Tiitɩ 1

'Bɔgʋʋ Pɔɔlʋ 'cɛlɩɛ

Tiitɩ

'wʋʋ

Bhälɩwɛlɩɩ

‑Amö Lagɔ a 'yliwʋnyɔ Pɔɔlʋ,

‑amöö glɩnɩɛ Zezwii Kliisɩ a tietienyɔɔ,

‑amöö cɛlɩɛ dɛ'ɛ 'bɔgʋ nɩ.

Nɩkpaa Lagɔ ‑sɛɛ ‑lɛ wa 'kä ɔ ‑nʋä glɩnɩɩ,

n 'kʋä 'ɔ ‑tiamö a wɛlɩɩ sʋlʋnɩ,

wa 'kɩ ‑gänɩ,

wa 'kɔ dlɩ 'tɛɛnɩ,

ɛ libhoo 'mö Lagɔ nyɩaaa.

2 Nzɩɩ 'wa dilaa 'kä 'wʋ 'tɛɛnɩ nɩɩ,

'pɩwʋ mää 'naa 'kää 'yli bhɩɛ,

ɔ yuë ‑mä 'nyɛ.

Lagɔ ‑ɔɔɔ yio ‑kä,

ɔ'ɔɔ a ‑bhlɛ 'pɩwʋ a ‑lii 'wuë ‑bhɛ,

'n ɔ yi a‑a ‑sɩbhä gbä.

3 'Ɔ 'tɛnyɩ ɔ ‑dɩ a‑a,

ɛ ghlɛɛ,

'n ɔ yiɛ tɩtɩ 'la 'yli 'wälanɩ.

Tɩtɩ 'la,

‑amö ‑aa Puënyɔ Lagɔ 'nyɛɛ yɩ biabialibho.

4 ‑Nmö Tiitɩ,

‑nmö n cɛlɩɛ dɛ'ɛ 'wʋ.

Sɛ ‑a glɩnɩɛ 'gämö Lagɔ a ‑nʋä a za,

na ‑tiamö a 'yu a sɛ ‑n ‑wʋä.

‑Aa dɩba Lagɔ ‑nyɛ ‑aa Puënyɔ Zezwii Kliisɩ 'sɔ,

'pʋpʋɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ nɩ ghälamö 'wʋ.

Libhoo Tiitɩ 'kää ‑mä Klɛɛtɩ‑bhölɩɩ 'mö nʋʋ

5 Tiitɩ,

‑n ‑yi sɛ nɩɩ,

‑mä Klɛɛtɩ‑bhölɩɩ 'mö mä ‑n ‑wʋä da'aa,

'saa 'nɩɛ ‑bhlɛ sasɛ 'wlu ‑gïganɩɩ,

‑n 'kʋ 'wlu gïganɩ,

nza n tɩɩmöä ‑mä,

‑mä a ‑gwlɩɩ ‑gömö,

Zezwii a ‑nʋa a ‑zɩkpöö ‑yɩ ‑wʋä ‑mä,

‑n 'kä yɩ 'yukugänɩwa ‑sɛ.

‑Lɛ a libho 'la,

‑n ‑kʋʋ nʋ dɔ'wʋ ‑wʋʋ,

dɩɩ n zʋʋmö a‑a 'möö,

ti 'wʋ dlʋ.

Sɛ'ɛ n gbä a‑a nɩɩ:

6 ‑Ɔ ‑gänɩɛ Zezwii a ‑nʋa 'yukuu,

nɩkpɛ a ‑mɔ 'nɩɛ ‑maa yɔwʋ ‑kä,

'mö ɔ kää ɔ 'kä glɩnɩ.

Ɔ nɩ kä 'nglɔ ‑bhlʋ ‑kpöö.

'Ɔ yuëa nɩ glɩnɩ Lagɔgänɩwa,

wa nɩ tɩ wa 'dɩzoku ‑sɛ,

wa nɩ tɩ 'klʋkpamösɛwa glɩnɩ.

7 Sɛ'ɛ n gbää nɩɩ,

‑ɔ ‑gänɩɛ Zezwii a ‑nʋa 'yukuu,

Lagɔ 'a ‑lii 'wuë a 'ylizʋnɩnyɔ ɔ glɩnɩɛ zaa,

nɩkpɛ a ‑mɔ 'nɩɛ ‑maa yɔwʋ ‑kä 'mö ɔ nɩ glɩnɩ.

Ɔ nɩ tɩ bhabhanyɔ glɩnɩ.

Ɔ nɩ tɩ 'klɛkänyɔ glɩnɩ.

Ɔ nɩ tɩ nʋnɩmänyɔ glɩnɩ.

Ɔ nɩ tɩ ‑glakänyɔ glɩnɩ.

