'bɩa,

yɩ ‑kä nɛnɩ,

yɩ 'nɩ nɛnɩɩ,

‑n 'kɩ 'ylɩmö.

12 Lagɔ,

ɔ 'yize ‑kpöö,

sɛɛ zlɔnɩɛ 'mö,

sɛ ‑a 'kää nɛmöö,

mɔɔ sʋlʋnɩnyɩɛ ‑sɩbhä.

Ɔ 'yize mɔɔ glɩnɩɛ ‑a 'wuë a ‑zijlitunyɔ,

mɔɔ bhɛnɩɛ ɔ 'kä nɩkpɛ puë,

mɔɔ bhɛnɩɛ ɔ 'kä nɩkpɛ 'yli bhɩa.

‑Maa ‑nmö glɩnɩ'ɛ ‑naa 'fʋ a nɩkpɛ n‑n yɩbhää ‑n 'kä Lagɔ a 'bhle 'mö nɩkpa ‑zijli tuu,

dɛ ‑n kä bhä sɛ 'nɩ?

A nɩ tɩ tɛkpɔtɛkpɔwa glɩnɩ

13 Abhʋaa nʋä nɩɩ:

«Zɩ'ɛ ɛ ‑kä'ɛ 'zɩgblɛ ma‑a,

‑a yi ‑glɔ ‑mumuu ‑gömö mö,

‑a yi ‑mä 'ylʋba ‑bhlʋ ‑sɛ.

‑A yi 'pɛlʋ 'pä,

‑a yi moni a ‑bɛ ghlɩ.»

Abhʋa n nyɛɛ dɛ'ɛ 'dɩ nɩɩ:

14 'Saa 'kanyɩɛ 'zɩgblɛ ghlɩɩ,

a'bhï a 'nuä ‑yi.

Sɛɛ jlu yi'ɛ 'n wʋ plɩ'ɛ cuu,

‑sɩbhä 'a zɩkpaa ‑wʋä.

15 Zaa,

'a sɛ a 'kää nʋ,

‑sɩbhä ma‑a nɩɩ:

«Lagɔ ‑kä ngluu,

‑a yi 'zɩgblɛ ‑bhölɩmö,

‑a yi sɛ'ɛ zʋ,

‑a yi'ɛ sɛ'ɛ zʋ.»

16 A'a nʋ sa'a,

‑maa tɛkpɔ a tɛkpɔɔ nɩɩ,

anyɩgäsɛ,

a yi ‑li 'kädɩ nʋ.

'A sɛ a tɛkpɔɔ da'a,

‑sɩbhä 'nɩɛ nɛnɩ.

17 'Saa nɛnɩɛ ‑n bhɛnɩɛ ‑n 'kä nʋʋ,

‑n ‑kʋʋ ‑yi 'wë n‑n 'nu nʋʋ,

'nyinyloli ‑n nʋä.