Zaakö 1

'Bɔgʋʋ

Zaakö

'cɛlɩɛ

Bhälɩwɛlɩɩ

‑Amö ‑aa dɩba Lagɔ ‑nyɛ ‑Alowli Zezwii Kliisɩ 'sɔ a 'yliwʋnyɔ Zaakö,

‑amöö cɛlɩɛ dɛ'ɛ 'bɔgʋ nɩ.

Abhʋa Lagɔ a ‑nʋa a ‑gligbï kʋgbä'sɔ ‑kpɔ abhʋaa mlɩnɩɛ ‑mä dʋdʋ a këtiea 'wuë 'wʋʋ,

a 'wuë n bhälanyɩ.

Yɔlɔylʋ a nimï ‑mä ‑li a ‑lii ‑wʋä

2 ‑Atʋayuënyɩ,

a ‑kä klɩɩ a kii 'wuë 'yɩ dɔ'wʋ ‑wʋʋ,

'mäna nɩ 'lɩbhanyɩ tenyii.

3 Ɛ'ɛ ‑bhö nyɩasɛ,

‑maa a nɩ ‑yi sɛ nɩɩ,

‑mä 'a klɩɩ 'wuë a yɩɛ 'mö,

a ‑kä Lagɔ dlɩ 'tɛɛnɩ 'yize,

yɩ 'wuë a 'wlusɛnɩdaa 'mö,

nɩkpa a ‑muë 'tɛɛ 'kwädlɩ 'yli yɔwʋ 'mö a 'kää 'zʋ.

4 Zaa,

dɛ a kää sɛ a nɩ nyɔnʋ ‑lɛ kɛ,

nzɩɩ a 'kä ‑tiamö a Lagɔnɩkpa ‑wa ‑wʋä 'tɩɩ ‑waaa ‑maa yɔwʋ ‑kä zʋ.

5 'N a gla'mö a ‑nɔ ‑bhlʋ 'nɩ 'nɛɛnɔ ‑kä,

ɔ nɩ bhibhe Lagɔ,

Lagɔ 'kɔnyɩ 'nyɛ.

Nyɩasɛ n'n‑ä ‑sɩbhä gbä,

‑maa Lagɔ,

dlɩzɛmönanɩsɛ ɔ nyɛɛ 'fʋ nɩkpa 'wuë 'ɔ ‑lii.

6 Zaa,

ɔ ‑kä Lagɔ ‑lu 'yɩbhänɩɩ,

ɔ nɩ 'tɛɛnɔɔ dlɩ nɩɩ,

ɔ yonyɩ ‑tiamö 'nyɛ,

‑maa ɔ nɩ tɩ gʋgɔ.

Ɛ'ɛ ‑bhö nyɩasɛ,

‑maa nɩkpɛ a ‑mɔɔ ‑gʋgɔɔ,

gïnyɛ a ‑gbɔkwälɩɩ 'vuu pää ghäyɩ,

‑yɩ bhliɛ mä'ä ‑yɩ bhliɛ mä'ä,

'mö ɔ ‑nyɛɛ 'wlʋnɩɛ.

7‑8 Sa'a a nɩkpɛ,

'ɔ dlɩɩ 'mö ɛ ‑dlinɩɛ,

'ɔ nʋnʋlii 'wuë 'mö a dɔ'wʋ gba'agbagba'a ɔ bhliɛ zaa,

ɔ ‑kä Lagɔ ‑lu 'yɩbhänɩɩ,

ɔ nɩ tɩ dlɩ 'pä nɩɩ Lagɔ yonyɩ 'nyɛ.

'Pʋa ‑nyɛ wʋlʋnɔ 'sɔ

9 Zezwii a ‑nɔ ‑mɔɔ 'nɩ dɛsɛ ‑kä nɩkpa a dɔ'wʋʋ,

'mäna nɩ 'lɩbhɔ,

‑maa Lagɔ a dɔ'wʋ dɛsɛ ɔ kää tenyii.

10 Wʋlʋnɩnyɔɔ,

sɛɛ Lagɔ 'nɩ 'libhoo 'kɔdɔ 'mö 'wʋ a za,

'mäna nɩ 'lɩbhämɔ'ɛ ɔbhlɩ.