Ɔ nɩ tɩ lɩ ‑bi 'mö linɩ.

8 Ɔ nɩ päla sasɛ lowluwa.

Ɔ nɩ ‑wa 'saa nɛnɩɛ.

Ɔ nɩ 'nɛɛ,

ɔ nɩ tɩ ‑bi ‑kä,

'ɔ nɛmönɛmösaa nɩ zlɔnɩ 'mö,

ɔ nɩ glɩnɩ nɩkpɛ a ‑mɔɔ ‑yi dlɩ'wʋpɩɛnɩsɛ.

9 Lagɔ 'a wɛlɩɩ ‑yɩ ‑wʋä dlɩ'wʋkäsɛɛ 'mö ɔ kää ɔ 'kä ɔnyɩ 'wʋ glɛ.

‑Lɛ a dɔ'wʋ,

ɔ bhɛnɩ ɔ 'kä ‑yɩ ‑wʋä gbëaa 'cɩa.

‑Wa sɛnɩɛ Lagɔ 'a wɛlɩɩ widɩ 'möö,

ɔ bhɛnɩ'ɛ ɔ 'kä 'wa yio 'pɩwʋ 'pä.

10 Nɩkpa a ‑muë 'nɩɛ 'yɩbhä wa nɩ 'kämanuë ‑gömöö,

wa'a ‑mä muënɩ.

Wa gla'mö a ‑nʋä a ‑bɛ,

Zwiiföwa wa glɩnɩɛ 'n wa yiɛ Zezwii a ‑nʋä 'zʋ.

Nyɩasɛwɛlɩ 'mö wa bhïlaa 'n wa dulaa nɩkpa.

11 'Wa wɛlɩzoku wa biaa,

mɩɩ kää 'nglɩ 'n 'ligbï ‑mimii 'mö a ‑nʋa sɛɛ ‑globhësɛ Lagɔ 'a ‑tiamö a wɛlɩɩ kɛ'mö.

‑Mä 'wa 'cɩacʋʋ 'mö,

moni wa tɛlɩɛ 'zokwësɛ sɛ.

‑Lɛ a nɩkpa 'la,

'nyʋä 'dɩ wa nɩ 'pä ‑lɛ 'wa nuu.

12 Klɛɛtɩ a nɩkpaa,

wa gla'mö a 'nɛɛnɩnyɔ ‑bhlʋ,

ɔ'bhë mɔɔ nʋä gbëaa wa dɛ nɩɩ:

«Klɛɛtɩ a ‑nʋa,

yiowa wa glɩnɩɛ 'kwädlɩ,

glanɩma a sɛ 'mlɩ wa ‑nyuä,

swɩ 'wʋ wa pönɩɛ,

lililibho a 'yize wa kää.»

13 Wɛlɩ 'la ‑tiawɛlɩɛ.

‑Sɩbhä a za n gbää nɩɩ,

pianuë sasɛ 'yli yɔwʋ ‑n 'kʋä Lagɔ 'a wɛlɩɩ a dɔ'wʋ 'mö zlɔmanɩ.

14 'Nyʋä 'dɩ nɩɩ,

Zwiiföwa ‑mumuë ‑wa panɩɛ ‑tiawɛlɩɩ Lagɔ nyɩanyɩɛ ‑gömöö,

'wa nyɩasɛwɛlɩɩ wa sɛɛ 'wlumöö,

'wa gböö wa pää nɩkpaa,

wa nɩ ‑sɩɩ kɛ'mö.

15 Nɩkpɛ a dlɩpäsɛ ‑kä nɛnɩɩ,

ɔ dɔ'wʋ ‑lii 'wuë nɛnɩ yɩ nɛnɩɛ.

‑Maa ‑wa nʋä ‑lizoku,

‑waaa 'yɩbhä wa 'kä Lagɔ dlɩ 'tɛɛnɩ,

wa dɔ'wʋ,

‑lii 'wuë ‑nyima yɩ ‑nyimaa.

Ɛ'ɛ ‑bhö nyɩasɛ,

‑maa 'wa dlɩpäsaa ‑nyima 'n 'wa 'mlɩwʋnuëyii 'nɩ köbhʋäa'a gbʋ.

16 Nɩkpa 'la,

wa lɛ wa ‑yi Lagɔ,

‑maa ‑mä 'wa nʋnʋlii 'mö,

wa 'nɔɔ tɛkäsɛ ‑yi 'lɩlɩlɩ.

Wa'aa 'klʋyɩlɩsɛ ‑wʋ,

wa'aa 'klʋkpa ‑kä,

wa'a ‑lu a ‑lu ‑bhlʋ a'bhë a nʋnwɛ bhɛnɩ.