Ɛ'ɛ ‑bhö nyɩasɛ,

‑maa,

sɛɛ ‑titi a 'ba bhɩɛ'ɛ 'ylii,

ɔ yi ‑sɩbhä 'yli bhɩɛ.

11 Ylʋʋ ‑kä 'pʋʋ,

‑titii 'mö wʋ sianɩɛ 'wʋ,

'n yɩ baa bhliɛ.

A ‑kä bhlii,

‑titi 'la 'nɩa'a 'ylimö nɛnɩ 'lɩlɩlɩ.

Sɛ ‑bhʋlʋ ‑kpɔ 'la,

‑sɩbhä wʋlʋnɩnyɔ ‑wʋä.

Ɔ yi 'ɔ lɩɩ a libhoo a za 'mö yɩyɩnɩ dɔ'wʋ ‑wʋ ɔ yi 'yli bhɩɛ.

'Klɩyɩyɛ ‑nyɛ ‑mäpäpʋ 'sɔ

12 Nɩkpɛ a ‑mɔɔ yɩɛ 'klɩ,

‑maa ‑ɔ ‑glɛɛ Lagɔ 'wʋ 'yizee,

'mäna nɩ 'lɩbhɔ.

Ɛ'ɛ ‑bhö nyɩasɛ,

‑maa ɔ yi Lagɔ 'a 'pɩwʋlelea ghlɩ,

'mö Lagɔ gbää ɔ 'kä nɩkpaa ‑wa kää ɔ ‑wawʋʋ dlɩ zɛmö 'nyɛ.

13 ‑Mäpäpʋ ‑kä nɩkpɛ ghlɩɩ,

ɔ nɩ tɩ nɩɩ Lagɔ mɔɔ 'pɔɔ ‑mä nʋ.

Ɛ'ɛ ‑bhö nyɩasɛ,

‑maa Lagɔ 'nɩ 'pä ‑mä nɩkpɛ ɔ 'kä ‑lizoku nʋʋ a za.

14 ‑Maa nɩkpɛ a'bhë,

‑lii a 'tʋzokwëa ‑a ‑wʋä ‑mä ɔ dlɩ zɛmöö,

ma‑a kwɔɔ 'nyinyloli 'mö.

15 Ɔ ‑kä 'tʋzokwë 'la 'klʋkpamö zʋʋ,

'n ɔ nʋä 'nyinyloli.

'Nyinylolii ‑kɔɔa'a 'wʋ yiee,

yɩ 'wuë a 'wlusɛnɩdaa 'mö,

'kwie 'mö yɩ kwɔɔ.

16 Na dlɩsɛkädaayuënyɩ,

‑bɛ nɩ tanyɩ dula.

17 Sɛ'ɛ n gbää nɩɩ,

Lagɔ,

‑li a ‑li a 'yize mɩɩ 'bhöönɔɔ kä'mö.

'Saa nɛnɩɛ,

'saa ‑wʋä 'tɩɩ,

‑aa dɩba Lagɔ ‑ɔ ‑bhɛɛ ylʋʋ,

‑ɔ ‑bhɛɛ cʋʋ,

‑ɔ ‑bhɛɛ ‑zɛlɩɩ,

‑mä ɔ kä'mö ‑mä yɩ 'bhöönɩɛ.

Sɛɛ ylʋʋ pʋä 'wë 'n wʋ 'ngïmoo 'wʋ 'n 'yuylukwëa yiɛ,

‑sɩbhä Lagɔ 'nɩɛ ‑wʋ,

ɔ'ɔ zigbonɩ 'mö.

18 Lagɔ a'bhë,

'ɔ sɛ ɔ 'yɩbhää a za,

mɔɔ nyɩanyɩɛ 'ɔ wɛlɩɩ ‑yɩ glɩnɩɛ gbëaa a 'yizee,

'mö ɔ ghlɛnɩɛ 'mö 'n ɔ ‑yinyɩɛ ɔ 'yuë 'wʋ 'zʋa,

nzɩɩ ‑a 'kä 'ɔ ‑bhɛbhɛlii 'wuë a 'yukuga glɩnɩ.

A nɩ tɩ Lagɔ 'a wɛlɩɩ 'yukwli a 'yize ‑pʋnɩ

19 Na dlɩsɛkädaayuënyɩ,

a 'kää ‑yi miɛ nɩɩ,

nɩkpɛ 'kä ɔ 'bhɩa 'yukwli ‑pʋnɩ a gbʋʋ mʋʋ nɩ plɛnɔɔ tenyii,

‑maa ɔ nɩ tɩ ‑papa bhïla,

ɔ nɩ tɩ'ɛ ‑papa 'klɛ 'pä.

20 ‑Maa ‑lii 'wuë nɩkpɛ nʋä 'klɛsɛɛ,

yɩ'ɩɛ Lagɔ dlɩ yɔwʋ nɛnɩ.

21 Zaa,

‑lii 'wuë ‑yɩ planyɩɛ fɩ Lagɔ a 'yila 'klʋ a dɔ'wʋʋ,

'n 'kpʋkpʋlii 'wuë ‑yɩ suä ‑mä 'a dilaa zɛmö,

a nɩ ‑sɩɩ kɛ'mö.

A nɩ ‑lɛmö anyɩ dʋdʋ 'wʋ,

Lagɔ 'a wɛlɩɩ ɔ 'zʋä ‑mä 'a dilaa zɛmö,

sɛ yɩ gbää,

a 'kä ‑sɩbhä 'wʋ nglu.

Yɩ 'yize mɩɩ bhɛnɩɛ yɩ 'kanyɩ puë.

22‑24 ‑Atʋayuënyɩ,

Lagɔ 'a wɛlɩɩ,

a nɩ ti 'yukwli a 'yize ‑pʋnɩ,

‑maa sɛ yɩ gbää a nɩ 'zʋ ‑sɩbhä.

Ɛ'ɛ ‑bhö nyɩasɛ,

‑maa nɩkpɛ a ‑mɔɔ ‑pʋniɛ 'fʋ 'yukwli,

sɛ yɩ gbää ‑ɔɔ 'zʋä ‑sɩbhää,

ɔnyɩ ɔ dulaa.

Nɩkpɛ a ‑mɔɔ 'yɩnɩ'ɛ pöpleyi 'mö 'ɔ klʋʋ 'ylɩmö,

ɔ ‑kɛɛ yɔwʋ 'bhöö cuu 'n ɔ dlʋ'ɛ sɛ wʋ ‑wʋä 'wʋʋ,

'mö ɔ ‑nyɛɛ 'wlʋnɩɛ.

25 ‑Maa,

Lagɔ 'a wɛlɩɩ ‑yɩ slʋnɩɛ 'tɩɩ nɩkpɛ 'saa Lagɔ yɩbhää,

‑yɩ bhɛnɩɛ yɩ 'kä nɩkpɛ 'nyinyloli a galɛ 'mö ‑sɛɛ,

‑ɔ ‑kɩɩ 'yukwli ‑pʋnɩɩ,

‑ɔ 'ni 'kwädlɩ 'wʋ dlʋ,

sɛ yɩ gbää ‑ɔ nɛmöä ‑sɩbhää,

‑sɩbhä a nɩkpɛ 'la,

'mäna nɩ 'lɩbhɔ.

'Ɔ sɛ ɔ zʋä da'a a za,

ɔ pa‑a 'nyu.

26 Sɛ'ɛ n gbää nɩɩ,

nɩkpɛ ‑kä ɔnyɩ Lagɔgänɩnyɔ la,

'n ɔ 'nɩ ɔnyɩ kpämɩɔ ‑känɩɩ,

‑sɩbhä a nɩkpɛ 'la,

ɔnyɩ ɔ dulaa.

'Ɔ Lagɔgänɩgänɛ,

ɛ'ɛɛ dɛsɛ ‑kä.

27 ‑Maa nɩkpɛ a ‑mɔɔ glɩnɩɛ ‑tiamö a Lagɔgänɩnyɔɔ,

sɛ ɔ kää ɔ 'kä zʋʋ,

‑sɩbhä ma‑a nɩɩ:

Kwɩyuëa ‑nyɛ 'kuzlengwlɩɩ 'sɔ,

sɛ wa ‑bhöä ngäzɩ 'wʋ a za,

ɔ kä ɔ 'kʋä 'wʋ yi.

Ɔ kä ɔ 'kä'ɛ ɔnyɩ 'wʋ 'nɛmanɩ,

nzɩɩ ‑wa nʋä mä'ä 'pɩwʋ a ‑lizokuu,

ɔ ‑nyʋä tɩa bhʋ ‑bhʋlʋ yɩ.